Read Ntcham Luc 23 Bible Online

Luc 23 - Ntcham bible

Luc 23

¹Ní bikpilibee kɔkɔ yíkì ki yōoǹ Yeesu ki cáa cūnnì gɔmina Piilati cee,

²ní ki bíi mɔ́ntí ki tūntí u-pu yii: «Ti ká kijapaai nee bíi gáatí ti-nib yiliŋ yii bí taa pà lampoo kí tīī gɔminakpaan Seesaar, ní ki bí yii úǹ u-ba sá Meesiya, ubɔti.»

³Ní Piilati bālifì-u yii: «Sii di sá Juuda yab bɔtiuaaa?» Ní Yeesu kíí-u yii: «Sii di lī[135].»

⁴Niinee ní Piilati bí bisaraaŋakpilib nì binib kɔkɔ yii: «Maa ká kijapaai nee pu tikpitil báà tiba.»

⁵Ní bi yíì, ki mɔ̀tīi sòoǹ mpɔn yii: «U yìiǹ ní ki dàkà ki gáatí binib ń taa nín̄ tɔ́ gɔmina. U kíliń Galiilee ní ki dɔ́miń ki jítì Juudee tiŋki kɔkɔ poon ní ki dāa bāań timbi cee doo.»

⁶Ŋyunti ŋun Piilati gbìl̄ mimmee, ní u bālifì yii: «Kijapaai nee sá ugaliileeja níii?»

⁷Bi nín kíí-u yii Yeesu lafun nyánní Galiilee kitiŋ kin ni Eeroodi sá ubɔtee, ní u dū Yeesu ki tīī Eeroodi un nìn dɔ́miń Jeerusaleem ŋyunti gbantee.

⁸Eeroodi nín ká Yeesuee, an mɔ́ɔkiǹ-u tikpil, di sá yii u nìn gbìl̄ bi sòoǹ Yeesu pu an yúntì, u bàà pée nyàab̀ kí ká-u ú ŋá maamaaci ubɔ ú ká.

⁹Ní u bālifì-u anyɔɔbun tikpil, ama Yeesu kaa kíí-u báà dinyɔɔbumbaantiil.

¹⁰Bisaraaŋakpilib nì bimaradakaliibi nìn bí niin ki sòoǹ mpɔn ki mɔ́ntí ki tūntí u-pu.

¹¹Ní Eeroodi nì u-soojab kíĺ ki bíi bèel̄-u ki kpèé-u fám, ní ki dū dibɔkutinyaandi diba ki pēeǹ-u mbɔtiyaamin ní ki fātìi gíiǹ-u ki tīī Piilati.

¹²Ŋwiin gbantee ní Piilati nì Eeroodi kansikin mɔ́ɔkì ní bi kpántì bibɔɔtiibi, dooooyee baa nìn kpí.

¹³Niinee ní Piilati kóoǹ bisaraaŋakpilib nì biyidambi nì samaa kɔkɔ ki kpáfì,

¹⁴ní ki bí-bi yii: «Ni cáań-mi unil nee yii u bíi gáatí binib, ní m bālifì-u ni-kɔkɔ nimbiin tibɔkpitil tin ni bí yii u ŋée, ama man kaa ká báà tiba u-pu.

¹⁵Eeroodi mun kaa ká u-bɔkpil, an pu ní u gíiǹní-u ki tīiń-ti. Kijapaai nee kaa ŋá tiba tin máaǹ ŋkúmee.

¹⁶Míǹ puee m làá yàntī bí gbá-u anaalab ní kí gíiǹ-u kí líí.» [

¹⁷Dilákatil jiŋaaliu kamaayee an nìn sá Piilati ń líí-bi usarkadaan ubɔ[136].]

¹⁸Ní bi-kɔkɔ kíĺ ki bíi tátí dicilpu yii: «Bí kpɔ̀ kijapaai nee kí gíiǹ Baaraabaasi kí líí.»

¹⁹- Bi nìn cúú Baaraabaasi gbanti ki tɔ́ sarkan kun puee u nìn yíkì kí já nì gɔmina ní ki kūū unil mun. -

²⁰Piilati nìn nyàab̀ kí líí Yeesuee, an pu ní u nìn gíti būsì ki sòon̄ nì samaa.

²¹Ama ní bi bíi kūuntí yii: «Bí kpáá-u ndɔpuntikaa pu, bí pée kpáá-u ndɔpuntikaa pu.»

²²Ní Piilati fātìi tí lī ntataatiim yii: «Tibɔkpitil tilati ní u baasii ŋá ní? Man kaa ká diyìntil diba u-pu din pu ní u máaǹ ŋkúmee. Míǹ puee m làá yàntī bí gbá-u anaalab kí gíiǹ-u kí líí.»

²³Ama ní bi yíì, ki mɔ̀tīi pée tátí mpɔn yii bí kpáá-u ndɔpuntikaa pu. Bi-tantatii nìn yāntì Piilati gīī ní ki fōō bi-nyɔkɔ.

²⁴

²⁵Ní u gíiǹ uninja, un nìn yíkì ki jáà nì gɔmina ki kūū unil muee ki líì, ní ki dū Yeesu ki tīī-bi bí ŋá-u bi nín là puee.

²⁶Bi yōoǹ Yeesu ki cáǹ kí kpááyee, ní ki dūu tú Siimɔn un sá Siireen tiŋkinee, u nìn nyánní kusaau. Ní bi cúú-u ní ki dū ndɔpuntikaa ki būkuǹ-u ú nīn bùkū ki pá Yeesu boon.

²⁷Dinikitikpaandi nìn dī Yeesu, ní binimpoobi mun nìn sūǹ ki yáliŋkí u-pu.

²⁸Ní Yeesu fātìi bí-bi yii: «Jeerusaleem nimpoobi, taa nín̄ sūm̀maan man pu, nín̄ sūm̀maan nimbi ni-ba nì ni-biyaamu pu.

²⁹Kun puee ŋyunti bí ki dòoń ŋun ni bi dāa lì yii: <Biŋmaŋŋmantiibi bin kaa pée màl̄ ki kée, bin mbiyaamu kaa ŋáam̀ bi-biiŋee bí mmɔnneeee!>

³⁰Ní binib dāa lì ajoon yii: <Lítímaan ti-pu!> Ní kí lì ŋgbantamu yii: <Nyìkim̄maan ti-pu!>

³¹Bi yaa ŋá man un sá bususɔmbuee mimmee, kin nimbi bin sá isukulimee fáà?»

³²Soojab cáań bininjab bili, bi sá digaŋgam dambi ki kútì Yeesu pu kí kpɔ̀ bi mun.

³³Bi bàn̄ laakin bi yíì kuyikpabikuee, ní ki dū-u ki kpáá ndɔpuntikaa pu úǹ nì digaŋgam dambi bilee, ubɔ u-ŋaŋgiil pú, un kíǹee u-ŋaŋgan pú.

³⁴Ní Yeesu bí yii: «M-Baa, dūú pɔ̄-bi, kun puee baa nyí tin bi bíi ŋáań nee taapu.» Ní bi tɔ́ kasi bi-kansikin ki yākatì u-bɔkutiŋ[137].

³⁵Ní kunipaau yú ki kpèé, ní Juuda yab yidambi bí ki bèel̄-u[138] yii: «U fīī bin kíǹee, u yaa lafun sá Meesiya, un Unimbɔti lēēyee, ú fīī u-ba mun.»

³⁶Ní soojab mun bí ki bèel̄-u, ní ki cáań ndaam min gàm̀ee ki tīī-u ú nyɔ̀[139],

³⁷ní ki bí-u yii: «A yaa sá Juuda yab bɔtiu, á fīī a-ba.»

³⁸Ní bi ŋmàn̄ u-yilpu yii: «Un bí nee di sá Juuda yab bɔtiu.»

³⁹Ní digaŋgam dambi bin bi kpáá ki kútì u-puee ubɔ mun bí ki sìí-u yii: «Sii di kaa sá Meesiyaaa? Fīī a-ba kí fīī kí kpáaǹ ti-muaa!»

⁴⁰Ní u-juti bíi wòoǹ-u yii: «Sii nì úǹ kɔkɔ bí ditafadaabaantiilin ní, aa fàŋkí Unimbɔtaaa?

⁴¹Timbi nín máaǹ puee di sá ditafadaaldi din poon ti bí nee, kun puee digaŋgam tuuŋŋi ŋin ti ŋáańee paati dee. Ama un bí nee, úǹ kaa ŋá digaŋgam ubɔ.»

⁴²Ní u bí Yeesu yii: «A yaa láa gítìń kí jī dibeelee, á dāá téetí m-pu.»

⁴³Ní Yeesu kíí-u yii: «Ibaamɔn ní m tùkù-si, díǹ gba man nì si di làá nīn bí Unimbɔti Beelin.»

⁴⁴Kuwiŋkuluu nyɔkɔmee, ní ŋwìiń wáŋkì ní dibɔmbɔndi jéetì kitiŋ kɔkɔ pu ki tin sāā tikúti tita.

⁴⁵Ní sata un bi nìn dūu pītì kunimbɔtidii[140] poon ki gāntì laakin bi yíì circir páaa laŋkee nì laan kíǹee cúu cátì kansikin nì kansikin.

⁴⁶Ní Yeesu fáá mbiil mpɔn yii: «M-Baa, m dū m-Fam ki ŋá a-ŋaan[141].» U lī mimmee, ní ki kpíì.

⁴⁷Room soojakpiliu ká mimmee ní ki bíi pàkà Unimbɔti, ní ki bí yii: «Ibaamɔn, kijapaai nee sá unimɔnti ní.»

⁴⁸Kunipaau kun nìn dɔ́miń kí kpèè bi nín kpáá Yeesu puee nín ká mimmee, ní bi fàtīi kùǹ ki fátí bi-biŋŋi nì kunimbaakpaaŋŋu.

⁴⁹Yeesu bɔɔbi kɔkɔ nì binimpoobi bin nìn céeǹní-u doooo Galiileeyee nìn yú kudandaŋu[142] ní ki kpèé tin kɔkɔ bíi jītée.

⁵⁰Uninja ubɔ nìn bí, bi yíì-u Jooseefi. U nìn sá bibɔsoonliibee kansikin ubɔ ní ki sá unimɔnti ki yú deedee.

⁵¹Uninjee nìn sá Juuda yab tiŋki kin bi yíì Arimateeyee[143] ní ki nìn kā ki cí Unimbɔti Beel. Waa nìn yú bibɔsoonliibi bin kíǹee boon, ní kaa nìn bí tin bi bɔ́ntì kí ŋée poon.

⁵²Úǹ di cūtì Piilati cee ki mēē-u nsan kí yòon̄ Yeesu wunti.

⁵³U pú-u nsanee, ní u cūtì ki kpáatì Yeesu wunti ndɔpuntikaa pu, ní ki dū ŋŋaapiin ki fìn̄-u ki cáá-u ki bíl̀ dikaakul din bi nìn lùkū ditaŋkpalinee. Baa nìn dáá síb́ báà ubɔ dikaakul gbanti poon.

⁵⁴An nìn sá ŋwiin ŋun jooku ŋwiŋŋuŋfikaa kífée, ní ŋwìiń tóob́ kí jēetí.

⁵⁵Binimpoobi bin nìn céeǹní Yeesu doooo Galiileeyee táá Jooseefi ki cūtì ki ká dikaakul nì bi nín bíl̀ u-wunti puee.

⁵⁶Bi nìn fātìi nín kùǹ, ki dɔ́miń ki bɔ́ntì ikpafi nì talaalub kí dāá cáań kí yàaǹ utaŋkpiil pu, ní ki kāl̀ ŋwiŋŋuŋfikaa, kii bi-marau nín sá puee[144].