Read Ntcham Luc 7 Bible Online

Luc 7 - Ntcham bible

Luc 7

¹Yeesu nín sòon̄ nì samaa míǹ ki dóòyee, ní u búntì Kapeernayum.

²Room soojakpiliu ubɔ nìn bí niin ki cáá utɔntɔnli un u néeń tikpilee, u būǹ ki làá kpú.

³Usoojakpilee nín gbìl̄ bi sòoǹ Yeesu puee, ní u tú Juuda yab tindaŋkpilib biba bí cùú gbàam̀ Yeesu ú dāá cáaǹ u-tɔntɔnliu.

⁴Bi bāań ki ká Yeesu, ní ki gbāam̀-u mmɔntiimin ki lī yii: «Usoojakpil gbanti pée máaǹ á tūtuǹ-u ní,

⁵kun puee u néeń timbi Juuda yab. Úǹ di máń ti-kpafidiiku.»

⁶Bi lī mimmee, ní Yeesu nóó-bi ki búntì. Bi tóob́ mmɔŋkee, ní usoojakpilee túnní u-bɔɔbi bí tùkù Yeesu yii: «Ukpil, taa sàaǹ a-ba, maa máaǹ á kóoń m-dumpu.

⁷An pu ní m dākafì yii man kaa kpántì kí dāan̄ a-cee. Á pée lì dinyɔɔbumbaantiil, m-tɔntɔnliu làá pɔ̄ɔkì.

⁸Di sá, man cáá bikpilib bin taapu m bée, ní ki cáá soojab bin mun bí man taapuee. M ŋūǹ kí tùkù ubɔ yii: <Cù doo,> ní ú cù, ki ŋūǹ kí tùkù ubɔ mun yii: <Dāan̄ doo,> ní ú dāan̄, ní kí bí m-tɔntɔnliu una yii: <Ŋá yéè,> ní ú ŋá.»

⁹Yeesu nín gbìl̄ mimmee, an ŋá-u bitii ní ki mɔ́ɔkiǹ-u, ní u fātì ki bí kunipaau kun nóó-uee yii: «Ibaamɔn ní m sòoǹ, maa láá pée ká ubɔ cáá fookii yéè Isirayeel yab kansikin gba.»

¹⁰Ní bin usoojakpilee túnnée fātìi nín gítí ki bàn̄ mmɔŋki, ki ká utɔntɔnlee pɔ́ɔkì.

¹¹Boonee ní Yeesu búntì Nayiin tiŋkin, ní u-boonnooliibi nì kunipaau mun nóó-u ki cūtì.

¹²Bi tóob́ kí bà kitiŋ gbanti punyɔkɔkee[48], kpalaayee binib biba cáǹ utaŋkpiil ubɔ kuceeun kí síb́. An nìn sá ukpiipu ubɔ jipɔmbaabil ní, ní kitiŋee nib kupaau nìn cēentí ukpiipu gbanti.

¹³Ti-Dindaan nín ká-uee, ní u-bɔti cúú-u falaa, ní u bí-u yii: «Taa ti sɔ̄!»

¹⁴ní ki sútìń ki dāatì u-ŋal ki gbēē nlundɔ, ní bin tú utaŋkpiilee síl̀. Ní Yeesu bí yii: «Unaacimpɔɔn, m pú-si kinyɔkɔ yii á yīkì!»

¹⁵Ní utaŋkpiilee fīkitì ní ki yáatìi kāl̀ ní ki bíi sòoǹ. Ní Yeesu dū-u ki tīī u-na.

¹⁶Niinee, tifaandi kɔ́ báà ŋma, ní bi bíi pàkà Unimbɔti ki lì yii: «Unimbɔti bɔnaatikpaaŋwu ubɔ nyáń kitiŋ pu, Unimbɔti dɔ́miń kí jòò u-nibul dee.»

¹⁷Ní Yeesu bɔti gbanti gbītì Juudee timmu kɔkɔn, ki kpáaǹ ikpaanceeti mun.

¹⁸Yoowaneesi boonnooliibi cūtì ki máafì-u Yeesu nín ŋáaǹ tiŋyee kɔkɔ, ní Yoowaneesi yíiń bi-kansikin bili

¹⁹ní ki dū-bi ki tú ti-Dindaan Yeesu cee, bí bàlifì-u yii: «Sii di sá un ti nyí yii u dòońeeyaaa[49], tí nīn kā ki cí ubɔ ní?»

²⁰Bi bāań Yeesu ceeyee, ní ki bí-u yii: «Yoowaneesi un fùul̀ binib Unimbɔti nyimee di túnní-ti tí bàlifì-si yii sii di sá un ti nyí yii u dòońeeyaaa, tí nīn kā ki cí ubɔ ní?»

²¹Ŋyunti ŋun bi bāań Yeesu ceeyee, u bíi cāantí bibunliibi tikpil iween kupaau, ki jì arasiniibi binib pu, ki ŋúbití bijɔfub nimbiliŋ.

²²Ní u fātìi kíí bin Yoowaneesi túnnée yii: «Nín̄ cámaan kí tùkù Yoowaneesi tin ni kée nì tin ni gbìl̄ee: bijɔfub nimbiliŋ ŋúbití, bideembi còom̄, binyaŋgbantiibi pɔ́ɔkí, bitafakpaafub kíǹ ki gbìl̀, bitaŋkpiibi fìkitī, ní biwɔfib gbìl̀ tibɔmɔntiil[50].

²³Un fōō-mi ki kíí kaa gùgufēe bí mmɔnneeee!»

²⁴Yoowaneesi boonnooliibee nín gítée, ní Yeesu bíi sòoǹ nì kunipaau Yoowaneesi pu yii: «Ni cūtì kuteeun kí kpèè Yoowaneesee, dinicil dilal ní u sá ní? U-bɔti kpántí kii kubuŋu nín fīintí dikaliŋgbaandi pueeee? Aayee.

²⁵Kin ba ní ni cūtìí kpèè ní? Uninja ubɔ un pēē abɔkutimɔnteeee? Aayee. Bin pēē agaajabɔkuti ki bí mmɔntiiminee bí bibɔtiibi dumpui ní.

²⁶Kin ba pu ní ni baasii cūtì ki kpēē Yoowaneesi ní? Ni cūtìí kpèè-u yii u nín sá Unimbɔti bɔnaatiliuee níii? Tiŋman ní m sòoǹ nì ni, un ni ká niinee jítiǹ Unimbɔti bɔnaatiliibi.

²⁷Kun puee Yoowaneesi pu ní Unimbɔti gbɔŋku poon sòon̄ yii: Unimbɔti bí yii: <M làá tɔ̄ń m-tuuŋŋu ŋú lìntīń a-nyɔkɔpu kí ŋānkì-si nsan[51].>»

²⁸Ní Yeesu gíti bí yii: «Ibaamɔn ní m sòoǹ, bin kɔkɔ unimpu màl̄ee kansikinee, ubɔ kaa bí ki sá ukpaan ki bàn̄ Yoowaneesi. Ama un sá kiwaai Unimbɔti Beelinee jítiǹ Yoowaneesi.»

²⁹Dinikitil kɔkɔ, ki kpáaǹ bifɔtiliibi gba, pílifiǹ Yoowaneesi ní ki béè yii Unimbɔti sá deedeedaan ní ki yāntì Yoowaneesi fùl̄-bi Unimbɔti nyim.

³⁰Ama ní Fariisab nì bimaradakaliibi yíì min Unimbɔti bàà là bí ŋée, kaa cāntì Yoowaneesi fùl̄-bi Unimbɔti nyim.

³¹Ní Yeesu gíti bí yii: «Ba ní m làá dū kí ŋmàntīǹ nimbi waanee nib dee? Ni náań nì ba deeyaaa?

³²Ni náań nì mbiyaamu mun kā mmɔŋki ki tátí mu-jutiibi pu yii: <Ti búń-ni awul, naa ŋɔ́ń, ní ti gāā-ni ikpiisilan, naa súń.>

³³Di sá Yoowaneesi un fùul̀ binib Unimbɔti nyimee dɔ́miń, kaa jīǹaaa, kaa nyù ndaam, ní naa fōō-u ní ki bí yii arasinii di bí u-pu.

³⁴Ní man Kinibiki dɔ́miń ki jīǹ ki nyù ní ni bí yii: <Kpèèmaan, uninja nee, úǹ sá upoofu nì udanyɔl ní ki bɔ́ɔtí bifɔtiliibi nì binikpitib bin kɔkɔ kíǹee.>»

³⁵Ama bin fōō Unimbɔti ciiŋyi ki kííyee dàkà yii i sá deedee.

³⁶Dalbee ní Fariisa ubɔ yíiń Yeesu yii ú dāan̄ u-dumpu bí jī, ní Yeesu cūtì ní ki kāl̀ bí jī.

³⁷Kinimpulaakpaai kiba nìn bí kitiŋ gbantin. U nín gbìl̄ yii Yeesu bí Fariisee dumpu ki jīǹee ní u yōoǹní talaalu un kā ditaŋkpal kpalbaunee[52].

³⁸U bāańee ní ki yúl̀ Yeesu boon u-taaŋi cee ní ki bíi sūǹ ní nnyinnyim sìtī Yeesu taaŋi pu[53], ní u cáá u-yikpiti ki pítí nnyinnyim ki móotí Yeesu taaŋi ní ki dū talaaluee ki sītì ŋi-pu.

³⁹Ufariisaja un nìn yíiń Yeesu bí jēe nín ká mimmee ní u bíi dàkafī u-pɔbilin yii: «Kijapaai nee yaa bàà lafun sá Unimbɔti bɔnaatiliu, u bàà béetí unimpu un gbèetī-u nee nín sá dinimpucil diŋyee, kun puee u sá kilaakpaai ní.»

⁴⁰Ní Yeesu bí-u yii: «Siimɔn, m cáá tiba ki làá tùkù-si.» Ní Siimɔn kíí-u yii: «Ukpil, sòoǹ.»

⁴¹Ní Yeesu bí yii: «Kijapaai kiba nìn pīnnì binib bili animbil. Ubɔ nìn cáá-u dipɔndi animbil jitɔmbi alaataa aŋmoo, ní un kíǹee imuŋku ili nì saalaa.

⁴²Bi-liitilee kansikin, báà ubɔ kaa ŋūǹ kí pà-u, ní u ŋá bi-liitil tiŋan ki dū bi-pɔndee ki pú-bi. Bi-kansikinee, ŋma di làá nīn néeń un dū dipɔndi ki pú-bee tikpil?»

⁴³Ní Siimɔn bí yii: «M pàkā yii un pɔndi wīikí bi ŋá-u tiŋanee di làá nīn néeń-u.» Ní Yeesu bí-u yii: «A lī an kāl̀.»

⁴⁴Ní Yeesu fātì unimpuee watil ní ki bí Siimɔn yii: «Kéè, a ká unimpu neeyaa? M nín kóoń a-dumpuee, aa pú-mi nnyim m fíntì m-taaŋi[54]. Ama úǹ dū u-nyinnyim ní ki sītì m-taaŋi pu ní ki dū u-yikpiti ki pítì-ŋi.

⁴⁵M nín páaǹnée, aa lī-mi yii: <Si nì nsan.> Ama, doooo m nín kɔ́nnée, unimpu nee pée bí ki móotí m-taaŋi ki dàkà u nín néeń-mi puee.

⁴⁶Aa yāaǹ m-yil pu ŋkpam[55] mun kpaŋkpam, ama úǹ sītì m-taaŋi pu talaalu.

⁴⁷An pu ní m lī-si yii unimpu nee dàkā dineendi tikpil m-pu, kun puee m dū u-kpitii kupaau ki pú-u. Un kpitii di yaa bí fiii ní bi dūu pú-uee, úǹ dàkà dineendi fiii ní.»

⁴⁸Ní Yeesu bí unimpuee yii: «M dū a-kpitii ki pú-si.»

⁴⁹Bin bin nìn kpáfìi kā ki jīǹee nìn bíi dàkafī bi-pɔbiliŋin yii: «Uninja nee sá ba yɔu ní ki tin pūǹ binib kpitii na?»

⁵⁰Ama ní Yeesu tùkū unimpuee yii: «A-fookiiu fīī-si, nín̄ cá nì ŋgbansɔŋfi.»