Read Ntcham Deutéronome 12 Bible Online

Deutéronome 12 - Ntcham bible

Deutéronome 12

¹Iwiin in kɔkɔ ni cáá kí kàl̄ kitiŋ kin ti-Dindaan ni-baabi Nimbɔtiu làá tīī-ni ní nīn yèe poonee, abɔkpaa nì marab bin ni máaǹ kí nīn ŋúb́ kí ŋá kii bi nín bí yii ní ŋá puee sɔ̀.

²Ní kpēelikì iwaatootipaan in kɔkɔ bí ajoon nì ŋgbantamu puee nì isuboon taapu laakin anibul ŋin ni làá jà nee tòotī bi-waaŋee kí fá, bí taa ti ká ipaan gbanti.

³Ní kpēelikì bi-saraafaŋyi, kí gbá kí wìil̀ ataŋkpee ŋin bi dūu cóoǹ ki tòotēe, ní kí wà bi-windɔi ŋŋmi. Gbámaan kí wìil̀ bi-waaŋi ŋin bi máńee binib ń taa ti béé yii tiba nìn bí ipaan gbanti pu.

⁴Naa máaǹ kí jāam̀ ti-Dindaan ni-Nimbɔtiu kii bíǹ nín jáaḿ bi-waaŋi puee.

⁵Ama ni-naakɔti kɔkɔ kansikin mpaan ŋun pu ní ti-Dindaan ni-Nimbɔtiu làá lēē bí nīn jáaḿ-uee baba ní ni dāa máaǹ kí cù kí jāam̀-u.

⁶Niin ní ni dāa cāabìń ni-saraawɔkaabi nì mpèé saraabi nì ni-saalaatiiti nì ni-lammɔntiim wampɔkaati nì ipoon saraabi nì ni-lammɔntiim saraabi nì ni-naai nì ni-piii nì ni-ŋoobui biseemaliŋ.

⁷Ti-Dindaan ni-Nimbɔtiu nimbiin niin ní ni nì ni-dicaŋŋi máaǹ kí jī tijin gbanti. Ní dāá nīn fàal̀ ti-Dindaan ni-Nimbɔtiu nín bīiǹ ni-tuuŋŋi kɔkɔ pu ki yāntì an bútì-nee pu.

⁸Naa dāa máaǹ kí nīn ŋáań kii ti nín bíi ŋáań pu díǹ, báà ŋma ŋáań min u là nee.

⁹Di sá yii taa láá bàn̄ kitiŋ kin ti-Dindaan ni-Nimbɔtiu làá dūú tīī-ni ní kàl̄ kí ŋùŋfèe ni.

¹⁰Ama ni làá dùtī Jɔɔdan buŋŋu kí tin kɔ́ kitiŋ kin ti-Dindaan ni-Nimbɔtiu làá dūú tīī-ni ní nīn kíǹ ki yèe ni. Ú làá nyāntí-ni ni-nannanliibi bin māntìi tú-nee kɔkɔ ŋaan, ní kí tīī-ni diŋuŋfil ní kàl̄ kitiŋee ni nì ŋgbansɔŋfi.

¹¹Niin ní ti-Dindaan ni-Nimbɔtiu làá lēē mpaan ŋun pu bi làá nīn jáaḿ-uee. Niin ní ni dāa máaǹ kí cùnnì tin kɔkɔ m bālifì-nee, ni-saraawɔkaabi nì ni-pèéŋu saraabi nì ni-saalaatiiti nì ni-lammɔntiim wampɔkaati nì tin kɔkɔ ni pōoǹ yii ni làá tīī ti-Dindaanee.

¹²Ti-Dindaan nimbiin niinee ní ní fàal̀, ni nì ni-jipɔmbi nì ni-bisalib nì ni-tɔntɔnliibi bininjab nì binimpoobi, nì Leefii yab bin bí ni-timmu poonee, kun puee bíǹ kaa fōō difakal kii nimbee[64].

¹³Ní nīn nyíǹ ni-ba kí taa láa ŋá ni-saraabi laakin kamaa ní ni yaa pée kée.

¹⁴Mpaan ŋun ti-Dindaan làá dāá lēē ni-naakɔti kansikin kubɔ poonee baba pu ní ni dāa máaǹ kí nīn ŋáań ni-saraabi. Niin baba ní ni máaǹ kí nīn ŋáań tin kɔkɔ m kpáafì-ni nee.

¹⁵Ama kii ti-Dindaan ni-Nimbɔtiu nín bīiǹ ni-pu puee, ŋyunti ŋun ni yaa lèe, ni ŋūǹ kí kpɔ̀ kuwaŋkuluu laakin ni kóòyee kí ŋmɔ́ ku-nanti. Niinee un bí circiree nì un kaa bí circiree kɔkɔ ŋūǹ kí ŋmɔ́ tinan gbanti, kii bi nín kù ucaŋkpalim àá ukpiil kí ŋmɔ́ puee.

¹⁶Ama naa máaǹ kí ŋmɔ́ tiwaŋkuti fatikuu[65]. Ní kpáatí-u kí fá kitiŋ kii bi nín kpáatí nnyim kí fá puee.

¹⁷Naa cáá nsan kí kàl̄ ni-timmu poon kí dū ni-kpaajinti nì ni-dapɔm nì ni-kpam saalaatiiti kí jī, àá ní kpɔ̀ ni-naai nì ni-piii nì ni-ŋoobui biseemaliŋ kí ŋmɔ́. Naa tí cáá nsan mun kí kàl̄ ni-timmu poon kí dū tin kamaa ni pōoǹ yii ni làá tīī ti-Dindaanee àá nlammɔntiim saraabi àá ni nín lēē ni-pɔbiliŋ poon kí tīī tiŋyee tiba kí jī.

¹⁸Ti-Dindaan ni-Nimbɔtiu baba nimbiin, laakin u làá dāá lēēyee ní ni dāa máaǹ kí jī-tì, nimbi nì ni-jipɔmbi nì ni-bisalib nì ni-tɔntɔnliibi bininjab nì binimpoobi kɔkɔ nì Leefii yab bin kóò ni-timmunee. Ni dāa máaǹ kí nīn bí mmɔŋkpaan poon ní ti-Dindaan ni-Nimbɔtiu nimbiin, tin u ŋá ki tīī-nee pu.

¹⁹Iwiin in kɔkɔ ni cáá kí kàl̄ ni-tiŋki poonee, ní nīn nyíǹ ni-ba kí taa súntí Leefii yab pu.

²⁰Ti-Dindaan ni-Nimbɔtiu yaa láa wāaǹ ni-tiŋki kii u nín pōoǹ-ni puee, ní tinan neeliŋu yaa láa cúú-nee, ni dāa pée ŋūǹ kí ŋmɔ́ tinan kii ni nín là puee.

²¹Mpaan ŋun ti-Dindaan ni-Nimbɔtiu lēē ní nīn jáaḿ-uee yaa dátiǹ-nee, ní dāá lēē ni-naai àá ni-piii àá ni-ŋoobui in ti-Dindaan ni-Nimbɔtiu tīī-nee kansikin tin ni lèe kí kpɔ̀ nimbi ni-ba timmu poon kí pée ŋmɔ́ ni nín là puee, kí nóó nì m nín kpáafì-ni puee.

²²Niinee ni pée ŋmóò-tì kii bi nín kù ucaŋkpalim àá ukpiil pu kí ŋmɔ́-uee ní. Un bí circiree nì un kaa bí circiree kɔkɔ ŋūǹ kí ŋmɔ́ tinan gbanti.

²³Ama ní nīn nyí kí taa ŋmɔ́ fatiku. Di sá yii fatiku sá dimaŋfal[66] ní. Míǹ puee naa máaǹ kí ŋmɔ́ kuwaŋkuluu nanti kí kpáaǹ kun yì ku-maŋfalee.

²⁴Naa máaǹ kí ŋmɔ́ fatiku. Ní kpáatí-u kí fá kitiŋ kii bi nín kpáatí nnyim kí fá puee.

²⁵Ní taa pée ŋmɔ́ fatiku, án nín làá ŋá pu án nīn ŋān̄ kí tīī ni nì ni-biyaamuee. Di sá yii ŋyunti gbantee, ni bíi ŋáań min kítì ti-Dindaan nimbiinee dee.

²⁶Ama ni-wanti tin ni dūu sú ti-Dindaan nì ni-pooŋyi saraabee, ní yòon̄ kí cáá cùnnì mpaan ŋun ti-Dindaan làá dāá lēēyee pu.

²⁷An yaa sá saraawɔkaayee, ní yòon̄ tinan kɔkɔ nì fatiku kí cáá ŋá saraa ti-Dindaan ni-Nimbɔtiu saraafaŋŋu pu. Ama an yaa sá saraabi bin kíǹeeyee, ní kpáatí bi-fatikuu kí pɔ̀l̄ ti-Dindaan ni-Nimbɔtiu saraafaŋŋu pu, ní kí ŋmɔ́ tinan.

²⁸Ní pīlifì tiŋan kí nīn ŋúb́ abɔkpaa ŋin m tīī-ni nee, ní án bútí ni nì ni-biyaamu mun làá páanní ni-boonee kí nīn cáa cá jaanjaan. Kun puee ni yaa ŋá mimmee, ni ŋá min kítì ti-Dindaan ni-Nimbɔtiu nimbiinee dee.

²⁹Ti-Dindaan ni-Nimbɔtiu làá nàan̄ anibul ŋin kóò kitiŋ kin poon ni cá kí kɔ́ nee. Ni làá dāá jà-bi ní kí fōō bi-tiŋki kí nīn kíǹ ki kóò niin.

³⁰Ti-Dindaan yaa láa nāaǹ-bi míǹ ki dóòyee, ní dāá nīn nyí nì ni-ba kí taa píĺ ni-ba kutaliŋŋu kí bàlifì bi-waaŋi pu, kí lì yii: «Mana ní anibul nee nib nìn tòotī bi-waaŋi ní? Ti-mun bàà là kí ŋá míǹ mbaantiim deeyaa!»

³¹Ní taa pée jāam̀ ti-Dindaan ni-Nimbɔtiu kii bíǹ nín tòotī bi-waaŋi ki ŋáań puee. Bíǹ yaa bíi jáaḿ bi-waaŋee, bi ŋáań atuun ŋin ti-Dindaan kaa néeńee nì ti-bulifi ní. Bi ŋūǹ gba kí dū bi-jipɔmbi nì bi-bisalib kí wà ŋŋmi kí ŋá saraa kí tīī bi-waaŋi.