Read Ntcham Luc 24 Bible Online

Luc 24 - Ntcham bible

Luc 24

¹Kinyɔŋ poon wimpeekaaŋu dal ntaafaabɔmbɔminee, ní binimpoobee búntì dikaakul laŋki ki ŋúb́ ikpafi nì talaalub bin bi bɔ́ntèe.

²Bi bàn̄ee, ki ká ditaŋkpal din bi nìn dūu pīiǹ dikaakul nyɔkɔee bíntì ki tin dɔ̄ ŋkpaanceeti,

³ní bi kɔ́ dikaakul poon kaa ká ti-Dindaan Yeesu wunti.

⁴Bi bākatì ki kíǹ ki yú ki dàkafēe ní bininjab bili cílìń bi-pu ki pēē tiwampin káŋkaŋ.

⁵Bi fāŋkì ki tīntì, ní binibee bí yii: «Ba pu ní ni nyàab̀ unil un wāĺee bitaŋkpiibi kansikin ní?

⁶Úǹ fīkitì, waa bí doo, téetímaan u nín nìn bí Galiilee ki tùkū-ni puee,

⁷yii: <An sá bí dū man Kinibiki kí ŋúbíǹ binikpitib ní bí kpáá-mi ndɔpuntikaa pu ḿ kpú, ní winta dalee ḿ fìkitī.>»

⁸Niinee ní bi fātìi téetì Yeesu bɔti gbanti pu.

⁹Ní bi búntì ki cūtìi máafì an bɔti kɔkɔ akpambal saalaa nì dibee nì biboonnooliibi bin kíǹee kɔkɔ.

¹⁰An nimpoobee di sá Maarii Magidalaa yɔu, nì Jaani, nì Maarii Yakubu na. Binimpoobi biba mun nìn céeǹ-bi, ki tùkū akpambal tibɔbaantiil.

¹¹Ama binimpoobee nín dɔ́miń ki tùkū akpambalee, baa nìn fōō ki kíí, bi nìn dūu yíiń mmaam ní.

¹²Ama ní Peetroo yíkìi sáǹ ki nín cá dikaakul laŋki. U bàn̄ ki gbóońee ŋŋaabu ŋun bi nìn dūu fìn̄-uee baba di dɔ̄. Ní u fātìi nín gítiń, ki bākatì nì an bɔti sèeee.

¹³Ŋwimbaanti gbanti ní u-boonnooliibi bili yíkì ki nín cá kitimbilii kiba bi yíì-kì Eemaayusi. Kí yīkì Jeerusaleem kí cù kitiŋ gbantinee, an sá ataŋkpee saalaa nì diba ní.

¹⁴Ní bi còom̄ ki sòoǹ tin kɔkɔ jítì Yeesu puee.

¹⁵Bi nìn bíi sòoǹ míǹ ki kpákèe, ní Yeesu u-ba bāań bi-cee ní u nì bi táá ki nín cá.

¹⁶Bi wál̀-u ní tiba yāntì baa béè-u.

¹⁷Ní Yeesu bālifì-bi yii: «Tilati ní ni còom̄ ki kpákà ní?» Ní bi sāā ki síl̀ nì kunimbaau.

¹⁸Ní bi-kansikin ubɔ, bi yíì-u Kileewoopasi, bí-u yii: «M pàkā sii baba di pée kíǹ Jeerusaleem tiŋkin doo, kaa gbìl̄ tin jítì iwiin nee poonee.»

¹⁹Ní u bālifì-bi yii: «Ba bɔti di jítì ní?» Ní bi kíí-u yii: «Tin bāań Yeesu Naasaareeti yɔu, un nìn sá Unimbɔti bɔnaatiliu ki ŋáań maamaaci tuuŋŋi, u-nyɔɔbuŋŋi mun cáá mpɔn Unimbɔti nì binib kɔkɔ nyée.

²⁰Ti-saraaŋakpilib nì ti-yidambi dū-u ki tīī bi sòon̄ ki kūū u-bɔti, ní bi dū-u ki kpáá ndɔpuntikaa pu.

²¹Úǹ pu ní ti bàà máká yii u làá fīī Isirayeel yab. Nì míǹ kɔkɔee, an bɔti nín jítèe díǹ iwiin ita sèé nee.

²²Ama ti-kansikin binimpoobi biba cáań-ti maamaaci bɔti díǹ nee. Di sá yii bi péé kutaafaau ní ki cūtì u-kaakul laŋki.

²³Bi bàn̄ee, kaa ká u-wunti, ní ki fātìi gítìń ti-cee ki máafì-ti yii Unimbɔti tuuŋyi cílìń bi-pu ki tùkū-bi yii u fīkitì.

²⁴Ti-yab biba mun cūtì u-kaakul laŋki ki mun ká kii binimpoobee nín bàà lī puee, ama baa ká úǹ u-ba.»

²⁵Niinee ní Yeesu bí yii: «Óooo binib nee kaa cáá iciin, kaa yáb̀ kí fōō Unimbɔti bɔnaatiliibi nín sòon̄ tiŋyee kí kíí.

²⁶Mimmee an kaa máaǹ Meesiya ń jī falaa míǹ kí nín kɔ́ u-nyootinaaa?»

²⁷Ní u kíĺ ki bíi sòoǹ ki cántí-bi Unimbɔti gbɔŋku poon tibɔti tin kɔkɔ Mooyiisi nì Unimbɔti bɔnaatiliibi nìn ŋmàn̄ ki síiǹ u-puee.

²⁸Bi nín bāań kitimbilii kin ni bi cée, ní Yeesu ŋá kii u là kí càatī nyɔkɔpuee.

²⁹Ní bi bí yii: «Aayee, gbíntí ti-cee, ŋwìiń làá jēetí kunyeeu ń mɔ́ dee.» Ní u kɔ́ bi-cee.

³⁰Ŋyunti ŋun bi kāl̀ ki làá nīn jīǹee, ní Yeesu yōoǹ kpɔnɔ ní ki jáam̀ Unimbɔti ní ki gífì ki tīī-bi.

³¹Niinee ní bi-nimbiliŋ cúu ŋāatì ní bi béè-u, ní u wáŋkì bi-kansikin niin.

³²Ní bi bíi lì tɔb cee yii: «U nín bíi sòoǹ nì ti ki lèekī Unimbɔti gbɔŋku taapu ki dàkà-ti nsannee, saa bàà ká an nín kɔ́ ti-pɔbiliŋin fíŋfiŋeeee?»

³³Ní bi yíkì niin niin ki nín gítí Jeerusaleem. Bi bàn̄ee ki ká akpambal saalaa nì dibee nì bi-jutiibi bin kíǹee kpáfì,

³⁴ki bíi lì yii: «Tiŋman, ti-Dindaan lafun fīkitì! Di sá yii Siimɔn ká-u.»

³⁵Ní bi mun dū tin bi ká nsannee, nì Yeesu nín gíí kpɔnɔ bi béè-u puee ki máafì-bi.

³⁶Bi bíi sòoǹ mimmee, Yeesu bāań bi-kansikin ki jáam̀-bi yii: «Unimbɔti ń tīī-ni ŋgbansɔŋfi.»

³⁷Ní bi fāŋkì tikpil bi-wunti kpíì, kun puee bi dàkafī yii an sá ufaŋfanti ní.

³⁸Ní Yeesu bālifì-bi yii: «Ba pu ní ni-pɔbiliŋ máfí míǹ? Ba pu ní ni cáá ilandɔkɔ ili ili míǹ?

³⁹Man dee, kpèèmaan m-ŋalii poon nì m-tafati tibuŋwati. Gbēēmaan-mi kí kpèè! Ufaŋfanti kaa cáá tiwunaaa, kaa cáá akpab kii ni nín wāĺ man cáá pu nee.»

⁴⁰U lī mimmee, ní ki dàkā-bi u-ŋalii nì u-taaŋi.

⁴¹Baa nìn dáá baasii fōō ki kíí mbaamɔmin, kun puee an nìn sá-bi mmɔnnaaa, ki ŋá-bi bitii mun, an puee ní Yeesu bālifì-bi yii: «Ni cáá tiba doo kí jāaa?»

⁴²Ní bi dū dijɔŋgindi din ŋɔ́fèe ki tīī-u,

⁴³ní u fōō ki ŋmɔ́ bi-nimbiin niin.

⁴⁴Ní u bí-bi yii: «Naa téetí m nín nìn dáá bí ni-cee, ki tùkū-ni yii tin kɔkɔ bi ŋmàn̄ m-pu Mooyiisi marab nì Unimbɔti bɔnaatiliibi gbɔnti nì Inyɔŋki laŋyi gbɔŋku poonee máaǹ kí ŋá mimmaaa?»

⁴⁵Niinee, ní u pīitì bi-landɔkɔi bí ŋmā kí gbìl̄ Unimbɔti gbɔŋku poon bɔti taapu,

⁴⁶ní ki bí-bi yii: «An nín ŋmàn̄ puee sèé, yii: Meesiya làá jī falaa kí kpú ní winta dalee ú fàtīí fìkitī[145].

⁴⁷An máaǹ yii ní sòoǹ u-pu atimbun kɔkɔ nib cee, kí kíliń Jeerusaleem, yii binib ń kpántí bi-bimbim kí ká bi-kpitii pɔ̄tam.

⁴⁸Nimbi di sá seeradambi yii m kpíì, ki fīkitì.

⁴⁹M làá yàntī Circir Fam min m-Baa nìn pōoǹee ń dāan̄ ni-pu. Ama ní nīn kā Jeerusaleem kitiŋ poon kí nīn cí ŋyunti ŋun Unimbɔti pɔŋŋuee làá kpákatiń ni-puee[146].»

⁵⁰Ní Yeesu yōoǹ-bi ki nyántì kitiŋ kpaanceetiŋu ki cá Beetanii[147] watil pú. Niinee ní u yōoǹ u-ŋalii yilpu ki mēē ki bīiǹ bi-pu.

⁵¹Ŋyunti ŋun u bíi mèé ki bìintí bi-puee, ní u yíkì bi-cee ki nín jɔ́ḿ yilpu[148].

⁵²Ní bíǹ gbāaǹ ki nyɔ́ŋkì-u, ní ki fātìi nín gítiń Jeerusaleem nì dipɔɔpiŋkpaandi.

⁵³Bi nìn bí baabadal kunimbɔtidiin ki pàkà Unimbɔti ki jáaḿ-u.