Read Ntcham Luc 16 Bible Online

Luc 16 - Ntcham bible

Luc 16

¹Yeesu gíti kútì ki lī u-boonnooliibi yii: «Ugaaja ubɔ di bí ní ki cáá utɔntɔnli un kpèé u-wanti kɔkɔee, ní bi tùkū-u yii utɔntɔnlee cáá u-wanti ki bíiĺ.

²Ní u yíiń-u, ní ki bí-u yii: <An kaa mɔ́ɔkiǹ-mi m nín gbìl̄ tin a ŋáańee. Ŋá akɔntaa kí tīī-mi kí tùkù-mi a nín túń ditundi ki gíiǹ puee, kun puee aa làá nīn gíti kpèé m-wanti.>

³Ní utɔntɔnlee bālifì u-ba yii: <M-kpiliu làá jà-mi dee, m làá ŋá mana dee? Ḿ cùú nīn kù tikpaalaaa? Maa cáá mpɔn kí kpɔ̀. Ḿ cùú nīn mèéee? An cáá-mi icoo!

⁴M béè m nín làá ŋá pu ní bi yaa jìn̄-mee, binib ń fōō-mi bi-dumpuyee.>

⁵Niinee ní u yíiń bin kɔkɔ cáá u-kpiliu apɔɔnee ubɔ ubɔ, ní ki bālifì upeepeekaa yii: <Mana ní a cáá m-kpiliu dipɔndi ní?>

⁶Ní u bí-u yii <Ŋkpam aŋkɔrab dilaataal.> Ní u fātìi bí yii: <A-pɔndi gbɔŋku sèé, fōō kí kàl̄ kí ŋmà malaa yii a cáá dipɔndi aŋkɔrab ili nì saalaa.>

⁷Ní u bí un kíǹee yii: <Sii fáà, a-pɔndi sá mana?> Ní úǹ bí yii: <Idi kutukub dilaataal,> ní u bi yii: <A-pɔndi gbɔŋku sèé, fōō kí ŋmà idi kutukub imuŋku inaa.>

⁸Utɔntɔŋkpitee kpiliu nín gbìl̄ tin u ŋée, ní u pàkā-u u nín yáb́ ki ŋá miŋyee: di sá yii bin kaa sá Unimbɔti nibee wálifì bi-jutiibi bɔti pu ki jítiǹ bin sá u-yabee.»

⁹Ní Yeesu lī yii: «Man tùkù nimbi yii: Nín̄ cáámaan ni-gaajati ki ŋáań min fáatì Unimbɔtee, án nín làá ŋá pu, tì yaa láa kúntì ni-ceeyee, Unimbɔti ń fōō-ni kí kàan̄ ikɔŋkoon in bí jaanjaanee nee.

¹⁰Un ŋúb̀ tiwan fiii nì deedeeyee tí ŋúb̀ tiwaŋkpaandi mun deedee ní. Un kaa ŋúb̀ tiwan fiii nì deedeeyee kaa tí ŋúb̀ tiwaŋkpaandi mun nì deedee.

¹¹Ni yaa kaa ŋūǹ kí ŋúb́ duulinya gaajati tin kaa sá timɔntiilee, Unimbɔti kaa dāa dù u-gaajawammɔntiiti kí ŋúbíǹ-ni.

¹²Tin tin sá ubɔ wantee, ni yaa kaa ŋúb́-tì nì deedeeyee, Unimbɔti kaa tìì ni mun tin sá ni-yatee.

¹³«Utɔntɔnli ubɔ kaa ŋūǹ kí nīn bí bikpilib bili cee. Asee ú nīn ná ubɔ kí nīn néeń un kíǹee, kí dū u-ba kí tīī ubɔ, kí nīn kpèé un kíǹee fám. Naa ŋūǹ kí kpāfì Unimbɔti nì animbil kí nóó[99].»

¹⁴Fariisab nín gbìl̄ an bɔtee ní bi bíi bèel̄ Yeesu, kun puee bíǹ néeń animbil.

¹⁵Ní Yeesu bí-bi yii: «Ni là binib ń nīn wāĺ-ni yii ni sá deedeedambi. Ama Unimbɔti nyí tin kā ni-pɔbiliŋ poonee. Tin binib kpèé yii an sá tiwaŋkpaandee, an sá ntimbiil wanti ní Unimbɔti nimbiin.

¹⁶«Mooyiisi marab nì Unimbɔti bɔnaatiliibi nín sòoǹ tiŋyee nìn bí ki dāa sāā Yoowaneesi un fùul̀ binib Unimbɔti nyimee yuntiŋu. Ŋyunti ŋun Yoowaneesi bāańee ní binib gbìl̄ Unimbɔti Beel bɔti, ní báà ŋma kíǹ ki bíi mɔ̀ kí kɔ́ di-ni.

¹⁷An pɔ̀fì ki tīī kutagbɔŋu nì kitiŋ ń jītí ki jítiǹ marab ŋmaŋmabiku kubɔ ń kpìtī.

¹⁸«Un kamaa yaa jìn̄ u-nimpuu ní ki fātìi cáá upɔɔnee, udaan ŋá tilaakpaal Unimbɔti nimbiin, ní un cáá unimpu un u-cal jìn̄ee mun ŋá tilaakpaal Unimbɔti nimbiin.»

¹⁹Ní Yeesu bí yii: «Ugaaja ubɔ di nìn bí ki pèentí abɔkutinyaan ŋin pɔ̄ɔ̄ kudaau tikpilee ní ki pée bí ki jīǹ jiŋaal mmɔntiimin baabadal.

²⁰Usoodaan ubɔ nìn bí bi yíì-u Laasaar. U nìn dɔ̀ ugaajee punyɔkɔpu ibunsoon píń u-wunti pu.

²¹U bàà nìn là kí nīn tòó ugaajee nín jīǹ tin gbátí ki lítí kitiŋee kí kpíiǹ u-ba, ní iboo mun gíti dòoń ki líntí u-buuŋyi.

²²Usoodaanee dūu kpíì, ní Unimbɔti tuuŋyi dɔ́miń ki yōoǹ-u ki cáa nín jɔ́ḿ yilpu ki kāaǹ Abraam cee[100]. Ní ugaajee mun dāa dūu kpíì, ní bi síb́-u.

²³U bàn̄ ditaŋkpiilinee ki bíi jīǹ falaakpaan. U bí falaa poonee ki wáaǹ ki kpēēyee ki ká Abraam ndan, Laasaar kā u-cee.

²⁴Niinee ní u téeń mpɔn yii: <Ti-baa Abraam, sɔ̄ m-saai kí pée tɔ̄ń Laasaar ú dū u-ŋambiki kí sēē nnyim kí cáań kí mèel̀ m-limbil, kun puee m bíi jīǹ falaa ŋŋmi nee poon tikpil.>

²⁵Ní Abraam kíí-u yii: <M-biki, téetí yii a nín nìn bí duulinyanee, a nìn jíń mmɔn, ní Laasaar úǹ jíń falaa. Kɔŋkɔnnee u mun bíi fòol̄ u-mɔŋŋu dee, ní si mun bí falaani.

²⁶Áli gba mbookpaan ŋubɔ di pītì timbi nì nimbi kansikin. Bin yaa bàà là kí nyānní timbi cee kí cù nimbi ceeyee ń taa ŋmāaa, bin mun yaa bàà là kí nyānní nimbi ceen kí dāan̄ timbi cee dooyee mun ń taa ŋmā.>

²⁷Ní ugaajee bí yii: <Mimmee, m gbàam̄-si, á tɔ̄ Laasaar m-baa dumpu,

²⁸kun puee m cáá nnabiyaamu muŋmoo, ú cù kí kpāafì-bi bíǹ ń taa dāan̄ nnaabu ŋun poon man bí nee ni.>

²⁹Ní Abraam kíí-u yii: <Bi cáá tin Mooyiisi nì Unimbɔti bɔnaatiliibi ŋmàn̄ee, bí nóó tíǹ.>

³⁰Ní ugaajee bí yii: <Aayee, m-baa Abraam, ubɔ di yaa bàà fīkitì bitaŋkpiibi kansikin ki cūtèe, bi bàà kpántí bi-bimbim.>

³¹Ní Abraam fātìi bí-u yii: <Bi yaa kaa làá nóó Mooyiisi nì Unimbɔti bɔnaatiliibi nín ŋmàn̄ tiŋyee, báà ubɔ yaa nyáń bitaŋkpiibi kansikin ki fīkitì ki sòon̄ nì bi, baa làá fōō udaan bɔti kí kíí.>»