Read Ntcham Marc 15 Bible Online

Marc 15 - Ntcham bible

Marc 15

¹Kutaafaau pɔ̀lpɔlee, bisaraaŋakpilib péé ki kpáfì, bi nì bitindaŋkpilib nì bimaradakaliibi, bíǹ bibɔsoonliibi kitilee kɔkɔ, kí sòoǹ Yeesu bɔti, ní ki bóob́-u ŋŋmii ki cáa ŋúbiǹ gɔmina Piilati.

²Ní Piilati bālifì-u yii: «Sii di sá Juuda yab bɔtiuaaa?» Ní Yeesu kíí-u yii: «Míǹ ní a lī nee[89].»

³Bisaraaŋakpilibee dɔ́miń ki sòon̄ tibɔti tikpil ki túǹ u-pu.

⁴Míǹ puee, ní Piilati fātìi gíti bālifì-u yii: «A ŋmí níii? Aa gbìl̀ tin kɔkɔ bi sòoǹ ki tūntí a-pueeee?»

⁵Yeesu kaa ti pée gātì tiba, ní Piilati bākatì sèeee.

⁶Dilákatil jiŋaaliu kamaayee, gɔmina Piilati nìn gīintí usarkadaan ubɔ, un samaa yaa mēē-uee ní kí líí.

⁷Kijapaai kiba nìn bí, bi yíì-kì Baaraabaasi. Bi nìn cúú u nì u-jutiibi biba ki tɔ́ sarkan, kun puee bi nìn kūū unil daliŋkin kunipaau kubɔ nìn yíì yii baa là kí pīlifiǹ gɔminee.

⁸Ní kunipaau jɔ́m̀ ki bālifī Piilati ń gíiǹ un bi lèe kí líí, kii u nín kpààa ŋáań-bi puee.

⁹Ní u bālifì-bi yii: «Ni là ḿ gíiǹ Juuda yab bɔtiu kí líí-naaa?»

¹⁰Di sá yii u nìn béè yii kináŋ kin kin bisaraaŋakpilib nìn cáá Yeesu puee di yāntì bi cáań-u ki ŋúbíǹ-u.

¹¹Niinee, bisaraaŋakpilibee téé kunipaau ń lì yii bi là gɔmina ń gíiǹ Baaraabaasi ní kí líí.

¹²Ní Piilati fātìi bālifì-bi yii: «Kin, m làá ŋá un ní ni yíì Juuda yab bɔtiuee mana?»

¹³Ní bi fātìi kíí-u ki téeń mpɔn yii: «Bí kpáá-u ndɔpuntikaa pu!»

¹⁴Ní gɔmina Piilati fātìi bālifì-bi yii: «Tikpitil tin u ŋée di sá tilati?» Niinee ní bi mɔ̄tìi kúuǹ mpɔn yii: «Bí kpáá-u ndɔpuntikaa pu!»

¹⁵Piilati là kí sɔ̀ŋkì bi-pɔbiliŋee, ní ki gíiǹ Baaraabaasi ki líì-bi, ní ki yāntì bi gbáń Yeesu anaalab, ní ki dū-u ki tīī-bi bí cáá-u kí kpáá ndɔpuntikaa pu.

¹⁶Niinee, soojab cáá Yeesu ki kɔ́ǹ gɔmina cindi poon ní ki yíiń disoojakitil din kíǹee kɔkɔ.

¹⁷Ní bi dū dibɔkutimandi cínciŋ ki pēeǹ Yeesu, ní ki dū ikuŋkum ki lùn̄ kibeefuulii ki cíkiǹ-u.

¹⁸Bi nìn kíĺ ki jáaḿ-u yii: «Ti jáaḿ-si Juuda yab bɔtiu!»

¹⁹Bi cáá ŋkpandɔ ki fátí u-yil ki tíiĺ timɔtan ki làbitī-u, ní ki dòoń ki gbàantí u-nimbiin.

²⁰Bi bēel̀-u míǹ ki dóòyee, ní ki cúú dibɔkutimandee ki pēetì-u ní ki gíiǹ úǹ u-ba wampeeŋkaati ki pēeǹ-u, ki nyántì-u kí cáá tin kpáá ndɔpuntikaa pu.

²¹Bi cée, ki ká usanjitil ubɔ nyánní kusaau, bi yíì-u Siimɔn, u sá Siireen tiŋki, Aleekisandir nì Rufusi baa dee[90]. Bi nìn páb́-u yii ú fōō Yeesu dɔpuntikaaŋu kí bùkun̄,

²²ní ki cáá Yeesu ki cūnnì laakin bi yíì Gɔlgɔtee (an taapu sá yii Kuyikpabiku laŋki).

²³Bi tīī-u ndamam min ni nnyɔkɔ ŋun bi yíì miiree ŋmàl̄ee ú nyɔ̀, ama u yíì, kaa nyùn̄.

²⁴Ní bi dū-u ki kpáá ndɔpuntikaa pu, ní ki yākatì u-wampeeŋkaati, ki tɔ́ kasi kí kpèè báà ŋma nín làá jī kuŋyee[91].

²⁵An nìn sá ntaafaawìiń tikúti tiwa ní bi kpáá-u ndɔpuntikaa pu ki dūu cóoǹ.

²⁶Bi nìn ŋmàn̄ tiŋmaŋmabiti ki nákáǹ u-yilpu kí dàkà kun pu ní bi kūū-uee, yii: «Juuda yab bɔtiu sèé.»

²⁷Bi nìn kpáá digaŋgandambi bili mun idɔpuntikaa pu ki dūu cóoǹ ki ŋàl̄-u, ubɔ u-ŋaŋgiil pú, un kíǹee u-ŋaŋgan pú. [

²⁸An ŋá kii an nín nìn ŋmàn̄ puee dee yii: «Bi dū-u ki ŋàl̄ binikpitib[92].»]

²⁹Bisanjitiliibi nìn bèel̄-u ní ki gàatī diyil ki lì yii: «Iiin, sii un lī yii a làá gbá kí wīī kunimbɔtidii kí fàtīí mā-ku iwiin ita dalee[93],

³⁰fīī a-ba kí kpákatiń ndɔpuntikaa pu!»

³¹Bisaraaŋakpilib nì bimaradakaliibi mun nìn bí ki bèel̄-u ki lì tɔb cee yii: «U fīī bin kíǹee ní kaa ŋūǹ kí fīī u-ba!

³²Isirayeel yab bɔtiu Meesiya ń kpákatiń kɔŋkɔnnee, tí kpèè kí nín fōō-u kí kíí!» Bin bi nìn kpáá idɔpuntikaa pu ki cóoǹ ki ŋàl̄-uee mun nìn bí ki sìí-u.

³³Kuwiŋkuluu gbáńee dibɔmbɔndi jéetì kitiŋ kɔkɔ pu ki tin sāā tikúti tita.

³⁴Tikúti titee, Yeesu fáá mbiil mpɔn, yii: «Eelooi, Eelooi, lama sabakitanii?» - An taapu sá yii «M-Nimbɔtiu, m-Nimbɔtiu, ba ŋá ní a dū-mi ki fá[94]?» -

³⁵Bin bí niinee biba nín gbìl̄ u fáá mbiil mimmee, ní bi bí yii: «Pīlifìmaan! U yíì Eelii dee!»

³⁶Ní bi-kansikin ubɔ sáǹ ki yōoǹ kuca ki múĺ ndaam min gàm̀ee ni, ní ki dūu túuń ŋkpandɔ pu ki tīī Yeesu ń nyɔ̀[95], ní ki lī yii: «Tí yàntīmaan kí kpèè Eelii yaa làá dāan̄ kí kpákatiń-u!»

³⁷Yeesu gíti fáá mbiil mpɔnee, ní ki sīntì.

³⁸Sata un nìn pītì kunimbɔtidii poon ki gāntì laakin bi yíì circir páaa laŋkee nì laan kíǹee cúu cátì abuku ali ki kíliń yilpu ki dāa kátì taapu.

³⁹Room yab soojakpiliu un nìn sí ki bíitìń Yeesuee wál̀ u nín sīntì puee, ní ki lī yii: «Tiŋman kijapaai nee lafun sá Unimbɔti Jipɔɔn ní.»

⁴⁰Binimpoobi biba mun nìn sí kudandaŋu ki kpèé. Maarii un nyánní Magidalaa tiŋkinee, nì Saloomee nì Maarii un sá Yakubuwaai nì Joosee nee, mun nìn bí bi-kansikin.

⁴¹Bíǹ di nìn táá Yeesu ki tútúǹ-u ŋyunti ŋun u nìn bí Galiileeyee. Binimpoobi biba mun tikpil nìn céeǹní-u ki jɔ́m̀ Jeerusaleem.

⁴²Bibɔsoonliibi kitil kansikin ukpil ubɔ nìn bí, binib nìn tɔ́-u tiŋan pu, bi yíì-u Jooseefi u sá Arimatee[96] tiŋkin, u mun nìn bɔ́ntì u-ba ki cí Unimbɔti Beel. Ŋwìiń nín tóob́ kí jēetí ŋwiŋŋuŋfikaa ń kíĺee, ní u ká dipɔbil ki cūtì Gɔmina Piilati cee ki mēē-u nsan kí yòon̄ Yeesu wunti.

⁴³

⁴⁴Gɔmina Piilati nín gbìl̄ yii Yeesu pūtì kpáàa kpíìyee, ní u bākatì, ní ki yíiń usoojakpil ki bālifì-u yii Yeesu nín kpíìyee an yúntàaa.

⁴⁵Usoojakpilee nín tùkū-u yii Yeesu lafun kpíì an yúntèe, ní Piilati pú Jooseefi kinyɔkɔ yii ú cùú yòon̄ Yeesu wunti.

⁴⁶Ní Jooseefi cūtì ki dá ŋŋaapiin ki dɔ́miń ki kpáatì Yeesu wunti, ki dūu tākaǹ ŋŋaapiinee ni, ní ki cáá-u ki bíl̀ dikaakul din bi nìn lùkū ditaŋkpalinee. U dū-u ki ŋá dikaakulee ni ki dóòyee, ní ki bíntì ditaŋkpakpaandi diba ki dūu pīiǹ dikaakul nyɔkɔ.

⁴⁷Maarii un nyánní Magidalaa tiŋkinee nì Maarii Joosee na mun nìn sí ki kpèé laakin bi dū-u ki bíl̀ee.