Read Ntcham Deutéronome 22 Bible Online

Deutéronome 22 - Ntcham bible

Deutéronome 22

¹A-nabiki naau yaa wáŋkì àá u-piiiu di wáŋkì ní a kée, á taa fàtī a-boon kí tīī. Péetí unaayee àá upiiyee kí cáá tīī u-dindaan.

²A-nabikee yaa kóò an dátiǹ-si àá saa pée nyí udaanee, á péetí-u kí cáá gbìn̄ a-dumpu kí nīn kpèé-u kí cáá sāā daliŋkin unaayee àá upiiyee dindaan làá dāan̄ kí nyàab̀ u-wantee, ní á gíiǹ kí tīī-u.

³An yaa tí sá a-nabiki maŋki àá u-bɔkutil àá u-wanti tin kamaa yaa pée wáŋkì ní a kée, a nín máaǹ kí ŋá puee dee. Á taa fàtī a-boon kí tīī a-juti wanti.

⁴A yaa tí ká a-nabiki maŋki àá u-naau lítì ki dɔ̄ nsan caŋinee, á taa fàtī a-boon kí tīī. Tūtuǹ udaan ú yòon̄ kuwaŋkuluuee kí síiń ku-taaŋi pu[100].

⁵Unimpu kaa máaǹ kí lòon̄ tininjawan. Míǹ mbaantiim ní uninja mun kaa máaǹ kí lòon̄ tinimpuwan. Bin bin ŋáań mimmee sá bitiŋwiiliibi ní ti-Dindaan ni-Nimbɔtiu cee.

⁶A yaa bíi còom̄ ki cá ní ki tin ká nsan caŋinee, kunɔmbidii pá busubu bubɔ pu àá kù dɔ̄ kitiŋ ní kinɔmbiki bí ku-poon nì ki-biyaamu àá ki náká ki-jiŋŋi puee, á taa cúú kinɔmbikee kí kpáaǹ ki-biyaamu.

⁷Á yòon̄ mbiyaamu kí yàntī unaati ń búntí. A yaa ŋá mimmee, án làá bútí-si ní á kàl̄ kitiŋ pu kí yúntí.

⁸A yaa máń kudipɔŋuee, á bɔ̀b̄ ku-yilpu kí mā digundi kí màntīí tū yilpu laakin a bɔ̀b̄ee ubɔ ń taa láa nyā kudiiyee yilpu kí lítí kitiŋ kí dū u-kpuulool kí lúntí a-pu.

⁹A yaa kùn̄ bufiinyikpaayee, á taa dū busubu bubɔ biliŋ kí bɔ̄l̀ bukpaabaantiibuee poon. An yaa kaa sá míǹ, fiinyee nì asubil ŋin a búĺ ki kútèe yaa láa lòon̄ee, an kɔkɔ dāa sá ki tīī Unimbɔti ní.

¹⁰Á taa dū unaa nì kimaŋ kí kpāfì kí kpàl̄ bí kpɔ̀ tikpaal.

¹¹Aa máaǹ kí pèen̄ tiwan tin ní bi dū ipii kuti nì gulfa ki ŋmālim̀ ki lùn̄ee[101].

¹²Á lù a-satabiiŋkaau nyɔɔjuuŋi naatil pu igbeeŋgbeen[102].

¹³Ubɔ yaa cáá unimpu ní ki dōoǹ nì u, ní boonee kaa ti là-u,

¹⁴ní ki túǹ-u dibɔgabil ki bíil̀ u-yindi ki lī yii: «M nín cáá unimpu nee ki dōoǹ nì uee, maa ká kudaaŋŋu kun dàkà yii waa nìn nyí uninjee».

¹⁵Niinee ní usapɔɔnee baa nì u-na ń cáań kudaaŋŋu kun dàkà yii bi-bisal kaa nìn nyí uninjee kí tīī bitindaŋkpilib bin kā kitiŋ punyɔkɔpuee.

¹⁶Ní ubaati ń bí bitindaŋkpilibee yii: «M dū m-bisal ki tīī uninja nee ticati, ama waa ti là-u,

¹⁷ní ki bíi tūntí-u dibɔgabil ki lì yii m-bisal béè uninja ní ki nín mɔ́ǹ-u. Ama kpèèmaan kun dàkà yii m-bisal kaa nìn nyí uninjee.» Niinee ní ubaati ń kpátí sata un pu bi nìn dōoǹ kunyapeepeekaauee kí bíĺ bitindaŋkpilib nimbiin.

¹⁸Ní bitindaŋkpilibee ń cúú uninjee kí dáaĺ u-tafal.

¹⁹Míǹ boonee ní bí gíí-u dipɔndi animbil kúti dilaataal ú pà kí tīī usapɔɔnee baa, kun puee u bíil̀ uisirayeelsapɔɔn un kaa nyí uninjee yindi. Kí kúntée usapɔɔnee làá nīn gbíntìi sá u-nimpuu ní kí cáá sāā u-kúm dal, waa ti cáá nsan kí jà-u.

²⁰Ama uninjee nín lī puee yaa sá ibaamɔn ní baa lafun ká kudaaŋŋu kun dàkà yii usapɔɔnee kaa nìn lafun nyí uninjee,

²¹ní bí cáá-u kí cùnnì u-baa diiku punyɔkɔpu ní kitiŋ gbanti yab bin sá bininjabee ń yāŋkì-u ataŋkpee kí kpɔ̀. Di sá yii u ŋá icoo bɔti Isirayeel tiŋkin ki kāl̀ u-baa dicaŋkun ki ŋá tilaakpaal. Míǹ ní ni máaǹ kí ŋá ní kí nyāntí ikpiti ni-kansikin.

²²Ubɔ yaa dōoǹ nì u-juti nimpuu ní ni cúú-uee, ní kpɔ̀-u kí kpáaǹ unimpuee mun. Míǹ ní ni máaǹ kí ŋá ní kí nyāntí ikpiti ni-kansikin.

²³Usapɔɔn di yaa tí cáá bɔɔn ní uninja ubɔ yaa ká-u kitiŋin ki dōoǹ nì uee,

²⁴ní nyāntí bi-liitilee kitiŋ punyɔkɔpu kí yāŋkì-bi ataŋkpee kí kpɔ̀. Bí kpɔ̀ usapɔɔnee, kun puee u bí kitiŋin kaa kúuǹ ki yíiń binib bí dāá fīī-u, ní kí kpɔ̀ uninjee, kun puee u dōoǹ nì ubɔ nimpuu. Míǹ ní ni máaǹ kí ŋá ní kí nyāntí ikpiti ni-kansikin.

²⁵Ama an yaa sá kusaaun ní ubɔ ká usapɔɔn un cáá bɔɔnee ki ŋá-u mpɔn ki dōoǹ nì uee, uninja un ŋá mimmee baba ní ni máaǹ kí kpɔ̀.

²⁶Ní taa ŋá usapɔɔn tiba, di sá yii waa ŋá ikpiti in máaǹ ŋkúmee. Tibɔti gbantee náań nì ubɔ nín cútí u-juti kí kpɔ̀-u puee ní.

²⁷Di sá yii uninjee ká usapɔɔn kusaaun ní. Báà usapɔɔnee yaa gbáń ibiilaaa, ubɔ kaa bí niin kí fīī-u.

²⁸Ubɔ yaa tí ká usapɔɔn un kaa cáá bɔɔnee ní ki yaa ŋá mpɔn ki dōoǹ nì u ní bi yaa cúú-bee,

²⁹uninjee máaǹ kí pà usapɔɔnee baa tikúti nimbiliŋ jitɔmbi imuŋku ili nì saalaa, ní kí cáá usapɔɔnee, di sá yii u bíil̀-u. Waa ti cáá nsan mun dalba dalba kí jà-u kí cáá sāā u-kúm dal[103].