Read Ntcham Luc 17 Bible Online

Luc 17 - Ntcham bible

Luc 17

¹Ní Yeesu tí bí u-boonnooliibi yii: «Kun làá nīn yàntī binib ń nīn ŋáań ikpitee làá nīn pée bí ní. Ama mbusu dɔ̄ ki cí un pu ní án làá dīńee.

²Bi yaa bàà dū ŋŋmii ki kúĺ kutaŋkpanaau ki dūu léeǹ u-neen, ki cáá-u ki tɔ́ tiŋkun, an bàà sɔ́ nì ú yàntī ŋwaamu nee kiba ń lítí ikpitin.

³Ní nīn nyíǹ ni-ba tiŋan! «A-nabiki yaa ŋá ikpitee, á wòoǹ-u ú taa ti ŋá míǹ. U yaa bí yii u-bɔti kpíìyee, dūú pɔ̄-u.

⁴U yaa yīntiǹ-si áli miluli ŋwimbaanti ní ki dɔ́miń miluli gbantee ki tùkù-si yii: <M-bɔti kpíìyee,> dūú pɔ̄-u.»

⁵Ní Yeesu kpambaliŋ bí-u yii: «Ti-Dindaan, kūtì-ti fookii.»

⁶Ní ti-Dindaan kíí-bi yii: «Ni yaa bàà cáámaan fookii ní báà u yaa bí fiii kii dijɔnjɔmbilee[101], ni bàà ŋūǹ kí tùkù busubu nee yii: <Á kpìkitī laakin a yú nee kí cùú cóoń tiŋku poon,> ní bú ŋá ni nín lī puee.»

⁷«Ni-kansikin ubɔ yaa cáá utɔntɔnli, u gbāā ki kù-u tikpaal àá u kpàá-u tiwaŋkuti, ní utɔntɔnlee yaa nyánní kusaau ki bāańee, u kíikí kí tùkù-u yii: <Dāan̄ malaa kí dāá nīn jīǹ tijinaaa?>

⁸See ú tùkù-u yii: <Ŋá-mi tijin, kí kpántí a-bɔkutil kí yòon̄ tijin kí cáań-mi. Man yaa jíń ki nyùn̄ee, si mun ń nín jī a-yati.>

⁹Aa cáá ijaam kí jāam̀ a-tɔntɔnliu u nín túń ditundi din a tīī-uee pu.

¹⁰Míǹ mbaantiim ní an sá ni mun cee. Ni yaa ŋá tin Unimbɔti bí ní ŋée kɔkɔ ki dóòyee, lìmaan yii: <Timbi sá bitɔntɔnliibi bin kaa bí tibanee ní, ti-tundi din ti máaǹ kí tɔ̄ee ní ti túń nee.>»

¹¹Yeesu nín nìn còom̄ ki cá Jeerusaleemee, u nìn jítì Samaarii nì Galiilee kansikin ní.

¹²U làá kɔ́ kitimbilii kibanee ní binyaŋgbantiibi saalaa túŋkìń-u ki dɔ́miń ki yú kudandaŋu[102],

¹³ní ki káaǹ yii: «Ukpil Yeesu, sɔ̄ ti-saai!»

¹⁴Yeesu ká-bee ní ki bí yii: «Cáámaan ni-ba kí dàkà bisaraaŋaliibi[103].» Ŋyunti ŋun bi cée, ní bi pɔ́ɔkì.

¹⁵Bi-kansikin ubɔ nín dáań ki ká yii u pɔ́ɔkèe, ní úǹ gbēeǹ niin ki fātì u-taaŋi pu ní ki nín gítiń ki sòoǹ mpɔn ki pàkà Unimbɔti.

¹⁶U dɔ́miń ki tātìi dōoǹ Yeesu nimbiin dicincibil ki jáam̀-u. Kijapaayee nìn sá usamaariija ní.

¹⁷Ní Yeesu bí yii: «M cáaǹ binib saalaa ní, kin biwa bin kíǹee bí la?

¹⁸Mimmee báà ubɔ kaa dākafì kí gítiń kí nyɔ̄ŋkì Unimbɔti see unicaan nee babaaa?»

¹⁹Ní Yeesu bí-u yii: «Yīkì kí nīn cá, a-fookiiu di fīī-si.»

²⁰Fariisab bālifì Yeesu yii: «Ŋyunti ŋulɔŋu ní Unimbɔti Beel làá bàń ní?» Ní Yeesu kíí-bi yii: «Unimbɔti Beel kaa dòoń yéè kpìrrr bí ká-dì.

²¹Baa dāa lì yii: Kpèèmaan di bí dooyaaa, di bíń lapu doo, ama ní béé yii Unimbɔti Beel kíǹ ki bí ni-kansikin doo.»

²²Ní u bí u-boonnooliibi yii: «Ŋyunti ŋubɔ dòoń ni dāa nyàab̀ man Kinibiki wiiŋyi nee ŋubɔ, kaa làá ká.

²³Bi dāa tùkù-ni yii: <U bí doo ní!> <Aayee, u bí lapu ní!> Taa sāǹ kí cùmaan laaba.

²⁴Man Kinibiki dāantam wiiŋŋu dal dāa sá kii utaa nín ŋmóò ki ŋmíntí pu kí kíliń kutagbɔŋu kílilaŋki kí nīn cá ku-kuntilaŋkee ní.

²⁵Ama kí wàatī míǹ ń nín bàńee, see ḿ jī falaa tikpil, waanee nib ń dū-mi kí fá.

²⁶Tin nìn jítì Noowa yuntiŋuee, tíǹ tibaantiil di làá dāá ŋá man Kinibiki mun wiiŋŋu dal.

²⁷Binib nìn jīǹ, ki nyù, bininjab cāab̀ binimpoobi ní binimpoobi mɔ́ń ticati áli ki tin sāā ŋyunti ŋun Noowa dāa kɔ́ meelanee, ní nnyiŋgbeen dɔ́miń ki kúntì bi-kɔkɔ pílpil[104].

²⁸«An làá dāá pée tí ŋá kii Looti yuntiŋuee ní: binib nìn jīǹ, ki nyù, ní bin dāāyee dāā, ní bin nyáfée nyáfí, ní bin kù tikpaalee bí ki kù, ní bidimaliibi bí ki māā.

²⁹Ama daliŋkin Looti yíkì Soodoomee, ní farwata nì ŋŋmi nyánní yilpu kii utaayee ki nìn̄ kitiŋ pu ní ki wùn̄ ki kúntì bi-kɔkɔ nyíki nyiki[105].

³⁰«Daliŋkin man Kinibiki yaa láa páaǹnée, min làá dāá ŋée dee.

³¹Yaadal wiiŋŋuee, un yaa láa bí dicindee ń taa lì yii u làá kpákatí kí kɔ́ kudii poon kí yòon̄ u-wanti tiba[106], míǹ ní un bí kusaauee mun ń taa fàtīń mmɔŋki.

³²Téetímaan Looti nimpuu pu[107].

³³Un là kí fīī u-maŋfalee làá fá-dì. Ama un fá u-maŋfalee làá kpāafì-dì.

³⁴Ibaamɔn ní m tùkù-ni, an nyeekuee, binib bili dāa dɔ̄ kilambaŋ pu ní án yòon̄ ubɔ kí yàntī un kíǹee.

³⁵Binimpoobi bili dāa gbāā ki nà kunabaantiiu pu ní án yòon̄ ubɔ kí yàntī un kíǹee. [

³⁶Bininjab bili dāa gbāā kusaau ki kù, ní án yòon̄ ubɔ kí yàntī un kíǹee[108].»]

³⁷Ní u-boonnooliibi bālifì-u yii: «Ukpil, la ní míǹ làá dāá ŋée?» Ní Yeesu kíí-bi yii: «Laakin diwaŋkpil yaa dɔ̄ee, niin ní kaajiikub kpáfí[109].»