Read Ntcham Marc 3 Bible Online

Marc 3 - Ntcham bible

Marc 3

¹Yeesu nìn fātìi kɔ́ kukpafidiin. Uninja ubɔ nìn bí niin u-ŋal fáká.

²Fariisab nìn bíi cɔ́ŋkí Yeesu kí kpèè u yaa làá cáaǹ-u ŋwiŋŋuŋfikaa dal, bí ŋmā kí ká nnaakpal kí lì yii u yīntì.

³Ní Yeesu bí unil un ŋal fákée yii: «Yīkì kí sīĺ ti-kansikin báà ŋma nimbiin.»

⁴Ní u bālifì-bi yii: «Ti-marau pú nsan tí ŋá tiŋan ŋwiŋŋuŋfikaa dalaaa, tí ŋá tikpitil ní? An pú nsan yii tí fīī unil naaa, tí kpɔ̀-u ní?» Ní bi ŋmí.

⁵U nìn kpēē-bi dinimbil ki māntì, ki fōō bi-pu diŋuul, ama ní bi-pɔɔgbifiŋŋu mun nìn kɔ́ǹ-u kunimbaau. Ní u bí un ŋal fákée yii: «Tàntī a-ŋal!» Ní u tāntì-ŋu, ní u-ŋal ŋáŋkì.

⁶Niin niin ní Fariisab nyáń ki nyàab̄ ubɔti Eeroodi naacimbi bí kpāfì kí nyàab̀ nsan ŋun bi làá dī kí kpɔ̀ Yeesuee.

⁷Niinee ní Yeesu nì u-boonnooliibi nyáń ki cūtì dimɔɔl caŋin. Kunipaau nìn táá-u ki nyánní Galiilee nì Juudee,

⁸nì Jeerusaleem nì Idumee, nì Jɔɔdan buŋgbandi lapu pu, nì Tiir nì Siidɔn tiŋgbammun. Kunipaauee kɔkɔ nìn gbìl̄ tin kɔkɔ u ŋáańee ní ki dɔ́miń u-cee.

⁹Ní u bí u-boonnooliibi yii bí bɔ́ntí-u kiŋaliŋwaai kiba nnyim pu ú kɔ́ kunipaauee ń taa láa nyīī kí mátí-u.

¹⁰Di sá yii u nìn cáaǹ binib tikpil, an yāntì bibunliibi kɔkɔ kpákà kí gbēē-u.

¹¹Arasiniibi bin kā biwaatiibi puee yaa nìn ká-uee, bi nìn gbàantí u-nimbiin, ní bi kūuntí ki lì yii: «Sii di sá Unimbɔti Jipɔɔn!»

¹²U nìn kpàtī bi-pu ki lì-bi yii bí taa yàntī bí béé-u.

¹³Boonee Yeesu jɔ́m̀ kigbantaŋ pu ní ki yíiń bin u lèe ní bi dɔ́miń u-cee.

¹⁴Niinee ní u lútì saalaa nì bili bí nīn sá u-kpambaliŋ u nì bi ń nīn kíǹ ki bí, ú nīn tūǹ-bi bí nīn sòoǹ u-bɔti,

¹⁵kí nīn cáá mpɔn ki jì arasiniibi.

¹⁶Binib saalaa nì bili bin u lútèe yiŋŋi sèé: Siimɔn - un u nìn páaǹ diyindi yii Peetrooyee[11] -,

¹⁷nì Seebeedee jipɔmbi Yakubu nì Yoowaneesi - bin u pú diyindi yii Bɔwaneegeesee an taapu sá yii «Binib bin náań nì ataadunee[12]» -.

¹⁸Bin kíǹee di sá Andree nì Fiiliipi nì Baateeleemii nì Maatiiu nì Toomasi, nì Yakubu Alfee jipɔɔn, nì Tadee nì Siimɔn un nìn là kí já nì Room yabee,

¹⁹nì Juudasi Isikaariyɔti, un dāa dū Yeesu ki tīī u-nannanliibee.

²⁰Míǹ boonee, ní bi nín gítí mmɔŋki, ní kunipaau tí kóoǹní ki múkuǹ. An yāntì Yeesu nì u-boonnooliibi kaa ti kpáàa cáá mpaan kí jī tijin.

²¹Yeesu yab gbìl̄ tin kɔkɔ jītée, ní bi yíkìi kíliń nsan kí dāá cúú-u, kun puee biba nìn lì yii: «U-yil lábitì ní.»

²²Bimaradakaliibi biba nìn nyánní Jeerusaleem ki lì yii: «Arasiniibi kpiliu Beelseebuul[13] di kā u-pu. Úǹ pɔŋŋu ní u cáa jì arasiniibi.»

²³Ní Yeesu yíiń-bi u-cee, ki gāā-bi dilaŋkpandi ki lī yii: «Mana ní Sitaan ŋūǹ kí jà Sitaan?

²⁴Dibeel din nib yaa cúú di-ba ki yākatì mili ki jáaǹ tɔbee kaa ŋūǹ kí nīn bí kí cù ndan.

²⁵Míǹ mun ní kudicaŋu kun di yaa cúú ku-ba ki yākatì mili ki jáaǹ tɔbee kaa tí ŋūǹ kí nīn bí ki cá.

²⁶An yaa sá yii Sitaan yíkìi jáaǹ u-ba ki cúú u-ba ki yākatèe, mimmee, waa ŋūǹ kí nīn bí ki cá, u-pɔŋŋu kúntí ní.

²⁷«Bi yaa kaa bóob́ upɔɔl ŋŋmii ki wāatì, ŋma di ŋūǹ kí kɔ́ u-dumpu kí kóoǹ u-wanti? See bí bóob́-u kí wàatī ní kí nín ŋmā kí kɔ́ kí kóoǹ u-wanti.

²⁸«M sòoǹ nì ni ibaamɔn ní, nnibiyaamu ŋūǹ kí ká bi-kpitii kɔkɔ pɔ̄tam ki kpáaǹ tibɔfan tin bi sòon̄ Unimbɔtee.

²⁹Ama un yaa sòon̄ Unimbɔti Fam tibɔfanee, úǹ kpá kí ká u-kpitii pɔ̄tam jaanjaan, di sá yii u kɔ́ diyìntil din kaa cáá dikúntilee ni!»

³⁰Yeesu nìn lī míǹ, kun puee bi nìn lì yii: «U cáá arasinii u-ni!»

³¹Yeesu na nì u-nabiyaamu bāań ki sí mmɔŋki ki tú bí yíiń-u.

³²Binib tikpil nìn kā ki gɔ́ń-u ní bi tùkū-u yii: «A-na nì a-nabiyaamu sí mmɔŋki ki nyàab̀-si.»

³³Ní u kíí-bi yii: «Ŋma di sá m-na nì m-nabiyaamu?»

³⁴U kpēē ki māntì ki tú bin nìn kā ki gɔ́ń-uee, ní ki lī yii: «Kpèèmaan, m-na nì m-nabiyaamu sèé nee!

³⁵Un kamaa yaa ŋáań Unimbɔti nín là puee, udaan gbanti di sá m-naal, m-niisal nì m-na.»