Read Ntcham Deutéronome 13 Bible Online

Deutéronome 13 - Ntcham bible

Deutéronome 13

¹Ní nīn ŋúb́ marab bin kɔkɔ m tīī-ni nee. Ní taa gbéeǹ tiba, kí taa bàtī tiba[67].

²Tí lì yii ubɔ yaa láa yíkì ni-kansikin dalba ní ki bí yii u sá ubɔnaatil àá ubɔɔ[68] ní ki tùkū-ni yii kudaaŋŋu àá maamaacikpaan ubɔ làá nyā.

³U nín lī puee yaa lafun ŋá míǹ, ní míǹ boonee u yaa tùkū-ni yii: «Dāam̄maan tí cù kí nóó awaa ŋin naa nyée kí tòotī-ŋee»,

⁴ní taa pīlifiǹ ubɔnaatil àá ubɔɔ gbanti. Di sá yii ti-Dindaan ni-Nimbɔtiu di bíi cɔ́ŋkí-ni kí kpèè yii ni lafun néeń-u nì ni-pɔbiliŋ kɔkɔ nì ni-naŋki kɔkɔɔɔ, naa néeń-u.

⁵Ti-Dindaan ni-Nimbɔtiu baba ní ni máaǹ kí nīn nóó, ní kí nīn fàŋkí úǹ baba, kí nīn ŋúb́ u-marab, kí nīn tɔ́-u, kí nīn jáaḿ-u ní kí dū ni-ba kí nákáǹ-u.

⁶Ama ubɔnaatil àá ubɔɔ gbantee, ní kpɔ̀-u. Di sá yii úǹ di sāal̀-ni ní yìntīǹ ti-Dindaan ni-Nimbɔtiu un di dá-ni ki nyántì kuyuŋun, Eejipiti tiŋkinee. Udaan bàà mākaǹ kí yàntī ní fá ti-Dindaan ni-Nimbɔtiu saŋŋu ŋun u kpáafì-ni yii ní nīn dēe dee. Míǹ ní ni máaǹ kí ŋá kí nyāntí ikpiti ni-kansikin.

⁷Dalba a-maan àá a-naal sii nì un pēē dinabiilee, àá a-jipɔɔn àá a-bisal àá a-nimpuu un a néeńee, àá a-bɔɔmɔnti di yaa dɔ́miń a-cee dibalin ní ki tùkū-si yii: «Yàntī tí cùú tòotī awaa». Awaa gbanti muee, sii a-ba àá a-naanjab kaa pée nyí-ŋi ki ká.

⁸An sá awaa ŋin anibul ŋin māntìi tú-nee nib tòotēe ní. Anibul gbanti aba bí ndan ní aba mun bí ki pìlīǹ-ni, ní aba mun bí kitiŋgbeennyɔkɔ kiba kí cáá sāā kin kíǹee.

⁹Ní taa pée fàtīí kpèè udaan ní kaa nín pílifiǹ-u. Ní taa sɔ̄ udaan saai, kí taa mɔ̄tì u-pu kí fīī-u.

¹⁰An pée sá ní kpɔ̀-u ní. Un ní u bàà bíi ŋmàtíǹee di máaǹ kí péé péé kí yā-u ditaŋkpal, ní bin kíǹee ń nín páań.

¹¹Yāŋkìmaan-u ataŋkpee kí kpɔ̀, di sá yii u bàà mākaǹ kí yàntī ní fá ti-Dindaan ni-Nimbɔtiu un nyántìń-ni kuyuŋun Eejipiti tiŋkinee ní.

¹²Niinee, Isirayeel yab kɔkɔ làá gbìl̄ tin jítèe ní kí fàŋkì, ní ni-kansikin báà unil kaa dāa gíti ŋáań ikpiti gbanti juti.

¹³Ni yaa tí gbìl̄ dalba yii ntimu mun ti-Dindaan ni-Nimbɔtiu tīī-ni ní nīn kóòyee kiba poon,

¹⁴binib bin kaa pée bí tibanee sāal̀ kitiŋ gbantin nib ki yāntì bi cūtìi tōotì awaa ŋin naa pée nyí ki kée,

¹⁵ní cɔ̄ŋkì tiŋan kí bàlifì kí kpèè yii an sá tiŋmanaaa, an kaa sá. Ama ni yaa cɔ́ŋkì ki bālifì ní ki ká yii tiŋman bi lafun ŋá ntimbiil tuuŋŋi gbanti ni-kansikinee,

¹⁶ní kpɔ̀ kitiŋ gbanti nib kɔkɔ. Ní kpɔ̀ kí céetí-bi kí kpáaǹ bi-waŋkuti, ní kí gbá kí yàaǹ kitiŋ gbanti kɔkɔ nì tin kɔkɔ bí ki-nee.

¹⁷Ní dāá kóoǹ ki-gaajawanti kɔkɔ kí bíĺ kitiŋ kansikin kí sēē ŋŋmi, ní kí wà kitiŋee kɔkɔ. Án dāa sá kii saraawɔkaa ní ni ŋá ki tīī ti-Dindaan ni-Nimbɔtiuee. Kitiŋ gbanti digbuŋkatiŋ làá nīn bí míǹ ní ki cá jaanjaan, di sá yii ubɔ gíti kpá kí mā niin.

¹⁸Ní taa pée yòon̄ tin sá bí cáá wà ŋŋmee poon tiba, án nín làá ŋá pu ti-Dindaan ni-Nimbɔtiu ŋuul ń sɔ̀ŋkèe. U làá sɔ̄ ni-saai kí ŋá-ni tiŋan ní kí yàntī ní bùtī kii u nín nìn pōoǹ ni-naanjab puee.

¹⁹Ni yaa ŋáań u nín bí yii ní ŋá puee, ki ŋúb́ u-marab bin kɔkɔ m tīī-ni díǹ nee, ní ki yaa ŋáań min kítì u-ceeyee, u làá lafun ŋá míǹ kí tīī-ni.