Read Ntcham Deutéronome 19 Bible Online

Deutéronome 19 - Ntcham bible

Deutéronome 19

¹Ti-Dindaan ni-Nimbɔtiu làá dāá kpɔ̀ kí céetí anibul ŋin tiŋki u làá dūú tīī-ni nee, ní ní jà-bi kí nyāntí ní kí fōō bi-timmu kí nīn kíǹ ki yì, kí jī bi-diiŋŋi kí nīn kóò.

²Ní dāá lēē kitiŋ kin ti-Dindaan ni-Nimbɔtiu làá dāá tīī-nee poon ntimu muta kí yóoń.

³Ní dāá cúú kitiŋ kin kɔkɔ ti-Dindaan ni-Nimbɔtiu làá dūú tīī-nee gbanti kí yàkatī ajan ata, kí dāá tɔ̄ adan kí cùnnì ntimu mun ni lēēyee poon, án nín làá ŋá pu un yaa láa kūū unilee ń ŋmā kí sāǹ kí kɔ́ mu-nee[95].

⁴Un yaa kaa ná u-juti ní kaa nyí ki kūū-uee baba di ŋūǹ kí sāǹ kí kɔ́ ntimu gbanti kiban kí fīī u-ba.

⁵Tí dūú ŋmàntī kii unil ubɔ nì u-bɔɔ cūtì kubambaŋŋun kí gāā idɔ ní ŋyunti ŋun u dúkutì ceeku kí bàà gāā busubuee, nceekubiim cúu fúkutì ki nyáń ki yá u-bɔɔyee ki kūū-u. An niliuee ŋūǹ kí sāǹ kí kɔ́ ntimu gbanti kiba poon kí fīī u-ba.

⁶Nsan ń taa nín̄ dátì, an yaa kaa sá míǹ, un un bi kūūyee nabiki[96] làá jà unikpɔlee diŋuul poon kí cúú-u kí kpɔ̀-u kí téeǹ. U mun kaa bàà máaǹ ŋkúm, di sá yii waa ná-u ní ki kūū-u.

⁷An pu ní m bíi kpáafí-ni yii ní dāá lēē ntimu muta kí cīití ni-ba.

⁸Ti-Dindaan ni-Nimbɔtiu yaa láa wāaǹ ni-tiŋki kii u nín nìn pōoǹ ni-naanjab puee, ní ki yaa láa dū kitiŋ kin kɔkɔ u nìn pōoǹ-bee ki tīī-nee,

⁹ní dāá lēē ntimu muta mubɔ mun kí kūtì. Di sá yii u làá dāá wàan̄ ni-tiŋki míǹ kí tīī-ni. Ama see ní nīn ŋúb́ marab bin kɔkɔ m tīī-ni díǹ nee, kí nīn néeń ti-Dindaan ni-Nimbɔtiu, kí nīn ŋáań baabadal kii u nín bí yii ní nīn ŋáań puee. Ŋyunti gbanti baba ní u làá ŋá míǹ kí tīī-ni.

¹⁰Ní dāá ŋámaan míǹ án nín làá ŋá pu kitiŋ kin ti-Dindaan ni-Nimbɔtiu làá dūú tīī-nee poonee, bí taa kpɔ̀ unil un kaa bàà máaǹ ŋkúmee fám, ní naa nín túǹ ubɔ kúm kpuulool.

¹¹Ama tí lì yii ubɔ ná u-juti, ní ki píĺ ki cí-u ní ki yíkìi cìb̄ ki cúú-u ki gbáń ki kūū-u ní ki sáǹ ki tin kɔ́ ntimu gbanti kiba poon.

¹²Unikpɔlee dumpu tindaŋkpilib ń dāá tɔ̄ binib bí cù kí gíiǹní-u u-tiŋkin ní kí dū-u kí ŋá un u kūūyee nabiki ŋaan, ní úǹ ń kpɔ̀-u kí tɔ̀ ipɔntoon.

¹³Taa sɔ̄maan unikpɔl gbanti saai. Ní ŋá míǹ ní kí nyāntí maanyiiba nikpaakooŋŋu kpitii Isirayeel tiŋkin ní án nīn ŋān̄ ki tīī-ni.

¹⁴Ni yaa láa bàn̄ kitiŋ kin ti-Dindaan ni-Nimbɔtiu làá yàkatī kí tīī-nee poon ki kāl̀ee, ní taa láa cóotí ni-timmu kpaanyɔmmu taŋkpeeŋi kí nìkī. Ní yàntī án nīn pée bí kii bin péeǹ-ni ki bàn̄ee nín ŋmāntì pu ki cóoǹee.

¹⁵Unibambaanti seerau kaa ŋūǹ kí yàntī bí kpɔ̀ ubɔ bɔti yii u kūū unil àá u ŋá ikpiti iba. Asee binib bili àá bita di yaa lēē udaan pu seera ní bi ŋūǹ kí kpɔ̀ u-bɔti[97].

¹⁶Ama ubɔ yaa yíkì ki bíi tūntí u-juti pu ikpiti ibee,

¹⁷bí cáá binib gbanti liitil kí cùnnì ti-Dindaan kɔŋkooŋŋun, báà ŋma ń kàaǹ u-bɔti bisaraaŋaliibi nì bibɔsoonliibi bin bí ditundin ŋyunti gbantee nimbiin.

¹⁸Bibɔsoonliibee ń fíkití tibɔtee tiŋan kí kpèè. Bi yaa dáań ki ká yii useeradaanee sá unyimɔndaan ní ki bíi lèekī u-juti pu nnyimɔn seerauee,

¹⁹ní dáaĺ u-tafal kii u nín bàà là bí dáaĺ u-nabiki tafal puee. Ní ŋá míǹ kí nyāntí ikpiti ni-kansikin.

²⁰Binib bin kíǹee yaa gbìl̄ tin jítèe, bi làá fàŋkì ní kí taa ti ŋá ikpiti gbanti juti ni-kansikin.

²¹Ní taa sɔ̄ dibɔkpil daan saai. Un yaa kūū unilee, bí kpɔ̀ u mun. Un yaa lēē u-juti nimbilee, bí lēē u mun yal. Un yaa lēē u-juti nyindee, bí lēē u mun nyindi. Un yaa gūutì u-juti ŋalee, bí gùutī u mun ŋal. Un yaa gūutì u-juti taalee, bí gùutī u mun taal[98].