Read Ntcham Deutéronome 18 Bible Online

Deutéronome 18 - Ntcham bible

Deutéronome 18

¹Bi yaa láa bíi yàkatī tikpaatan ki tìì Isirayeel yabee, bí taa kpáaǹ Leefii yab bisaraaŋaliibi nì bin kɔkɔ pée sá Leefii naakookunee. Saraabi bin bi ŋáań ki tìì ti-Dindaanee di dāa sá bi-jinti nì bi-fakal.

²Leefii yab kaa cáá tikpaatan bi-nabiyaamu kansikin, di sá yii diyimɔɔl din bi cáá kí nīn bí ti-Dindaan tundin kii u nín pōoǹ-bi puee di sá bi-fakal[89].

³Samaa yaa cáań unaa àá upii ki ŋá saraayee, bisaraaŋaliibi jandi di sá kuboou nì nnyɔɔkpaween nì dipool.

⁴Ní dāá dū tijimpeepeekaal tin ni lēēyee, an dàkà yii ni-bileeu nì ni-damam nì ni-kpam ki kpáaǹ ni-pikuti tin ni péé ki cáńee kí tīī-bi.

⁵Di sá yii ni-naakɔti kɔkɔ poonee, Leefii yab ní ti-Dindaan ni-Nimbɔtiu lēē yii bí nīn bí u-tundin kí nīn cáa cá jaanjaan.

⁶Leefii yab ubɔ yaa nìn kóò Isirayeel timmu kiban, ní ki yaa là kí dāan̄ mpaan ŋun ti-Dindaan lēēyee puee,

⁷u cáá nsan kí tɔ̄ ditundi kí tīī ti-Dindaan u-Nimbɔtiu kii u-nabiyaamu, Leefii yab bin kíǹee nín bí niin ki tūǹ ti-Dindaan tundi puee.

⁸Báà u yaa nyáfì u-baa fakal ki cáá animbil, bi nín tìì u-nabiyaamu mun bí niinee pu bi jīǹee, míǹ mbaantiim ní bi máaǹ kí tīī udaan mun.

⁹Ni yaa láa kɔ́ kitiŋ kin ti-Dindaan ni-Nimbɔtiu làá dūú tīī-nee poonee, ní taa bīfì kí nīn ŋáań ntimbiil tuuŋŋi ŋin anibul ŋin bí niin díǹ pu nee ŋáańee.

¹⁰Bí taa ká ni-kansikin ubɔ dū u-jipɔɔn àá u-bisal kí tɔ̄ ŋŋmin kí ŋá saraa, àá ki būū tibɔɔl, àá ki màkà dimàkal, àá ki ŋáań kukpaŋkpantiiu tuuŋŋi, àá ki ŋáań kusoou tuuŋŋi,

¹¹àá ki tòó binib inyɔkɔfi, àá ki kàal̀ abɔɔjal, àá ki sòoǹ tin dòońee, àá ki yíì bitaŋkpiibi ki sòoǹ nì bi[90].

¹²Unil un yaa ŋáań atuun gbantee sá utiŋwiil ní ti-Dindaan nimbiin. Ntimbiil tuuŋŋi gbanti pu ní ti-Dindaan ni-Nimbɔtiu làá jà anibul nee kɔkɔ kí fōō bi-tiŋki kí tīī-ni.

¹³Ní dū ni-ba kɔkɔ kí sú ti-Dindaan ni-Nimbɔtiu[91].

¹⁴Di sá yii anibul ŋin timmu ni làá fōō nee sá binib bin cá biwaadambi nì bibɔɔbi ceeyee ní. Ama nimbee, ti-Dindaan ni-Nimbɔtiu kaa pú-ni nsan ní ŋá míǹ.

¹⁵Ti-Dindaan ni-Nimbɔtiu làá dāá lēē ni-nabiyaamu kansikin ubɔ ú nīn sá Unimbɔti bɔnaatiliu kii mamee, ní dāá pīlifiǹ-u[92].

¹⁶Di sá yii tin ni nìn bālifì ti-Dindaan ni-Nimbɔtiu ŋwiin ŋun ni nìn kóoǹ ki kpáfì ki sí Ooreeb jool taapuee dee. Ni nìn lī yii: «Taa ti là kí gbìl̄ ti-Dindaan ti-Nimbɔtiu neen pu, kaa ti là kí wāl̀ u-ŋmikpaaŋŋu nee mun. Di sá yii taa là kí kpú[93].»

¹⁷Ti-Dindaan nìn tùkū-mi yii: «Tiŋman bi cáá mbaamɔn kí sòoǹ míǹ.

¹⁸M làá lēē bi-nabiyaamu kansikin ubɔnaatil un bí kii siiyee kí tīī-bi. M làá dāá dū m-nyɔɔbuŋŋi kí ŋá u-nyɔkɔn ní ú dāá tùkù-bi tin kɔkɔ m kpáafì-uee.

¹⁹Un sá kamaa yaa kaa dāa pílifiǹ m-nyɔɔbuŋŋi ŋin ubɔnaatilee làá dāá sòoǹ m-yindi puee, mama m-ba di làá dāá dáaĺ u-tafal[94].

²⁰Ama m yaa kaa tùkū ubɔnaatil ubɔ tiba yii ú lì ní udaan yaa gāā u-bindi ki yíkìi sòon̄ tiba m-yindi pu, àá ki sòon̄ tiba awaa aba puee, an sá ní kpɔ̀-u ní.»

²¹An yaa yíì ni làá bàlifì ni-ba yii: «Kin mana ní ti làá ŋmā kí béé yii tin u sòon̄ee kaa nyánní ti-Dindaan cee?»

²²Tiŋman, ubɔnaatilee yaa yíkìi sòon̄ tiba ti-Dindaan yindi pu ní an kaa ŋá kii u nín lī pueeyee, ní béé yii tin u sòon̄ee kaa sá ti-Dindaan nyɔɔbundi. Ubɔnaatil gbanti gāā u-bindi ní ki sòon̄. Ní taa fàŋkì-u.