Read Ntcham Luc 22 Bible Online

Luc 22 - Ntcham bible

Luc 22

¹Jiŋaal un bi ŋmóò kpɔnɔb bin baa ŋáań ŋkpɔnɔnyɔkɔ bi yíì-u Dilákatil jiŋaaliuee tóobiń[127].

²Ní bisaraaŋakpilib nì bimaradakaliibi nìn bíi nyàab̀ nsan kí cúú Yeesu, ama ní ki fàŋkí kunipaau.

³Niinee ní Sitaan kɔ́ Juudasi un bi yíì Isikaariyɔtee ni. U nìn sá Yeesu kpambaliŋ saalaa nì alee kansikin diba ní.

⁴Ní Juudasi cūtì ki ká bisaraaŋakpilib nì soojab bin cí kunimbɔtidiiyee kpilib, ki sòon̄ nì bi nsan ŋun pu u làá dī kí cúú Yeesu kí ŋúbíǹ-bee.

⁵Ní an mɔ́ɔkiǹ-bi ní bi síiǹ kunimbiŋmiiu kun bi làá tīī-uee.

⁶Ní u kíí ní ki kíĺ ki bíi nyàab̀ ŋyunti ŋun di kítì ú dū Yeesu kí ŋúbíǹ-bi, samaa ń taa bééyee.

⁷Jiŋaalee poonee, ŋwiin ŋun bi máaǹ kí kpɔ̀ apibilee bāań,

⁸ní Yeesu tú Peetroo nì Yoowaneesi yii: «Cùú ŋámaan Dilákatil jiŋaaliu jinti tí jī[128].»

⁹Ní bi bālifì-u yii: «La ní a là tí cù kí ŋá tijin gbanti?»

¹⁰Ní u bí-bi yii: «Ní pīlifì, ni yaa làá kɔ́ kitiŋinee ni nì uninja ubɔ làá tin kpāfì u tú dinyimbool. Ní táá-u kí kɔ́ kudii kun ni u yaa kɔ́ee,

¹¹kí bàlifì kudiidaan yii: <Ukpil bàlifī-si yii kudii kulɔkɔn ní u nì u-boonnooliibi làá jī jiŋaal jikaati ní?>

¹²Niinee, u làá dàkà-ni diditɔntɔkɔl puee, kudikpaaŋŋu kubɔ kun poon tikɔkɔ bɔ́ntì ki sée, niin ní ni làá ŋá tijikaal.»

¹³Ní bi búntì ki lafun bàn̄ ki ká min u lēe deedee, ní ki ŋá jiŋaalee jinti niin.

¹⁴Ŋyunti bāań Yeesu nì u-kpambaliŋ kāl̀ ki bíi jīǹ tijinee,

¹⁵ní u bí-bi yii: «M lēē m-pɔbilin páaa yii man nì ni ń jī Dilákatil jiŋaaliu nee kí wàatī ní ḿ nín jī falaa.

¹⁶M tùkù ki cántí-ni yii m gíti kpá kí jī jiŋaal nee kí nīn cí daliŋkin u-taapu làá nyā mpaampiin pu Unimbɔti Beelinee.»

¹⁷Niinee ní u yōoǹ ndaam, ní ki jáam̀ Unimbɔti ní ki bí yii: «Fōōmaan kí nyɔ̀ kí kíń tɔb.

¹⁸M tùkù ki cántí-ni yii m gíti kpá kí nyɔ̀ ndaam nee kí nīn cí ŋyunti ŋun Unimbɔti Beel làá dāan̄ee.»

¹⁹Boonee ní u yōoǹ kpɔnɔ ní ki jáam̀ Unimbɔti ní ki gífì ki tīī-bi ní ki bí yii: «Doo di sá m-wunti tin m tīī ni-puee. Nín̄ ŋáaḿmaan míǹ ki téetí m-pu.»

²⁰Bi ŋmɔ́ ki dóòyee, ní u gíti yōoǹ ndaam mbaantiim ki tīī-bi ní ki bí yii: «Ndaam nee di sá mpèépɔɔn ŋun làá nīn bí Unimbɔti nì binib kansikinee. M-fatikuu un làá nyā nimbi puee di tìì an poondi gbanti[129].

²¹«Kpèè, un làá dū-mi kí tīī m-nannanliibee bí doo, man nì un jīǹ disambibaantiilinee[130].

²²Tiŋman, man Kinibiki làá kpú kii Unimbɔti nín nìn lī ki síiǹ puee, ama mbusu dɔ̄ ki cí un di làá dū-mi kí nyāfiǹ m-nannanliibee.»

²³Ní bi kíĺ ki bíi bàlifī tɔb yii: «Ŋma di bí ti-kansikin ki làá ŋá míǹ?»

²⁴Niinee ní Yeesu kpambaliŋ kíĺ ki bíi kpákà ki là kí béé bi-kansikin un di làá nīn sá ukpaanee.

²⁵Ní Yeesu bí yii: «Atimbun bɔtiibi wɔ́b́ binib bin pu bi kā dibeelee ní, ní biyidambi là bí nīn yíì-bi bilaŋŋaŋfitiibi.

²⁶Ama án taa nín̄ sá míǹ nimbi cee. Un sá nimbi cee ukpaanee ń nīn sá kii kiwaayee, ní un là kí nīn sá uyidaanee ń kpántí ni-tɔntɔnliu.

²⁷Ŋma di sá ukpaan ní? Un kā ki jīǹeeyaaa, un yú ki tìì tijinee ní? Un kā ki jīǹee di sá ukpaan. Ama man sá ni-kansikin kii utɔntɔnlee ní, míǹ puee ni mun ń nīn bí kii mamee.

²⁸«Nimbi di bí m-cee m-falaabi poon baabadal, kaa fá-mi.

²⁹Míǹ puee m-Baa bɔ́ntì dibeel kí tīī-mi. Míǹ mbaantiim ní ma mun bɔ́ntì Dibeel kí tīī-ni.

³⁰Ní ŋyunti ŋun m làá kàl̄ Dibeelee, ni làá kàl̄ m-cee m-Beelin kí jī kí nyɔ̀, ní kí kàl̄ abeejal pu kí nīn sòoǹ Isirayeel yab naakɔti saalaa nì tilee bɔti.»

³¹Ní ti-Dindaan lī yii: «Siimɔn, Siimɔn, á pīlifì, Sitaan bālifì kí bàkal̀-si kii bi nín bàkal̄ idi puee.

³²Ama m mēē a-pu án nín làá ŋá pu a-fookiiu ń taa wāŋkèe. Boonee a yaa láa fātìi kpántì a-bee, á dāá nyàatī a-nabiyaamu.»

³³Ní Peetroo bí-u yii: «Ukpil, man bɔ́ntì ki cí, an yaa sá sarkaaa, man nì si di làá kɔ́, an yaa tí sá ŋkúmaaa, man nì si di làá kpú.»

³⁴Ní Yeesu fātìi kíí-u yii: «Peetroo, ibaamɔn ní m tùkù-si, díǹ gba kí wàatī ukooja ń bāakèe, a làá néé yii saa nyí-mi, diba dibee mita pu.»

³⁵Ní Yeesu gíti bí-bi yii: «M nín nìn tú-ni ki bí yii ní taa yòon̄ animbil nì ditɔkɔl, nì anaatakee, tiba nìn lóò-naaa?» Ní bi kíí yii: «Aayee.»

³⁶Ní u bí-bi yii: «Kɔŋkɔnnee un yaa cáá animbilee ń yòon̄, un cáá ditɔkɔlee mun ń yòon̄, un kaa cáá kitàataajikee ń nyāfì u-bɔkutil kí cùú dā.

³⁷Di sá yii m tùkù ki cántí-ni yii, see án bàń m-pu kii an nín ŋmàn̄ ki síiǹ Unimbɔti gbɔŋku poon puee, yii: <Bi kàan̄-u ki tɔ́ bikpitibin[131].> Tiŋman tin kɔkɔwoooo Unimbɔti bɔnaatiliibi ŋmàn̄ ki síiǹ m-puee làá ŋá míǹ.»

³⁸Niinee ní u-boonnooliibi bí yii: «Ukpil, kpèè, ntàataajimu muli sèé.» Ní Yeesu bí-bi yii: «An ŋmāntì.»

³⁹Bi lī míǹ ki dóòyee, ní u nyáń ki búntì Ɔliifi sufii jool pu kii u nín pée kpààa cá puee. Ní u-boonnooliibi nóó-u.

⁴⁰Bi bāań niinee ní u bí-bi yii: «Ní nīn mèémaan kí taa gèeǹ án nín làá ŋá pu ni yaa kɔ́ icɔŋkinee, ní taa lítée.»

⁴¹Ní u sútì ki cūtì nyɔkɔpu ki ŋmāntì kii bi nín tòó ditaŋkpal puee ní ki gbāaǹ ki mēē yii:

⁴²«M-Baa, a yaa là, kàkatī falaa un an sá ḿ nyɔ̀ nee kí wàatī-mi. Nì míǹ kɔkɔee, án taa nín̄ sá man lammi ní ń ŋá, án nīn sá sii yam.» [

⁴³Niinee ní Unimbɔti tuuŋŋu ŋubɔ nyánní yilpu ki dɔ́miń ki tīī-u kunyannyaau.

⁴⁴Dinimbinaamandi din nìn kɔ́-uee puee, u nìn mɔ̄tìi bíi mèé tiŋan tiŋan, áli u-tuntuŋku tin kpántì kii afatikudindikee ki lítí kitiŋ[132].]

⁴⁵U mēē ki dóòyee ní ki yíkì ki nín gítiń u-boonnooliibi cee. U bāańee, bíǹ dɔ̄ ki gèeǹ, ki gīī púb, kun puee kunimbaau nìn kɔ́-bi tikpil.

⁴⁶Ní u fīntì-bi ki bālifì-bi yii: «Ba pu ní ni gèeǹ? Yīkìí mèèmaan kí taa ti gèeǹ, án nín làá ŋá pu ni yaa kɔ́ icɔŋkinee, ní taa lítée.»

⁴⁷Yeesu kaa láá sòon̄ ki ŋmíl̀, ní dinikitil diba cílìń. Juudasi un sá u-kpambaliŋ kansikin dibee līiń bi-nyɔkɔpu, ní ki sútì ki pìlìń Yeesu kí kpàl̄-u.

⁴⁸Ní Yeesu bālifì-u yii: «Juudasi, mimmee nì dikpàldi poon ní a làá dū man Kinibiki kí ŋúbíǹ m-nannanliibaaa?»

⁴⁹Yeesu boonnooliibi béè yii bi là kí cúú-uee, ní bi bālifì-u yii: «Ti-Dindaan, tí dū ntàataajimu kí gàatì-baaa?»

⁵⁰Niinee, bi-kansikin ubɔ dū kitàataajiki ki gāā ki wúkutì usaraaŋakpil tɔntɔnliu ŋaŋgiitafal[133].

⁵¹Ama ní Yeesu bí yii: «Yàntīmaanee! An ŋmāntèe,» ní ki gbēē utɔntɔnlee tafal, ní u pɔ́ɔkì.

⁵²Ní Yeesu bālifì bisaraaŋakpilib nì bin cí kunimbɔtidiiyee kpilib, nì bibɔsoonliibi bin dɔ́miń kí cúú-uee yii: «Ba pu ní ni ŋúbiń ntàataajimu nì atambɔn kí dāá cúú-mi kii m sá unikpitee?

⁵³Man nì ni di pée bí kunimbɔtidiin baabadal, ba pu ní naa cúú-mi niin? Ama ŋyunti bāań ni nì dibɔmbɔndi bɔtiu ń tɔ̄ ni-tundi.»

⁵⁴Ní bi cúú Yeesu ki cáá-u ki búntì usaraaŋakpil dumpu, ní Peetroo nóó-u aboon aboon.

⁵⁵Bi nìn kpāā ŋŋmi dicindi kansikin ki bíi wùl̀, ní Peetroo dɔ́miń ki kāl̀ bi-cee.

⁵⁶Usapɔɔn ubɔ nìn tūǹ ditundi niin. U ká Peetroo nín kā ki kɔ́ĺ ŋŋmee, ní u dū u-nimbil ki báaǹ u-pu ki kpēē-u címmm, ní ki bí yii: «Uninja nee mun bí kijapaai kin bi cúú nee cee ní.»

⁵⁷Ní Peetroo néé yii: «Unimpu, man kaa nyí-u.»

⁵⁸An kútì fiiiyee, ní ubɔ mun gíti ká-u, ní ki bí yii: «A mun sá bin nóó-uee kansikin ubɔ ní.» Ní Peetroo kíí-u yii: «Maa sá u-yɔu.»

⁵⁹An yúntì ki bàn̄ kii kukúluu kubɔ nyɔkɔmee, ní ubɔ mun gíti bí yii: «An pée sɔ̄ kí lā, uninja nee mun nìn bí kijapaai nee cee ní, kun puee u sá Galiilee ní.»

⁶⁰Ní Peetroo kíí-u yii: «M-bɔɔ, maa nyí tin tin a sòoǹee.» U bíi sòoǹee, niin niin ní ukooja báakì.

⁶¹Ní ti-Dindaan fātìi kpēē Peetroo dímmm. Niinee ní Peetroo téetì ti-Dindaan nín bàà tùkū-u puee yii: «Díǹ, a làá néé yii saa nyí-mi diba dibee mita pu ní ukooja ń bāakì.»

⁶²Ní Peetroo nyáń ki bíi sūǹ ki yáliŋkí.

⁶³Binib bin nìn cí Yeesuee nìn bíi bèel̄-u ní ki gbáà-u,

⁶⁴ní bi dū ŋŋaabu ki bóob́ u-nimbiin ní ki lì-u yii: «Béé un fáá-see kí lì.»

⁶⁵Bi nìn gíti sīī-u asiibil tikpil ki kútì.

⁶⁶Kutaa wúntèe, Juuda yab tindaŋkpilib nì bisaraaŋakpilib nì bimaradakaliibi kpáfì ki làá sòoǹ u-bɔti, ní ki yāntì bi cáá-u ki cūnnì bi-cee.

⁶⁷Ní bi bālifì-u yii: «Tùkù-ti sii di yaa sá Meesiya?» Ní u kíí-bi yii: «Báà m yaa pée tùkū-naaa, naa làá fōō kí kíí,

⁶⁸m yaa tí bālifì-ni tibɔtaaa, naa làá kíí-mi.

⁶⁹Ama kí kíĺ kɔŋkɔnnee kí nīn cée, man Kinibiki làá nīn kā Unimbɔti Mpɔŋkɔdaan ŋaŋgiil pú[134].»

⁷⁰Ní bi-kɔkɔ bí yii: «Mimmee a sá Unimbɔti Jipɔɔn deeyaa!» Ní u kíí-bi yii: «Kii nimbi ni-ba nín lī puee.»

⁷¹Niinee ní bi bí yii: «Ti làá gíti ŋá ba biseeradambi! U sòon̄ timbi ti-ba gbìl̄ dee.»