Read Ntcham Marc 7 Bible Online

Marc 7 - Ntcham bible

Marc 7

¹Fariisab nì bimaradakaliibi biba nìn nyánní Jeerusaleem ki dɔ́miń ki kpáfì Yeesu cee.

²Bi bí niinee, ní ki ká Yeesu boonnooliibi biba jīǹ, kaa fíntì bi-ŋalii kii bi-yaajakoobiliŋ nín sá puee.

³Di sá yii Fariisab nì Juuda yab bin kíǹee kɔkɔ yaa kaa fíntì bi-ŋalii tiŋan, kii bi-naanjab nín nìn ŋáań puee, baa jīǹ[28].

⁴Bi yaa tí nyánní kitiŋin ki bāańee, baa tí jīǹ asee bí fíntí bi-ba nì nnyim kí wàatī, ní kí nín jī. Bi cáá akoobil tikpil ki kútì ŋin bí nee pu: ŋiba sá bí fíntí kɔŋkɔmbi, kí fíntí aboon nì asambil.

⁵Tíǹ pu ní Fariisab nì bimaradakaliibee nìn bālifì Yeesu yii: «Ba pu ní a-boonnooliibi kaa ŋúb̀ ti-yaajakoobiliŋ, kaa fíntí ki jīǹ?»

⁶Ní Yeesu kíí-bi yii: «Mpoonnyoondambi, an pu ní Unimbɔti bɔnaatiliu Yeesaya ŋmàn̄ u-gbɔŋkun ki sòon̄ ni-pu yii Unimbɔti bí yii: <Binib nee nyɔ́ŋkí-mi nì bi-nyɔmmun fám ní. Ama bi-pɔbiliŋ dátiǹ-mi.

⁷Bi jáaḿ-mi fám ní, kun puee tin binib náańee ní bi dàkà, ní ki cáa yíì man marab.[29]>»

⁸Ní Yeesu nìkī ki lī-bi yii: «Ni féeń Unimbɔti marab ki fòol̄ nnibiyaamu koobiliŋ.»

⁹Ní u gíti kútì yii: «Ni féeń Unimbɔti marab tiŋan pu kí ŋmā kí ŋúb́ nimbi ni-ba koobiliŋ.

¹⁰Mooyiisi nìn lī u-marabin yii: <Á nīn tɔ́ a-baa nì a-na,> ní ki gíti lī yii: <Un yaa sòon̄ ki bíil̀ u-baa kii u-nee, see bí kpɔ̀-u[30].>

¹¹Ama nimbi lì yii, unil yaa cáá tiba ki bàà ŋūǹ kí tīī u-na kii u-baayee, u ŋūǹ kí lì yii: <An wanti sá Kɔɔban>, (an dàkà yii saraa ki tīī Unimbɔti).

¹²U yaa lī mimmee, naa ti yàntī ú ŋá tiba kí tīī u-baa kii u-na.

¹³Míǹ ní ni cáá nimbi ni-ba koobiliŋ ŋin ni-baabi dàkā-nee ki cáa kpìtī Unimbɔti bɔti. Tiwan tikpil bí ni ŋáań míǹ mbaantiim.»

¹⁴Míǹ boonee, Yeesu gíti yíiń kunipaau u-cee, ní ki tùkū-bi yii: «Ni-kɔkɔ ń pīlifìmaan kí gbìl̄ m nín làá lì puee taapu!

¹⁵Tiba kaa nyēeń dipaal pu kí kɔ́ unilin kí kɔ́ǹ-u tijɔkɔndi Unimbɔti nimbiin. An sá tin nyēeń unilinee di kɔ̄ntí-u tijɔkɔndi Unimbɔti nimbiin. [

¹⁶Un yaa cáá ditafalee ń gbìl̄ taapu[31]!»]

¹⁷Ŋyunti ŋun u yíkì kunipaau cee ki kɔ́ kudiinee, ní u-boonnooliibi bālifì-u dilaŋkpandi din u bàà gāāyee taapu.

¹⁸Ní u kíí-bi yii: «Ni mun kaa cáá iciin níii? Naa gbìl̀ yii tin kɔkɔ nyēeń dipaal pu ki kóò unilinee kaa ŋūǹ kí kɔ́ǹ-u tijɔkɔndi Unimbɔti nimbiinaaa?

¹⁹Di sá yii tijikaal kaa kóò unil pɔbilin, an kóò u-poon ní, ní ú cù ataa pu.» Yeesu lī míǹ ki dàkā yii tijikaal kɔkɔ ŋān̄ ki tīī unil ń jī[32].

²⁰U gíti lī yii: «Tin nyēeń unilinee di sá tin kɔ̄ntí-u tijɔkɔndi Unimbɔti nimbiinee.

²¹Di sá yii binib pɔbiliŋin ní ilandɔkɔkpiti kɔkɔ nyēeń: binaacimpɔmbi nì bisapɔmbi jɔkɔnti, bunaayubu, nnikpaakoon,

²²binimpoobi nì bininjab laakpaati, ikummunti, digaŋgam, diŋmatindi, bimaramɔntiibi fátam, nnimbidiki, tibɔfan, timɔn nì ŋyipɔn.

²³Tibɔkpitil gbanti kɔkɔwoooo nyēeń binib pɔbiliŋin ní ki kɔ̄ntí-bi tijɔkɔndi.»

²⁴Yeesu yíkì niinee, ki póotì Tiir nì Siidɔn jaaŋŋu pú. U bàn̄ ki kɔ́ kudii kubɔn, kaa bàà là yii báà ubɔ ń béé u-pu. Nì míǹ kɔkɔee, waa ŋúń ki bál̀.

²⁵Unimpu ubɔ nìn bí, ki cáá kisapɔmbiki arasinii kā ki-pu. U nín gbìl̄ bi sòon̄ Yeesu puee, waa ti kāl̀. U yíkìń ní malaa, ki dɔ́miń ki tātìi gbāaǹ u-taaŋi taapu.

²⁶Unimpu gbanti kaa nìn sá Ujuudanimpu, u sá Feenisii, Siirii tiŋkin ní. U mēē Yeesu ń jà arasiniiyee u-bisal pu.

²⁷Ní Yeesu kíí-u yii: «Yàntī mbiyaamu ń díkí kí wàatī. Kun puee an kaa máaǹ bí dū mbiyaamu jinti kí tīī mbɔbiyaamu!»

²⁸Ní unimpuee fātì ki kíí-u yii: «Tiŋman, an sá míǹ ní, m-Dindaan. Ama mbiyaamu yaa bíi jīǹ an gbátée, mbɔbiyaamu mun tòó igbasigbasi ní.»

²⁹Niinee, ní Yeesu bí-u yii: «A kíí tiŋan! Míǹ puee, nín̄ kùǹ. Arasiniiyee nyáń a-bisalin.»

³⁰Unimpuee fātìi gítìń u-dumpuee, arasiniiyee nyáń u-bisalin u pɔ́ɔkì ki dɔ̄ u-dooŋu pu.

³¹Yeesu yíkì Tiir tiŋkin ki fātìi dīń Siidɔn, ki jítìń ntimu saalaa pu ki nín dòoń Galiilee mɔɔl watil pú.

³²U bàn̄ niinee, bi cáań-u umɔɔmiin ubɔ ní ki mēē-u yii ú dū u-ŋalii kí páań u-pu.

³³Ní Yeesu cáá-u ki kākatì ŋkpaanceeti u nì u liitil, ki dū u-ŋambiyaamu ki bɔ́ umɔɔmiinee tafaliŋin, ní ki tíil̀ timɔtan ki dūu gbēē umɔɔmiinee limbil,

³⁴ki wáaǹ ki kpēē kutaa ki fáá diniindi, ní ki lī yii: «Eefata!» An taapu sá yii: «Cúú ŋátí!»

³⁵Niin niin ní umɔɔmiinee tafaliŋ cúu ŋátì, ní u-limbil mun bútì, ní u kíǹ ki sòoǹ tiŋan.

³⁶Ní Yeesu kpáafì-bi bí taa pée māafì báà ubɔ tin jítèe. Ama Yeesu yaa nìn mɔ́tì yii bí taa lèe, míǹ ní bíǹ làá nín mɔ̀tīí lì.

³⁷Bi nìn bākatì tikpil, ní ki lì yii: «Tin kɔkɔ u ŋáańee ŋān̄ ki lákatì, áli ki yàntī bitafakpaafub gbìl̀, bimɔɔmiimbi sòoǹ!»