Read Ntcham Luc 20 Bible Online

Luc 20 - Ntcham bible

Luc 20

¹Dalba, Yeesu bíi dàkà samaa ki sòoǹ tibɔmɔntiil kunimbɔtidiinee, ní bisaraaŋakpilib nì bimaradakaliibi nì bitindaŋkpilib cílìń bi-pu,

²ní ki bí-u yii: «Nì nsan ŋulɔŋu pu ní a ŋáań tin bí nee ní? Ŋma di pú-si nsan á ŋá míǹ?»

³Ní u kíí-bi yii: «Ma mun làá bàlifì-ni tibɔti tiba.

⁴Ní tùkù-mi Yoowaneesi nín fùul̀ binib Unimbɔti nyimee, ŋma di tīī-u an pɔŋŋu ní? Unimbɔtaaa, binib?»

⁵Niinee ní bi kíĺ ki bíi sòoǹ bi-ŋmaniŋma yii: «Ti yaa kíí-u yii: <Unimbɔti di tīī-u an pɔŋŋu,> u làá lì yii: <Kin, ba ŋá ní naa fōō u-bɔti ki kíí?>

⁶Ti yaa tí kíí-u yii: <Binib di tīī-u,> kunipaau nee kɔkɔ làá yāŋkì-ti ataŋkpee kí kpɔ̀, kun puee báà ŋma nyí ibaamɔn yii, Yoowaneesi sá Unimbɔti bɔnaatiliu ní.»

⁷Niinee ní bi kíí Yeesu yii: «Taa nyí un di tīī Yoowaneesi mpɔn ú fàl̀ binib Unimbɔti nyimee.»

⁸Ní u fātìi kíí-bi yii: «Ma mun kaa làá tùkù-ni nì nsan ŋun pu ní m ŋáań mimmee.»

⁹Boonee ní Yeesu dū tibɔŋmantikaal nee ki bíi sòoǹ nì samaa yii: «Uninja ubɔ di kùn̄ fiinyi[117] kpaabu, ní ki dūu ŋúbiǹ bipaadambi, ní ki búntì nsan ki yúntìń.

¹⁰Isufee biliŋ kìtitam bāańee, ní u túnní u-tɔntɔnliu ubɔ bipaadambee cee ú fōō u-jandi kí cáań-u. Ní bi cúú-u ki gbáń ní ki jìn̄-u ki gíiǹ nì iŋaŋkulim.

¹¹Ní bukpaadaanee gíti túnní u-tɔntɔnliu ubɔ mun bi-cee ní bi tí cúú u mun ki gbáń ki kɔ́ǹ-u icoo ní ki jìn̄-u ki gíiǹ nì iŋaŋkulim.

¹²Ní u gíti tú utataati, ní bi cúú-u ki ŋá-u tiweendi ní ki jìn̄-u ki nyántì.

¹³Ní bukpaadaan bí yii: <M làá gíti ŋá mana? See ḿ dū m-jipɔɔn un m néeńee kí tɔ̄. An yaa yíì, bi làá fàŋkì úǹ.>

¹⁴Ama bipaadambee nín wál̀ u-jipɔɔn dòońee ní bi bíi lì tɔb yii: <Kpèè, un làá dāá jī bukpaa fool boonee dee! Tí kpɔ̀maan-u, bukpaa ń kpántí ti-yɔbu.>

¹⁵Ní bi cìb̄ ki cúú-u ki cáá-u ki nyántì ŋkpaabuku ní ki kūū-u.» Ní Yeesu bālifì-bi yii: «Kɔŋkɔnnee, bukpaadaan làá ŋá-bi mana?

¹⁶U dòoń ní kí kpɔ̀-bi ní kí dū u-kpaabu kí ŋúbiǹ biba.» Bin pílifèe nín gbìl̄ an bɔtee, ní bi lī yii: «Mbusu ń cù ndan.»

¹⁷Ní Yeesu dū u-nimbiliŋ ki báaǹ bi-pu, ní ki bālifì-bi yii: «Unimbɔti gbɔŋku poon nín ŋmàn̄ puee làá lì yii ba dee, yii: <Ditaŋkpal din bidimaliibi nìn dūu fée, díǹ di dāa kpántì ditaŋkpal din ŋúb́ kudii pɔŋŋuee[118].>

¹⁸Un kamaa di yaa lítì ditaŋkpal gbanti puee làá kɔ̄fì, ní un pu ní ditaŋkpalee yaa tàb̄ee, udaan làá nà ní dúsi dusi.»

¹⁹Niinee, bimaradakaliibi nì bisaraaŋakpilib bíi nyàab̀ isan kí cúú Yeesu, kun puee bi béè yii bíǹ pu ní u dū tibɔti gbanti ki ŋmāntì, ama binib nín nìn wīikí u-cee puee, bi fāŋkì.

²⁰Ní bi kíĺ ki bíi cɔ́ŋkí Yeesu ní ki nyántì binib biba ki túnní u-cee, bi dū bi-ba ki gíiǹ nnimɔntiyaamin kí píĺ-u tibɔti bí ŋmā kí cúú-u kí dūú ŋúbiǹ gɔmina ń dáaĺ u-tafal.

²¹Ní binibee bālifì Yeesu yii: «Ukpil, ti nyí yii tin a sòoǹee nì tin a dàkèe bí deedee, báà unil yaa yāntì ki bí miŋyee, aa fātìi tɔ́, ní ki dàkà nnimbɔtisan nì ibaamɔn.

²²Míǹ puee, á tùkù-ti, ti-marau pú-ti nsan yii tí pà lampoo kí tīī Room gɔminauaaa, an kaa pú?»

²³Yeesu béè bi nín bíi líbití-uee ní ki bí-bi yii:

²⁴«Cáaḿmaan-mi animbil.» Bi cáańee, ní u bālifì-bi yii: «Ŋma yindi nì u-yil di kā animbil pu na?» Ní bi kíí-u yii: «Gɔmina Seesaar.»

²⁵Niinee ní u fātìi bí-bi yii: «Dūmaan tin gɔmina yèe kí tīī gɔmina, kí dū Unimbɔti mun yati kí tīī Unimbɔti.»

²⁶Baa ŋúń ki ká u sòon̄ dinyɔɔbuŋkpitil diba binib nimbiin bí bàà ŋmā kí cúú-u. U nín nìn kíí-bi puee, bi bākatì, ní kaa ti ká tiba kí gàtī.

²⁷Boonee ní Sadusab biba dɔ́miń. - Bíǹ di sá dikitil din lì yii difìkitil kaa bée[119]. - Bi nìn bālifì Yeesu yii:

²⁸«Ukpil, Mooyiisi ŋmàn̄ mara ki síiǹ-ti yii: <Unil yaa cáá kinabiki ní u kpíì ki yāntì u-nimpuu, kaa màl̄ee, u-nabikee ń fōō ukpiipuee kí màal̀ kí téeǹ u-nabiki kin kpíìyee yil pu[120].>

²⁹Kun pu ti bàlifēe di sá, nnabiyaamu mululi di nìn bí, upeepeekaa cáá unimpu ní ki kpíì ki yāntì u-nimpuu, kaa màl̄.

³⁰Ní uliliiti fōō-u ní ki mun kpíì, kaa màl̄

³¹ní utataati mun míǹ. Binib bilulee kɔkɔ cáá-u ki tin tú ki kpíì kpíì kaa màl̄ mbiyaamu.

³²Boonee, unimpuee u-ba mun dāa kpíì.

³³Mimmee, difìkitil dalee, bi-kɔkɔ yaa láa fīkitèe, bi-kansikin ŋma di dāa yì unimpuee? Kun puee bíǹ binib bilulee kɔkɔ cáá-u ki ká.»

³⁴Ní Yeesu kíí-bi yii: «Duulinya nee poon ní bininjab cāab̀ binimpoobi, ní binimpoobi mun mɔ́ń bininjab.

³⁵Ama bininjab nì binimpoobi bin Unimbɔti ká yii bi máaǹ kí dāá fìkitī ditaŋkpiilin kí dāá kàl̄ duulinyapɔɔn un dòoń boonee, dinimpucaal nì dicamɔndi dāa kpá.

³⁶Baa dāa gíti kúù, ní ki dāa bí kii Unimbɔti tuuŋyi nín bí puee, ní ki dāa sá Unimbɔti jipɔmbi, kun puee bi fātìi fīkitì ditaŋkpiilin.

³⁷Mooyiisi nìn ŋmàn̄ ki cántì yii bitaŋkpiibi làá dāá fìkitī, laakin u sòoǹ kisugbooi kin nìn fōō ŋŋmee bɔtee. U nìn yíiń ti-Dindaan yii: <Abraam Nimbɔtiu, Isaaki Nimbɔtiu, Jaakɔb Nimbɔtiu[121].>

³⁸Unimbɔti sá bin wāĺee Nimbɔtiu ní, waa sá bitaŋkpiibi Nimbɔtiu, kun puee úǹ ceeyee bíǹ kɔkɔ kaa kpíì.»

³⁹Niinee ní bimaradakaliibi biba bí-u yii: «Ukpil, a nín sòon̄ puee ŋān̄ tikpil.»

⁴⁰Kun puee baa nìn gíti ŋūǹ kí bàlifì-u tibɔti tiba kí kpèè u-nyɔkɔn.

⁴¹Ní Yeesu bí-bi yii: «Nì mana ní ni ŋūǹ kí lì yii Meesiya sá Daafiidi naantiiu?

⁴²Daafiidi u-ba lī Inyɔŋki laŋyi gbɔŋku poon yii: <Ti-Dindaan tùkū m-Dindaan yii: Kàl̄ m-ŋaŋgiil pú yéè

⁴³kí nīn cí ŋyunti ŋun m làá yàntī a-nannanliibi ń kpántí a-taaŋi tɔ́kɔŋkaatee[122].>

⁴⁴Daafiidi u-ba yíì-u u-Dindaan ní: kin mana ní u ŋūǹ kí nīn sá Daafiidi naantiiu mun?»

⁴⁵Yeesu bíi sòoǹ kunipaau bíi pílifíǹ-uee ní u bí u-boonnooliibi yii:

⁴⁶«Ní nīn nyíǹ ni-ba nì bimaradakaliibi. Bi néeń ki pèentí abɔkutikpaan ki yìiǹ, ki néeń bí nīn jáaḿ-bi sampaambi pu, ní ki néeń ki kàal̀ nyɔkɔpu jaliŋ akpafidiinni nì diinabin,

⁴⁷ní ki fìkì bikpiipoobi wanti, ki mèé ŋwimmeem yúntí, kí dàkà binib yii bi sá bimɔntiibi. An puee ditafadaaldi din gíti lákatèe dɔ̄ ki cí-bi.»