Read Ntcham Marc 6 Bible Online

Marc 6 - Ntcham bible

Marc 6

¹Yeesu nyáń niinee, ki nín kùǹ u-tiŋkin laakin u kāl̀ ki wíiǹee[19], ní u-boonnooliibi táá-u.

²Ŋwiŋŋuŋfikaa bāańee, ní u kíĺ ki bíi dàkà binib Unimbɔti bɔti kukpafidiin. Kunipaau kun nìn bí ki pílifíǹ-uee bākatì ki bíi lì yii: «U nín kánní la tin u sòoǹ nan dee? U nín kánní la iciin nee bulifi dee? An dī mana ní u ŋūǹ ki ŋáań maamaacib nee?

³Ti nyí-uaa! An sá Maarii jipɔɔn kapintaa[20]! U-naalib mun di sá Yakubu nì Joosee nì Juudi nì Siimɔn. U-niisalib mun di kóò ti-kansikin neeyaa!» Ní an yāntì baa ti ŋūǹ kí fōō-u kí kíí.

⁴Ní Yeesu bí-bi yii: «Laaba yab kaa kpèé Unimbɔti bɔnaatiliu fám, see u-tiŋkin yab nì u nì bin pēēyee nì u-cindin yab[21].»

⁵Waa nìn gíti ŋúń ki ŋá maamaaci tuuŋŋi niin, see bibunliibi ŋwaam pu ní u nìn dū u-ŋalii ki páaǹ ki cáaǹ-bi.

⁶Ní u bākatì bi nín kaa fōō-u ki kííyee. Ŋyunti gbantee, Yeesu nìn yìiǹ ntimbilimu nì ikpaanceeti ki dàkà binib Unimbɔti bɔti.

⁷Ní u kpáfì u-kpambaliŋ saalaa nì alee, ní ki tú-bi bili bili, ní ki tīī-bi mpɔn bí nīn jì arasiniibi,

⁸ní ki kpáafì-bi yii: «Ni yaa cée, ní taa nín̄ ŋúb́ tiba see ŋkpandɔ baba. Ní taa nín̄ ŋúb́ tijin kí taa yòon̄ atɔkɔl kí taa nín̄ fúuń animbil mun,

⁹kí taa pèen̄ abɔkuti ali ali, ama kí nīn táká anaataka.»

¹⁰U tùkū-bi yii: «Ni yaa kɔ́ kudii kun nee, nín̄ bímaan niin kí nīn cí daliŋkin ni làá yīkèe.

¹¹Ni yaa bàn̄ laakin binib yaa yíì, kaa là kí fōō-ni, kaa tí là kí pīlifiǹ-nee, nyāmaan niin kí gbāfì ni-taaŋi kpɔŋkpɔm[22], kí dàkà yii ni sòon̄ ki kpáafì-bi.»

¹²Ní bi búntì ki cūtìi bíi sòoǹ nì binib yii bí kpántí bi-bimbim.

¹³Bi nìn jì arasiniibi tikpil biwaatiibi pu, ní ki nìn bàtī ŋkpam ki jòotī bibunliibi tikpil pu ki cāantí-bi[23].

¹⁴Ubɔti Eeroodi nìn gbìl̄ bi sòoǹ Yeesu pu, kun puee u-yindi nìn gbītì ajan kɔkɔwoooo. Binib biba nìn sòoǹ Yeesu pu yii: «An sá Yoowaneesi un nìn fùul̀ binib Unimbɔti nyimee di fīkitì ditaŋkpiilin, an pu ní u ŋūǹ ki ŋáań maamaacib.»

¹⁵Biba lì yii: «An sá Eelii.» Ní bin kíǹee mun lì yii: «U sá Unimbɔti bɔnaatiliu kii bitiŋkpikib bɔnaatiliibi ubɔee ní.»

¹⁶Eeroodi, úǹ nín gbìl̄ee, ní u lī yii: «Yoowaneesi un man yāntì bi tīl̀ u-yilee, di fīkitì.»

¹⁷Di sá yii Eeroodi nìn tīī mara bí cúú Yoowaneesi kí bóob́-u kí cáá tɔ̄ sarka. U-maan Fiiliipi nimpuu Eeroodiyadi un u nìn cááyee pu ní u nìn ŋá míǹ.

¹⁸Di sá yii Yoowaneesi bí Eeroodi yii: «An kaa máaǹ á cáá a-maan nimpuu[24].»

¹⁹Eeroodiyadi nìn fōō Yoowaneesi pu kudɔ̀ŋu ki nyàab̀ kí kpɔ̀-u, ama waa nìn ŋūǹ.

²⁰Di sá yii Eeroodi, úǹ nìn fàŋkí Yoowaneesi ki nyí yii Yoowaneesi sá ibaamɔndaan ki sá Unimbɔti tɔntɔnliu. An puee Eeroodi nìn mɔ́tí u-pu. Yoowaneesi yaa nìn sòoǹee, an nìn páb̀ Eeroodi, ama u nìn néeń ki pílifíǹ-u.

²¹Dalbee, Eeroodiyadi ká nsan ŋun u làá dī kí kpɔ̀ Yoowaneesee. Di sá yii Eeroodi nìn bíi jīǹ u-maaliwiiŋŋu jiŋaaliu. U nìn yíiń u-kpilib nì bisoojakpilib nì Galiilee yidambi kɔkɔ.

²²Ŋyunti ŋun bi kpáfèe, Eeroodiyadi bisal kóoń bi-kansikin ki ŋɔ́ń ní u-ŋoolee fáatì ubɔti Eeroodi nì bin kɔkɔ u yíińee, ní u bí usapɔɔnee yii: «Mèè-mi tin kɔkɔ a lèe, m làá tīī-si!»

²³Ní u pūtì ki lī yii: «Tin kamaa a yaa bālifì-mee, m làá tīī-si, báà an yaa sá m-beel dijandi, m làá tīī-si!»

²⁴Niinee ní usapɔɔnee nyáń ki cūtì ki bālifì u-na yii: «M-na, ḿ mèè ba?» Ní u-na kíí-u yii: «Lì yii a là Yoowaneesi un fùul̀ binib Unimbɔti nyimee yil.»

²⁵Ní u fātìi tóotì ki gítì ubɔti cee ki bí-u yii: «M là yii á tùkutī Yoowaneesi un fùul̀ binib Unimbɔti nyimee yil kí tàkan̄-mi kpaatan kɔŋkɔnnee.»

²⁶Niinee, kunimbaau kɔ́ ubɔti. U mun gíti dáá pūtì u-nicambi bin u yíińee nimbiin, waa ti ŋūǹ kí yíí.

²⁷Ní u tú dicilpu niin u-soojau ubɔ ki tùkū-u yii ú cùú cáań Yoowaneesi yil. Ní soojee cūtì ki kɔ́ kusarkadiin ki lafun tūkutìń Yoowaneesi yil

²⁸ki tākaǹní kpaatan, ki cáań ki ŋúbíǹ usapɔɔnee, ní usapɔɔnee mun cáa tīī u-na.

²⁹Yoowaneesi boonnooliibi nín gbìl̄ an bɔtee, ní bi dɔ́miń ki yōoǹ-u ki cáa síb́.

³⁰Yeesu kpambaliŋ ŋin u nìn túee kpáfì u-cee ki máafì-u bi nín cūtì ki ŋá tiŋyee nì tin bi dàkēe.

³¹Ní Yeesu bí-bi yii: «Dāam̄maan tí kàkatī ŋkpaanceeti, laakin binib kpée ní ŋùŋfì fiii.» Kun puee binib nìn cáá ní lìbiti libiti. Biba kùǹ ní biba bàń, an yāntì Yeesu nì u-kpambaliŋ kaa nìn cáá mpaan kí jī tijin.

³²Ní bi kɔ́ buŋalimbun ki kākatì laakin binib kaa bée.

³³Binib tikpil ká bi nín cée ní ki béè-bi, ní ki sáǹ ki nyáń ntimun ki dū ataa ki péeǹ-bi ki bàn̄ laakin bi cée.

³⁴Yeesu kpákatì buŋalimbunee, ki ká kunipaau sí kii ipii in kaa cáá ukpaalee[25]. An nìn kɔ́-u falaa ní u kíĺ ki bíi dàkà-bi tibɔti tikpil.

³⁵Kujoou bíi jóotée, ní u-boonnooliibi sútìń ki pìl̄-u ki tùkū-u yii: «Binib kaa kóò laakin ti sí nee, kí wàatēe, kujoou mun bíi jóotí.

³⁶Yàntī binib nee ń cù ikaan nì ntimbilimu mun pìlīǹ dooyee kí dā tijin kí jī.»

³⁷Ní Yeesu kíí-bi yii: «Nimbi ni-ba, tīīmaan-bi tijin bí jī!» Ní bi fātìi bālifì-u yii: «Mimmee, ti dù animbil jitɔmbi alaataa ali[26] ní kí dā tijin kí tīī bí jī deeyaaa?»

³⁸Ní Yeesu mun fātìi bālifì-bi yii: «Kpɔnɔb biŋa ní ni cáá? Cùú kpèèmaan!» Bi cūtìi bālifì ki béèyee, ní ki bí-u yii: «Ti cáá kpɔnɔb biŋmoo nì ijɔm ili.»

³⁹Niinee ní u tùkū u-boonnooliibi bí tùkù binib ń kàl̄ akiti akiti kumɔsɔŋu pu.

⁴⁰Ní bi kāl̀ kitiŋ. Akiti aba cáá binib dilaataal, aba mun cáá imuŋku ili nì saalaa.

⁴¹Yeesu fōō kpɔnɔb biŋmoo nì ijɔm ilee ki wáaǹ ki kpēē kutaa pu ki jáam̀ Unimbɔti tijinee pu, ní ki gífì gífì kpɔnɔb ki tīī u-boonnooliibi bí yàkatī binib. U yākatì ijɔm ilee mun ki tīī bi-kɔkɔ,

⁴²ní bi-kɔkɔ jíń ki díkí.

⁴³Ní u-boonnooliibi tōō akpɔnɔkati nì ajɔŋgin ŋin kíǹee ki gbéeǹ tikabiti saalaa nì tili[27].

⁴⁴Bin nìn jíń tijin gbantee nìn nyáń bininjab kutukub biŋmoo ní.

⁴⁵Niinee ní Yeesu bí u-boonnooliibi yii bíǹ ń kɔ́ buŋalimbu kí lìntī malaa kí dùtī dimɔɔl Beetisayida watil pú, ŋyunti gbantee úǹ ń yàntī samaayee ń kpì.

⁴⁶U yāntì samaayee nín kùǹee ní u jɔ́m̀ dijool pu kí mèè.

⁴⁷Kunyeeu bíi móotée u-boonnooliibi bàn̄ dimɔɔl kansikin, Yeesu úǹ dáá bíń dimɔɔgbandi u-baba.

⁴⁸U nìn ká yii u-boonnooliibi bí ki ŋàal̀, an kaa cá, kun puee kubuŋu nìn túŋkiń-bi. Ki cá kutaawuntuŋuee ní u tɔ́kɔǹ nnyim pu ki còom̄ ki cá bi-cee ki làá jītí bi-pu.

⁴⁹Bi nín ká u còomìń nnyim pu ki dòońee, ní bi dākafì yii an sá ufaŋfanti, ní bi kíĺ ki bíi gbáà ibiil,

⁵⁰kun puee bi-kɔkɔ nìn wál̀-u ní bi-pɔbiliŋ bíil̀. Kpalaayee, Yeesu sòon̄ nì bi yii: «Cúúmaan ni-pɔbiliŋ, an sá man! Taa fàŋkìmaan!»

⁵¹Niinee ní u jɔ́m̀ bi-cee buŋalimbun, ní kubuŋu mun ŋmíl̀. Tifaandi nìn kɔ́-bi, ní bi kāl̀ ki bākatì.

⁵²Di sá yii baa nìn gbìl̄ Yeesu nín nìn dū kpɔnɔb fiii ki būtì ki kpíiǹ kunipaauee taapu, kun puee an nìn pɔ̄ɔ̄ ki tīī-bi bí gbìl̄ tibɔti taapu.

⁵³Bi dūtì dimɔɔl ki dóòyee, ki bàn̄ Geeneesareeti tiŋkin ki síl̀ dimɔɔgbandi.

⁵⁴Ŋyunti ŋun bi kpákatì buŋalimbunee, binib kpáàa béè Yeesu,

⁵⁵ní ki sáǹ ki cūtì ntimun ki máafì ní binib yòontiń bibunliibi ki tūntiń ilún pu ki cāabìń laakin Yeesu bée.

⁵⁶Míǹ ní báà laakin ní u yaa nìn bàn̄ee, ntiŋgbamuneeee, ntiŋkpaamuneeee, ikaaneeee, binib nìn cāabìń bibunliibi ki bīil̀ imɔŋkijaa ní ki gbàam̄-u yii ú pée yàntī bibunliibee ń dáb́ u-bɔkutijúti. Bin kɔkɔ yaa nìn gbēē-uee pɔ́ɔkí ní.