Read Ntcham Deutéronome 17 Bible Online

Deutéronome 17 - Ntcham bible

Deutéronome 17

¹Ní taa dū unaa àá upii un laaba wɔ̀b̄ee àá un pu tiba pée bí kaa ŋān̄ee kí ŋá saraa kí tīī ti-Dindaan ni-Nimbɔtiu, di sá yii an sá ntimbiil ní ti-Dindaan ni-Nimbɔtiu nimbiin.

²Ntimu mun ti-Dindaan làá dūú tīī-ni ní nīn kóò nee kansikin kiba poon, uninja àá unimpu ubɔ yaa bíi ŋáań min kaa kítì ti-Dindaan ni-Nimbɔtiu ceeyee, u kōotì mpèé koobil dee.

³Tí lì yii udaan cūtìi bíi tòotī awaa ki gbàantí ŋi-taapu àá ki gbàantí ŋwìiń àá uŋmal àá iŋmalbijaa in bí kutaa puee taapu. Man ni-Dindaan mun kpáafì-ni yii ní taa ŋá míǹ jaanjaan.

⁴Ni yaa gbìl̄ bi máafì-ni tiba mimmee, ní mɔ̀tīí cɔ̄ŋkì tiŋan kí kpèè yii an sá ibaamɔnaaa, an kaa sá. An yaa lafun sá ibaamɔn yii ubɔ ŋá ntimbiil tuuŋŋi gbanti Isirayeel tiŋki puee,

⁵ní nyāntí uninja àá unimpu un ŋá atuŋkpiti gbantee ni-tiŋki punyɔkɔki[83] ní kí yāŋkì-u ataŋkpee ú kpú.

⁶Binib bili àá bita yaa lēē ubɔ pu seera yii udaan máaǹ ŋkúmee, bí kpɔ̀ udaan. Unibambaanti seerau kaa ŋūǹ kí yàntī bí kpɔ̀ udaan[84].

⁷Biseeradambi di máaǹ kí péé kí yā udaan ataŋkpee kí kpɔ̀, ní samaa un kɔkɔ kíǹee ń nín páań. Ní ŋá míǹ kí nyāntí ikpiti ni-kansikin[85].

⁸Bi yaa cáań nnikpaakoon bɔti àá kujaau bɔti àá ubɔ ŋá u-juti tiweendi tiba ki bíl̀ ni-nimbiin ni-bɔsoondiikun ní ni ká yii tibɔtee pɔ̄ɔ̄ ní ŋmā kí sòoǹ-tèe, ní cù mpaan ŋun ti-Dindaan ni-Nimbɔtiu làá dāá lēēyee pu.

⁹Ní ká Leefii yab bin sá bisaraaŋaliibee nì un sá ubɔsoonli ŋyunti gbantee, ní bíǹ ń sòoǹ tibɔtee kí tīī-ni.

¹⁰Tibɔtee nín sá pu bi dūu tùkū-ni mpaan ŋun ti-Dindaan lēēyee puee, ní ŋá míǹ deedee. Ní pɔ́ɔǹ kí ŋá kii bi nín kpáafì-ni ní ŋá puee deedee.

¹¹Bi nín sòon̄ tibɔti gbanti ki síiǹ puee nì tin bi tùkū-ni yii ní ŋée, ŋámaan míǹ nyíki nyiki.

¹²Ama ubɔ yaa ŋá dilambil ki kpákáǹ usaraaŋakpil un yú ki bíi tūǹ ti-Dindaan Unimbɔti tundee àá ubɔsoonli nín lī puee, ní kpɔ̀ udaan. Ní ŋá míǹ kí nyāntí ikpiti gbanti Isirayeel yab kansikin.

¹³Samaa kɔkɔ làá dāá gbìl̄, ní kí fàŋkì kí taa ti ŋá dilambil míǹ dalba dalba.

¹⁴Ni yaa láa kɔ́ kitiŋ kin ti-Dindaan ni-Nimbɔtiu làá dūú tīī-nee poon ní ki ká ŋkakaa ki kāl̀ ní ki yaa láa lī dalba yii: «Yàntīmaan tí kàan̄ ubɔti ú nīn kpòotī-ti kii anibul ŋin māntìi tú-tee nín cáá pueeyee[86]»,

¹⁵ní dāá dū unil un ti-Dindaan ni-Nimbɔtiu u-ba làá lēēyee kí kàan̄ dibeel. Udaan dāa máaǹ kí nīn sá ni-nabiyaamu Isirayeel nib kansikin ubɔ ní. Ní taa dū unicaan un kaa sá Isirayeel niliuee kí kàan̄ dibeel.

¹⁶Ama udaan kaa dāa máaǹ kí nīn cáá itaamu tikpil, àá kí tɔ̄ binib bí cù Eejipiti tiŋkin kí dāń-i[87], di sá yii ti-Dindaan nìn tùkū-ni yii: «Ní taa pée fàtīí gítí niin».

¹⁷Waa dāa máaǹ kí nīn cáá kunimpupaau, án làá dāá yàntī ú fá Unimbɔti. Waa dāa tí máaǹ kí nīn cáá animbil nì sindaariya tikpil[88].

¹⁸Bi yaa láa kāaǹ-u dibeelee, ú dāá ŋmà marab bin Leefii yab bin sá bisaraaŋaliibee kpáafèe kí ŋá kugbɔŋun kí tīī u-ba.

¹⁹Marab gbanti ń nīn bí ki kɔ́ĺ-u ú nīn kàaǹ-bi baabadal kí cáá sāā u-kúm dal. Mimmee u làá bīfì kí nīn fàŋkí ti-Dindaan u-Nimbɔtiu, ní kí nīn ŋúb́ abɔkpaa nì akoobil ŋin kɔkɔ kā marab gbɔŋku gbanti poonee.

²⁰U yaa kàaǹ marab gbanti mimmee, án làá yàntī ú taa nín̄ yòontí u-ba yilpu kí dàkà yii u jítiǹ u-nabiyaamu mun kíǹee, ní kí taa kpèè marab biba fám kí taa nín̄ tɔ́-bi. U yaa ŋá míǹ, u nì u-naantiibi làá jī dibeel Isirayeel tiŋki pu kí yúntí.