Read Ntcham Marc 2 Bible Online

Marc 2 - Ntcham bible

Marc 2

¹Iwiin iba boonee, Yeesu nìn gítì Kapeernayum, ní binib gbìl̄ yii u bí mmɔŋki.

²Kunipaau nìn dɔ́miń ki kpáfì u-cee kudiin, ní mpaan kaa ti kpáàa bí kipunyɔkɔpu gba. U nìn bíi sòoǹ nì bi Unimbɔti bɔti ní.

³Ní bininjab binaa túǹní ufaliŋfaan ubɔ ki cáań u-cee.

⁴Nniwíin puee, baa nìn ŋúń kí pìl̄ Yeesu. Míǹ puee, bi nìn jɔ́m̀ ki cíl̀ kudii yilpu[5] ki bíitì laakin Yeesu bée, ní ki dū ufaliŋfaan nì nlún ki dīń dibùndee ni ki sīntìń ki bíl̀.

⁵Yeesu nín ká binib gbanti fōō ki kíí yii u ŋūǹ kí cáaǹ ubunlee, ní u tùkū ufaliŋfaanee yii: «M-biki, m dū a-kpitii ki pú-si.»

⁶Bimaradakaliibi biba nìn kā niin ki dàkafī bi-pɔbiliŋin yii:

⁷«Ba pu ní uninja nee lì míǹ? U ŋèeǹ nì Unimbɔti ní. Ubɔ kaa ŋūǹ kí dū ikpiti kí pɔ̄, asee Unimbɔti baba[6].»

⁸Niinee Yeesu béè bi-landɔkɔŋu ní ki bālifì-bi yii: «Ba pu ní ni dàkafī míǹ ni-pɔbiliŋin?

⁹Ba di kaa pɔ̄ɔ̄ dilil ní? Á tùkù ufaliŋfaan yii: <A ká a-kpitii pɔ̄tam> di kaa pɔ̄ɔ̄ dilil naaa, <Yòon̄ a-lúŋŋu kí nīn còom̄> di kaa pɔ̄ɔ̄ ní?

¹⁰Ama ní béé yii man Kinibiki cáá mpɔn kitiŋ pu kí dū unil kpitii kí pɔ̄-u.» Niinee ní u tùkū ufaliŋfaanee yii:

¹¹«Sii yīkìm̄ kí yòon̄ a-lúŋŋu kí nīn kùǹ a-dumpu!»

¹²Ní u nyīī ki yíkì dicilpu niin ki yōoǹ u-lúŋŋu ki nyáń báà ŋma nimbiin, ní an bākatiǹ-bi sèeee, ní bi bíi pàkà Unimbɔti ki lì yii: «Taa láá pée ká míǹ dalba dalba!»

¹³Yeesu nyáń ki gítì Galiilee mɔɔl caŋin. Kunipaau nìn dɔ́miń u-cee ní u dàkā-bi Unimbɔti bɔti.

¹⁴U jītée, ki ká Leefii Alfee jipɔɔn kā fɔtiku diikun. Ní u bí-u yii: «Dāan̄ kí nīn nóó-mi!» Ní Leefii lafun yíkì ki táá-u.

¹⁵Yeesu nìn kɔ́ Leefii dumpu ki bíi jīǹ tijinee, bifɔtiliibi tikpil nì binikpitib bin kɔkɔ kíǹee dɔ́miń ki kútì u nì u-boonnooliibi pu: di sá yii an nikpitibee nìn nóó-u ki wīikí.

¹⁶Bimaradakaliibi bin sá Fariisab kitilinee nín ká u nì binikpitib kpáfí ki jīǹee, ní bi bālifì u-boonnooliibi yii: «Ba pu ní u nì binib nee kpáfí ki jīǹ míǹ[7]?»

¹⁷Yeesu gbìl̄ bi nín lī puee, ní ki gāā-bi dilaŋkpandi yii: «Bin cáá laafiyee kaa nyàab̀ unyɔɔdaan, see bin būǹee di nyàab̀ unyɔɔdaan. Di sá yii maa dɔ́miń kí yíiń deedeedambi, m dɔ́miń kí yíiń binikpitib ní.»

¹⁸Yoowaneesi boonnooliibi nì Fariisab nìn bōob̀ kinyɔkɔ. Dalbee ní biba dɔ́miń ki bālifì Yeesu yii: «Ba pu ní Yoowaneesi boonnooliibi nì Fariisab boonnooliibi bōob̀ kinyɔkɔ ní sii yab kaa bōob̀ ní?»

¹⁹Ní Yeesu fātìi bālifì-bi yii: «Ubɔ yaa cáá unimpucaan ki yaa yíiń u-bɔɔbee, bi jīǹ ki nyù naaa, kinyɔkɔ ní bi bōob̀ ní? Unimpucaan cal yaa bí bi-kansikinee, baa kàal̀ ŋkùm.

²⁰Ama ŋwiin ŋubɔ bí ki dòoń bi làá dāa yòon̄ unimpucaan cal bi-kansikin, an yuntiŋu ní u-bɔɔbi dāa bōob̀ kinyɔkɔ.

²¹«Bi yaa dū ŋŋaapɔɔn ki lìb̄ satakpiki bundi, ki yaa fíntèe, ŋŋaapɔɔn kōontí ní kí kpáaǹ satakpiki kí cátí, ní dibùndee ń mɔ̀tīí wàan̄.

²²Míǹ mbaantiim ní baa tí dù ndapɔm kí fúuń tilɔkpikilin. Bi yaa dūu fúuń míǹ, tilɔkpikil pòol̄ ní ndaam ń fá, ní tilɔti mun ń bīil̀. Bi dù ndapɔm kí fúuń tilɔpɔn ni ní.»

²³Ŋwiŋŋuŋfikaa ŋubɔ dalee, Yeesu nì u-boonnooliibi bíi jītí bilee kpaaŋŋin ní u-boonnooliibi bíi gífí bilee fiŋyi ki ŋmèem̄ abil ki ŋmóò[8].

²⁴Fariisab ká mimmee, ní ki bí-u yii: «Ba pu ní a-boonnooliibi ŋáań min kòó ŋwiŋŋuŋfikaa dalee[9]?»

²⁵Ní u fātìi kíí-bi yii: «Naa láá pée kàan̄ kugbɔŋu poon ki ká tijin takaasiu nín nìn cúú ubɔti Daafiidi nì u-naacimbi bi ŋá pueeee? Ŋyunti ŋun Abiyataar nìn sá usaraaŋakpilee,

²⁶Daafiidi nìn kɔ́ kunimbɔtidiin ki ŋmɔ́ saraa kpɔnɔb ki kíǹ ki tīī u-yab. Abiyataar di nìn sá usaraaŋakpil ŋyunti gbanti. Ti-koobiliŋ poonee, usaraaŋal baba di cáá nsan kí ŋmɔ́ kpɔnɔb gbanti[10]. Ama Daafiidi nìn ŋmɔ́ ki kíǹ ki tīī u-naacimbi gba.»

²⁷Yeesu gíti lī-bi yii: «Unimbɔti náań ŋwiŋŋuŋfikaa binib pu ní, waa náań binib ŋwiŋŋuŋfikaa pu.

²⁸Man Kinibiki di sá ŋwiŋŋuŋfikaa daan.»