Read Ntcham Marc 8 Bible Online

Marc 8 - Ntcham bible

Marc 8

¹Iwiin gbanti poonee, kunipaau kubɔ tí fātìi kpáfì u-cee, ní kaa nìn cáá tiba kí jī. An puee Yeesu yíiń u-boonnooliibi ki bí-bi yii

²«Nnibiim nee gbí-mi falaa, di sá yii iwiin ita sèé bi nín bí m-cee, kaa ti cáá tiba kí jēe.

³M yaa jìn̄-bi nì ŋkùm nee bí nīn kùǹ bi-dumpuyee, bi làá yɔ̀l̄ nsanni, kun puee bi-kansikin tikpil nyánní ndan.»

⁴Niinee ní u-boonnooliibi kíí-u yii: «La ní ti làá kánní tijin kuteeu nee ni kí kpíiǹ binib nee?»

⁵Ní Yeesu fātìi bālifì-bi yii: «Kpɔnɔb biŋa ní ni cáá?» Ní bi kíí-u yii: «Biluli.»

⁶U yāntì kunipaau kāl̀ taapu ki dóòyee, ní u yōoǹ kpɔnɔb bilulee ki jáam̀ Unimbɔti tijin gbanti pu, ní ki gífì gífì ki tīī u-boonnooliibi ń yàkatī binib. Ní bi dūu yākatì kunipaauee.

⁷U-boonnooliibi nìn cáá njɔmbiyaamu mubɔ mun. U jáam̀ Unimbɔti mu mun pu ki dóòyee ní ki tùkū-bi yii bí dū-mu kí yàkatī.

⁸Kunipaauee jíń ki díkí, ní bi kóoǹ ajɔŋgin nì akpɔnɔkati ŋin kíǹee ki gbéeǹ tikabiti tiluli.

⁹Bin nìn jíń an jikaatee ŋūǹ kí bà binib kutukub binaa. Bi jíń ki dóòyee, ní u yāntì bi nín kùǹ,

¹⁰ní u nì u-boonnooliibi kɔ́ buŋalimbun ki nín cá Dalmanuta watil.

¹¹Fariisab nìn jīnní Yeesu boon ki bāań ki bíi kpākantí-u kí píĺ-u tibɔti. Bi nìn bālifì-u yii ú ŋá maamaaci ubɔ un nyánní Unimbɔti ceeyee.

¹²Ní Yeesu fáá diniindi ní ki lī yii: «Ba pu ní waanee nib nee bàlifī kí ká maamaaci án nīn sá-bi kudaaŋŋu? Ibaamɔn ní m sòoǹ nì ni, ni kpá kí ká maamaaci báà ubɔ!»

¹³U lī míǹ ki dóòyee, ní ki fātìi tí kɔ́ buŋalimbun ki dūtì lapu pu mɔɔgbandi ki wāatì-bi.

¹⁴Yeesu boonnooliibi nìn súntì kaa kpáaǹ tijin, asee kpɔnɔbaanti di nìn tàkā bi-cee buŋalimbun.

¹⁵Ní Yeesu kpáafì-bi ki bí-bi yii: «Nín̄ nyím̀maan ni-ba nì Fariisab nì Eeroodi kpɔnɔnyɔkɔŋu!»

¹⁶U-boonnooliibi dākafì ki lī bi-ŋmaniŋma kansikin yii: «Ti nín kaa ŋúb́ tijinee pu ní u kalin sòoǹ mimmaaa?»

¹⁷Yeesu béè bi-landɔkɔyee ní ki bí-bi yii: «Ba pu ní ni sòoǹ ni nín kaa ŋúbiń kpɔnɔee pu? Nìn díǹ naa láá gbìl̀ tibɔti taapuɔɔɔ? Naa láá béè-maaa?

¹⁸Ni pɔbiliŋ tīlifì níii? Ni cáá animbil fám ní kaa wāĺaaa? Ni cáá atafal ki pílifí ní kaa gbìl̀aaa? Naa cáá nlandɔkɔ

¹⁹kí téetí ŋyunti ŋun m dū kpɔnɔb biŋmoo ki gífì gífì ki tīī binib kutukub biŋmoo bi ŋmɔ́ ki díkéeee? Tikabiti tiŋa ní ni tōō akati ki gbéeǹ ní?» Ní bi kíí-u yii: «Saalaa nì tili[33].»

²⁰«Kin, m nín gífì gífì kpɔnɔb biluli ki tīī binib kutukub binaayee, tikabiti tiŋa ní ni tí kóoǹ akati ki gbéeǹ ní?» Ní bi tí kíí-u yii: «Tiluli[34].»

²¹Ní u lī-bi yii: «Ní áli nìn díǹ, naa láá gbìl̄aaa?»

²²Bi bàn̄ Beetisayidee, binib biba cáań ujɔfu ubɔ Yeesu cee ki gbāam̀-u yii ú gbēē ujɔfuee.

²³Yeesu cúú ujɔfuee ŋal ki kpáaǹ-u ki kpōotì kitimbiliiyee kpaanceetiŋu, ní ki tíil̀ timɔtan ki ŋá ujɔfuee nimbilin, ki dū u-ŋalii ki gbēē u-nimbiliŋ, ní ki bālifì-u yii: «A wāĺ tibaaa?»

²⁴Ujɔfuee kpēē, ní ki bí yii: «M wāĺ binib, ní bi bí kii isufi di còom̄ee.»

²⁵Niinee ní Yeesu gíti tí dū u-ŋalii ki gbēē u-nimbiliŋ. Ŋyunti gbanti ní ujɔfuee kpítì u-nimbiliŋ ki kpēē ní ki pɔ́ɔkì ki kíǹ ki wāĺ bɔ́mbɔŋ.

²⁶Ní Yeesu tùkū-u yii: «Nín̄ kùǹ a-dumpu kí taa dī kitiŋ poon.»

²⁷Yeesu nì u-boonnooliibi yíkìi búntì Seesaaree-Fiiliipi timbilimmu watil pú. Bi bàn̄ nsannee, ní u bālifì u-boonnooliibi yii: «Binib lì yii m sá ŋma ní?»

²⁸Ní bi kíí-u yii: «Biba lì yii a sá Yoowaneesi un fùul̀ binib Unimbɔti nyimee, ní biba mun lì yii a sá Eelii. Biba bíǹ ceeyee, a sá Unimbɔti bɔnaatiliibi kansikin ubɔ ní.» Ní u bālifì-bi yii:

²⁹«Kin nimbi fáà, ŋma ní nimbi nyí yii m sá ní?» Ní Peetroo kíí-u yii: «Sii di sá Meesiya!»

³⁰Niinee ní Yeesu kpáafì-bi tiŋan bí taa sòoǹ u-pu míǹ báà ubɔ cee.

³¹Ŋyunti gbantee, u kíĺ ki bíi tùkù u-boonnooliibi yii: «An sá man Kinibiki ń jī falaa tikpil. Bitindaŋkpilib nì bisaraaŋakpilib nì bimaradakaliibi kɔkɔ làá dāá lì yii baa là m-bɔti, bi làá dāá kpɔ̀-mi, ní ḿ fàtīí fìkitī winta dal.»

³²U nìn pée tùkù-bi an bɔtee ki cántí-bi ní. Ní Peetroo cáá-u ki kākatì ŋkpaanceeti ki kíĺ ki bíi wòoǹ-u.

³³Niinee ní Yeesu fātìi kpēē u-boonnooliibi ní ki kpātì Peetroo pu ki bí yii: «Sii un cáá Sitaan landɔkɔŋuee, sútí kí wàatī-mi! Aa dàkafī Unimbɔti yam, a-landɔkɔi sá binib landɔkɔi ní.»

³⁴U lī míǹ ki dóòyee, ní ki yíiń kunipaau nì u-boonnooliibi u-cee, ní ki bí-bi yii: «Un yaa là kí nóó-mee ń fá úǹ u-ba nín là puee kí nóó min ní man lèe, kí yòon̄ u-dɔpuntikaaŋu kí nīn nóó-mi.

³⁵Kun puee un di yaa là kí fīī u-maŋfalee làá fá-dì, ama un di yaa dū u-maŋfal ki fá kí nóó-mi kí sòoǹ m-bɔmɔntiiti kí tīī binibee, udaan di làá fīī u-maŋfal.

³⁶Unil, a yaa jíń duulinya nee kɔkɔ ní sisi a-ba wáŋkèe, a páatì ba?

³⁷Ba ní a ŋūǹ kí dūú pà kí fīī a-ba?

³⁸Un kamaa yaa cáá icoo man nì m-bɔti pu waanee nib bin nyēē Unimbɔti boon ki ŋáań ikpitee kansikinee, ŋyunti ŋun m yaa láa gítìń m-baa nyootin nì u-tuuŋyee, man Kinibiki làá dāá kɔ́ǹ udaan icoo.»