Read Ntcham Marc 5 Bible Online

Marc 5 - Ntcham bible

Marc 5

¹Bi nìn dūtì lapu mɔɔgbandi Geeraseen yab tiŋkin[18].

²Yeesu kpákatì buŋalimbunee, kpalaayee, kijapaai kiba kin pu arasinii kēe nyánní kuceeun ki túŋkiń-u.

³U nìn kóò akaakulin ní. Báà ubɔ kaa nìn ŋūǹ kí bóob́-u, báà bi yaa dū ikusaka gba.

⁴Di sá bi nìn bāā-u abaa ki gbìǹ-u ikusaka mun, ní ú tìfī ikusakee ní kí wìil̀ abaa mun. Ubɔ kaa nìn gíti ŋūǹ kí pèefì-u.

⁵U nìn bí ní ki yìiǹ ŋwiimpu nì kunyeeu kɔkɔ akaakulin nì ajoon pu ki kūuntí ní ki cáá ataŋkpee ki gífí u-ba.

⁶U wál̀ Yeesu ndanee, ní ki sáǹní ki dɔ́miń ki tātìi gbāaǹ u-nimbiin,

⁷ní ki fáá mbiil mpɔn yii: «Yeesu Unimbɔti un bí yilpuee Jipɔɔn, man nì si yii ba ní? M dū Unimbɔti ki gbāam̀-si, taa sàaǹ-mi!»

⁸U nìn lī míǹ kun puee Yeesu nìn lī-u yii: «Arasinii, nyā uninja nee ni!»

⁹Ní Yeesu bālifì-u yii: «Bi yíì-si yii ba?» Ní uwaatee kíí-u yii: «M-yindi di sá yii: <Kusoojapaau,> kun puee ti wīikí tikpil.»

¹⁰Ní u gbāam̀ Yeesu tikpil ki lī yii: «Taa jà-ti kitiŋ nee pu!»

¹¹Dijool diba nìn bí niin, di-caŋinee digbeetikitikpaandi diba nìn sí ki jīǹ.

¹²Arasiniibee gbāam̀-u yii: «Càntī tí cùú kɔ́ igbeeti nee ni.»

¹³Ní u pú-bi mpaan, ní bi nyáń uwaatee ni ki kɔ́ igbeetin, ní digbeetikitilee sáǹ ki wúntì nsitimin ki jéetì dimɔɔlin ki múĺ ki kpíì. Igbeetee nìn bàn̄ kutukub bili nyɔkɔm.

¹⁴Ní bin nìn kpàá igbeetee sáǹ ki cūtì kitiŋin nì ikaan ki máafì an bɔti. Binib nyánní kí dāá kpèè tin di ŋée,

¹⁵ki bāań Yeesu ceeyee ki ká uwaati un pu kurasiniipaau nìn kēe kā ki pēē tiwan ki dàkafī nnimɔntiyaamin. Bi ká-uee, ní tifaandi kɔ́-bi.

¹⁶Bin nìn ká tin jítèe máafì bin kíǹee an nín ŋá pu ní uwaatee pɔ́ɔkì ní igbeeti kpíìyee.

¹⁷Ŋyunti gbantee ní bi kíĺ ki bíi gbàam̄ Yeesu yii ú yīkì bi-tiŋki pu.

¹⁸Yeesu bíi kóò buŋalimbunee, ní uninja un nìn wáatèe gbāam̀-u yii ú yàntī ú táá-u kí nīn kíǹ ki bí u-cee.

¹⁹Ama ní Yeesu kaa pú-u nsan, ní ki bí-u yii: «Nín̄ kùǹ a-mɔŋkiŋu a-yab cee kí māafì-bi min ní ti-Dindaan súń a-saayee nì tin kɔkɔ u ŋá ki tīī-see.»

²⁰Ní kijapaayee búntì ki kíĺ ki máafí ntimu saalaa jaaŋŋi kɔkɔn tin kɔkɔ Yeesu ŋá ki tīī-uee, ní báà ŋma bākatì sèeee.

²¹Yeesu kɔ́ buŋalimbun ki fātìi dūtì dimɔɔgbandi. U dáá bí dimɔɔgbandee ní dinikitikpaandi dɔ́miń ki kpáfì u-cee.

²²Kukpafidii kpiliu ubɔ nìn dɔ́miń, bi yíì-u Jayirusi. U ká Yeesuee, ní ki gbāaǹ u-nimbiin

²³ki mēē-u nì igbaam poon ki bí yii: «M-sapɔmbiki būǹ ki làá kpú. Á jī kimɔtii kí pée dāan̄ kí dū a-ŋal kí páań ki-pu, kí cáaǹ-kì kí ŋmátí.»

²⁴Ní u nì Yeesu búntì, ní dinikitilee fāā ki bīiǹ u-boon bɔ̀mmm.

²⁵Unimpu ubɔ nìn ŋmàl̄ niin ki fùul̀ ŋkpin an kaa gúǹ áli abin saalaa nì ali.

²⁶U nìn jíń falaa tikpil ki nìn bíil̀ u-nimbiliŋ mun kɔkɔ binyɔɔdambi tikpil cee, kaa kpáàa ká dicáaǹdi, ní an mɔ̄tìi púntì-u.

²⁷Unimpuee nìn gbìl̄ bi sòon̄ Yeesu pu, ní u dɔ́miń kunipaaun ki dīń Yeesu boon pú ki gbēē u-bɔkutil.

²⁸Di sá u nìn lī u-pɔbilin yii: «M yaan pée ŋúń ki gbēē u-bɔkutil kpaŋkpam, m bàà kāntí dicáaǹdi.»

²⁹Niinee, fatiku un nyēē-uee kpáàa gúń, ní u gbìl̄ u-wuntin yii u pɔ́ɔkì.

³⁰Kpalaayee Yeesu gbìl̄ u-ban yii mpɔn ŋubɔ nyáń u-ni ní u fātì kunipaauee pu ki bí yii: «Ŋma di gbēē m-bɔkutil?»

³¹Ní u-boonnooliibi kíí-u yii: «Sii wāĺ kunipaau téekí-si yéè, ní a bàlifī yii: <Ŋma gbēē-maaa?>»

³²Yeesu kpēē ki māntì ki tú ki nyàab̀ kí béé un di ŋá mimmee.

³³Niinee, tifaandi cúú unimpuee, u-wunti kíĺ ki bíi jìkì, kun puee u nyí tin di jítì u-puee. Ní u dɔ́miń ki tātìi gbāaǹ Yeesu taaŋi taapu ní ki kàan̄-u tikɔkɔ nì ibaamɔn.

³⁴Niinee ní Yeesu bí-u yii: «M-bisal, a nín fōō ki kíí puee fīī-si. Nín̄ cá nì ŋgbansɔŋfi, a-weeŋyi ń yàntī-si.»

³⁵Waa láá ŋmíl̀, ní kukpafidii kpiliuee yab biba nyánní u-dumpu ki bāań ki bí yii: «A-bisal kpíì. Taa ti páb́ ukpil yii ú dāan̄.»

³⁶Yeesu gbìl̄ dinyɔɔbundi din bi lēe, ní ki tùkū kukpafidii kpiliuee yii: «Taa yàntī a-pɔbil ń bīil̀! Sii dee fōō man kí kíí.»

³⁷Waa yāntì báà ubɔ céeǹ-u ki kútì Peetroo nì Yakubu nì Yoowaneesi, Yakubu naal pu.

³⁸Bi nín bàn̄ kukpafidii kpiliuee dumpuee, Yeesu ká binib gà dituweel an tùm̀ dàiiyee,

³⁹ní u kɔ́ ki bí-bi yii: «Ba pu ní ni sūǹ ki ŋáań kuwoou míǹ? Kibikee kaa kpíì, ki gèeǹ ní.»

⁴⁰Ní bi bíi bèel̄-u, ní u jìn̄ bi-kɔkɔ ki nyántì, ní ki yōoǹ kibiki baa nì ki-na nì u-boonnooliibi bita bin nìn céeǹní-uee, ki kɔ́ǹ laakin kibikee dɔ̄ee,

⁴¹ní u cúú kibikee ŋal ki bí-kì yii: «Taliita, kumii.» An taapu di sá yii: «Kisapɔmbiki, yīkì, sii ní m lì!»

⁴²Kpalaayee ní kibikee nyīī yíkì ki bíi còom̄. Kì nìn cáá abin saalaa nì ali ní. Ní bin nìn bí niinee bākatì sèeee.

⁴³Ama ní Yeesu kpáafì-bi tiŋan bí taa yàntī báà ubɔ ń béé, ní ki bí-bi yii, «Tīīmaan-kì tijin.»