Read Ntcham Deutéronome 21 Bible Online

Deutéronome 21 - Ntcham bible

Deutéronome 21

¹Tí dūú ŋmàntī yii kitiŋ kin ní ti-Dindaan ni-Nimbɔtiu làá dūú tīī-nee poonee, ni ká dinikpil dɔ̄ kusaau kubɔn, ní naa nyí un di kūū-uee.

²Ni-tindaŋkpilib nì ni-bɔsoonliibi ń cù kí ŋmàntī kí yòon̄ dinikpilee nín dɔ̄ laakiŋyee kí cáá cùnnì ntimu mun māntìi tú-dèe,

³kí kpèè kitiŋ kin di pìlīǹ dinikpil gbantee. Niinee ní kitiŋ gbanti kpilib ń nyàab̀ kinasalii kin kaa láá kùn̄ tikpaal àá ki dáaĺ tɔrɔku ki kée,

⁴ní kí cáá-kì kí cùnnì ditinjal din pu baa kùn̄aaa, kaa búĺ tiba muee, laakin mbun ŋun kaa fóotí jaanjaanee bée. Niinee ní bitindaŋkpilibee ń nyīī kí gíí kinasaliiyee sil kí tɔ̄ mbunee ni.

⁵Ŋyunti gbantee Leefii yab bisaraaŋaliibee ń nyā kí yūĺ nyɔkɔpu. Di sá yii bíǹ ní ti-Dindaan ni-Nimbɔtiu lēē bí nīn tūǹ u-tundi ní kí nīn mèé-u ki bìintí binib pu. Bíǹ di máaǹ kí nīn sòoǹ kunikpɔŋkpɔkɔu nì ubɔ yaa fáá u-juti ki tīī-u tiweendee bɔti.

⁶Niinee ní kitiŋ kin pìlīǹ dinikpilee kpilib ń fíntí bi-ŋalii kí sìtī dinasapɔmbil din sil bi nyīī ki gííyee pu,

⁷ní kí lì yii: «An kaa sá timbi di kūū unil nee. Ti-nimbiliŋ kaa ká un kūū-uee mun.

⁸Míǹ puee ti-Dindaan, dūú pɔ̄ a-nibul din ní a fīīyee, kí taa dū maanyiiba nee kúm kpuulool kí túń a-nibul Isirayeel yab pu». Niinee ní Unimbɔti ń fíntí nnikpaakoon gbanti kpitii.

⁹Nimbee, ni máaǹ kí ŋá min fáatì ti-Dindaanee, ní kí nyā maanyiiba kúm kpuuloolin.

¹⁰Ni yaa cūtì dikɔ̀ndi ní ti-Dindaan ni-Nimbɔtiu dū ni-nannanliibi ki ŋá ni-ŋaan ní ni jáń ki pɔ́ɔkiǹ-bi ki cúuń binib dikɔ̀ndin,

¹¹ní ni-kansikin ubɔ dáań ki ká yii bin ni cúuńee kansikin, usapɔɔnnyaan ubɔ bí ki kɔ́-u, ní u bàà là kí cáá-uee,

¹²u ŋūǹ kí yòon̄-u kí cáá cùnnì u-dumpu. U yaa bàn̄ee ú yàntī unimpuee ń kòol̀ dibaakpandi, kí wéetí u-ŋaŋŋati,

¹³ní kí lēē u-wampeeŋkaati tin u pēeń u-dumpuee kí bíĺ, ní kí nīn bí uninjee dumpu. Míǹ boonee ní ú dū uŋmamɔn kí sɔ̄ u-na nì u-baa pu. Unimpuee yaa ŋá míǹ ki dóòyee, udaan ŋūǹ kí dòon̄ nì u, ní kí dū-u kí kpántí u-nimpuu.

¹⁴Ama boonee, udaan yaa ká yii unimpuee bɔti kaa ti mɔ̄ǹ-uee, ú yàntī-u ú búntí laakin u yaa lèe. Waa dāa ŋūǹ kí dū-u kí nyāfì, kaa dāa tí ŋūǹ kí dū-u kí kpántí u-yumbuu ŋyunti ŋun ní u cáá-u ki dóòyee.

¹⁵Uninja ubɔ di yaa bí ní ki cáá binimpoobi bili, ní ki néeń ubɔ ki jítiǹ un kíǹee, ní binimpoobee liitil yaa màl̄ mbininjabiyaamu ní an yaa ŋá yii unimpu un waa néeńee biki di sá kikpiliiyee,

¹⁶an yaa láa bāań ú yàkatī u-gaajawanti kí tīī u-biyaamuee, waa máaǹ kí dū dijandi din sá ujipɔŋkpil jandee kí tīī u-nimpuu un u néeńee jipɔɔn kí yàntī un waa néeńee yɔu un di baasii sá ukpilee.

¹⁷U máaǹ kí béé yii unimpu un waa néeńee jipɔɔn di lafun sá u-jipɔŋkpiliu tiŋman pu, ní kí dū u nín làá yàkatī u-jipɔmbi kɔkɔ u-gaajawanti puee mili pu kí tīī-u. Di sá yii kibiki gbanti di sá u-biseebiki kin dàkā u-ninjatee, ní ki máaǹ kí fōō kibipeepeekaai fakal.

¹⁸Ubɔ yaa cáá kibiki ní kì cáá ntafapɔn nì ŋyipɔn, kaa tɔ́ ki-baa nì ki-na, ní báà min kɔkɔ bi sòon̄ nì kì tibɔn nì timan ki dáaĺ ki-tafalee kaa fātìi tɔ́ee,

¹⁹ki-baa nì ki-na ń cúú-kì kí cáá cùnnì bitindaŋkpilib bin kā bi-tiŋki punyɔkɔpuee cee.

²⁰Bí tùkù bitindaŋkpilibee yii: «Ti-jipɔɔn nee cáá ŋyipɔn nì ntafapɔn. Waa tɔ́-ti. Kun u pée ŋūǹee di sá binimpoobi dimɔnnil nì ndaam dinyɔl.»

²¹Niinee ní kitiŋ gbanti yab bin sá bininjabee ń yāŋkì-kì ataŋkpee kí kpɔ̀. Ni máaǹ kí nyāntí ikpiti ni-kansikin. An yaa ŋá mimmee, Isirayeel yab kɔkɔ làá gbìl̄ tin jítèe ní kí fàŋkì.

²²Ubɔ yaa yīntì ní u-yìntitam gbanti puee ni kūū-u ki dū u-wunti ki lúntì ndɔ puee,

²³ní taa yàntī kunyeeu ń mɔ́ dinikpilee ndɔ pu. Ní síb́-u ŋwiin ŋun ní ni kūū-uee, di sá yii un kamaa bi yaa lúntì ndɔ puee dátiń Unimbɔti busuu kitiŋ pu ní. Ní nīn nyí kí taa kɔ́ǹ kitiŋ kin ti-Dindaan ni-Nimbɔtiu làá dūú tīī-ni ní nīn kíǹ ki yèe tijɔkɔndi[99].