Read Ntcham Luc 3 Bible Online

Luc 3 - Ntcham bible

Luc 3

¹Gɔminakpaan Tiibeer nín kāl̀ dibeel nee, an ŋá abin saalku dee. Dibindi gbanti poonee, Pɔnsi Piilati di nìn sá gɔmina Juudee tiŋkin, ní Eeroodi sá ubɔti Galiilee tiŋkin ní u-maan Fiiliipi mun sá ubɔti Iituree nì Trakoonii timmun, ní Liisaniyasi sá ubɔti Abileen tiŋkin,

²ní Ana nì Kaayiifi sá bisaraaŋakpilib. Ŋyunti gbanti ní Unimbɔti nìn sòon̄ nì Yoowaneesi, Sakari jipɔɔn kuteeun.

³Ní Yoowaneesi kíĺ ki bíi yìiǹ ntimu mun bí Jɔɔdan buŋŋu caŋinee ki sòoǹ yii: «Kpántímaan ni-bimbim bí fàl̀-ni Unimbɔti nyim, ní Unimbɔti ń dū ni-kpitii kí pɔ̄-ni.»

⁴An nóó nì Unimbɔti bɔnaatiliu Yeesaya nín ŋmàn̄ u-gbɔŋku poon puee yii: «Ubɔ báakí kuteeun yii: Bɔ́ntímaan ti-Dindaan saŋŋu kí tàntīmaan u-sàmbiyaamu kí cīití-u.

⁵Atantaka kɔkɔ làá dāá gbīŋkì, ajoon nì ŋgbantamu kɔkɔ làá bìtī. Asaŋgɔŋgɔl làá tàntī. Isan in cáá abɔbil abɔbilee làá ŋāŋkì.

⁶Ní báà ŋma ń dāá ká Unimbɔti nín fìil̄ binib puee[24].»

⁷Yoowaneesi nìn lì kunipaau kun nìn dòoń ú fàl̀-bi nnyimee yii: «Nimbi bin tū kii ikoowaatee, ŋma di tùkū-ni yii ni ŋūǹ kí sāǹ kí ŋmátí Unimbɔti ŋuul din dòońee ni?

⁸Lòom̀maan abil ŋin dàkà yii ni kpántì ni-bimbimee, kí taa nín̄ kā ki dàkafī yii Abraam sá ni-naanja[25]! M tùkù-ni ibaamɔn ní, di sá Unimbɔti ŋūǹ kí dū ataŋkpee nee kí kpántí Abraam naantiibi.

⁹Áli gba, Unimbɔti bɔ́ntì kicɔkɔ ki bíl̀ isufi taapu: busubu bun kamaa yaa kaa lòoǹ abimɔntee, bi làá gāā-bu kí tɔ̄ ŋŋmin.»

¹⁰Ní kunipaauee bíi bàlifī-u yii: «Mimmee, ti làá ŋá mana ní kí fáatí Unimbɔti?»

¹¹Ní u kíí-bi yii: «Un yaa cáá abɔkuti alee ń lēē diba kí tīī un kaa cááyee. Un mun yaa tí cáá tijinee, ń lēē kí tīī un kaa cáá kí jēe.»

¹²Ní bifɔtiliibi mun dɔ́miń bí fàl̀-bi Unimbɔti nyim, ní ki bālifì Yoowaneesi yii: «Ukpil, ti máaǹ kí ŋá mana ní?»

¹³Ní u bí-bi yii: «Bi nín yóoǹ mara yii bí nīn fɔ́tí puee, ní taa fɔ́tí kí lákatí míǹ pu.»

¹⁴Ní soojab mun dɔ́miń ki bālifì-u yii: «Timbi máaǹ kí ŋá mana?» Ní u kíí-bi yii: «Ní taa nín̄ dàkà binib mpɔn, kí taa nín̄ gífí inyimɔn ki tūntí binib pu, ama ní yàntī tipaal tin ni fòol̄ uŋmal uŋmalee ń nīn mɔ̄ǹ-ni.»

¹⁵Kii báà ŋma nín nìn kā ki cí Meesiyayee puee ní bi kíǹ ki bàlifī bi-ba yii Yoowaneesi di kalin sá Meesiyaaa?

¹⁶Niinee ní Yoowaneesi bí bi-kɔkɔ yii: «Man fùul̀-ni nì nnyim ní, ama ubɔ dòoń, u-pɔŋŋu jítiǹ man yɔŋu. Man kaa kpántì kí nīn sá u-yumbuu kí kútí u-naataaŋmiii gba. Úǹ di làá dāá fàl̀-ni nì Unimbɔti Fam nì ŋŋmi.

¹⁷Úǹ di ŋúb́ u-yubakalkaaku[26] ki làá bàkal̀ kí gàntī idi nì tifin, kí dū idee kí ŋá kulɔŋŋun, ní kí dū tifin kí tɔ̄ ŋŋmi ŋun kaa kúù jaanjaanee ni.»

¹⁸Míǹ ní Yoowaneesi nìn sáŋkí binib, ki gíti kútí-bi tibɔti tikpil ní ki sòoǹ nì bi tibɔmɔntiil.

¹⁹Yoowaneesi wòon̄ ubɔti Eeroodi un nìn cáá u-maan nimpuu Eeroodiyadee nì u nín túń atuŋkpiti tikpil ŋin ki kútèe.

²⁰Niinee ní Eeroodi gíti túń dituŋkpitil diba ki kútì, di sá yii u cúú Yoowaneesi ki pīiǹ kudii.

²¹Báà ŋma nìn cá bi fùul̀-bi Unimbɔti nyim. Yeesu mun nìn fùl̄ Unimbɔti nyim. U fùl̄ ki bíi mèéyee, kutagbɔŋu cúu pīitì,

²²ní Unimbɔti Fam kpákatìń u-pu ki náań nì dibeenanjil ní bi gbìl̄ Unimbɔti sòon̄ní kutaa pu yii: «Sii di sá man Jipɔɔn un m néeń tikpilee, sii ní m-pɔbil fáatì[27].»

²³Yeesu nìn ŋá kii abin mmuŋku nì saalaa ní ki kíĺ u-tundi. Binib nìn nyí-u yii u sá Jooseefi jipɔɔn, ní Jooseefi baa sá Eelii.

²⁴Eelii baa sá Maataati, ní Maataati baa sá Leefii, ní Leefii baa sá Meelki, ní Meelki baa sá Jaanayi, ní Jaanayi baa sá Jooseefi,

²⁵ní Jooseefi baa sá Maatatiyasi, ní Maatatiyasi baa sá Amoosi, ní Amoosi baa sá Nawum, ní Nawum baa sá Eeslii, ní Eeslii baa sá Nagayi,

²⁶ní Nagayi baa sá Maatiyasi, ní Maatiyasi baa sá Maatatiyasi, ní Maatatiyasi baa sá Seemeeyiin, ní Seemeeyiin baa sá Jooseeki, ní Jooseeki baa sá Jooda,

²⁷ní Jooda baa sá Joowana, ní Joowana baa sá Reesa, ní Reesa baa sá Sooroobabeel, ní Sooroobabeel baa sá Salatiyeel, ní Salatiyeel baa sá Neerii,

²⁸ní Neerii baa sá Meelki, ní Meelki baa sá Adii, ní Adii baa sá Koosam, ní Koosam baa sá Eelmadam, ní Eelmadam baa sá Eer,

²⁹ní Eer baa sá Yeesuwa, ní Yeesuwa baa sá Eeliyeeseer, ní Eeliyeeseer baa sá Jooriim, ní Jooriim baa sá Maataati, ní Maataati baa sá Leefii,

³⁰ní Leefii baa sá Simeeyɔn, ní Simeeyɔn baa sá Juuda, ní Juuda baa sá Jooseefi, ní Jooseefi baa sá Joonam, ní Joonam baa sá Eeliyaakiim,

³¹ní Eeliyaakiim baa sá Meeleeya, ní Meeleeya baa sá Meena, ní Meena baa sá Maataata, ní Maataata baa sá Naatan, ní Naatan baa sá Daafiidi,

³²ní Daafiidi baa sá Jeesee, ní Jeesee baa sá Joobeedi, ní Joobeedi baa sá Boowaasi, ní Boowaasi baa sá Salmɔn, ní Salmɔn baa sá Naasɔn,

³³ní Naasɔn baa sá Amiinadaab, ní Amiinadaab baa sá Adameen, ní Adameen baa sá Arinii, ní Arinii baa sá Eesiroom, ní Eesiroom baa sá Fareesi, ní Fareesi baa sá Juuda,

³⁴ní Juuda baa sá Jaakɔb, ní Jaakɔb baa sá Isaaki, ní Isaaki baa sá Abraam, ní Abraam baa sá Teera,

³⁵ní Teera baa sá Naakɔɔr, ní Naakɔɔr baa sá Seeru, ní Seeru baa sá Ragoo, ní Ragoo baa sá Faleeki, ní Faleeki baa sá Eebeer,

³⁶ní Eebeer baa sá Sala, ní Sala baa sá Kayinaam, ní Kayinaam baa sá Aripakisaadi, ní Aripakisaadi baa sá Seem, ní Seem baa sá Noowa,

³⁷ní Noowa baa sá Lameeki, ní Lameeki baa sá Matuseela, ní Matuseela baa sá Eenɔki, ní Eenɔki baa sá Jareedi, ní Jareedi baa sá Maleeleel,

³⁸ní Maleeleel baa sá Kayinan, ní Kayinan baa sá Eenɔsi, ní Eenɔsi baa sá Seeti, ní Seeti baa sá Adam, ní Adam úǹ sá un Unimbɔti péé ki náańee.