Read Ntcham Luc 4 Bible Online

Luc 4 - Ntcham bible

Luc 4

¹Yeesu gbí Unimbɔti Fam ki nyánní Jɔɔdan, ní Ŋfamee cáá-u ki cūnnì kuteeun.

²Ní Sitaan cɔ́ŋkì-u iwiin imuŋku ili. Waa nìn jíń tiba iwiin imuŋku ilee, ní ŋkùm cúú-u.

³Ní Sitaan bí-u yii: «A yaa lafun sá Unimbɔti Jipɔɔn, tīī ditaŋkpal nee mara dí kpántí kpɔnɔ.»

⁴Ní Yeesu yíì ní ki kíí-u yii: «Unimbɔti gbɔŋku poon lī yii: <An kaa sá tijin dijil ŋmaniŋma di yì unil maŋfal[28].>»

⁵Niinee ní Sitaan yōoǹ Yeesu ki jɔ́m̀ yilpu, ní ki yāntì u kpēē duulinya beeŋi kɔkɔ dicilpu,

⁶ní ki bí-u yii: «M làá dū mpɔn gbanti kɔkɔ nì abee gbanti nyooti kí tīī-si, kun puee man ní bi dū an wanti kɔkɔ ki tīī, ní ma mun yaa là uŋyee ní ḿ tīī.

⁷Míǹ puee, a yaa gbāaǹ ki jáam̀ man, sii di làá nīn kíǹ ki yì an kɔkɔ.»

⁸Ní Yeesu kíí-u yii: «An ŋmàn̄ Unimbɔti gbɔŋku poon yii: <Ti-Dindaan a-Nimbɔtiu baba ní án sá á jāam̀, ní kí nīn bí úǹ baba tundin[29].>»

⁹Míǹ boonee ní Sitaan yōoǹ-u ki cáa cūnnì Jeerusaleem, ní ki cáá-u ki tɔ́kɔ́ǹ kunimbɔtidii yilpu kúnti kunti, ní ki bí-u yii: «A yaa sá Unimbɔti Jipɔɔn, á yùkū kí tìin̄ní tiba kaa làá ŋá-si,

¹⁰kun puee an ŋmàn̄ Unimbɔti gbɔŋku poon yii, <Unimbɔti làá yàntī u-tuuŋyi ń nīn cí-si.>

¹¹Ní ki gíti bí yii: <I làá nīn tíkí-si i-ŋaan a-taal ń taa gbéetí ditaŋkpal[30].>»

¹²Ní Yeesu yíì ní ki bí-u yii: «Unimbɔti gbɔŋku lī yii: <Á taa cɔ̄ŋkì ti-Dindaan a-Nimbɔtiu[31].>»

¹³Sitaan cɔ́ŋkì Yeesu isan kɔkɔ pu ki dóòyee, ní ki búntì kí nīn tí cí ŋyunti ŋubɔ.

¹⁴Ní Yeesu fātìi nín gítí Galiilee tiŋkin ki gbí Unimbɔti Fam pɔŋŋu tiŋan, ní u-yindi gbītì niin pú kɔkɔ.

¹⁵U nìn dàkà binib Unimbɔti bɔti akpafidiinni ní báà ŋma pàkà-u.

¹⁶Ní Yeesu búntì Naasaareeti, laakin u nìn kāl̀ ki wíiǹee. Ŋwiŋŋuŋfikaa bāańee, ní u kɔ́ kukpafidiin, kii u nín pée kpààa ŋáań puee, ní ki yíkì kí kàaǹ Unimbɔti gbɔŋku,

¹⁷ní bi dū kugbɔŋu kun sòoǹ Unimbɔti bɔnaatiliu Yeesaya puee ki tīī-u, ní u fōō ki cúu kpátì ní ki ká laakin lī yii:

¹⁸«Ti-Dindaan Fam bí m-pu, u lēē-mi ḿ sòoǹ tibɔmɔntiil kí tīī biwɔfib. U túnní-mi ḿ bāakì kí tùkù bisarkadambi yii Unimbɔti làá líí-bi, kí tùkù bijɔfub mun yii bi làá wāl̀, kí tùkù bin bi sàantée yii bi làá ká dibatɔl,

¹⁹kí tùkù binib yii ŋyunti nee ní ti-Dindaan làá sɔ̄ bi-saai[32].»

²⁰Ní Yeesu kpáb́ kugbɔŋuee ní ki gíiǹ ki tīī un kpèé kukpafidiiyee, ní ki kāl̀ kí nīn dàkà-bi. Bin kɔkɔ nìn bí niinee nìn kíǹ ki kā ki kpèé-u ní címmm.

²¹Ní u kíĺ ki bíi tùkù-bi yii: «Kí yòon̄ díǹ kí nīn cée, tibɔti tin m kàan̄ ni gbìl̄ nee bàan̄ dee.»

²²Ní báà ŋma kíǹ ki sòoǹ min ŋān̄ee u-pu, ní an ŋá-bi bitii tibɔmɔntiil tin u sòoǹee pu. Ní bi bíi lì yii: «Jooseefi jipɔɔn kaa yáaa?»

²³Ní u bí-bi yii: «M nyí yii ni làá gāā-mi dilaŋkpandi nee yii: <Unyɔɔdaan, cáaǹ a-ba> ní ki làá gíti lì-mi yii: <Ti gbìl̄ a nín ŋá min Kapeernayumee, ŋá a-tuuŋŋi gbanti abaanti a-tiŋki poon doo.>»

²⁴Ní u gíti lī yii: «Ibaamɔn ní m sòoǹ nì ni, baa fòol̄ Unimbɔti bɔnaatiliu u-dumpu mmɔntiimin.

²⁵Ibaamɔn ní m sòoǹ, Unimbɔti bɔnaatiliu Eelii yuntiŋuee, utaa kaa nìn gíti nìn̄ abin ata nì dijandi ní ŋkùm nìn jéetì kitiŋ kɔkɔ pu. Bikpiipoobi nìn wīikí Isirayeel tiŋkin ŋyunti gbanti[33].

²⁶Ama Unimbɔti kaa nìn gíti tú Eelii Isirayeel kpiipuu báà ubɔ cee, asee unicaŋkpiipu un nìn kóò Sareepita tiŋki kin bí Siidɔn tiŋkinee baba cee ní u nìn tú-u[34].

²⁷Unimbɔti bɔnaatiliu Eeliisee yuntiŋuee, binyaŋgbantiibi mun tikpil nìn tí bí Isirayeel tiŋkin. Ama bi-kansikin báà ubɔ kaa nìn ká dicáaǹdi, asee Naama Usiiriija baba[35].»

²⁸Niinee ní bin kɔkɔ nìn bí kukpafidiin ki gbìl̄ an bɔtee fōō aŋuu.

²⁹Bi nìn yíkì ki cúú Yeesu ki dáaĺ ki nyántì kitiŋ kpaanceetiŋu, ní ki cáá-u ki nín jɔ́ḿ dijool din pu bi-diiŋŋi nìn tɔ́kɔ́ee yilpu, kí bàà téé-u kí tɔ̄ń taapu.

³⁰Ama ní u dī bi-kansikin ki búntì.

³¹Yeesu cūtì Kapeernayum, Galiilee tiŋkpaaŋki kiban, ní ŋwiŋŋuŋfikaa dalee, u kɔ́ kukpafidiin ki bíi dàkà binib Unimbɔti bɔti.

³²U-dàkatamee nìn ŋá binib bitii, kun puee mpɔn nìn bí u-bɔti tin u dàkèe ni.

³³Kijapaai kiba nìn bí kukpafidiiyee ni, arasinii kā u-pu, ní ki téeń yii:

³⁴«Yeesu Naasaareeti yɔu, a nyàab̀-ti nì tilati ní? A dɔ́miń kí kúntí-ti níii? M nyí un a sée, a sá circirdaan un Unimbɔti túnnée ní!»

³⁵Ní Yeesu kpātì arasiniiyee pu yii: «Á ŋmīĺ niin kí nyā uninja nee ni!» Ní arasiniiyee fíiǹ uninjee ki lúkú kitiŋ binib nimbiin, ní ki nyáń, kaa ŋá-u tiba.

³⁶Ní báà ŋma bākatì sèeee, ní ki bàlifī tɔb yii: «Batii nyɔɔbundi ní u nín sòon̄ ní dì cáá mpɔn ki jì arasiniibi nan dee?»

³⁷Ní Yeesu bɔti gbītì Kapeernayum tiŋgbammu kɔkɔn.

³⁸Yeesu nyáń kukpafidiinee, ní ki búntì Siimɔn dumpu. Siimɔn nimpuu na nìn būǹ ki dɔ̄ u-wunti píĺ kpaŋkpam, an páb́-u, ní bi mēē Yeesu ú cáaǹ-u.

³⁹Ní Yeesu sútì ki pìl̄-u ní ki kpātì ŋweenee pu. Dicilpu niin ní u pɔ́ɔkì ki yíkì ki ŋá-bi tijin.

⁴⁰Kujoou ŋwìiń bíi jēetée[36], bin bin cáá bibunliibee nìn cáań-bi Yeesu cee, báà ŋma nì u-weeŋŋu u-weeŋŋu, ní u cáá u-ŋalii ki pāantí bi-kɔkɔ pu ní bi pɔ́ɔkí.

⁴¹Arasiniibi nìn nyēē binib tikpil pu ní ki gbáà ibiil yii: «A sá Unimbɔti Jipɔɔn ní!» Ama ní Yeesu kpàtī bi-pu, kaa pūǹ-bi kinyɔkɔ bí sòoǹ, kun puee bíǹ nìn nyí u nín sá Meesiyayee.

⁴²Yeesu péé ntaafaabɔmbɔmin ki nyáń kitiŋin ki búntì ŋkpaanceeti, laakin binib kpée. Ní kunipaau bíi nyàab̀-u. Bi ká-uee, ní ki bàà là ú gbíntí bi-cee kí taa ti cù laaba.

⁴³Ní u bí-bi yii: «An máaǹ ḿ cù kí sòoǹ tibɔmɔntiil tin sá Unimbɔti Beel bɔtee ntimu mun kíǹee poon: kun pu Unimbɔti túnní-mee dee.»

⁴⁴U nìn yìiǹ ki sòoǹ Unimbɔti bɔti Juudee kpafidiiŋŋin.