Read Ntcham Deutéronome 20 Bible Online

Deutéronome 20 - Ntcham bible

Deutéronome 20

¹Ni yaa nyáń kí jáǹ ni-nannanliibi ní ki yaa ká yii bi-taamui nì bi-tɔrɔkub nì bi-janjakitil wīikí ki jítiǹ ni-yabee, ní taa fàŋkì. Di sá yii ti-Dindaan ni-Nimbɔtiu un nyántìń-ni Eejipiti tiŋkinee bí ni-cee.

²Ni yaa láa bɔ́ntì kí nīn cée, usaraaŋakpil ń nyā kí sīĺ samaa nimbiin kí sòoǹ nì samaa kɔkɔ.

³Ú dāá sòoǹ nì bi yii: «Isirayeel yab, pīlifìmaan. Díǹ nee, ni làá nyā kí jáǹ ni-nannanliibi. Ni-wunti ń taa yɔ̀tī. Ní taa fàŋkì-bi kí taa nyɔ̀ ŋkpatim bi-nimbiin.

⁴Di sá yii ti-Dindaan ni-Nimbɔtiu di bí ni-cee ní ki làá jáǹ ni-nannanliibi, kí tīī-ni dijajil.»

⁵Míǹ boonee ní bigbaŋŋmaliibi ń sòoǹ nì samaa kɔkɔ ní kí bàlifì yii: «Ubɔ bí ni-kansikin ki máń kudipɔŋ kaa láá kɔ́-kuɔɔɔ? Ubɔ yaa bée, udaan ń nīn gítí u-diikun. An yaa kaa sá míǹ, u ŋūǹ kí tin kpúń dikɔ̀ndin ní ubɔ fám ń dāá pɔ̀ntī u-diiku gbanti.

⁶Ni-kansikin ubɔ kùn̄ fiinyi kpaabu kaa láá kītì bu-biliŋaaa? Ubɔ yaa bée, ú nīn gítí u-diikun. An yaa kaa sá míǹ, u ŋūǹ kí tin kpúń dikɔ̀ndin ní ubɔ fám ń dāá jī u-fiinyi kpaabu gbanti.

⁷Ubɔ cáá bɔɔn kaa láá cáá-uaaa? Ubɔ yaa bée, ú gítí u-diikun. An yaa kaa sá míǹ, u ŋūǹ kí tin kpúń dikɔ̀ndin ní ubɔ fám ń dāá cáá u-bɔɔn gbanti.»

⁸Ní bigbaŋŋmaliibee ń gíti bàlifì tin bí nee yii: «Ubɔ bí ki sá ufaantija u-mul kaa bōotí mmɔ́ɔnaaa? Udaan yaa bée, ú nīn gítí u-diikun, án nín làá ŋá pu ú taa yɔ̀tī u-nabiyaamu wuntee.»

⁹Bigbaŋŋmaliibi yaa sòon̄ nì samaayee míǹ ki dóòyee ní bí lēē bijanjakpilib bin làá nīn līī samaa nyɔkɔpuee.

¹⁰Ni yaa cūtì kí já nì kitiŋ kiba nibee, ní péé péé kí sòoǹ nì bi kí nyàab̀ ŋgbansɔŋfi ń nīn bí ni-kansikin.

¹¹Bi yaa gbìl̄ ki tīiǹ-ni ki yāntì ni kɔ́ bi-tiŋkinee, bí kpántí ni-yumbui kí nīn kíǹ ki tūǹ ditundi ki tìì-ni.

¹²Ama bi yaa yíì kaa là ŋgbansɔŋfi ń nīn bí ni nì bi kansikin, ní ki yíkìi bíi jáà nì nee, ní màntīí tū bi-tiŋki kí jàkà-kì.

¹³Ti-Dindaan ni-Nimbɔtiu yaa dū-bi ki ŋá ni-ŋaanee, ní kpɔ̀ bininjab kɔkɔ.

¹⁴Ama binimpoobi nì mbiyaamu nì tiwaŋkuti nì tin kɔkɔ pée bí kitiŋ gbantinee, ní yòon̄. Ni-jajil wanti dee. Nimbi di yì kí jī tin kɔkɔ ti-Dindaan ni-Nimbɔtiu fōō ni-nannanliibi ŋaan ki dūu tīī-nee.

¹⁵Míǹ ní ni máaǹ kí ŋá ntimu mun kɔkɔ dátiǹ-ni, kaa kútì ntimu mun sá ní fōō kí nīn kíǹ ki yèe.

¹⁶Ama an yaa kíǹ anibul ŋin timmu ti-Dindaan ni-Nimbɔtiu làá dūú tīī-ni ní nīn kíǹ ki yèe poonee, ní kpɔ̀ tin kɔkɔ pée cáá kufoouee kí taa kíń tiba.

¹⁷An puee ní dāá kpɔ̀ kí céetí Eeti yab nì Amɔɔr yab nì Kanaan yab nì Peeriisi yab nì Eefi yab nì Jeebusi yab kii ti-Dindaan ni-Nimbɔtiu nín kpáafì-ni puee.

¹⁸An yaa kaa sá mimmee, ni làá fōō bi-waatootii tuuŋŋi ŋin sá ntimbiilee. Ni mun yaa ŋá mimmee, ni yīntiǹ ti-Dindaan ni-Nimbɔtiu dee.

¹⁹Ni yaa láa bíi jáà nì kitiŋ kiba ní ki lùkū gíb́-kì, ní ki kpēē yii an sá ní kàl̄ niin kí yúntí ní kí nín ŋmā kí já kí fōō-kèe, ní taa yòon̄ ni-ceekub kí nīn gà isufi in sí niinee ki féeń, kun puee ni ŋūǹ kí ŋmɔ́ i-biliŋ. Ní taa pée gāā-i kí fá. Isufi in yú akpaannee kaa sá binib ní nīn bíi jáà nì i!

²⁰Ama ni ŋūǹ kí gàatì isufi in kaa lòoǹ abil ŋin bi ŋmóòyee kí dūú ŋá ni-jaaku tuuŋŋi kí nīn cí ŋyunti ŋun ní kitiŋ kin ni cūtì kí já kí fōōyee làá kɔ́ ni-ŋaanee.