Read Ntcham Luc 19 Bible Online

Luc 19 - Ntcham bible

Luc 19

¹Yeesu bàn̄ Jeeriikooyee, ki bíi còom̄ ki jītí kitiŋin.

²Uninja ubɔ nìn bí niin, bi yíì-u Jaasee. U nìn sá bifɔtiliibi kpiliu ní ki sá ugaaja.

³Kijapaayee bàà pée nyàab̀ kí wāl̀ un ní Yeesu baasii sée, ama u nín sá kinigiŋgiŋee puee, waa nìn ŋūǹ kí wāl̀-u, kun puee binib nìn múkú Yeesu pu tikpil.

⁴Ní u sáǹ ki līntì nyɔkɔpu ki cūtìi jɔ́m̀ busubu pu kí wāl̀ Yeesu, kun puee Yeesu làá nìn jītí niin ní.

⁵Yeesu dūu bāań niinee, ní ki wáaǹ yilpu ní ki bí-u yii: «Jaasee, kpákatiń malaa, kun puee sii dumpu ní m làá kɔ́ díǹ.»

⁶Ní Jaasee ŋá malaa malaa ki kpákatìń ní ki fōō Yeesu ki cūnnì u-dumpu nì dipɔɔpindi.

⁷Bin nìn bí niin ki ká mimmee nìn bíi gbùkum̄ yii: «Uninja nee cūtì ki kɔ́ unikpiti dumpu dee.»

⁸Ní Jaasee síl̀ ti-Dindaan nimbiin ní ki bí yii: «Ti-Dindaan, kpèè, m làá lēē m-gaajati dijandi kí tīī bisoodambi, ní m yaa nìn mūul̀ ubɔ ki fōō animbil u-cee, m làá téeǹ-u min m mūul̀-uee minaa pu[111].»

⁹Ní Yeesu bí-u yii: «Difiil kɔ́nní kudii nee poon díǹ, kun puee uninja nee mun sá Abraam maaliŋun ní.

¹⁰Di sá yii man Kinibiki dɔ́miń kí nyàab̀ kí fīī bin nìn wáŋkèe ní.»

¹¹Ní Yeesu gíti kútì tibɔŋmantikaal nee ki lī bin nìn bí ki pílifíǹ-uee, kun puee bi nìn dàkafī yii u nín tóob́ Jeerusaleem nee, Unimbɔti làá dū-u kí kàan̄ Dibeel kɔŋkɔnnee ní.

¹²Ní u lī yii: «Uninja ubɔ di sá ubɔti maaliŋun, ní ki yíkì ki búntì kitiŋ kiba poon ndandati kí cù kí fōoń dibeel, kí gítiń u-tiŋki pu kí dāá kàl̄ tibɔtiil.

¹³Kí wàatī ú nín yīkèe, u yíiń u-tɔntɔnliibi kansikinee saalaa ní ki tīī bi-kɔkɔ kinimbifɔŋ kiba kiba bí nīn cáa bàntī ú dāan̄.

¹⁴Ama ní u-tiŋkin nib kaa là u-bɔti. U yíkì kpalaayee, ní bi tú binib u-boon bí cùú lì yii: «Timbi kaa là kijapaai nee ń nīn sá ti-bɔtiu.»

¹⁵Ama u nín cūtì bi kāaǹní-u dibeel u fātìńee ní u yíiń u-tɔntɔnliibi saalaa bin u nìn tīī animbil bí nīn cáa bàntēe kí kpèè yii bi bāntì ki ká mana.

¹⁶Ní upeepeekaa dɔ́miń ki bí yii: <Ukpil, a nín tīī-mi animbil ḿ dūú bàntēe, m bāntì ki ká míǹ saalaa mun ki kútì.>

¹⁷Ní u-kpiliu bí yii: <Mbòó, a sá utɔntɔmmɔnti, kun puee m tīī-si tiwan fiii ní a ŋúb́-tì nì deedee. An puee m kāaǹ-si á nīn sá ntimu saalaa bɔtiu.>

¹⁸Ní uliliiti mun bāań ní ki bí yii: <Ukpil, a nín tīī-mi animbil ŋiŋyee, m dūu bāntì ki ká míǹ miŋmoo pu ki kútì.>

¹⁹Ní ukpilee bí yii: <Si mun ń nīn sá ntimu muŋmoo bɔtiu.>

²⁰Ní ubɔ mun bāań, ní ki bí yii: <Ukpil, kpèè a-nimbiliŋ sɔ̀. M dūu kúĺ kiŋaabikin ki yóoǹ-si.

²¹M fāŋkì-si, kun puee a sá unil un bɔti pɔ̄ɔ̄yee. Kun saa yóoǹee, kúǹ ní a yòontí, ní ki cēē kun saa búĺee.>

²²Ní ubɔtee bí-u yii: <Utɔntɔŋkpiti ní a sá. Tin tin a sòon̄ee, tíǹ ní m làá gíiǹ kí dūú kpɔ̀ a-bɔti. A nyí m sá unil un bɔti pɔ̄ɔ̄yee, ní kun maa síiǹee ní m yòontí, ní ki cēē kun kun maa búĺee.

²³Kin, ba pu ní aa cáá m-nimbiliŋ kí ŋá baŋkan, m yaa láa fātìi gítìńee, ḿ bàà fōō m-nimbiliŋ nì ipaati?>

²⁴Ní u bí bin bí niinee yii: <Fōōmaan animbil u-cee kí dūú kūtì un cáá saalaayee.>

²⁵Ní bíǹ bí yii: <Ukpil, u cáá saalaayaa!>

²⁶Ní u kíí-bi yii: <M tùkù-ni yii, un kamaa yaa ŋúb́ tin u cááyee tiŋanee, bi dāa kútí-u ní. Ama un kamaa yaa kaa ŋúb́ tin u cááyee tiŋanee ní bí dāá fōō fiii un u cááyee.

²⁷An yaa kíǹ m-nannanliibi bin bí yii baa là ḿ nīn sá bi-bɔtiuee, cáaḿmaan-bi kí kpɔ̀-bi m-nimbiin doo.>»

²⁸Yeesu sòon̄ míǹ ki dóòyee, ní ki līntì bin táá-uee nyɔkɔpu ki búntì Jeerusaleem.

²⁹U nín tóob́ Beetifagee nì Beetanii, kigbantaŋ kin bi yíì Ɔliifi sufii joolee caŋinee[112], ní u dū u-boonnooliibi bili ki tú u-nyɔkɔpu ki tùkū-bi yii:

³⁰«Nín̄ cámaan kitimbilii kin bí ti-nyɔkɔpu nee. Ni yaa bàn̄ ki kɔ́ ki-nee, ni làá ká dimampɔmbil diba gbìn̄, din pu báà ubɔ kaa láá kāl̀ee, ní gbìntīmaan-dì kí cáań-mi.

³¹Ubɔ yaa bālifì-ni yii: <Ba pu ní ni gbìntī-dèe?> ní kíí-u yii: <Ti-Dindaan di nyàab̀ kimaŋ.>»

³²Bin Yeesu túee búntì ní ki bàn̄ ki ká kii u nín tùkūń-bi puee deedee.

³³Ŋyunti ŋun bi bíi gbìntī kimaŋee ní ki-dindambi bālifì-bi yii: «Ba pu ní ni gbìntī-kì?»

³⁴Ní bi kíí-bi yii: «Ti-Dindaan di nyàab̀ kimaŋ.»

³⁵Bi cáań dimampɔmbilee Yeesu cee ní ki pēetì bi-wampeeŋkaati ki páaǹ di-pu ní ki yāntì Yeesu kāl̀[113].

³⁶Yeesu còom̄ ki cée, ní binib kpátí bi-wampeeŋkaati ki bīil̀ nsan pu[114].

³⁷U bíi kpákatí Ɔliifi sufii jool pu ki tóobiń Jeerusaleemee, u-boonnooliibi kpáfì dinikitikpaandi an mɔ̄ǹ-bi tikpil bi fàal̀ ki pàkà Unimbɔti mpɔn maamaacib bin bi nìn ká Yeesu ŋáaǹee pu.

³⁸Ní bi lì yii: «Ti-Dindaan ń bìin̄ ubɔti un dòoń u-yindi puee boon. Ŋgbansɔŋfi bí yilpu ní tinyool sá ki tīī Unimbɔti[115]!»

³⁹Fariisab biba nìn bí kunipaaun, ní ki bí Yeesu yii: «Ukpil, tùkù a-boonnooliibi yii bí ŋmīĺee!»

⁴⁰Ní Yeesu kíí-bi yii: «M tùkù-ni ibaamɔn ní, báà bi nee yaa ŋmíl̀aaa, ataŋkpee làá kūuntì.»

⁴¹Yeesu nín tóobiń kí kɔ́ Jeerusaleem ki wál̀ kitiŋee ní u bíi sūǹ ki-nib pu,

⁴²ní ki bí yii: «Díǹ wiiŋŋu nee ni yaa bàà ŋūǹ kí béé kun ŋūǹ kí cáań-ni ŋgbansɔŋfee, ama kɔŋkɔnnee an bí-ni dibalin.

⁴³An puee iwiin iba dòoń ni-nannanliibi làá dāan̄ kí bíĺ ataŋkpuku kí màntīí tū ni-tiŋki, ní kí lùtīí gɔ́ń-kì kí táká-ni.

⁴⁴Bi làá kúntí ni nì ni-tiŋki kɔkɔ, kí taa kíń báà kudigbuŋu, kun puee naa béè ŋyunti ŋun Unimbɔti dɔ́miń kí jòoń-nee.»

⁴⁵Yeesu bāań Jeerusaleemee, ní ki kɔ́ kunimbɔtidiin, ki kíĺ ki bíi jì biwannyafiliibi,

⁴⁶ní ki tùkū-bi yii: «An ŋmàn̄ Unimbɔti gbɔŋkun yii: <M-diiku làá nīn sá ŋwimmeem diiku ní, ama ní nimbi dū-ku ki kpántì kunaayudii[116]!>»

⁴⁷Yeesu nìn kíǹ ki bí baabadal kunimbɔtidiin ki dàkà Unimbɔti bɔti, ní bisaraaŋakpilib nì bimaradakaliibi nì bitindaŋkpilib bíi nyàab̀ bi nín làá dī pu kí kpɔ̀-uee.

⁴⁸Ama baa nìn nyí min ní bi làá ŋée, kun puee kunipaau kɔkɔ nìn bí ki pílifíǹ Yeesu kaa là kí lóó u-nyɔɔbundi báà diba.