Read Ntcham Deutéronome 23 Bible Online

Deutéronome 23 - Ntcham bible

Deutéronome 23

¹Ubɔ ń taa cáá u-baa nimpoobi kansikin ubɔ. U yaa ŋá mimmee, u kpēē u-baa dooŋu fám[104].

²Uninja un sá ufaalee àá un ninjati bi yaa gíí ki tūkutèe kaa máaǹ kí kɔ́ ti-Dindaan samaau kansikin.

³Unil un sá dikpacantibilee nì u-naantitɔntɔkɔŋ kí tin sāā saalaa pu gba kaa máaǹ kí kɔ́ ti-Dindaan samaau kansikin.

⁴Amɔn yab nì Moowaab yab nì bi-naantitɔntɔkɔŋ kí tin sāā saalaa pu gba kaa máaǹ kí kɔ́ ti-Dindaan samaau kansikin[105].

⁵Di sá yii ŋyunti ŋun ni nìn nyánní Eejipiti tiŋkin ki dòońee, baa nìn nyánní ki túŋkì-ni kí tīī-ni tijin nì nnyim. Ní míǹ boonee, bi cūtìi yōoǹní Beewɔɔr jipɔɔn, Balaam un sá Peetɔɔr tiŋki kin bí Aram Naarayiimee, ki tīī-u animbil ú tɔ̄-ni mbusu.

⁶Nì míǹ kɔkɔee, ti-Dindaan ni-Nimbɔtiu kaa nìn pílifiǹ Balaam gbanti. Ama u nìn yāntì u nín tòó-ni mbusu uŋyee kpántí dibiindi ní ki tìì-ni, kun puee ti-Dindaan ni-Nimbɔtiu néeń-ni ní[106].

⁷Dalba dalba ní taa nyàab̀ atimbun ali gbanti nyɔkɔpu cùtam, kí taa píí-bi kubɔɔtiiu.

⁸Ní taa nín kpèé ki sìŋkīǹ Eedoom yab kii bi sá ntimbiil nibee, di sá yii bi sá ni-nabiyaamu ní[107]. Ní taa kpèè kí sìŋkīǹ Eejipiti yab mun, di sá yii ni kāl̀ bi-tiŋkin kunicaŋu.

⁹Bi-naantitɔntɔkɔl ditataatiil ŋūǹ kí kɔ́ ti-Dindaan samaau kansikin.

¹⁰Ni yaa yíkì ki cá kí jáǹ ni-nannanliibi ní ki kóoǹ ki kpáfì laaba ki ŋātì dijanjanaapaalee, ní nīn nyíǹ ni-ba kí taa ŋá tin kamaa kaa ŋān̄ee.

¹¹Ni-kansikin ubɔ yaa dɔ̄ ki gèeǹ kunyeeu ní ki nyéem̀ tijati ki kɔ́ tijɔkɔndinee, udaan ń nyā dinaapaalin kí taa kɔ́nní ŋwiin gbanti.

¹²Ama kujoou yaa bíi jóotée, ú nyàab̀ nnyim kí fàl̀, ní ŋwìiń yaa jéetèe ú fàtīí gítiń bin kíǹee cee.

¹³Ní lēē dinaapaal kpaanceetiŋu laaba kí nīn cáà niin ataa pu.

¹⁴Ujanjal kamaa máaǹ kí nīn cáá tigbakaal ní u yaa cūtì ataa puee, ú gbà mbòó kí sɔ́ntí, ní u yaa dóòyee ú kàfì ntam kí bìin̄.

¹⁵Di sá yii ti-Dindaan ni-Nimbɔtiu dòoń ki màntī ni-naapaal pu kí wúń ni-pu, ní kí nyāntí-ni ni-nannanliibi ŋaan kí tīī-ni dijajil. An puee ni-naapaal máaǹ kí nīn bí circir ní, án nín làá ŋá pu ú taa ká ni-kansikin titantan tiba kí fàtī u-boon kí tīī-nee.

¹⁶Uyumbu yaa sáǹ ki kɔ́-see, á taa fàtīí gíiǹ-u kí tīī u-dindaan.

¹⁷U ŋūǹ kí kɔ́ ni-kansikin, laakin yaa fáatì-uee, nì kitiŋ kin u yaa lēē kí nīn bée poon. Á taa mùul̀-u.

¹⁸Isirayeel sapɔmbi nì Isirayeel naacimpɔmbi ubɔ ń taa dū u-ba kí tīī alaakpaatuun[108].

¹⁹Unimpu àá uninja yaa ŋá alaakpaatuun ní ki ká animbilee, ú taa cáań animbil gbanti kí pà ipoon in ní u pōoǹ ti-Dindaan ni-Nimbɔtiuee pɔndi, kun puee alaakpaanimbil sá ntimbiil wanti ní ti-Dindaan Unimbɔti cee.

²⁰Ni yaa pīnnì ni-nabiki animbil àá tijin àá tin ní an yaa pée sée, ní taa páb́-u ú téeǹ-ni kí páań.

²¹Ni ŋūǹ kí pìnnì unicaan kí yàntī ú dāá téeǹ-ni kí páań, ama ní taa ŋá míǹ ni-nabiki Isirayeel niliu cee. Ni yaa ŋá mimmee ti-Dindaan ni-Nimbɔtiu làá bìin̄ ni-tuuŋŋi kɔkɔ pu kitiŋ kin ni làá kɔ́ kí fōō ki nīn kíǹ ki yèe poon[109].

²²Ni yaa pōoǹ kí ŋá tiba kí tīī ti-Dindaan ni-Nimbɔtiuee, ní pà ni-pɔndi malaa, di sá yii ti-Dindaan ni-Nimbɔtiu làá dāá pée bàlifì-ni, ní ní dāá fōō dibɔkpil[110].

²³Ama ni yaa kaa pōoǹ tibee, naa yīntì mun.

²⁴Tin nyáń ni-nyɔkɔnee, see ní pɔ́ɔǹ kí ŋá míǹ, kun puee ni-ba nyɔkɔn ní an nyáń ní ni pōoǹ ti-Dindaan ni-Nimbɔtiu dipoondi.

²⁵Ni yaa kɔ́ ni-nabiki fiinyi kpaabunee, ni ŋūǹ kí kìtī fiinyi biliŋ kí ŋmɔ́ ni nín là puee, ama ní taa kìtī kí ŋá ni-lookun.

²⁶Ni yaa tí kɔ́ ni-nabiki bilee kpaabun, ni ŋūǹ kí dū ni-ŋalii kí lēē ifin kí ŋmèem̀ kí ŋmɔ́, ama naa máaǹ kí dū ugɔti kí cā[111].