Read Ntcham Luc 10 Bible Online

Luc 10 - Ntcham bible

Luc 10

¹Boonee ní ti-Dindaan gíti lēē binib imuŋku ita nì saalaa nì bili[67] biba, ki tú-bi bili bili bí lìntī u-nyɔkɔpu kí cù ntimu mun kɔkɔn úǹ u-ba bàà là kí cùee.

²U nìn bí-bi yii: «Kudiceeu wīikí, ama bidicaliibi kaa náaǹ. Mèèmaan bukpaadaan ú tɔ̄ń bitɔntɔnliibi kí kūtì bí dāá cā u-jikaati.

³Nín̄ cámaan. M tú-ni, ni làá nīn bí kii apibil ŋin bí isaakpan kansikinee ní.

⁴Ní taa yòon̄ animbil, nì kuloou nì anaataka, kí taa yūĺ nsanni kí jāam̀ ubɔ.

⁵Ni yaa kɔ́ kudicaŋu kunnee, ní péé péé kí jāam̀-bi yii: <Ŋgbansɔŋfi ń nīn bí kudicaŋu nee pu.>

⁶Un yaa là ŋgbansɔŋfee yaa bí niinee, ní ú fōō ni-gbansɔŋfiŋuee. Un là ŋgbansɔŋfee yaa kpá niinee, ní kpáaǹ ni-gbansɔŋfiŋuee kí búntí.

⁷Ni yaa kɔ́ laakin ní bi yaa fōō-nee, nín̄ kāmaan kudicaŋu gbantin. Tin kamaa ní bi yaa pée cáań-nee, ní jī kí nyɔ̀, kun puee utɔntɔnli máaǹ tipaal[68]. Ní taa nín̄ kóò ki póotí adiin.

⁸Ni yaa kɔ́ kitiŋ kin poon ní bi yaa fōō-nee, jīmaan tin kɔkɔ bi yaa pée cáań-nee,

⁹ní kí cáam̀maan kitiŋ gbanti poon bunliibi, kí tùkù ki-nib yii: <Unimbɔti Beel sútì ki pìlīń-ni.>

¹⁰Ama ni yaa kɔ́ kitiŋ kin poon ní baa fōō-nee, nyāmaan adan pu kí lì yii:

¹¹<Ti gbáfì ni-tiŋki kpɔŋkpɔm min táká ti-taaŋee gba ki gíiǹ ki tīī-ni[69]. Ama nì míǹ kɔkɔee ní béé yii Unimbɔti beel sútì ki pìl̄-ni.>

¹²Ibaamɔn ní m tùkù-ni, ibɔsoon dalee, Soodoom[70] tiŋki tafadaaldi dāa sɔ́ǹ kitiŋ gbanti yal.»

¹³«Nimbi Kɔrasin tiŋki yab, mbusu dɔ̄ ki cí-ni, nimbi Beetisayida tiŋki nib. Mbusu dɔ̄ ki cí-ni, kun puee maamaaci tuuŋŋi ŋin m ŋáaǹ nimbi cee nee di yaa bàà nìn ŋá Tiir nì Siidɔn timmunee, kɔnampu nee ntimu gbanti nib bàà nìn pēeǹ ikpalcati ki dū ŋfantam ki pùkū bi-ba ki dàkā yii bi kpántì bi-bimbim[71].

¹⁴Míǹ puee, ibɔsoon dalee, nimbi tafadaaldi dāa jítiǹ Tiir nì Siidɔn nib tafadaaldi.

¹⁵Nimbi Kapeernayum tiŋki yab, ni nyí yii ni làá yīkì kí tin sāā kutagbɔŋu níii? Ni làá sìntī kí bà taapu taŋkpiibi ní[72].»

¹⁶Ní u gíti lī u-boonnooliibi yii: «Un yaa pílifiǹ-nee, pílifiǹ man dee. Un yaa yíì-nee, yíì man dee, ní un yaa yíì mamee yíì un túnní-mee dee.»

¹⁷Binib imuŋku ita nì saalaa nì bili[73] bin Yeesu túee fātìi bāań nì dipɔɔpindi, ní ki bí yii: «Ukpil, áli gba arasiniibi sīntiǹ bi-ba ki tīī-ti a-yindi pu!»

¹⁸Ní Yeesu bí yii: «M ká Sitaan nín nyánní kutagbɔŋu ki bí kii ntaaŋmɔŋmɔee ki lítì.

¹⁹M tùkù-ni yii m tīī-ni mpɔn ní tāā ikoobu nì inoom pu kí còom̀ kí nàan̄ Sitaan pɔŋŋu kɔkɔ, tiba kpá kí ŋá-ni tikpitil.

²⁰Ní taa nín fàal̀ yii arasiniibi nín sīntiǹ bi-ba ki tīī-nee ŋmaniŋma pu, ama ní nīn fàal̀ yii ni-yiŋŋi nín ŋmàn̄ yilpuee pu.»

²¹Niinee ní Unimbɔti Fam yāntì Yeesu kíǹ ki bíi fàal̀, ní ki lī yii: «Óooo m-Baa, yilpu nì taapu Dindaan, m nyɔ́ŋkí-si a nín dū tibɔti nee ki bál̀ bin yíì bi-ba biciŋfitiibi nì binyiliibi bí taa béé-tì, ní ki dū-tì ki dàkā bin sá ŋwaamuee. M-Baa, tiŋman an sá míǹ, kun puee míǹ di ŋān̄ a-cee ki fáatì-si.

²²«M-Baa Unimbɔti dū tikɔkɔ ki tīī-mi. Báà ubɔ kaa nyí man un sá Unimbɔti Jipɔɔnee asee m-Baa, míǹ ní báà ubɔ kaa nyí un di sá Ubaatee, asee man u-Jipɔɔn nì bin man u-Jipɔɔn yaa là kí dū-u kí dàkèe.»

²³Ní u fātì u-boonnooliibi pu ní ki bí bíǹ ŋmaniŋma yii: «An sá diyimɔɔl ki tīī bin wāĺ tin ni wāĺ nee.

²⁴Ibaamɔn ní m sòoǹ nì ni, Unimbɔti bɔnaatiliibi nì bibɔtiibi tikpil bàà nìn pée nyàab̀ kí ká tin ni wāĺ nee ní kaa ká, ki bàà nìn nyàab̀ kí gbìl̄ tin nimbi gbìl̄ nee ní kaa gbìl̄[74].»

²⁵Niinee ní umaradakal ubɔ là kí píĺ Yeesu tibɔti kí kpèè u-nyɔkɔn, ní ki yíkì ki bí-u yii: «Ukpil, mana ní an sá ḿ ŋá ní kí ká dimaŋfal din kaa cáá dikúntilee?»

²⁶Ní Yeesu bí-u yii: «An ŋmàn̄ yii ba ní ti-marau poon? Tin tin a kàaǹee sòoǹ yii ba ní?»

²⁷Ní uninjee kíí-u yii: «An lī yii: <Á nīn néeń a-Dindaan a-Nimbɔtiu nì a-pɔbil kɔkɔ nì a-naŋki kɔkɔ nì a-pɔŋŋu kɔkɔ nì a-landɔkɔŋu kɔkɔ, ní kí nīn néeń a-juti kii sisi a-bee[75].>»

²⁸Ní Yeesu bí-u yii: «A kíí an ŋān̄, ŋá míǹ kí dāá ká dimaŋfal gbanti[76].»

²⁹Umaradakalee là kí pɔ̀ u-bee ní ki bālifì Yeesu yii: «Ŋma di sá m-juti ní?»

³⁰Ní Yeesu bí-u yii: «Uninja ubɔ di nyánní Jeerusaleem ki sìntī Jeeriikoo, ní digaŋgandambi biba kíntì-u nsanni ki tāfì-u tiŋan pu u fìkī. Bi fúkúl̀ u-wanti pílpil, ki búntì ki yāntì-u, u kíǹ ki dɔ̄ ki fìkī.

³¹Ní usaraaŋal ubɔ mun yíkì ki dīń nsan gbanti. U bāań ki ká kijapaayee dɔ̄ee ní u páaǹ mpampa.

³²Ní Leefii yab ubɔ mun bāań ki ká kijapaayee dɔ̄, ní u mun páaǹ mpampa.

³³Ama usamaariija ubɔ cá nsan ki bāań ki yīkiǹ uninjee, ní ki súń u-saai,

³⁴ní ki sútì ki pìl̄-u, ní ki ŋá u-buuŋyi ŋkpam ní ki dū ndamam mun ki ŋá, ní ki póob́-u, ki yōoǹ-u ki kāaǹ u-maŋki pu, ní ki cáá-u ki cūnnì anicandiinni, ki kpēē-u tiŋan.

³⁵Kutaa wúntèe, ní u nyántì animbil ki tīī ukpil un kpèé anicandiinee, ní ki bí-u yii: <Á kpèè-mi kijapaai nee tiŋan. A yaa gíti jíń animbil min nyɔkɔm u-puee, m yaa láa fātìńee, ḿ téeǹ-si.>»

³⁶Ní Yeesu bālifì umaradakalee yii: «Binib bitee kansikinee, ŋma ní a ká yii u sá un digaŋgandambi kíntì ki gbáńee juti ní?»

³⁷Ní u kíí Yeesu yii: «Un ŋá-u tiŋanee di sá u-juti.» Ní Yeesu bí-u yii: «Too, a mun cùú ŋá míǹ mbaantiim.»

³⁸Yeesu nì u-boonnooliibi nìn kíĺ nsan kí nīn cá ní ki dūu bàn̄ kitimbilii kiban. Unimpu ubɔ nìn fōō-u u-dumpu, bi yíì-u Maarta.

³⁹U nìn cáá naal ubɔ, bi yíì-u Maarii. Maarii úǹ nìn kā ti-Dindaan taaŋi taapu ki pílifí u-bɔti[77].

⁴⁰Maarta kaa nìn cáá mpaan, di sá yii atuun kupaau nìn ŋúb́-u, ní u dɔ́miń ki bí yii: «Ukpil, a-tafal kpá nì m-naal nín yāntì man baba pée bíi tūǹ atuun kɔkɔeeee? Tùkù-u ú dāá tūtuǹ-mi.»

⁴¹Ní ti-Dindaan kíí-u yii: «Maarta, Maarta, a nìiǹ ki jìkì tiwan tikpil pu,

⁴²ama kuwambambaantiiu di páb́. Kúǹ ní Maarii lēē nee, ní ubɔ kaa ŋūǹ kí fōō-ku u-cee.»