Read Ntcham Luc 14 Bible Online

Luc 14 - Ntcham bible

Luc 14

¹Ŋwiŋŋuŋfikaa ŋubɔ dalee, ní Fariisab kpilib ubɔ yíiń Yeesu ú dāan̄ u-dumpu bí jī tijin. Yeesu bàn̄ee, ní bin bí niinee kā ki cɔ́ŋkí-u.

²Ucùúdaan ubɔ nìn kā u-nimbiin.

³Ní Yeesu bālifì bimaradakaliibi nì Fariisab yii: «Ti-marau pú nsan tí cáaǹ ubunli ŋwiŋŋuŋfikaa dalaaa, an kaa pú?»

⁴Ní baa kíí-u tiba. Ní u cúú ubunlee ŋal ní ki cáaǹ-u ní ki bí yii ú nīn kùǹ.

⁵Míǹ boonee ní Yeesu bí-bi yii: «Ni-kansikin ubɔ di yaa cáá jipɔɔn àá unaa, ní u yaa jéetì lɔkɔn ŋwiŋŋuŋfikaa dal, waa lèekī-u malaaa?»

⁶Ní baa ŋúń ki kíí-u an bɔti.

⁷Yeesu dáań ki ká yii bin bi yíiń bí dāan̄ kí jī tijinee bíi nyàab̀ ikakaamɔnti, ní u dū tibɔŋmantikaal ki sòon̄ nì bi-kɔkɔ ki lī yii:

⁸«Bi yaa yíiń-si tinimpucan jim ní a yaa bàn̄ee, taa kàl̄ nyɔkɔpu jal pu, an yaa yíì, bi yíiń unikpaan un jítiǹ-see mun.

⁹A dāa kpèéyee, un yíiń nimbi liitilee bāań a-cee ní kí bí-si yii: <Yīkì kí pɔ̄ ukpil nee mpaan.> Ní á yīkì nì icoo gbòooo kí nīn gítí boon boon kí cùú kàlīń.

¹⁰Míǹ puee, bi yaa yíiń-si njimee, cùú kàlīń boon, ní un yíiń-see yaa bāań ki ká-si a kāń boonee, ní ú bí-si yii: <M-bɔɔ, dāá kàl̄ nyɔkɔpu dijamɔntiil pu[94].> Niinee an sá diyindi ní ki tīī-si, sii nì bin kɔkɔ bí niin kí jēe nimbiin.

¹¹Míǹ mbaantiim ní un kamaa yaa yōoǹ u-ba yilpuee, Unimbɔti làá sìntīǹ-u taapu, ní un yaa sīntì u-ba taapuee, Unimbɔti làá yòon̄-u yilpu.»

¹²Ní Yeesu fātìi bí un yíiń-uee yii: «A yaa làá yíiń binib bí dāan̄ a-dumpu kí jī tijinee, taa yíiń a-bɔɔbi nì a-nabiyaamu, nì bin nàaǹ-see nì a-gaajajutiibi, kun puee bi mun ŋūǹ kí dāá ŋá míǹ kí yíiń-si mun. Mimmee bi pàn̄-si tin a nìn ŋá ki tīī-bee dee.

¹³Ama a yaa ŋá tijin ki làá yíiń binib bí dāan̄ a-dumpu kí jēe, á yíiń bisoodambi, bideembi, bifaliŋfaambi nì bijɔfub.

¹⁴A yaa ŋá mimmee, a làá nīn bí mmɔnni kun puee an nibee kaa ŋūǹ kí téeǹ-si, ní daliŋkin Unimbɔti yaa láa fīkitì deedeedambee, ní ú dāá pà-si.»

¹⁵Bin nì Yeesu nìn kā ki jīǹee kansikin ubɔ nín gbìl̄ an bɔtee, ní u bí Yeesu yii: «Un làá dāá jī Unimbɔti Beelin jikaatee bí mmɔnneeee!»

¹⁶Ní Yeesu kíí-u yii: «Unimbɔti Beel nín náań nì kuŋyee sèé: Kijapaai kiba di nìn bɔ́ntì njiŋkpaammi miba ní ki yíiń binib tikpil.

¹⁷Njimee yuntiŋu bāańee, ní u tú u-tɔntɔnliu yii ú cùú tùkù bin u yíińee yii: <Dāam̄maan, an kɔkɔ bɔ́ntì[95].>

¹⁸Ní bi-kɔkɔ bíi tìì inaakpal fám kun pu ní baa làá ŋmā kí cùee. Upeepeekaayee bí yii: <M cíkitì-si kifuulii, maa làá ŋmā kí dāan̄, kun puee m dá kusaau kubɔ, m máaǹ kí cùú kpèè-ku.>

¹⁹Ní ubɔ mun bí yii: <M cíkitì-si kifuulii, maa làá ŋmā kí dāan̄, di sá yii m dá inaa in bi cáa kù tikpaalee saalaa. M làá cáá-i kusaau kí màkan̄-i kí kpèè.>

²⁰Ní ubɔ mun tí bí yii: <M dáá pée cáá unimpucaan dee, an puee maa làá ŋmā kí dāan̄.>

²¹Ní utɔntɔnlee gítìń ki tùkū u-kpiliu binibee nín kíí-u puee. Niinee ní ukpil fōō diŋuul ní ki bí-u yii: <Nín̄ cá malaa kitiŋin sampaambi pu nì adan pu kí cáań bisoodambi nì bideembi nì bijɔfub nì bifaliŋfaambi!>

²²An kútì fiiiyee, ní utɔntɔnlee gítìń ki bí yii: <A nín bí yii ḿ ŋá puee, m ŋá míǹ, binib tikpil dɔ́miń, ama mpaan dáá gbíntìi bí.>

²³Ní ukpil bí-u yii: <Nín̄ cá isaasan pu nì ikpaabuku. A yaa pée ká binib biŋyee, á páb́-bi bí dāan̄ án nín làá ŋá pu m-diiku ń gbée.

²⁴Ibaamɔn ní m sòoǹ nì ni, bin kɔkɔ m bàà péé péé ki yíińee, báà ubɔ kaa làá dáká m-jinti nee.>»

²⁵Dinikitikpaandi diba nì Yeesu nìn táá ki còom̄. Ní Yeesu fātì ki bí-bi yii:

²⁶«Un yaa dɔ́miń man cee ki là kí kpántí m-boonnooliuee, see ú nīn néeń man ki jítiǹ u-baa nì u-na nì u-nimpuu nì u-biyaamu nì u-nabiyaamu, ní kí nīn néeń man ki jítiǹ úǹ u-ba.

²⁷Sii un yaa kaa yōoǹ a-dɔpuntikaaŋu ki túǹ kí nīn nóó-mee kaa ŋūǹ kí nīn sá man boonnooliu.

²⁸Ni-kansikin ŋma di yaa làá mā kudikpaaŋŋu, kaa kāl̀ ki cɔ́tì kunimbiŋmiiu kí béé animbil ŋin u cááyee yaa làá bà ú mā an diiku.

²⁹An yaa sá fám, u cōontí kudii ní kí dūú gbèen̄, kaa ti ŋūǹ kí púntí, ní bin kɔkɔ jītí ki wāĺ-kuee kíǹ ki bèel̄-u yii:

³⁰<Kpèè, kijapaai nee bàà kíĺ ki bíi māā kudii dee ní ŋŋmam kaa ti bí-u ú púntí.>

³¹Àá, ubɔti ulɔu di yaa làá cùú jáǹ u-bɔtijuti waa kàal̀ kí kpèè yii u-nib kutukub saalaa yaa ŋūǹ kí cùú jáǹ ubɔti un dòoń kí jáǹ-u nì binib kutukub mmuŋkuee.

³²U yaa kpēē yii waa làá ŋmēe, ŋyunti ŋun ubɔti un béeyee dáá bíń ndan ki dòońee ní ú tɔ̄ binib ń cù kí gbàam̀-u yii: <A là ḿ ŋá mana ní ŋgbansɔŋfi ń dāan̄ ti-kansikin ní?>»

³³Ní Yeesu gíti lī yii: «Míǹ mbaantiim ní ni-kansikin un yaa là kí nīn sá man boonnooliuee ń fá tin kɔkɔ u cááyee.»

³⁴«Ŋyaam sá tiwammɔntiil ní, ama ŋyaam yaa kpíìyee, mana ní bi làá ŋá ní mí fàtīí mɔ̄ɔkì?

³⁵Màa ŋān̄ bí dūú bíĺ kitiŋ án tīī ntiŋkpamaaa, kaa tí ŋān̄ bí dūú bíĺ tiwambɔlkaal taapu án lòoǹ mun. Asee bí dūú fá ditampundi pu. Un yaa cáá ditafalee ń pīlifì.»