Read Ntcham Deutéronome 2 Bible Online

Deutéronome 2 - Ntcham bible

Deutéronome 2

¹Boonee ní ti fātì ti-boon, ki yōoǹ Tikati mɔɔl[9] saŋŋu, ki dūu dī kuteeun kii ti-Dindaan nín nìn tùkū-mi puee. Ti nìn dū iwiin kupaau ní ki pée bí ki màntī Seeyiir jool.

²Dalbee, ní ti-Dindaan bí-mi yii:

³«Ni cōom̀ ki gɔ́ń dijool nee an yúntì. Kɔŋkɔnnee fàtī kí túĺmaan ŋgan pú.»

⁴Ní ti-Dindaan gíti tí bí-mi yii ḿ kpāafì-ni yii, ni làá jītí ni-nabiyaamu Eesayuu naantiibi tiŋki Seeyiir. Bi yaa ká-nee, bi làá fàŋkì, ama nimbee, ní cúúmaan ni-ba[10].

⁵Ní taa táká-bi tibɔti ní kaa nín jáń nì bi, kun puee maa làá dū bi-tiŋki dijandi fiiiyee gba kí tīī-ni. Báà laakin ni làá dū ni-taaŋi kí síińee gba, maa làá tīī-ni. Di sá yii Seeyiir jooŋŋi tiŋkee, Eesayuu naantiibi ní m dūu tīī.

⁶Nì ni-nimbiliŋ ní ni làá dā tijin bi-cee kí jī. Ki kpáaǹ nnyim min ni làá nyɔ̀ee, ni làá dā-mì ní kí nín ká kí nyɔ̀.

⁷Kun puee ti-Dindaan ni-Nimbɔtiu bīiǹ ni-tuuŋŋi kɔkɔ pu, ki wúń ni-pu ŋyunti ŋun ni cōom̀ ki jítì kuteekpaaŋŋu nee puee. Abin imuŋku ili sɔ̀, ti-Dindaan ni-Nimbɔtiu nín bí ni-ceeyee, tiba nì tiba kaa lóò-ni.

⁸Ti jítì Seeyiir tiŋkin laakin ti-nabiyaamu Eesayuu naantiibi kóòyee, ní ti nóó Arabaa teeku saŋŋu ŋun cá Eelaati nì Eesiyɔn Gabeer timmunee, ní ki fātìi dūu dī Moowaab teeku saŋŋu.

⁹Ní ti-Dindaan bí-mi yii: «Ní taa táká Moowaab yab tibɔti ní kaa nín jáń nì bi, di sá yii maa làá tīī-ni bi-tiŋki dijandi báà fiiiyee gba. Kun puee m dū Aari tiŋki ki tīī Looti naantiibi ní bí nīn kíǹ ki yì[11].»

¹⁰(Dooooyee, Eem yab di nìn kóò niin. Eem yab gbanti nìn sá tinikpaandi, ki nìn wīikí ní ki nìn sá tinifɔkɔl kii Anaaki yabee[12].

¹¹Binib biba nìn cáá-bi ki tìì Reefa yab ní kii Anaaki yabee[13], ama Moowaab yab nìn yíì-bi Eem yab ní.

¹²Dooooyee Koor yab di nìn kóò Seeyiir tiŋkin, ama ní Eesayuu naantiibi kūū ki céetì-bi, ní ki fōō bi-tiŋki ki kíǹ ki kóò niin, kii Isirayeel yab nín nìn ŋá pu ki fōō kitiŋ kin ti-Dindaan dūu tīī-bi bí nīn kíǹ ki yèe puee.)

¹³Ní ti-Dindaan tí bí yii: «Kɔŋkɔnnee, yīkìmaan kí dùtī Seereedi bùmbiki.» Niinee ní ti yíkì ki dūtì Seereedi bùmbiki.

¹⁴Kí yòon̄ ŋwiin ŋun ti yíkì Kadeesi Barneeya kí cáá sāā ŋwiin ŋun ti dūtì Seereedi bùmbikee, abin nyáń ali kpá imuŋku ili ní. Ŋyunti gbantee, bininjab bin nìn bàn̄ kí cù kujaauee kɔkɔ kpíì kii ti-Dindaan nín nìn pūtì puee[14].

¹⁵Ti-Dindaan u-ba di nìn kūū ki céetì-bi múb ki nyántì u-nibooliŋu kansikin, báà ubɔ kaa nìn kíǹ.

¹⁶Ŋyunti ŋun ní bininjab bin nìn bàn̄ kí cù kujaau ti-Dindaan nibooliŋu kansikinee kɔkɔ kpíìyee,

¹⁷ní ti-Dindaan bí-mi yii:

¹⁸«Díǹ nee, ni làá dī Aari tiŋki saŋŋu kí jītí Moowaab tiŋki pu,

¹⁹ní kí tin nyā Amɔn yab pu. Ní taa táká-bi tibɔti ní kaa nín jáń nì bi. Kun puee maa làá tīī-ni Amɔn yab tiŋki báà dijandi fiii gba, di sá yii Looti naantiibi ní m dū kitiŋ gbanti ki tīī bí nīn yì.»

²⁰(Binib biba nìn dàkafī yii, dooooyee Reefa yab di nìn yì kitiŋ gbanti ki kóò. Amɔn yab nìn yíì-bi yii Samsuum yab ní.

²¹Binibee nìn cáá mpɔn, ní ki wīikí tikpil ki sá tinifɔkɔl mun, kii Anaaki yabee. Ama ti-Dindaan nìn kūū ki céetì-bi ní Amɔn yab fōō bi-tiŋki ki kíǹ ki kóò.

²²Ti-Dindaan nìn pée tí ŋá míǹ mbaantiim ní ki tīī Eesayuu naantiibi Eedoom yab bin kóò Seeyiir tiŋkinee. U nìn kūū ki céetì Ooni yab ki fōō bi-tiŋki ki tīī-bi, ní bíǹ jíń-kì ki kíǹ ki kóò niin ki dāa sāā díǹ.

²³Míǹ mbaantiim ní binib biba nyánní Kafitoor[15] tiŋkin ki kūū ki céetì Aafi yab bin nìn kóò ntimbilimu mun nìn bí Gaasaa tiŋkinee, ní ki fōō bi-tiŋki ki kíǹ ki kóò.)

²⁴Ní ti-Dindaan lī yii: «Yīkìmaan kí kíĺ nsan kí dùtī Arinɔn bùmbiki. Kpèèmaan, m dū Eesbɔn bɔtiu Siiwɔn uamɔɔrja nì u-tiŋki ki ŋá ni-ŋaan. Bóob́maan dikɔ̀ndi kí jáǹ-u kí fōō u-tiŋki.

²⁵Kí yòon̄ díǹ kí nīn cée, m làá yàntī anibul ŋin kɔkɔ bí kitiŋ puee ń fàŋkì-ni. Bi yaa láa pée gbìl̄ ni-puee, dinyoondi dāa cútí-bi ní bi-wunti jìkì ki gbáà kpàkpakpa.»

²⁶Niinee ní m dū binib ki tú doooo Kideemooti teeku bí cù kí sòoǹ nì Siiwɔn, Eesbɔn bɔtiu nì ŋgbansɔŋfi poon kí tùkù-u yii:

²⁷«Pɔ̄-ti nsan tí jītí a-tiŋki pu. Ti làá nīn pée tàkā didandi ní cáaa kí jītí. Taa làá pàatī ŋgan púɔɔɔ, kaa làá kpòotī kí cù ŋgiil pú.

²⁸Nì ti-nimbiliŋ ní ti làá dā tijin kí jī ní kí dā nnyim mun kí nyɔ̀. Kun ti pée là a-ceeyee di sá á pɔ̄-ti nsan tí còom̀ kí jītí a-tiŋki pu.

²⁹Kpèè, Eesayuu yab bin kóò Seeyiir tiŋkinee nì Moowaab yab bin mun kóò Aari tiŋkinee pú-ti nsan ti jítì bi-timmu pu. An puee ti pée là yii á yàntī tí jītí a-tiŋki pu kí tin dùtī Jɔɔdan buŋŋu kí kɔ́ kitiŋ kin ní ti-Dindaan ti-Nimbɔtiu làá dūú tīī-tee poon ní.»

³⁰Ama Eesbɔn bɔtiu Siiwɔn nìn yíì kaa pú-ti nsan tí jītí u-tiŋki pu, di sá yii ti-Dindaan ni-Nimbɔtiu nìn pɔ́ɔkì u-tafal nì u-pɔbil. U nìn ŋá míǹ kí dū u-tiŋki kí ŋá ni-ŋaan kii díǹ pu nee ni nín lafun yì-kì pu nan ní.

³¹Niinee ní ti-Dindaan bí-mi yii: «Kpèè, kɔŋkɔnnee m dū Siiwɔn nì u-tiŋki ki ŋá ni-ŋaan. Kíĺ kí jámaan kí fōō u-tiŋki kí nīn kíǹ ki yì.»

³²Niinee ní Siiwɔn nì u-janjakitil kɔkɔ nyánní kí já nì ti Yaasa tiŋkin.

³³Ama ti-Dindaan ti-Nimbɔtiu nìn dū-u ki ŋá ti-ŋaan ní ti jáń ki pɔ́ɔkiǹ u nì u-jipɔmbi nì u-samaau kɔkɔ.

³⁴Niinee ní ti fōō u-timmu kɔkɔ ní ki kūū ki céetì mu-nib kɔkɔ. Uninjeeee, unimpueeee, kibikeeee, báà unil kaa nìn kíǹ.

³⁵Tin timbi ti-ba nìn pée yōoǹee di nìn sá tiwaŋkuti nì tigaajawan tin ti nìn ká ntimu gbanti poonee.

³⁶Kí yòon̄ Arooweer tiŋki kin bí Arinɔn buŋgbandee nì kitiŋ kin mun bí Arinɔn tantakalin kí cáá sāā Galaadee, kitiŋ kiba kaa nìn kíǹ taa ŋúń ki jáń ki fōō-kì, di sá yii ti-Dindaan ti-Nimbɔtiu nìn dū mu-kɔkɔ ki ŋá ti-ŋaan ní.

³⁷Asee Amɔn yab tiŋki nì ntimu mun nìn bí Yaabɔki buŋgbaŋŋee nì ntimu mun bí ajoonnee nì laakin ti-Dindaan ti-Nimbɔtiu nìn kpáafì-ti yii tí taa gbēēyee baba ní taa nìn fōō.