Read Ntcham Luc 9 Bible Online

Luc 9 - Ntcham bible

Luc 9

¹Yeesu yíiń u-kpambaliŋ saalaa nì alee ki kpáfì ki tīī-bi mpɔn bí nīn jì arasiniibi kɔkɔ, kí nīn cāantí bibunliibi.

²U nìn tú-bi bí nīn sòoǹ Unimbɔti Beel bɔti kí nīn cāantí bibunliibi.

³Ní u bí-bi yii: «Ni yaa cée, ní taa yòon̄ báà tiba: ní taa ŋúb́ ŋkpandɔɔɔ, kuloouaaa, tijinaaa, animbilaaa, kí taa ŋúb́ abɔkuti ali ali.

⁴Ni yaa kɔ́ kudicaŋu kun ni ní bi yaa fōō-nee, nín̄ bímaan niin kí tin sāā daliŋkin ni làá yīkèe.

⁵Laan kamaa ní ni yaa bàn̄ ní baa fōō-nee, ní yīkì kitiŋ gbanti pu kí gbāfì ni-taaŋi kpɔŋkpɔm[60], kí dàkà yii ni sòon̄ ki kpáafì-bi.»

⁶U sòon̄ nì bi míǹ ki dóòyee, ní bi búntì ki yìiǹ ntimbilimu kɔkɔn ki sòoǹ Unimbɔti bɔti, ki cāantí bibunliibi an kɔkɔ.

⁷Ubɔti Eeroodi nín nìn gbìl̄ tin kɔkɔ bíi jītée, u bākatì, kun puee biba nìn bí yii: «Yoowaneesi di fātìi fīkitì.»

⁸Ní biba mun bí yii: «Unimbɔti bɔnaatiliu Eelii di nyánní yilpu ki fātìń.» Ní biba mun bí yii: «An sá Unimbɔti bɔnaatiliibi dooooyee yab ubɔ di fātìi fīkitì.»

⁹Ama ní Eeroodi bí yii: «Man yāntì bi lēē Yoowaneesi yil, kin ŋma di gíti sá kijapaai kin pu bi sòoǹ míǹ nan dee?» Niinee ní u kíĺ ki nyàab̀ kí ká Yeesu.

¹⁰Yeesu kpambaliŋ ŋin u nìn túee bāań ki kpáfì u-cee ki bíi máafí-u bi nín ŋáaǹ puee. Ní Yeesu cáá-bi ki kpōotì bi-ŋmaniŋma kitiŋ kin bi yíì Beetisayidee caŋin.

¹¹Ama kunipaau nín dāa béè laakin bi túĺee ní bi nín jì bi-boon. Ní Yeesu fōō-bi ki sòon̄ nì bi Unimbɔti Beel bɔti, ní ki cáaǹ bin nìn nyàab̀ ú cáaǹ-bee.

¹²Kujoou nìn bíi jóotée, ní Yeesu kpambaliŋ saalaa nì alee sútìń ki pìl̄-u ní ki bí-u yii: «Yàntī binib nee ń nīn cá ntimbilimun nì ikaan kí nyàab̀ tijin nì laakin bi làá dòon̄ee. Di sá yii laakin ti bí nee, binib kpá.»

¹³Ní Yeesu kíí-bi yii: «Nimbi ni-ba tīīmaan-bi bí jī.» Ní bi bí-u yii: «Timbi cáá kpɔnɔb biŋmoo nì njɔmbiyaamu muli ja ní, àá a là tí cùú dāń tijin kí cáań kí tīī samaa nee kɔkɔ ń jī ní.»

¹⁴Kunipaauee poonee bininjab nìn bàn̄ kutukub biŋmoo nyɔkɔm. Ní Yeesu bí u-boonnooliibi yii: «Ní yàntī bí kàl̄ ikuul ikuul, ŋkuul kamaa ń nīn cáá binib ili nì saalaa nyɔkɔm.»

¹⁵U-boonnooliibi nìn ŋá u nín lī puee ki yāntì bi kāl̀ ikuul ikuul.

¹⁶Ní Yeesu yōoǹ kpɔnɔb biŋmooyee nì njɔmbiyaamu mulee ní ki wáaǹ ki kpēē kutaa ki jáam̀ Unimbɔti tijin gbanti pu, ní ki gífì ní ki dūu tīī u-boonnooliibi bí yàkatī kunipaau kɔkɔ ń jī.

¹⁷Báà ŋma nìn jíń ki díkí, ní bi tōō akpɔnɔkati nì ajɔŋgin ŋin bi ŋmɔ́ ki kíǹee an gbí tikabiti saalaa nì tili[61].

¹⁸Dalba Yeesu tí kākatì ki bí laaba u-baba ki mèé. U-boonnooliibi nìn bí u-cee ní u bālifì-bi yii: «Binib lì yii m sá ŋma ní?»

¹⁹Ní bi kíí-u yii: «Biba lì yii a sá Yoowaneesi un fùul̀ binib Unimbɔti nyimee. Biba mun lì yii a sá Unimbɔti bɔnaatiliu Eelii, biba mun lì yii an sá Unimbɔti bɔnaatiliibi bikpikib kansikin ubɔ di fīkitì.»

²⁰Ní Yeesu fātìi bālifì-bi yii: «Kin nimbi fáà, ŋma ní nimbi nyí yii m sá?» Ní Peetroo kíí-u yii: «A sá Meesiya un Unimbɔti túnnée ní.»

²¹Ní Yeesu kpáafì-bi tiŋan yii bí taa pée lì-tì báà ubɔ cee,

²²ní ki gíti lī yii: «An máaǹ man Kinibiki ń jī falaa tikpil. Bitindaŋkpilib nì bisaraaŋakpilib nì bimaradakaliibi làá dāá yíí-mi, kí kpɔ̀-mi, ní ḿ dāá fìkitī winta dal.»

²³Ní u tùkū bi-kɔkɔ yii: «Un yaa là kí nóó-mee ń fá úǹ u-ba nín là puee kí yòon̄ u-dɔpuntikaaŋu kí nīn nóó-mi baabadal.

²⁴Un di yaa là kí fīī u-maŋfalee làá dāá fá-dì, ama un di yaa dū u-maŋfal ki fá man puee làá dāá fīī-dì.

²⁵Unil, a yaa jíń duulinya nee kɔkɔ, ní sisi a-ba wáŋkèe, ba ní a páatì?

²⁶Un yaa cáá man nì m-bɔti pu icooyee, man Kinibiki mun làá dāá nīn cáá udaan pu icoo m yaa láa gítìń nì m-nyootin nì m-Baa nì u-circir tuuŋyi nyootinee.

²⁷Ibaamɔn ní m sòoǹ nì ni, ni-kansikin biba làá ká Unimbɔti Beel kí wàatī ní kí nín kpú.»

²⁸Yeesu sòon̄ míǹ, iwiin inii boonee ní ki yōoǹ Peetroo nì Yoowaneesi nì Yakubu ki jɔ́m̀ dijool pu kí mèè ŋwimmeem.

²⁹Ŋyunti ŋun u bíi mèéyee ní u-nimbiin cúu kpántì, ní u-bɔkutil píil̀ káŋkaŋ ní ki jìliŋkī.

³⁰Kpalaayee, binib bili biba bíi sòoǹ nì u. An nìn sá Mooyiisi nì Eelii.

³¹Unimbɔti nyooti nìn māntìi tú-bi. Bi nìn bíi sòoǹ nì Yeesu u-tundi din sá yii ú kpú Jeerusaleemee pu ní.

³²Peetroo nì u-bɔɔbi nìn gèen̄ ki kɔ́ poon, ama bi dāa fīntèe, ní ki ká Yeesu walifiŋu nì binib bilee yú[62].

³³Ŋyunti ŋun bi làá yīkì Yeesu ceeyee, ní Peetroo bí-u yii: «Ukpil, an ŋān̄ tí gbíntí doo, tí gāā tibìń tita, sii kubɔ, Mooyiisi kubɔ, Eelii mun kubɔ.» - Di sá waa nìn nyí tin u bíi sòoǹee. -

³⁴U bíi sòoǹ mimmee, ní ditagbandi diba dɔ́miń ki bīiǹ bi-pu, ní tifaandi cúú Peetroo nì bin kíǹee.

³⁵Niinee ní bi gbìl̄ Unimbɔti sòon̄ní ditagbandin, yii: «Un bí nee di sá m-Jipɔɔn un m lēēyee! Ní pīlifiǹ-u[63].»

³⁶Unimbɔti tin sòoǹ míǹ ki ŋmīlifée an kíǹ Yeesu baba, ní bi kpáafì an bɔti, kaa pée sòon̄ tin bi kée báà ubɔ cee.

³⁷Kutaa wúntì, bi bíi kpákatiń dijoolee, ní dinikitikpaandi diba túŋkìń Yeesu.

³⁸Binib gbanti poon ní uninja ubɔ bíi kūuntí ki lì yii: «Ukpil, m gbàam̄-si, pée fàtī kí kpèè m-jipɔɔn nee. An sá-mi dibibaabil ní.

³⁹Arasinii ubɔ di bí u-pu. An yaa bāań-uee, ní u tátí ní u-wunti jìkì, ní u-nyɔkɔ nyēē kupumpukuu. Arasiniiyee sàantí-u, kaa là kí yàntī-u malaa.

⁴⁰M mēē a-boonnooliibi yii bí jà-mi-u, ní baa ŋúń.»

⁴¹Ní Yeesu bí yii: «Óo binib nee, naa cáá fookii ki gáatì! Kí dāá sāā ŋyunti ŋulɔŋu ní ḿ bàà dūú kàl̄ ni-cee? M làá nīn jīǹ ni-pu kimɔtii kí tin sāā ŋyunti ŋulɔŋu ní? Uninjee, cáań a-bikee doo.»

⁴²Ŋyunti ŋun kibikee dòoń Yeesu ceeyee, ní arasiniiyee fíiǹ-kì ki lúkú ní ki cīŋkì-kì ŋkpitim pu. Ní Yeesu kpātì arasiniiyee pu, ki cáaǹ kibikee, ki dū-kì ki tīī ki-baa.

⁴³Ní báà ŋma bākatì sèeee Unimbɔti pɔŋkpaaŋŋu pu. Báà ŋma nìn dáá bí ki pàkà Yeesu maamaacib bin kɔkɔ u ŋáańee pu, ní u bí u-boonnooliibi yii:

⁴⁴«Ní cúú tibɔti tin m làá tùkù-ni kɔŋkɔnneeyee tiŋan. Bi làá dū man Kinibiki kí dūú nyāfiǹ binib.»

⁴⁵Ama baa nìn gbìl̄ tibɔtee taapu. An nìn dáá bí-bi dibalin, ní baa ŋúń kí béè taapu, ama ní ki fāŋkì, kaa bālifì-u mun.

⁴⁶Yeesu boonnooliibi nìn bíi kpákà tikpiti pu.

⁴⁷Ní Yeesu béè bi-landɔkɔi, ní ki cáań kibiyaawaai ki yóoǹ u-cee,

⁴⁸ní ki bí-bi yii: «Un di yaa fōō kibiyaawaai kii kinee man puee, fōō man m-ba dee, ní un yaa fōō-mee, fōō un túnní-mee mun dee. Di sá yii un yaa sá kiyaawaai ni-kansikinee, úǹ di sá ukpaan.»

⁴⁹Ní Yoowaneesi bí Yeesu yii: «Ukpil, ti ká uninja ubɔ cáá a-yindi ki jì arasiniibi binib pu, ní timbi bàà nyàab̄ kí pìin̄-u nsan, kun puee waa sá ti-yɔu.»

⁵⁰Ní Yeesu kíí-u yii: «Taa pìim̄maan-u nsan, kun puee un kaa kpākantí-nee sá ni-yɔu ní.»

⁵¹Ŋyunti ŋun u làá yīkì duulinyan kí nīn jɔ́ḿ yilpuee tóobińee, ní u bóob́ yii see ú pée cù Jeerusaleem.

⁵²U nìn tú binib ń lìntī. Binib gbanti nìn cūtì ki kɔ́ Samaarii tiŋki kiban kí bɔ́ntí laakin u làá dāá kɔ́ee,

⁵³ní niin yab yíì, kaa fōō-u, u nín nìn cá Jeerusaleemee pu[64].

⁵⁴U-boonnooliibi Yakubu nì Yoowaneesi nín gbìl̄ mimmee, ní bi bí yii: «Ti-Dindaan, tí mèè Unimbɔti ŋŋmi ń nyānní yilpu kí dāá wà kí céetí-baaa[65]?»

⁵⁵Ní Yeesu fātì ki kpīiǹ-bi[66].

⁵⁶Ní bi nìkī kitiŋgbaŋ kiban.

⁵⁷Bi bí nsanni ki cée, ní uninja ubɔ bí Yeesu yii: «M làá nīn pée nóó-si, báà laakin ní a yaa cée.»

⁵⁸Ní Yeesu bí-u yii: «Jiiŋkpaaibi cáá bi-kɔŋkooŋyi ki dɔ̀, ní nnɔmbiyaamu cáá anɔndiin ki dɔ̀, ama man Kinibiki kaa cáá laakin m làá bíĺ m-yil kí ŋùŋfèe.»

⁵⁹Ní Yeesu bí kijapaai kiba yii: «Nóó-mi.» Ní kijapaayee kíí-u yii: «Ukpil, pɔ̄-mi nsan ḿ síb́ m-baa kí wàatī.»

⁶⁰Ní Yeesu kíí-u yii: «Yàntī bitaŋkpiibi ń nīn síb̀ bi-taŋkpiibi. Sii dee, cùú sòoǹ Unimbɔti Beel bɔti kí tùkù binib.»

⁶¹Ní ubɔ mun gíti dɔ́miń ki bí Yeesu yii: «Ukpil, m làá nīn nóó-si, ama á dá láá pɔ̄-mi nsan ḿ cùú kàan̄ m-dumpu yab kí wàatī.»

⁶²Ní Yeesu bí-u yii: «Sii un yaa cúú dikool kí kpɔ̀ ní ki gíti bíi fàtīi kpèé a-boonee, kaa sá Unimbɔti Beelin yɔu.»