Read Ntcham Marc 4 Bible Online

Marc 4 - Ntcham bible

Marc 4

¹Yeesu tí kíĺ ki bíi dàkà Unimbɔti bɔti Galiilee mɔɔl caŋin, ní kunipaau kóoǹní ki kpáfì u-cee. Bi-wíiŋŋu puee, ní u jɔ́m̀ ki kāl̀ buŋalimbun nnyim pu, ní kunipaauee kɔkɔ sí dimɔɔgbandi ki pìlīǹ-u.

²U nìn cáá tibɔŋmantikaal tikpil ki sòoǹ nì bi tibɔti ní ki dàkà-bi ki bí-bi yii:

³«Pīlifìmaan! Uwaŋyaanli ubɔ nyáń kí yàaǹ u-wamboolii.

⁴U bíi yàantée ní iba lítì nsan pu, ní ilunlukuti dɔ́miń ki dūu jíń.

⁵Iba mun lítì kuteeu pu, laakin kitiŋ kaa nyóòyee ní ki pūtì kpáàa nyáń.

⁶Ŋwìiń píĺee ní i kpíì kun puee kitiŋ kaa nyóò inyaan ń kɔ́.

⁷Iba mun lítì ikuŋkumin ki nyáń, ní ikuŋkum wíiǹ ki múkuǹ i-pu, ní iaa ŋúń ki lòon̄.

⁸In kíǹee mun lítì laakin kitiŋ ŋān̄ee, ki nyáń ki wíiǹ ki cáá apoo, ní ki lòon̄ ifin. Iba cáá abil mmuŋku nì saalaa, iba mun imuŋku ita, in kíǹee mun dilaataal.»

⁹Ní u gíti kútì ki lī yii: «Sii un yaa cáá ditafalee ń gbìl̄!»

¹⁰Ŋyunti ŋun u kíǹ u-babee ní bin nìn cēentí-uee nì u-boonnooliibi saalaa nì bilee bālifì-u tibɔŋmantikaalee taapu.

¹¹Ní u kíí-bi yii: «Unimbɔti yāntì nimbi béè u-Beel bɔti tin nìn bí dibalinee taapu. An yaa kíǹ bifantantiibee, an sá tibɔti ní bí nīn cáa ŋmàntī-bi,

¹²án nín làá ŋá pu ní: <Bi-nimbiliŋ ń nīn kpítì bí taa nín̄ wāĺ, bí nīn pílifí mun tikpil kí taa nín̄ gbìl̀ee. An yaa yíì, bi yaa kpēē ki wál̀, ki yaa pílifì mun ki gbìl̄ee, bi féeń bi-saŋkpitii, Unimbɔti ń dū bi-kpitii kí pɔ̄-bi[14]!>»

¹³Míǹ boonee ní Yeesu gíti lī-bi yii: «Naa gbìl̀ tibɔŋmantikaal nee taapuɔɔ! Kin ni làá dāá ŋá mana kí gbìl̄ tin kíǹee taapu?

¹⁴An sá Unimbɔti nyɔɔbundi ní uwaŋyaanlee bí ki yàantí.

¹⁵Binib biba náań nì iwambool in lítì nsan puee ní. Binibee yaa gbìl̄ dinyɔɔbundee, Sitaan dòoń ki lèekī dicilpu tibɔti tin bi búĺ bi-pɔbiliŋinee.

¹⁶Míǹ mbaantiim ní binib biba náań nì kuteeu, laakin iwambool lítèe. Binibee yaa gbìl̄ dinyɔɔbundee, bi fòol̄-dì nì dipɔɔpindi.

¹⁷Nì min kɔkɔ bi fòol̄ mimmee, baa cáá inyaan kí sīĺ kí báań. Bi nín fōō dinyɔɔbundee puee, an yaa sá digìńdi kii disàandi di yaa jéetì bi-puee ní bí dū dimákal din bi cáá Unimbɔti puee kí fá malaa.

¹⁸Biba mun náań nì iwambool in lítì ikuŋkuminee ní. Bíǹ di sá bin gbìl̀ dinyɔɔbundee,

¹⁹ní duulinya landɔkɔi páb́-bi, tigaajati ŋmàtíǹ-bi, ní nnimbitaataam mun cáá-bi. An wantee kɔkɔ mūkuntí ki bìintí dinyɔɔbundee pu, ní dàa ŋūǹ kí lòoǹ abil.

²⁰Biba mun tí náań nì laakin kitiŋ ŋān̄ iwamboolee lítèe ní. Bíǹ di sá bin gbìl̄ dinyɔɔbundee ki fōō-dì, ní ki lòoǹ abil. Ŋfin ŋubɔ pu lòon̄ mmuŋku nì saalaa, ŋubɔ imuŋku ita, ŋubɔ mun dilaataal.»

²¹Ní u gíti bí-bi yii: «Baa tùutī fitila kí dūú tàkan̄ kulɔŋŋun, kaa tí dù-u kí síiń kilambaŋ taapu. Bi dù fitila kí tɔ́kɔń kifaŋkɔlii pu ní[15].

²²Míǹ ní tin kɔkɔ pu binib bìintée làá dāá bìitī. Tiba kaa bí dibalin kaa làá nyā mpaampiin pu.

²³Sii un cáá ditafalee ń gbìl̄!»

²⁴Ní u tí bí-bi yii: «Ní nīn pílifí tibɔti nee tiŋan. Ni nín ŋmāntì pu ki tīīyee, Unimbɔti dāa ŋmàntī míǹ ní kí tīī-ni, kí gbéeǹ-ni gba án yàaǹ.

²⁵Di sá yii Unimbɔti dāa kútí un cááyee ní kí fōō un kaa cááyee cee fiii un u bàà cááyee.»

²⁶U gíti lī yii: «Unimbɔti Beel náań nì kii unil nín yàantí iwambool kitiŋ puee ní.

²⁷U yaa gèeǹeeee, u yaa wāĺeeee, kunyeeueeee, ŋwiimpueeee, iwamboolee nyēē ki wīintí, waa kpāantí kí béé an nín dì pu ní kí dāá ŋá mimmee.

²⁸Kitiŋ ki-ba càntī iwambool ń nyā kí cáá apoo kí màtī, ní kí lòoǹ abil ifinni.

²⁹Abil yaa bīń ki dóòyee, mimmee, kudiceeu bāań dee ní bí yòon̄ kijiki kí kɔ́ kí cā[16].»

³⁰Yeesu gíti lī yii: «Ti làá dū Unimbɔti Beel kí nántíǹ ba? Àá tibɔŋmantikaal tilati ní ti làá dūú ŋmàntī kí dàkà Dibeelee nín bí puee?

³¹Dì náań nì kii tikuŋfaal subiki kin bi yíì muutaadee bil ní. Bi yaa búĺ-dèe díǹ di sá kiwaai kitiŋ pu subiliŋ kɔkɔ kansikin.

³²Ama bi nín búĺ-dèe ní dí nyā kí wíiǹ kí tɔ̄ apan kí kpántí busukpaambu kí jītíǹ tikuŋfaal tin kɔ kíǹee subiyaamu, áli nnɔmbiyaamu gba ŋūǹ kí dāá páań mu-diiŋŋi kí báĺ busubuee faatin.»

³³Tibɔŋmantikaal nee jutiibi tikpil ní Yeesu nìn cáa sòoǹ nì bi u-bɔti, min ní bi nìn ŋūǹ kí gbìl̄ taapuee.

³⁴Waa nìn sòoǹ nì bi fám an yaa kaa sá nì tibɔŋmantikaal. Boonee, u nì u-boonnooliibi yaa kíǹ bi-ŋmaniŋmee ní u cántí tibɔŋmantikaalee taapu ki tùkù-bi.

³⁵Ŋwimbaanti gbanti jookuee, Yeesu bí u-boonnooliibi yii: «Tí dùtīmaan lapu buŋgbandi!»

³⁶U-boonnooliibi yāntì kunipaau yàl̄ee, ní bi kɔ́ buŋalimbu bun ni u nìn kēe ki kpáaǹ-u ki búntì. Iŋaliŋfi iba mun nìn táá-u.

³⁷Bi cée ní kubuŋkpaaŋŋu kubɔ kíĺ ki bíi jītí ki yòontí nnyim ki tòó buŋalimbun, ki yāntì buŋalimbuee bíi gbéè nnyim kpalaa.

³⁸Ama Yeesu úǹ nìn dɔ̄ buŋalimbu boon pú ki kúĺ diyikuŋkul ki gèeǹ, ní u-boonnooliibi fīntì-u, ní ki bí-u yii: «Ukpil, ti nín làá kpúee, an kaa ká-saaa?»

³⁹U fīntèe, ní ki kpātì kubuŋu pu ní ki tùkū dimɔɔl yii: «Ŋmīĺ kí dòon̄ soooo!» Niinee ní kubuŋu kpáàa gbēeǹ, ní an ŋmíl̀ fɔ́ŋfɔŋ díkí diki.

⁴⁰Míǹ boonee ní Yeesu bālifì u-boonnooliibi yii: «Ba ŋá ní ni fāŋkì mimmee? Ba pu ní naa máká m-pu?»

⁴¹Tifaandi nìn baasii kɔ́-bi tikpil, ní bi bàlifī tɔb yii: «Kijapaai nee nín baasii sá ŋma dee, ní ki sòoǹ kubuŋu nì dimɔɔl gbìliǹ-u míǹ nan dee[17]?»