Read Ntcham Luc 11 Bible Online

Luc 11 - Ntcham bible

Luc 11

¹Dalbee, Yeesu bí laaba ki mèé Unimbɔti. U mēē ki dóòyee, ní u-boonnooliibi kansikin ubɔ bí-u yii: «Ukpil, dàkà-ti bi nín mèé Unimbɔti puee, a lì kii Yoowaneesi nín nìn dàkā u-boonnooliibi puee.»

²Ní u bí-bi yii: «Ni yaa bíi mèéyee, ní lì yii: <Ti-Baa, yàntī bí béé yii a sá Unimbɔti circirdaan, kí yàntī a-Beel ń dāan̄.

³Tīī-ti kutaa sá kamaa kun ti làá jēe.

⁴Dū ti-kpitii kí pɔ̄-ti, kun puee ti mun pūǹ bin ŋáań-ti ikpitee bi-kpitii. Taa pɔ̄ mpaan Sitaan ń kīil̀-ti.>»

⁵Ní Yeesu gíti bí-bi yii: «Tí dūú ŋmàntī yii ni-kansikin ubɔ di yaa cáá bɔɔ ní ki yaa cūtì u-cee kunyataasiiu, ki bí-u yii. <M-bɔɔ, pìnnì-mi kpɔnɔb bita[78],

⁶kun puee m-bɔɔ ubɔ nyánní nsan ki kɔ́-mi ní maa cáá báà tiba kí ŋá-u tijin.>

⁷U-bɔɔyee yaa kíiń-u kudii poon yii: <Taa páb́-mi, man pīiǹ kudii, man nì m-biyaamu kɔ́ ki dōoǹ, maa ti ŋūǹ kí yīkì kí tīī-si kpɔnɔb.>

⁸M tùkù-ni ibaamɔn ní, báà u yaa kaa làá yīkì kí tīī-u kpɔnɔb u nín sá u-bɔɔyee puee, see ú yīkì kí tīī-u tin kɔkɔ u nyàab̀ee u nín pée gbíntìi páb́-uee pu.

⁹Míǹ pu ní man tùkù-ni yii, mèèmaan Unimbɔti, u làá tīī-ni. Nyàab̀maan, u làá yàntī ní ká. Kpāafìmaan, u làá pìitī-ni.

¹⁰Kun puee, sii un yaa mēē Unimbɔti tibee, see á fōō kudɔŋu, ní sii un yaa nyàab̀ tibee, see á ká kudɔŋu. Sii un di yaa tí yú ki kpáafée, see bí pìitī-si.

¹¹«Ni-kansikin ŋma di yaa cáá kibiki, ní kì yaa mēē-u ujɔm, ní ú dū ukoobu kí tīī-kì?

¹²Àá, kì yaa tí mēē-u dijindi, ní ú dū unoom[79] kí tīī-kì?

¹³Too, nimbi bin sá binikpitibee yaa nyí ki tìì ni-biyaamu tiwammɔntiil, kin ataa aŋa pu ní Ubaati un bí yilpuee kaa nín tìì Circir Fam bin kɔkɔ yaa mèé-u Ŋfam gbantee?»

¹⁴Kijapaai kiba nìn bí, arasinii kā u-pu ki yāntì u kpántì umɔɔmiin. Yeesu jìn̄ arasiniiyee, ní umɔɔmiinee kíǹ ki bíi sòoǹ, ní kunipaauee bākatì sèeee.

¹⁵Ama biba bí yii: «An sá arasiniibi bɔtiu Beelseebuul[80] di tīī-u mpɔn ní u cáa jì arasiniibi.»

¹⁶Ní biba mun là kí píĺ-u tibɔti ní ki bí-u yii ú ŋá kudaaŋŋu kubɔ bí béé yii u-pɔŋŋu gbanti baasii nyánní Unimbɔti cee.

¹⁷Ama Yeesu nìn nyí bi-landɔkɔi ní ki bí yii: «Dibeel din nib di yaa cúu yākatì ki jáà nì tɔbee, see dí kúntí, ní di-diiŋŋi ń lítí kí yāŋkì tɔb kí wìil̀.

¹⁸Ní ni bí yii Beelseebuul di tīī-mi mpɔn ní m jì arasiniibaaa? Mimmee, Sitaan yaa fātìi bíi jáà nì úǹ u-bee, mana ní u-beel ŋūǹ kí nīn bí ki cá!

¹⁹Man yaa cáá Beelseebuul pɔŋŋu ní ki jì arasiniibee, mimmee ni làá lì yii arasiniibi bɔtiu Beelseebuul di tīī ni-jipɔmbi mun mpɔn ní bi jì arasiniibi deeyaa! Ni-yab bi-ba dàkà yii ni bí diyìntil poon dee.

²⁰Ama, an yaa sá Unimbɔti pɔŋŋu ní m cáa jì arasiniibee, mimmee, an dàkà yii Unimbɔti Beel pɔŋŋu[81] dɔ́miń ni-cee dee.

²¹«Upɔɔl yaa kā nì u-janjawanti ki cí u-diikuee, tiba kaa gbèetī u-wanti.

²²Ama ubɔ mun yaa gíti bí ní ki pɔ̄ɔǹ-uee, u dòoń kí já nì u kí fōō u-janjawanti tin pu u mákée, ní kí kóoǹ u-wanti kí yàkatī u-yab.

²³«Un yaa kaa bí man jandi púee jáà nì man dee, ní un yaa kaa bíi tútúǹ-mi m kōontí ki kpáfée, bíi yàantí dee.»

²⁴«Arasinii yaa nyáń unilinee, u búntí kuteeu pu ní ki yìiǹ ki nyàab̀ ŋkɔŋkoon. U yaa nyàab̄ ki gīī, kaa kée, ní ú bí yii: <M làá fàtīí gítí laakin m nìn nyánnée.>

²⁵U yaa gítìń ki ká bi ŋātì kudii ki bɔ́ntì-kuee,

²⁶ní ú cùú nyàabìń arasiniibi biluli bin cáá ntoom ki jítiǹ úŋ̀wuee, ní bí dāan̄ kí kpāfì kí kàl̄ udaan pu, ní ú mɔ̀tīí bīil̀ kí jītíǹ mpeepeekaam.»

²⁷Yeesu bíi sòoǹ mimmee, ní unimpu ubɔ téeń kunipaaun yii: «Unimpu un cáá a-pool ki màl̄-si a ŋáam̀ u-biilee bí mmɔnneeee!»

²⁸Ní Yeesu kíí-u yii: «Bin baasii bí mmɔnnee di sá bin pílifí Unimbɔti bɔti ki ŋáań tì nín lī puee!»

²⁹Kunipaau dɔ́miń ki wíiǹ Yeesu ceeyee, ní u bí yii: «Nimbi waanee nib sá bikpitib, ki bàlifī ḿ ŋá kudaaŋŋu kubɔ. Ama naa làá ká kudaaŋŋu kubɔ, asee kun náań nì Unimbɔti bɔnaatiliu Yoona yɔkɔee.

³⁰Kii Yoona nín nìn sá kudaaŋŋu ki tīī Niiniifi yab puee[82], míǹ ní man Kinibiki làá nīn sá kudaaŋŋu ki tīī nimbi waanee nib.

³¹Ibɔsoon dalee, unimpubɔti un nìn nyánní Seeba tiŋkinee làá dāá yīkì kí kpɔ̀ nimbi waanee nib bɔti, kun puee u nìn nyánní kitiŋkuntinyɔkɔ ki dɔ́miń ki pílifì Saloomɔn ciiŋyi[83]. Ama ubɔ bí doo ki jítiǹ Saloomɔn.

³²Ibɔsoon dalee, kitiŋ kin bi yíì Niiniifee yab làá dāá yīkì nimbi waanee nib pu kí kpɔ̀ ni-bɔti, kun puee Yoona nín nìn sòon̄ nì bi Unimbɔti bɔtee, bi nìn kpántì bi-bimbim[84]. Ama ubɔ bí doo ki jítiǹ Yoona ní ki sòon̄ ní nimbi kaa kpántì ni-bimbim.»

³³«Ubɔ kaa tùutī fitila kí dūú báĺ, kaa tí dù dibool kí cíkiń u-pu. Bi dùú tɔ́kɔń kifaŋkɔlii pu ní bin kóòńee ń nīn wāĺ.

³⁴A-nimbiliŋ sá a-wunti fitilau ní. A-nimbiliŋ yaa ŋān̄ee, a-wunti kɔkɔ wāĺ ní, ama ŋi yaa kaa ŋān̄ee, a-wunti kɔkɔ kɔ́ dibɔmbɔndin dee.

³⁵Míǹ puee, á kpèè tiŋan ŋwalifi ŋun bí a-nee ń taa kpántí dibɔmbɔndi.

³⁶A-wunti kɔkɔ yaa wāĺ ní dijandi diba yaa kaa bí dibɔmbɔndinee, mimmee a-wunti kɔkɔ bí ŋwalifin dee, kii bi yaa tūū fitila ŋwalifi nín ŋmíntí-si pu a wāĺ puee.»

³⁷Yeesu sòon̄ míǹ ki dóòyee, ní Fariisa ubɔ yíiń-u yii ú dāan̄ bí jī tijin, ní Yeesu kɔ́ u-cee ki kāl̀ kí jī.

³⁸Fariisee ká yii Yeesu kaa fíntì u-ŋalii, kii bi-marau nín sá bí ŋá pu kí wàatī kí nín jī tijinee, ní an ŋá-u bitii.

³⁹Ní ti-Dindaan bí-u yii: «Nimbi Fariisab, ni fíntí tiyuti nì asambil boon kaa fíntí poon. Diwaŋfikil nì ntoom gbí ni-pɔbiliŋ poon.

⁴⁰Bigbaambi, Unimbɔti un ŋá boonee, úǹ di kaa tí ŋá poonaaa?

⁴¹An bàà sá ní ŋá biwɔfib tiŋan, ní tikɔkɔ ń ŋāŋkì kí tīī-ni.

⁴²«Mbusu bí ki tīī nimbi Fariisab, kun puee ni lèekī saalaa kamaa pu kubɔ kubɔ goosi faati nì ditunnuul nì tikuŋfaal tin kɔkɔ kíǹee[85] pu ki tìì Unimbɔti, ama ní kaa là kí nīn bí deedee kí nīn néeń Unimbɔti. Kin, min ni bàà máaǹ kí péé kí ŋá kí wàatī kí nín ŋá tin kíǹee dee.

⁴³«Mbusu bí ki tīī nimbi Fariisab, kun puee ni néeń ki kàal̀ nyɔkɔpu jaliŋ akpafidiinni, ki néeń bí nīn jáaḿ-ni sampaambi pu ki tìì-ni jilma.

⁴⁴Mbusu bí ki tīī-ni, kun puee ni bí kii akaakul ŋin jīlifì ki nákáǹ kitiŋ, á dāá còom̀ kí jītí ŋi-pu, kaa kpāantíí béé yii tiwan tin kaa ŋān̄ee pu ní a jítèe ní.»

⁴⁵Ní umaradakal ubɔ bí yii: «Ukpil, a nín sòoǹ pu nee, a sìí ki kpāantí timbi deeyaa!»

⁴⁶Ní Yeesu kíí-u yii: «Mbusu bí ki tīī nimbi bimaradakaliibi mun, kun puee ni cáá awaŋgul ŋin nyìm̀ee ki tūntí binib ní nimbi ni-ba kaa là kí dū ni-ŋambiki kí dáb́ kí tūtuǹ-bi.

⁴⁷Mbusu bí ki tīī-ni, kun puee ni māā Unimbɔti bɔnaatiliibi bin ni-naanjab nìn kūūyee akaakumɔnti.

⁴⁸Ni ŋáań míǹ kí dàkà yii ni-naanjab nín nìn túń atuun ŋiŋyee ŋān̄ ni-cee, kun puee bíǹ kūū Unimbɔti bɔnaatiliibi, ní nimbi māā bi-kaakuliŋ.

⁴⁹An pu ní Unimbɔti iciindaan nìn lī yii: <M làá tɔ̄ń m-bɔnaatiliibi nì m-kpambaliŋ bi-cee: bi làá kpɔ̀ biba ní kí sàaǹ bin kíǹee.>

⁵⁰An puee, nimbi waanee nib làá ká ditafadaaldi Unimbɔti bɔnaatiliibi bin kɔkɔ ni kūūyee pu, kí yòon̄ doooo Unimbɔti nín náań duulinya,

⁵¹kí yòon̄ní Abeel kí dāá sāā Sakari un bi nìn kūū nsaraafan nì kunimbɔtidii kansikinee[86]. Tiŋman ní m tùkù-ni, nimbi waanee nib làá ká ditafadaaldi nnikpaakoon gbanti pu.

⁵²«Mbusu bí ki tīī nimbi bimaradakaliibi, kun puee ni pīiǹ dinyil punyɔkɔ ki lēē saafii. Naa làá kɔ́ ni-ba ní ki jì bin bàà là kí kɔ́ee.»

⁵³Yeesu nyáń Fariisee dumpuee, ní bimaradakaliibi nì Fariisab fōō aŋuu ŋkpitim pu ní ki kíǹ ki bíi bàlifī-u tibɔti tikpil.

⁵⁴Bi bíi pīil̀-u tibɔti ki là ú sòoǹ kí yìntī bí ká nsan kí cúú-u.