Read Ntcham Luc 13 Bible Online

Luc 13 - Ntcham bible

Luc 13

¹Ŋyunti gbantee ní binib biba dɔ́miń ki tùkū Yeesu yii Galiilee yab biba nìn bíi kù tiwaŋkuti ki ŋáań saraa ki tìì Unimbɔti, ní gɔmina Piilati yāntì bi dɔ́miń ki kūū-bi, ní bi-fatikuu nì tiwaŋkuti tin bi kūūyee fatikuu ŋmālim̀ tɔbin.

²Ní Yeesu bí-bi yii: «Mimmee, ni dàkafī yii Galiilee yabee nín kpíì nsansaaŋkúm gbantee, an dàkà yii bi sá binikpitib ki jítiǹ Galiilee yab bin kíǹee kɔkɔɔɔ?

³Aayee, baa sá, ama ni mun yaa kaa kpántì ni-ba, ni làá kpú kii bi mun nín nìn kpíì puee ní!

⁴Àá, ni dàkafī yii binib saalku nì bita bin Siiloowee difɔkɔku lítì ki tàb̄ ki kūūyee sá digaŋgam nib ki jítiǹ Jeerusaleem yab bin kíǹee kɔkɔ?

⁵Aayee, ama ni mun yaa kaa kpántì ni-ba, ni làá kpú kii bi mun nín kpíì puee ní.»

⁶Ní Yeesu gíti dū tibɔti nee ki ŋmāntì ki lī yii: «Uninja ubɔ di bí ní ki cóoǹ busubu bun bi yíì fiigee u-kpaabun. Dalbee, u cūtì kí kìtī abil, ní kaa ká.

⁷Ní u bí upaadaan un kpèé u-kpaabuee yii: <Kpèè, abin ata sèé m nín pée dòoń ki nyàab̀ busubu nee biliŋ, kaa kāntée. Gāā-bu kí fá. Ba pu ní bu yú ki jīǹ mpaan fám míǹ?>

⁸Ní upaadaanee bí yii: <Ukpil, gíti yàntī-bu dibindi nee, ḿ yɔ̀kɔtī bu-taapu kí ŋá tinaabin.

⁹M yaa ŋá míǹ, an yaa yíì, jiil bu làá lòoǹ, bu yaa kaa nín lòon̄ee, á nín gāā-bu kí fá.>»

¹⁰Ŋwiŋŋuŋfikaa ŋubɔ dalee, Yeesu nìn bíi dàkà binib Unimbɔti bɔti kukpafidii kubɔn.

¹¹Unimpu ubɔ nìn bí niin, arasinii ubɔ nìn ŋúb́-u doooo abin saalku nì ata ki yāntì an gúkúǹ-u u kpántì udeen, waa ti ŋūǹ kí yáatí báà fiii.

¹²Yeesu ká-uee, ní ki yíiń-u ní ki bí-u yii: «Unimpuee, a-weeŋyi yāntì-si,»

¹³ní ki dū u-ŋalii ki páaǹ u-pu. Kpalaa niin ní unimpuee yáatìi yúl̀ cáacaa, ní ki bíi pàkà Unimbɔti.

¹⁴Niinee, an kaa mɔ́ɔkiǹ kukpafidii kpiliu Yeesu nín cáaǹ unimpuee ŋwiŋŋuŋfikaa dalee, ní u tùkū bin kpáfì niinee yii: «Kinyɔŋ poonee iwiin iluu di sá báà ŋma ń dūú tɔ̄ u-tundi[93]. Míǹ puee, dāam̄maan iwiin iluuyee poon bí cáaǹ-ni, án taa nín̄ sá ŋwiŋŋuŋfikaa dal.»

¹⁵Ní Yeesu kíí-u yii: «Mpoonnyoondambi, kéè ŋwiŋŋuŋfikaa dalee, ni gbìntī ni-naai nì ni-mammu kunaakooun ki cáǹ-i i nyùɔɔ!

¹⁶Kin unimpu nee mun sá Abraam naantiiu ubɔ ní Sitaan bóob́-u doooo abin ali kpá mmuŋku. Úǹ di kaa nín máaǹ ḿ báatí-u dikpambaal ŋwiŋŋuŋfikaa dalaaa?»

¹⁷Yeesu nín kíí-bi mimmee, ní icoo kɔ́ u-nannanliibi gbanti, ama samaa un kíǹee nìn fàal̀ atunnyaan ŋin Yeesu nìn ŋáańee pu.

¹⁸Ní Yeesu gíti tí dū tibɔti tiba ki ŋmāntiǹ-bi yii: «M làá dū Unimbɔti Beel kí nántíǹ ba deeyaaa? Ba ní m làá dū-dì kí ŋmàntīǹ?

¹⁹Dì náań nì kisubiki kin bi yíì muutaadee bil ní ubɔ yōoǹ ki dūu búĺ u-kpaabun, ní dì nyáń ki kpántì busubu, ní nnɔmbiyaamu dɔ́miń ki páaǹ mu-diiŋŋi bu-paŋŋi pu.»

²⁰Ní u kútì ki lī yii. «Ba ní m gíti ŋūǹ kí dū Unimbɔti Beel kí ŋmàntīǹ?

²¹An náań nì ŋkpɔnɔnyɔkɔ ŋun ní unimpu dū ki ŋmālim̀ ŋkpɔnɔyim tikpil poon ki búuń, ní busaa kɔkɔ jɔ́m̀ee ní.»

²²Yeesu nìn còom̄ ki jītí ntiŋwaamu nì ŋkpaamu ki dàkà Unimbɔti bɔti ki cá Jeerusaleem.

²³Ní ubɔ bālifì-u yii: «Ukpil, binib fiii di làá dāá pée ká difiilaaa?» Ní Yeesu kíí-u yii:

²⁴«Pɔ́ɔm̀maan ni-ba kí dīmaan kipunyɔkɔwaai kí kɔ́ Unimbɔti beelin! Mbaamɔn ní m tùkù-ni, binib tikpil làá dāá nyàab̀ kí kɔ́, kaa làá dāá ŋmā.

²⁵«Unimbɔti kudiidaan yaa láa yíkì ki pīiǹ u-punyɔkɔkee, ni dāa kíǹ ki yú boon ki gbáà kipunyɔkɔ ní ki lì yii: <Ti-Dindaan, pìitī-ti!> Ní ú dāá kíí-ni yii: <Maa nyí laakin ní ni sée.>

²⁶Niinee ní ni dāa lì yii: <Ti nì si nìn jíń ki nyùn̄, a dɔ́miń ti-tiŋkin ki yúl̀ ti-daŋŋi pu ki dàkā Unimbɔti bɔti.>

²⁷Ní ú fàtīí kùbitī kí tùkù-ni yii: <Maa nyí laakin ní ni sée. Sútímaan niin kí wàatī-mi, nimbi bikpitiŋaliibee kɔkɔ.>

²⁸Niin ní ni làá dāá ká Abraam nì Isaaki nì Jaakɔb nì Unimbɔti bɔnaatiliibi kɔkɔ kā Unimbɔti Beelin, ní nimbee, bí dū-ni kí fá mmɔŋki, ní ní dāá sɔ̄ anyin gà tɔb kàkaka.

²⁹Binib làá dāá nyānní duulinya jaŋŋi kɔkɔn, kí dāan̄ kí kɔ́ Unimbɔti Beelin kí jī nnaam.

³⁰Bin bin sá kɔŋkɔnnee biluŋkikaabee, biba di dāa sá bipeepeekaabi, ní bin sá kɔŋkɔnnee bipeepeekaabee, biba dāa sá biluŋkikaabi.»

³¹Ŋyunti gbantee ní Fariisab biba dɔ́miń Yeesu cee ní ki bí-u yii: «Yīkì doo kí nīn cá laaba, kun puee Eeroodi nyàab̀ kí kpɔ̀-si.»

³²Ní Yeesu kíí-bi yii: «Cùú tùkùmaan Eeroodi un cáá iciin kii jiiŋkpaayee yii: <M làá jà arasiniibi kí cáaǹ bibunliibi díǹ nì fool, daapudalee, m dóò dee.>

³³An máaǹ ḿ còom̀ díǹ nì fool nì daapudal, kun puee an kaa pú nsan yii Unimbɔti bɔnaatiliibi ń kpú laaba an yaa kaa sá Jeerusaleem.

³⁴«Jeerusaleem yab, Jeerusaleem yab, nimbi bin kù Unimbɔti bɔnaatiliibi ki cáá ataŋkpee ki yāŋkí ki kù bin Unimbɔti túnnée, ataa aŋa pu ní maa nyàab̄ kí kóoǹ-ni kí kpāfì m-cee kii ukɔl nín kōontí u-biyaamu kí ŋá u-taapu kí dū u-feeŋyi kí bìin̄ mu-pu miŋyee! Ama ní ni yíì.

³⁵An puee Unimbɔti làá fá ni nì ni-diiku. Ibaamɔn ní m tùkù-ni, naa làá ti ká-mi kí nīn cí ŋyunti ŋun ni làá dāá sòoǹ m-pu yii: <Unimbɔti ń bìin̄ un u túnnée boonee.>»