Read Ntcham Luc 2 Bible Online

Luc 2 - Ntcham bible

Luc 2

¹Ŋyuntee ní gɔminakpaan Oogusti yóoǹ mara yii bí kàaǹ ntimu kɔkɔ nib.

²Dikaampeepeekaalee nìn sá ŋyunti ŋun Kriniyusi nìn sá gɔmina Siirii tiŋkinee ní.

³Báà ŋma nìn cá u-naanja tiŋkin bí kàaǹ-u.

⁴Míǹ puee ní Jooseefi mun yíkì Naasaareeti Galiilee tiŋkin ki nín cá ubɔti Daafiidi dumpu Beetileem, Juudee tiŋkin, kun puee u nìn sá Daafiidi naantitɔntɔkɔl ní.

⁵U nì u-bɔɔn Maarii un nìn sá upɔdaanee di nìn cūtì dikàandi gbanti.

⁶Bi bí Beetileem niinee, ní ŋwiin ŋun Maarii làá màal̀ee dūu bāań.

⁷U nìn màl̄ u-biseemal kibininjabiki ní ki dū iŋaabu ki fìn̄-kì. U nìn dū-kì ki bíl̀ laakin bi ŋáań tiwaŋkuti timool tì ŋmóòyee, kun puee binib nìn gbí kunicandii poon, baa nìn ŋūǹ kí kɔ́ niin.

⁸Kitiŋ gbanti poonee, bipikpaaliibi biba nìn dɔ̄ tisatin ki kpàá bi-piii.

⁹Unimbɔti tuuŋŋu ŋubɔ nìn cílìń bi-pu, ní ti-Dindaan walifiŋu ŋmíntì ki māntì ki tú-bi ní bi fāŋkì tikpil.

¹⁰Ní ntuunee bí-bi yii: «Taa fàŋkìmaan! Dinyɔɔbummɔɔndi din làá mɔ̄ɔkiǹ báà ŋma tikpilee ní m cáań-ni.

¹¹Dinyɔɔbundi gbanti di sá yii díǹ nyeeku nee, bi màl̄-ni Ufiil ubɔ Daafiidi dumpu Beetileem. Úǹ di sá Kriisitoo, ti-Dindaan.

¹²Min ni làá dūu béé an bikee di sá, ni yaa bàn̄ee, ni làá ká ki dɔ̄ laakin bi ŋáań tiwaŋkuti timoolee, bi dū iŋaabu ki fìn̄-kì.»

¹³Kpalaayee, ní Unimbɔti tuuŋyi dikitikpaandi diba nyánní yilpu ki dɔ́miń ki kútì ŋun béeyee pu. I nìn kíĺ ki bíi nyɔ́ŋkí Unimbɔti yii:

¹⁴«Inyɔŋki sá ki tīī Unimbɔti un bí yilpu fɔ́ŋŋŋee, ní u-gbansɔŋfiŋu sá ki tīī taapu doo nib bin fáatì-uee.»

¹⁵Ituunee yíkì ki nín gítí yilpuee, ní bipikpaaliibee sòon̄ yii: «Tí cùmaan Beetileem! See tí ká tin di bāań ní ti-Dindaan yāntì bi dɔ́miń ki tùkū-tee.»

¹⁶Niinee ní bi yíkì malaa malaa ki búntì. Bi bàn̄ee, ki ká Maarii nì Jooseefi nì kibiki, kíǹ dɔ̄ laakin bi ŋáań tiwaŋkuti timool tì ŋmóòyee poon.

¹⁷Bi ká kibikee, ní ki máafì Unimbɔti tuuŋŋu nín dɔ́miń ki tùkū-bi kibiki gbanti bɔti puee.

¹⁸Binib bin kɔkɔ nìn gbìl̄ tin bipikpaaliibee sòoǹee nìn bākatì ní sèeee.

¹⁹Ama Maarii úǹ dū an bɔti kɔkɔ ki kpáafì u-pɔbilin ki dàkafī ti-pu.

²⁰Ní bipikpaaliibi fātìi nín gítí bi-pikpaaku laŋki ki nyɔ́ŋkí Unimbɔti ki pàkà-u bi nín gbìl̄ tiŋyee nì tin bi kée pu. Di sá yii ntuunee nín pée tùkū-bi puee, míǹ deedee ní bi ká.

²¹An tú winniiyee, bi gíí kibiki dikpancandi ní ki pú-kì diyindi yii Yeesu, kii Unimbɔti tuuŋŋu nín nìn pée tùkū u-na pu kí wàatī ú nín cáá dipoolee[17].

²²Ŋyunti ŋun sá bí ŋá Maarii akoobil kii Unimbɔti nín yāntì Mooyiisi ŋmàn̄ marab puee bàn̄ee[18], ní bi yōoǹ kibiki ki cáa cūnnì Jeerusaleem tiŋkin kí cáá-kì kí ŋá ti-Dindaan ŋaan.

²³An ŋmàn̄ ti-Dindaan marau poon yii: «Kibiseebiki yaa sá kininjabikee, an sá bí gàntī kíǹ ki-ba kí yóoń ti-Dindaan[19]

²⁴ní kí cáá abeenanjipɔmbil ali àá nnanjilimu muli kí ŋá saraa, kii ti-Dindaan nín síiǹ mara puee[20].»

²⁵Uninja ubɔ nìn bí Jeerusaleem, bi yíì-u Simeeyɔn. U nìn yú deedee ki tɔ́ Unimbɔti ní ki nìn kā ki cí un làá dāan̄ kí fīī Isirayeel yabee. Unimbɔti Fam nìn bí u-cee,

²⁶ní ki nìn tùkū-u yii u làá ká Meesiya ní kí nín kpú.

²⁷Unimbɔti Fam kpōotì Simeeyɔn ki kɔ́ǹ kunimbɔtidiin ŋyunti ŋun Yeesu na nì u-baa cáá-u niin kí ŋá mara nín bālifì miŋyee.

²⁸Simeeyɔn nìn fōō-kì u-ŋaan ki jáam̀ Unimbɔti ki lī yii:

²⁹«M-Dindaan, a nín nìn pōoǹ puee, an ŋá míǹ! Kɔŋkɔnnee, yàntī a-tɔntɔnliu ń kpú nì ŋgbansɔŋfi,

³⁰kun puee m-nimbil ká Ufiil

³¹un a bɔ́ntì ki yóoǹ inibool kɔkɔee.

³²Úǹ di sá ŋwalifi ŋun làá yàntī atimbul kɔkɔ ń béé-see. Úǹ di làá tīī a-nibul Isirayeel yab tinyool[21].»

³³Niinee, ní Yeesu baa nì u-na bākatì nì tibɔti tin Simeeyɔn bíi sòoǹ bi-biki puee.

³⁴Ní Simeeyɔn mēē Unimbɔti ń bìin̄ bi-pu. U mēē ki dóòyee, ní ki bí Maarii yii: «Kpèè, Unimbɔti lēē kibiki nee. Ki-puee Isirayeel yab tikpil làá lítí ní tikpil mun ń yīkì. Úǹ di làá dāá nīn sá Unimbɔti daaŋku kun binib làá dāá kpákaǹee,

³⁵ki làá dāá bìitī binib tikpil landɔkɔi in bál̀ bi-pɔbiliŋ poonee. Ama sii ubinaati, bi nín làá dāá ŋá-u puee làá dāá kɔ́ kí dóó-si, kii kitàataajiki ní bi dūu sāā a-pɔbilee.»

³⁶Unimpu ubɔ mun nìn bí, bi yíì-u Ana. U nìn sá Unimbɔti bɔnaatiliu. Fanuyeel un sá Aseer naantitɔntɔkɔlee bisal dee. U nín mɔ́ǹ ticatee, u ŋá abin aluli ní u-cal kpíì,

³⁷ní u gbíntì míǹ ki sá ukpiipu, kaa ti mɔ́ǹ, ní ki púĺ tikpil ki tin bàn̄ abin imuŋku inaa nì abin anaa. U nìn tūǹ Unimbɔti tundi ŋwiimpu nì kunyeeu ki bōob̀ kinyɔkɔ ki mèé Unimbɔti, kaa sútí kí wàatī kunimbɔtidii.

³⁸Ŋyunti gbanti ní unimpuee bàn̄ ki ŋmāntiǹ-bi kunimbɔtidiin ní ki bíi pàkā Unimbɔti, ní ki sòoǹ kibikee bɔti ki tùkù bin kɔkɔ kā ki cí Unimbɔti ń dāá fīī Jeerusaleem yabee.

³⁹Yeesu baa nì u-na ŋá ti-Dindaan nín yóoǹ mara bí ŋá puee ki dóòyee, ní bi fātìi nín gítí bi-dumpu Naasaareeti, Galiilee tiŋkin.

⁴⁰Kibikee nìn wīintí ki cíkití ki cáá iciin tikpil, ní Unimbɔti bīī ki-boon.

⁴¹Dibindi sá kamaayee, Yeesu baa nì u-na cá Jeerusaleem ní ki jīǹ Dilákatil jiŋaaliu.

⁴²Yeesu bàn̄ abin saalaa nì alee, u-baa nì u-na tí cá Jeerusaleem jiŋaal kii mara nín bālifì puee[22], ní ki kpáaǹ-u.

⁴³Bi jíń jiŋaal ki dóòyee, ní Yeesu úǹ gbíntì niin, ní u-baa nì u-na nín kùnní, kaa nyí yii Yeesu gbíntìń.

⁴⁴Bi nìn cōom̀ ŋwimmɔn ki dàkafī yii u bí bi-saŋkinjutiibi bin kíǹee cee. Boonee ní bi kíǹ ki bíi nyàab̀-u bi-nabiyaamu nì bi-bɔɔbi cee.

⁴⁵Baa ká-uee, ní ki nín gítí Jeerusaleem kí nyàab̀-u.

⁴⁶Winta dalee, ní bi dāa ká-u kunimbɔtidiin, u kā bimaradakaliibi kansikin ki pílifí bi nín sòoǹ puee, ní ki bàlifī-bi tibɔti.

⁴⁷Bin kɔkɔ nìn bí niin ki pílifée nìn bākatì u nín cáá iciin ki kíikí tibɔti miŋyee.

⁴⁸U-baa nì u-na bāań ki ká-u niinee, ní bi bākatì, ní u-na bí yii: «M-biki, ba ŋá ní a ŋá-ti mimmee! Man nì a-baa nyàab̄-si, ti-nimbiliŋ mántì.»

⁴⁹Ní u bí-bi yii: «Ba ŋá ní ni nyàab̄-mi? Naa nyí yii m máaǹ kí nīn bí m-Baa diikunaaa?»

⁵⁰Ama baa nìn gbìl̄ u nín sòon̄ puee taapu.

⁵¹Niinee ní u yíkìi nóó-bi ki nín gítí Naasaareeti, ní ki sīntiǹ u-ba ki tīī-bi. Ní u-na cúú tin kɔkɔ jítì kunimbɔtidiinee ki kpáafì u-pɔbilin.

⁵²Yeesu nìn wīintí ní u-ciiŋyi mun wīintí, ní u nìn mɔ̀tīi fáatíǹ Unimbɔti nì binib[23].