Read Ntcham Luc 1 Bible Online

Luc 1 - Ntcham bible

Luc 1

¹Ukpil Teewoofiil[1], Binib tikpil pɔ́ɔǹ ki ŋmàn̄ ditundi din Yeesu túń ti-kansikinee bɔti.

²Bi pée ŋmàn̄-tì kii bin nìn ká tibɔtee kílilaŋki ki kíǹ ki sòoǹ ki nàatī Unimbɔti bɔtee nín máafì-tì puee ní.

³Míǹ puee, kii m nín nyàab̄ ki cúú mbaamɔm tin jítì doooo ŋkilkaaminee, an kítì yii ma mun ń dū-tì kí ŋmà kí tīī-si,

⁴án nín làá ŋá pu á ŋmā kí béé yii bi nín dàkā-si tibɔti tiŋyee sá ibaamɔnee.

⁵Ŋyunti ŋun Eeroodi nìn sá ubɔti Juudee tiŋkinee, usaraaŋal ubɔ nìn bí, bi yíì-u Sakari. U nìn sá usaraaŋal Abiiya[2] kitil poon ubɔ ní. Bi nìn yíì u-nimpuu Eeliisabeeti, u mun sá Aarɔn maaliŋu poon.

⁶Bi-liitil nìn yú deedee Unimbɔti nimbiin ní ki tɔ́ ti-Dindaan marab kɔkɔ mmɔntiim,

⁷ama baa nìn cáá kibiki, kun puee Eeliisabeeti nìn sá uŋmaŋŋmanti, ní bi-liitil nìn púĺ.

⁸Sakari kitil yuntiŋu bāańee, bi fōō saraa tundi ní Sakari kɔ́ kunimbɔtidiin ki bíi tūǹ u-tundi Unimbɔti nimbiin.

⁹Kii bisaraaŋaliibi nín ŋáań puee, bi nìn tɔ́ kasi ní ki lēē-u ú kɔ́ ti-Dindaan diiku poon kí tūū talaalu[3].

¹⁰Kunipaau kɔkɔ nìn bí mmɔŋki ki mèé ŋyunti ŋun úǹ bíi tùutī talaalu nsaraafan puee.

¹¹U bí niinee, ní ti-Dindaan tuuŋŋu ŋubɔ dɔ́miń ki yúl̀ nsaraafan cee ŋŋaŋgiil pú[4].

¹²U ká ntuunee, ní u-pɔbil bíil̀, ní tifaandi cúú-u.

¹³Ní ntuunee bí-u yii: «Sakari, taa fàŋkì! Di sá yii Unimbɔti fōō a-wimmeem. A-nimpuu Eeliisabeeti làá dāá màal̀-si kibininjabiki, á dāá pɔ̄-kì diyindi yii Yoowaneesi.

¹⁴Án làá dāá nīn sá-si dipɔɔpiŋkpaandi nì mmɔn ní, ní binib tikpil làá fàal̀ u-màaltam pu.

¹⁵U làá dāá nīn sá unikpaan ti-Dindaan nimbiin. Waa dāa nyù ndaam nì tinyɔkaal tin kɔkɔ pée gbéèyee[5]. U làá dāá gbí Unimbɔti Fam doooo u-na poon ní.

¹⁶U làá dāá gíiǹ Isirayeel yab kupaau ti-Dindaan bi-Nimbɔtiu cee[6].

¹⁷U làá dāá lìntīń ti-Dindaan nyɔkɔpu kí dāá nīn cáá Unimbɔti Fam nì mpɔn kii Eelii nín nìn cáá puee. U làá yàntī bibaatiibi nì mbiyaamu ń mɔ̄ɔkì, ní kí gíiǹní bin gáatèe deedeedambi ciiŋŋun, ní kí bɔ́ntí dinikitil mmɔntiim kí yóoń ti-Dindaan.»

¹⁸Niinee ní Sakari bí Unimbɔti tuuŋŋuee yii: «M làá ŋá mana kí béé yii tibɔti nee sá ibaamɔn? Kun puee man púĺaaa, m-nimpuu mun púĺ.»

¹⁹Ní ntuunee bí-u yii: «Man di sá Gabriyeel[7], man di bí Unimbɔti nimbiin ki tūǹ atuun. Unimbɔti di túnní-mi ḿ cáań dinyɔɔbummɔɔndi gbanti kí tùkù-si,

²⁰ní saa fōō m-bɔti tin m sòon̄ nì si nee ki kíí. Ama an yuntiŋu yaa bàn̄ án làá ŋá míǹ. Míǹ puee, a làá kpántí umɔɔmiin, aa ti làá ŋmā kí sòoǹ kí nīn cí ŋyunti ŋun tibɔti tin m sòon̄ nee ń dāá ŋá.»

²¹Ŋyunti gbantee, an ŋá bin bí mmɔŋki ki cí Sakari ń nyānnée bitii, kun di ŋúb́-u kudii poon ní waa nyēeńee.

²²U nín dāa nyánnée, waa ti ŋūǹ kí sòoǹ. U kíǹ ki lábití u-ŋalii mmɔɔmiin yaamin ní. Niinee ní bi béè yii Unimbɔti ŋúbitì u-nimbiliŋ u wál̀ tiba kudii poon.

²³Iwiin in sá Sakari ń dūú tɔ̄ kunimbɔtidii poon tundee sāāyee, ní u nín kùǹ u-dumpu.

²⁴Míǹ boonee ní u-nimpuu Eeliisabeeti cáá dipool, ní ki bál̀, kaa ti nyēē áli iŋmal iŋmoo,

²⁵ní ki bí yii: «Kɔŋkɔnnee, kpèèmaan Unimbɔti nín ŋá min ki tīī-mee! U ŋá míǹ kí lēē kun nìn kɔ̄ntí-mi icoo binib kansikinee dee.»

²⁶Eeliisabeeti cáá dipool iŋmal iluuyee, ní Unimbɔti tú u-tuuŋŋu Gabriyeel Galiilee tiŋki kin bi yíì Naasaareetee

²⁷usapɔɔn un kaa nyí uninja bi yíì-u Maariiyee cee. Usapɔɔnee nìn cáá bɔɔn, bi yíì-u Jooseefi. U nìn sá ubɔti Daafiidi maaliŋun ní.

²⁸Ní Unimbɔti tuuŋŋuee kɔ́ usapɔɔnee cee ní ki bí yii: «M jáaḿ-si, sii un Unimbɔti pú diyimɔɔlee, ti-Dindaan bí a-cee.»

²⁹U jáam̀ ki dóòyee, ní Maarii fāŋkì tikpil ní ki bālifì u-ba yii: «Ba jaamii di nín yá nan dee?»

³⁰Niinee ní ntuunee bí-u yii: «Maarii, taa fàŋkì, diyimɔɔl ní a ká Unimbɔti cee.

³¹A làá cáá dipool kí màal̀ kibininjabiki, á dāá pɔ̄-kì diyindi yii Yeesu.

³²U dāa sá unikpaan ní. Yilpu fɔ́ŋŋŋ Nimbɔtiu dāa yíì-u u-Jipɔɔn. Úǹ ní ti-Dindaan Unimbɔti làá dū u-naanja Daafiidi beel kí tīī.

³³Úǹ di làá nīn sá Isirayeel yab bɔtiu kí nīn cá jaanjaan ní u-beel kaa dāa cáá dikúntil[8].»

³⁴Ní Maarii bí ntuunee yii: «Maa nyí uninja, kin án làá ŋá mana ní kí bàń míǹ?»

³⁵Ní ntuunee kíí-u yii: «Unimbɔti Fam di làá kpákatiń a-pu, ní Yilpu Fɔ́ŋŋŋ Nimbɔtiu pɔŋŋu ń bìin̄ a-pu kii mboonee. An pu ní circir biki kin a làá màal̀ee, bi dāa yíì-kì Unimbɔti Jipɔɔn.

³⁶Kpèè, a-kpilintɔ Eeliisabeeti unimpunaatee mun cáá kibininjabiki pool. Úǹ un bi nìn yíì uŋmaŋŋmantee bí u-ŋmaluluutiu poon ní nee.

³⁷Di sá yii tiba kaa bí ki pɔ̄ɔ̄ Unimbɔti cee[9].»

³⁸Ní Maarii bí yii: «M sá ti-Dindaan yumbuu ní, a nín lī puee, án ŋá míǹ.» Ní ntuunee yíkì u-cee.

³⁹Ŋyunti gbanti poon ní Maarii yíkì Naasaareeti ki nín cá Juudee jooŋŋi watil pú malaa.

⁴⁰U kɔ́ Sakari dumpu ní ki jáam̀ Eeliisabeeti.

⁴¹Eeliisabeeti nín gbìl̄ Maarii jaamiiyee, ní kibiki cīŋkì u-poon, ní u gbí Unimbɔti Fam

⁴²ní kí téeń mpɔn yii: «Unimbɔti bīiǹ a-pu ki jítiǹ binimpoobi kɔkɔ, ní ki bīiǹ kibiki kin a làá màal̀ee mun pu.

⁴³Ma mun ŋma ní m-Dindaan na ń dāan̄ m-cee?

⁴⁴Di sá m nín pée gbìl̄ a-jaamiiyee, ní kibiki cīŋkì m-poon nì ifaal.

⁴⁵Án nīn mɔ̄ǹ sii un fōō ki kíí yii ti-Dindaan nín lī miŋyee, an làá lafun ŋá mimmee.»

⁴⁶Ní Maarii bí yii[10]: «M nyɔ́ŋkí ti-Dindaan nì m-pɔbil kɔkɔ u nín sá ukpaanee puee,

⁴⁷an mɔ̄ǹ-mi tikpil Unimbɔti m-Fiiliu pu,

⁴⁸kun puee u tīntìń ki kpēē man u-tɔntɔnliu nín sīntiǹ u-ba puee[11]. Ní kí yòon̄ díǹ kí nīn cée, iyunti kɔkɔ nib làá yíiń-mi diyimɔɔl daan.

⁴⁹Kun puee Unimbɔti Mpɔŋkɔdaan un bí circiree túń atuŋkpaan ki tīī-mi. U-yindi bí circir.

⁵⁰U-saasɔl bí kí nīn cá abin abin ki tīī bin fàŋkí-uee.

⁵¹U-pɔŋŋu ní u dūu túń atuŋkpaan, ki yāaǹ bin dàkà bi-bee.

⁵²U téé bibɔtiibi bi-jaliŋ pu ki lúkú, ki yōoǹ binandambi yilpu[12].

⁵³U yāntì bin ŋkùm nìn cááyee ká digbíl mmɔntiim ní ki jìn̄ bigaajab ki gíiǹ nì iŋaŋkulim.

⁵⁴U jōoń u-tɔntɔnliibi Isirayeel yab, ki téetì u-poondi pu ki ŋá-bi tiŋan,

⁵⁵kii u nín pée pōoǹ ti-naanjab, Abraam nì u-maaliŋu kɔkɔ puee, kí nīn cá jaanjaan.»

⁵⁶Maarii nìn kāl̀ Eeliisabeeti cee iŋmal ita nyɔkɔm ní ki fātìi nín kùǹ.

⁵⁷Ŋyunti ŋun Eeliisabeeti làá màal̀ee dūu bàn̄ ní u màl̄ kibininjabiki.

⁵⁸U-kɔŋkɔnnaatɔb nì u-nabiyaamu nín gbìl̄ tiŋaŋkpaandi tin ti-Dindaan ŋá ki tīī-uee puee, ní bi nì u kɔkɔ bíi fàal̀.

⁵⁹An tú iwiin iniiyee, ní bi dɔ́miń ki nyántì kibiki ní ki gíí-kì dikpancandi[13] ní ki bàà là kí pɔ̄-kì ki-baa yindi Sakari.

⁶⁰Ní ki-na bí yii: «Aayee, ti làá nīn yíì-u Yoowaneesi ní.»

⁶¹Ní bi bí-u yii: «A-yɔu ŋma ní bi yíì míǹ?»

⁶²Niinee ní bi bālifì ubaati mmɔɔmiiŋyaamin diyindi din u là bí pɔ̄ kibikee,

⁶³ní u yāntì bi tīī-u kupiliŋu, ní u ŋmàn̄ yii: «U-yindi di sá Yoowaneesi.» Ní báà ŋma bākatì sèeee.

⁶⁴Niinee, Sakari limbil cúu kpātì, ní u kíĺ ki bíi sòoǹ ki nyɔ́ŋkí Unimbɔti.

⁶⁵An yāntì tifaandi kɔ́ bi-kɔŋkɔnnaatɔb, ní binib kíǹ ki máafí an bɔti Juudee tiŋki kin sá ajoonee kɔkɔn.

⁶⁶Bin kɔkɔ nìn gbìl̄ an bɔtee nìn bíi dàkafī ti-pu, ní ki bàlifī bi-ba yii: «An bikee làá dāá nīn bí mana dee?» Tiŋman, ti-Dindaan pɔŋŋu nìn bí kibikee pu.

⁶⁷Niinee ní Unimbɔti Fam gbí Sakari, kibikee baa, ní ki yāntì u bíi nàatī Unimbɔti bɔti yii:

⁶⁸«Ti-Dindaan Isirayeel Nimbɔtiu ń ká inyɔŋki, kun puee u gíiǹní u-landɔkɔŋu u-niboolii pu ki fīī-bi ki líì.

⁶⁹U nyántìń-ti Ufiil mpɔndaan ubɔ, udaan sá u-tɔntɔnliu ubɔti Daafiidi maaliŋu poon ní.

⁷⁰Kii u nín nìn yāntì u-circir bɔnaatiliibi bin nìn bí njaminee sòon̄ ki síiǹ puee,

⁷¹yii: u làá nyāntí-ti ti-nannanliibi nì bin kɔkɔ ná-tee ŋaan.

⁷²U làá dàkà ti-naanjab u-saasɔl, kí téetí u-circir poondi din u nìn pōoǹ-bee pu,

⁷³kii u nín nìn pūtì ki pōoǹ ti-naanja Abraam cee puee[14].

⁷⁴U nìn pōoǹ-u yii u làá nyāntí-ti ti-nannanliibi ŋaan, tí ŋmā kí nóó-u kí taa fàŋkì,

⁷⁵kí nīn bí circir nì deedee u-nimbiin áli ti-kúm dal.

⁷⁶Ní sii, kibiki, bi làá dāá nīn yíì-si Yilpu Fɔ́ŋŋŋ Nimbɔtiu bɔnaatiliu ní. Di sá yii sii di làá dāá nīn līī ti-Dindaan nyɔkɔpu kí ŋāŋkì u-saŋŋu[15],

⁷⁷ní u-nibul ń béé yii u làá dāá fīī-bi kí dū bi-kpitii kí pɔ̄-bi.

⁷⁸Kun puee Unimbɔti nín cáá tiŋan u-poon mɔ̄ puee, u làá yàntī yilpu walifiŋu ń ŋmíntí ti-pu kii ŋwìiń nín nyēē puee.

⁷⁹Ŋu làá ŋmíntí bin bí dibɔmbɔndinee nì bin bin bí ŋkúm saŋŋu puee, kí kpòotī-ti kí gíiǹ ŋgbansɔŋfi saŋŋun[16].»

⁸⁰Kibikee nìn wīintí ní ki-ciiŋyi mun wīintí. U nìn kóòń kuteeun ní áli ki tin sāā daliŋkin u kíĺ ki bíi sòoǹ nì Isirayeel yab Unimbɔti bɔtee.