Read Ntcham Luc 12 Bible Online

Luc 12 - Ntcham bible

Luc 12

¹Ŋyunti gbantee, binib nìn kpáfì Yeesu cee ki wīikí tikpil, an kaa cáá ŋkaan. Bi nín múkú tikpil puee, bi nìn kíǹ ki tà tɔb ní. Ní u kíĺ ki bíi sòoǹ nì u-boonnooliibi ki lī yii: «Tikɔkɔ poonee, ní nīn nyíǹ ni-ba nì Fariisab kpɔnɔnyɔkɔŋu pu, an dàkà yii bi-poonnyooŋŋu.

²Tin kɔkɔ bí dibalinee, bi làá bìitī ti-pu, ní tin kɔkɔ baa nyée, bi làá béé-tì.

³An puee, tin kɔkɔ ni yaa láa lī dibɔmbɔndinee, ŋwiimpu ní bi làá dāá gbìl̄-tì, ní tin ni yaa láa kɔ́ kudii poon ki lɔ́kɔfèe, mpaampiin pu ní bi làá dāá bāakì-tì.»

⁴«Nimbi m-bɔɔbi ní m tùkù tibɔti nee. Ní taa fàŋkìmaan bin kù binib, ní boonee kaa ti ŋūǹ kí ŋá tiba kí kūtèe.

⁵M làá dàkà-ni un ni máaǹ kí fàŋkèe. Fàŋkìmaan Unimbɔti un ŋūǹ kí lēē dimaŋfal ní ki gíti cáá mpɔn kí dū kinaŋ kí tɔ̄ ŋŋmin ŋkúm boonee[87]. Tiŋman ní m tùkù-ni, un ní ni máaǹ kí fàŋkèe dee.

⁶«Baa nyáfí seerib biŋmoo igboo ilaaa? Ama nì míǹ kɔkɔee, Unimbɔti kaa súntí seer báà ubɔ pu.

⁷Unimbɔti kàan̄ ni-yikpiti kɔkɔ ki nyí ti-nyɔkɔm. An puee, taa fàŋkìmaan! Nimbi jítiǹ kuseerpaau.»

⁸«M tùkù-ni yii un kamaa di yaa sòon̄ binib nimbiin yii u sá man yɔuee, man Kinibiki mun làá dāá lì Unimbɔti tuuŋyi cee yii u mun sá man yɔu.

⁹Ama un di yaa néé binib nimbiin yii waa nyí-mee[88], man Kinibiki mun làá dāá néé Unimbɔti tuuŋyi nimbiin yii maa nyí-u.

¹⁰«Un di yaa sòon̄ ki bíil̀ man Kinibikee ŋūǹ kí ká u-kpitii pɔ̄tam, ama un di yaa sòon̄ ki bíil̀ Unimbɔti Famee kpá kí ká u-kpitii pɔ̄tam.

¹¹«Bi yaa láa cúú-ni ki cūnnì akpafidiinni nì bitindaŋkpilib nì biyidambi nimbiin kí sòoǹ ni-bɔtee, ni nín máaǹ kí sòoǹ pu kí ŋmátée bɔti ń taa páb́-ni.

¹²Di sá yii ŋyunti gbanti yaa bāańee, Unimbɔti Fam làá dàkà-ni tin sá ní sòoǹee.»

¹³Kunipaau kansikinee ní unil ubɔ bí-u yii: «Ukpil, tùkù m-maan ú yàkatī ti-baa fakal kí lēē man jandi kí tīī-mi.»

¹⁴Ní Yeesu kíí-u yii: «Óò kijapaai, ŋma di kāaǹ-mi ni-bɔsoonliu nì ni-waŋyakatiliu?»

¹⁵Ní u bí báà ŋma yii: «Ní nīn nyíǹ ni-ba tiŋan kí taa nín̄ cáá nnimbitaataam, kun puee báà unil yaa yāntì ki sá ugaaja min, u-gaajawanti di kaa yì-tì ní u cáá dimaŋfal.»

¹⁶Ní u dū tibɔti nee ki ŋmāntì yii: «Ugaaja ubɔ di nìn bí ki cáá tikpaatan ki kùn̄, ní an lòon̄ tiŋan.

¹⁷Ní u lī u-ban yii: <M làá pée gíti ŋá mana deeyaaa? Maa ti cáá mpaan laaba kí cáá m-jikaati kí ŋá.>

¹⁸Niinee ní u bí yii: <M béè m nín làá ŋá puee: m làá kpìtī m-cakalaabi ní kí fàtīí gāā bikpaŋkpaambi, ní kí kóoǹ m-jikaati kɔkɔ nì m-wanti tin kíǹee kí gbéeǹ.

¹⁹M yaa ŋá míǹ ki dóòyee, ní ḿ bí m-ba yii: M cáá tikɔkɔ nì tikɔkɔ tikpil kí jī kí nyɔ̀ kí nīn fàal̀ kí ŋùŋfì áli abin kupaau.>

²⁰Ama ní Unimbɔti bí-u yii: <Ugbaan, kunyeeu nee gba, m làá fàtīí fōō a-naŋki. Tin kɔkɔ a bɔ́ntì ki yóoǹ a-bee, ubɔ di làá nīn kíǹ ki yì.>»

²¹Ní Yeesu gíti lī yii: «Míǹ ní án làá ŋá un kamaa nyàab̀ tigaajawan ki yōontí u-ba, ama ní kaa sá ugaaja Unimbɔti nimbiinee[89].»

²²Míǹ boonee ní Yeesu bí u-boonnooliibi yii: «An pu ní m tùkù-ni yii ní taa nín̄ nìiǹ tipɔjin nì tiwampeeŋkaal pu,

²³kun puee dimaŋfal jítiǹ tijin, ní tiwun mun jítiǹ tiwampeeŋkaal.

²⁴Kpèèmaan inoon! Iaa būul̀, kaa cēē, kaa cáá kukaatuŋu, kaa tí cáá cakalaa, ama Unimbɔti kpīintí-i. Kin nimbi bin jítiǹ inoon kpataaayee fáà?

²⁵Báà a yaa bíi yáliŋkí nì a-ba, saa ŋūǹ kí gbéeǹ a-maŋfal fɔkɔŋŋu pu fiii.

²⁶Ni yaa kaa ŋūǹ kí ŋá tin bí fiii mimmee, kin ba pu ní ni yáliŋkí tin kíǹee pu?

²⁷Kpèèmaan mpumpukum! Maa tūǹ ditundi ki gì, kaa lù satab, ama m tùkù-ni yii ubɔti Saloomɔn gba, nì u-gaajati kɔkɔee[90], waa ŋúń ki ká tiwannyaandi ki pēeǹ an bàn̄ mpumpukum nee kansikin miba nyaaŋku.

²⁸Unimbɔti yaa nyāantí míǹ timool tin bí tisatin díǹ fool ŋŋmi ń dāá wà-tèe, mimmee waa làá ŋá án jītíǹ míǹ kí tīī-naaa? Ba pu ní ni-fookiiu kaa náaǹ mimmee?

²⁹Ní taa nín̄ bìǹ ki nyàab̀ tin ni làá jēe nì tin ni làá nyɔ̀ee, kí taa nín̄ páb́ ni-ba an wanti pu.

³⁰Duulinya nib bin kaa nóó Unimbɔtee di nyàab̀ tíǹ kɔkɔ kaa gbèentí, ama nimbee, ni cáá Ubaati un nyí yii an bàlifī ní nīn cáá an wantee.

³¹Péé kí nyàab̀maan Unimbɔti Beel, ní ú tīī-ni kí kpáaǹ tin kɔkɔ kíǹee.»

³²«Nimbi bin sá kinikitiwaayee, taa fàŋkìmaan, ni-Baa lēē yii u làá tīī-ni Dibeel.

³³Nyāfìmaan ni-wanti kí dūú tīīmaan bisoodambi. Mimmee ni síiǹ animbitɔkɔl ŋin kaa cífée nì tigaajati tin kaa dóotée dee yilpu, laakin binaayub kaa ŋūǹ kí yɔ̀ɔɔ, dikɔtuul mun kaa ŋūǹ kí mɔ́ee.

³⁴Kun puee laakin a-gaajati bée, niin ní a-landɔkɔŋu mun bí.»

³⁵«Bɔ́ntímaan ni-ba, kí nīn gbìn̄ ni-dambalab, ni-fitilab ń nīn fòol̄ ki cí m-gítintam.

³⁶Ní nīn bí kii bitɔntɔnliibi bin kpiliu búntì animpucaŋgbiil, bi kā ki cí-u, u yaa láa bāań ki fáá kipunyɔkɔ bí pìitī-uee.

³⁷An sá mmɔn ki tīī bitɔntɔnliibi bin kpiliu bāań ki ká bi kā ki wāĺ, kaa gèeǹee. Ibaamɔn ní m tùkù-ni, u làá dū ditɔntɔmbɔkutil kí pèen̄ ní kí yàntī bí kàl̄, ní ú cáań tijin kí tīī-bi.

³⁸Báà an yaa sá kunyataasiiu àá ŋkoosiim ní u yaa bāań ki ká bi kā kaa gèeǹee, an sá mmɔn ki tīī bidambi.

³⁹Ní gbìl̄maan tinee mun. Kudiidaan yaa nyí ŋyunti ŋun unaayuu làá dāan̄ kí yɔ̀-uee, u bàà kàal̀ kí cīití ní bí taa láa cíĺ u-diiku kí yɔ̀-u.

⁴⁰Míǹ mbaantiim, ni mun ń bɔ́ntí kí nīn címaan, kun puee man Kinibiki làá bàń ŋyunti ŋun naa bàà dàkafēe ní.»

⁴¹Ní Peetroo bí yii: «Ukpil, tibɔŋmantikaal gbantee, a lì timbi baba naaa, a lì báà ŋma ní?»

⁴²Ní ti-Dindaan kíí-u yii: «Tibɔŋmantikaal nee sá ki tīī utɔntɔnli kamaa un yú deedee ki cáá iciin, u-kpiliu dū u-cindi yab ki ŋúbiǹ-u ú nīn kpèé ki tìì-bi tijin ŋyunti ŋun sá ú tīī-bee ní.

⁴³An sá mmɔn ki tīī utɔntɔnli gbanti u-kpiliu yaa bāań ki ká u bíi ŋáań min u tùkū-uee.

⁴⁴Ibaamɔn ní m tùkù-ni, u-kpiliu làá dū u-gaajati kɔkɔ ní kí ŋúbiǹ-u.

⁴⁵Ama ní utɔntɔnlee yaa bí yii: <M-kpiliu yúntìń tikpil,> ní ki kíĺ ki bíi gbáà bitɔntɔnliibi bin kíǹee bininjab nì binimpoobi, ní ki jīǹ ki nyù ki gbéè,

⁴⁶niinee ní u-kpiliu ń dāá fàtīń ŋwiin ŋun pu waa dàkafī yii u làá gítińee nì kukúluu kun pu waa nyée. U yaa bāańee, see ú tɔ̀ntī-u ní kí dū-u kí tɔ̄ bin yíì kaa fōō Unimbɔtee laŋki.

⁴⁷«Utɔntɔnli un yaa nyí min ní u u-kpiliu là, ama ní kaa bɔ́ntì míǹ ki tīī-uee, u-gbati làá nīn wīikí tikpil.

⁴⁸Ama, utɔntɔnli un yaa kaa nyí min u-kpiliu lèe ní ki yīntiǹ-uee, u-gbati kaa dāa náaǹ. Sii un Unimbɔti yaa tīī tikpilee, u dāa bàlifī-si tikpil mun ní, ní sii un Unimbɔti yaa ti kpāaǹ tikpilee, see ú dāá bàlifì-si tikpil mun.»

⁴⁹Ní Yeesu bí yii: «M dɔ́miń kí cáań ŋŋmi kí tɔ̄ kitiŋ pu ní[91]. M bàà là ŋú fōō dooooyee gba ní.

⁵⁰M làá fàl̀ falaa kii nnyimee. An puee m bí digìŋ́kpaandin kí nīn cí ŋyunti ŋun án làá dāá ŋée.

⁵¹Ni nyí yii m dɔ́miń kí cáań ŋgbansɔŋfi kitiŋ pu níii? Aayee, m cáań diyakatil ní.

⁵²Di sá yii, kí yòon̄ kí nīn cée, binib yaa bí biŋmoo kudicaŋu poonee, bi làá yàkatī ní. Bita kaa làá nīn gbìliǹ bili, ní bili mun kaa làá nīn gbìliǹ bita.

⁵³Ubaati kaa làá nīn gbìliǹ u-jipɔɔn ní u-jipɔɔn mun kaa làá nīn gbìliǹ ubaati. Unaati kaa làá nīn gbìliǹ u-bisal, ní u-bisal mun kaa làá nīn gbìliǹ-u. Unimpu kaa làá nīn gbìliǹ u-coopu, ní u-coopu mun kaa làá nīn gbìliǹ-u[92].»

⁵⁴Ní Yeesu bí kunipaauee yii: «Ni yaa ká atagban yaa yíkìń ŋwìiń jeetilaŋkee, ní ní lì yii: <Utaa làá nì,> ní ú lafun nì.

⁵⁵Ní dipeel buŋku yaa bāańee, ní ní bí yii: <Ti làá kɔ́ kutuntuŋun dee,> ní an lafun ŋáań míǹ.

⁵⁶Milimilidambi, ni nyí ki gàntī yilpu nì taapu daanti, ba pu ní naa ŋūǹ kí béé tin bíi jītí kɔŋkɔnneeyee?»

⁵⁷«Ba pu ní naa dàkafī kí lēē min bí deedeeyee ni-ba?»

⁵⁸Yeesu kútì ki lī yii: «Ubɔ yaa cáǹ-si ibɔsoon, ŋyunti ŋun ní ni dáá bí nsanni ki cée, pɔ́ɔǹ a-ba kí ŋāŋkì tibɔti kí kúntí-tì nsanni niin, án nín làá ŋá pu ú taa dáaĺ-si kí cùnnì ubɔsoonli cee, ní úǹ ń dū-si kí tīī pilisib ń cáá-si kí pìin̄ sarkee.

⁵⁹M tùkù-si ibaamɔn ní, bi yaa cáá-si ki tɔ́ sarkanee, see á pà a-pɔndi kɔkɔ nyíki nyiki, báà gboo kaa kīntí, ní bí nín líí-si.»