Read Ntcham Luc 21 Bible Online

Luc 21 - Ntcham bible

Luc 21

¹Yeesu yáatì ki ká bigaajab nín tòó animbil saraa dakaaun pu kunimbɔtidiinee,

²ní u ká ukpiipusoodaan ubɔ cáań igboo ili ki tɔ́[123].

³Ní u bí yii: «Ibaamɔn ní m tùkù-ni, Unimbɔti nimbiinee, ukpiipusoodaan nee tɔ́ ki jítiǹ bin kɔkɔ kíǹee.

⁴Di sá yii bin kíǹee dū bi-nimbiliŋ ŋin pá baa làá dūú ŋá nì tibee ní ki tɔ́, ama ukpiipu nee nì u-sool poonee, u nín bàà cáá ŋin kí dā tijin kí jēe ní u cáań kɔkɔ ki dūu tɔ́ nee.»

⁵Binib biba nìn bíi sòoǹ kunimbɔtidii nyaaŋku pu, ataŋkpanyaan ŋin bi nìn dūu máń-kuee, nì tiwammɔntiil tin bi nìn dūu ŋá saraa ki tīī Unimbɔtee. Ní Yeesu bí-bi yii:

⁶«Kéè ni wāĺ kudii neeyaa, iwiin iba dòoń, naa dāa gíti kāntí ditaŋkpal diba tɔ́kɔ́ di-juti pu. An kɔkɔ làá dāá wīī ní.»

⁷Bi bālifì Yeesu yii: «Ŋyunti ŋulɔŋu ní tin a sòon̄ee làá bàń? Kudaaŋŋu kulɔkɔ di làá dàkà yii an tóobiń?»

⁸Ní Yeesu bí yii: «Ní nīn nyíǹ ni-ba ubɔ ń taa ŋmàtiǹ-ni, kun puee binib tikpil làá dāá dū man yindi kí kpántí bi-yaŋ, kí bí yii bíǹ di sá man, kí tùkù-ni yii ŋyunti bāań. Ama ní taa nóó-bi.

⁹Ni yaa láa gbìl̄ bi sòoǹ tijáti nì fìkil fikil kitiŋ puee, ni-pɔbiliŋ ń taa bīil̀. An máaǹ tíǹ kɔkɔ ń bàń kí wàatī. Ní nīn nyí yii duulinya kúntitam kaa dá láá yá.»

¹⁰Ní u gíti lī yii: «Kitiŋ kiba yab dāa yíkí ní kí jáǹ kiba yab, ní dibeel diba yab ń yīkì kí jáǹ diba mun yab.

¹¹Ajan tikpil puee, kitiŋ làá dāá cìŋkì ŋkpitim pu, ní bìlbil kúm nì ŋkùm làá dāá nyā atinjan kupaau poon. Tiwan tikpil làá dāá ŋá kí kɔ́ǹ binib tifaandi, ní tidaandi tikpaandi dāa pāantí kutagbɔŋu pu.

¹²«Kí wàatī tíǹ kɔkɔ ń bàńee, bi làá cūtì-ni kí sàaǹ-ni, kí cáá-ni ibɔsoon akpafidiinni, kí pìin̄-ni sarka. Bi làá cáá-ni bibɔtikpaambi nì biyidambi nimbiin man pu.

¹³Niin ní ni dāa kāntí mpaan kí sòoǹ nì bi tin ni nyí man puee.

¹⁴Míǹ yaa bāań-nee, ní bɔ́ntí ni-ba kí taa nín̄ yáliŋkí tin ni làá tin sòoǹ kí fīī ni-bee pu.

¹⁵Kun puee mama m-ba di làá dāá tīī-ni iciin nì tibɔti tin ni làá sòoǹ kí líí ni-nannanliibi, bí taa ŋmā kí kpákáǹ-nee.

¹⁶Ni-baabi nì ni-nab nì ni-nabiyaamu nì ni nì bin pēēyee, nì ni-bɔɔbi làá dāá dū-ni kí ŋúbíǹ ni-nannanliibi, ní bíǹ ń kpɔ̀ ni-kansikin biba.

¹⁷Báà ŋma làá dāá nīn ná-ni ni nín fōō man ki kííyee pu.

¹⁸Ama, nì míǹ kɔkɔee, ni-yikpiliku báà kubɔ kaa làá lēē ni-yil pu kí wāŋkì.

¹⁹Yūĺmaan mmɔntiimin, míǹ ní ni ŋūǹ kí dāá fīī ni-ba.»

²⁰«Ni yaa láa ká soojab dɔ́miń ki māntì ki tú Jeerusaleem tiŋkee, ní béé ŋyunti gbantee yii butɔbu làá jàkà-kì dee.

²¹An yuntiŋuee, bin yaa láa bíń Juudee tiŋkinee ń nīn sáń ki dàb̀ ajoon. Bin yaa láa bí Jeerusaleem tiŋkinee ń nīn sáń ki nyēē, ní bin yaa láa bíń tisatinee ń taa kpìnní mmɔŋki.

²²An dāa sá ipɔntoon wiiŋyi ní, kí ŋá kii Unimbɔti gbɔŋku poon nín ŋmàn̄ ki síiǹ puee[124].

²³Ama, falaa dɔ̄ ki cí bipɔdambi nì bimatib iwiin gbanti poon. An dāa sá kunimbaakpaaŋŋu ní kitiŋ kɔkɔn. Unimbɔti ŋuul làá dāá lítí dinibul nee pu tikpil.

²⁴Bi làá kpɔ̀ binib tikpil nì ntàataajimu, kí cúú tikpil kí cáá cùnnì kuyuŋu atimbun kɔkɔn, ní bin kaa nyí Unimbɔtee ń dāá jī Jeerusaleem kí tāā pùb, kí dāá sāā bi-yuntiŋu.»

²⁵«Ni làá dāá ká tidaandi ŋwìiń nì uŋmal nì iŋmalbijaa pu[125]. Kitiŋ puee, atimbun dāa bí ki yáliŋkí nì ŋi-ba, ní tiŋku nyiŋgbanti wooku dāa kɔ̄ntí-bi tifaandi.

²⁶Binib yaa dākafì tin bí ki dòoń kitiŋ puee, an faantee làá dāá kpɔ̀-bi. Ní ipɔn in bí kutaa puee ń dāá cìŋkì.

²⁷Ŋyunti gbantee ní bi dāa kāntí man Kinibiki dòoń ditagbandi pu ki jìl̀ pàlpal nì mpɔn nì tinyool tikpil[126].

²⁸Tin bí nee yaa láa bíi ŋáańee, nimbi ń mɔ̀tīí yūĺ kí ká kunyannyaau, ni-fiil tóobiń dee.»

²⁹Ní Yeesu dū tibɔŋmantikaal nee ki ŋmāntì-bi yii: «Kpèèmaan fiigi subu nì isufi in kɔkɔ kíǹee nín dàkà-ti tiŋyee.

³⁰Ni yaa ká i bíi túkù tifaapɔnee, ni béetí yii kuseeu tóobiń dee.

³¹Míǹ mbaantiim, ni yaa láa ká tin kɔkɔ m sòon̄ nì ni nee bíi jītée, béémaan yii Unimbɔti Beel tóobiń dee.

³²Ibaamɔn ní m tùkù-ni, nimbi waanee nib kaa làá kpú kí kúntí ní an bɔtee kɔkɔ ń bàń.

³³Kutagbɔŋu nì kitiŋ dāa bí kí kúntí, ama man bɔti kpá kí kúntí jaanjaan.»

³⁴«Ní nīn nyímaan nì ni-ba kí taa yàntī njinjim nì ndanyoon nì duulinya landɔkɔi ń jī mpaan ni-pɔbiliŋ poon. An yaa sá fám, Unimbɔti bɔsooŋyi wiiŋŋu gbanti làá dāá túuǹ-ni.

³⁵Ŋu dāa tòoń kii kulaaŋŋuee, kun puee an làá dāá bìin̄ kitiŋ kɔkɔ nì ki-nib pu ní.

³⁶Míǹ puee ní taa nín̄ gèem̀maan. Nín̄ mèémaan múlmul, mbusu wiiŋyi gbanti yaa láa bāańee, ní ká mpɔn kí ŋmátí tikɔkɔ poon, kí ŋmā kí dāá yūĺ man Kinibiki nimbiin.»

³⁷Kinyɔŋ gbanti poonee, baabadalee, Yeesu nìn dàkà Unimbɔti bɔti kunimbɔtidiin, ní kunyeeuee ú cù kitimbilii kin bí dijool din bi yíì Ɔliifi sufii joolee pu kí dòon̄.

³⁸Ní samaa kɔkɔ nìn kíntiń-u kutaafaau pɔ̀lpɔl kunimbɔtidiin kí pīlifì tin u sòoǹee.