Read Ntcham Deutéronome 24 Bible Online

Deutéronome 24 - Ntcham bible

Deutéronome 24

¹Ubɔ yaa cáá unimpu ní ki ká yii unimpuee bɔti kaa ti mɔ̄ǹ-u kun puee u ká u-pu tibee, ú ŋmà kugbɔŋu[112] kun dàkà yii u jìn̄-uee kí ŋúbíǹ-u ní kí nín jà-u u-cindi.

²Unimpuee yaa búntì ní ki tin ká uninja ubɔ ki mɔ́ǹ,

³ní uninja liliiti un u mɔ́ǹ gbantee mun yaa bí yii waa ti là-u ní ki mun ŋmàn̄ gbɔŋku kun dàkà yii u jìn̄-uee ki ŋúbiǹ-u ní ki mun tí jìn̄-u u-cindi, àá tí lì yii u-cal liliiti gbanti kpíì.

⁴Niinee, u-cal peepeekaa un nìn jìn̄-uee kaa ti cáá nsan kí fàtīí cáá-u, di sá yii unimpuee kɔ́ tijɔkɔndi. Waa ti ŋūǹ kí cáá-u. U yaa fātìi cáá-uee, an sá ntimbiil tundi ní ti-Dindaan nimbiin. Ní taa kɔ́ǹ kitiŋ kin ti-Dindaan ni-Nimbɔtiu làá dūú tīī-ni ní nīn kíǹ ki yèe tijɔkɔndi.

⁵Uninja un cáá unimpucaanee kaa máaǹ kí cù kujaau. Baa máaǹ kí tīī-u ditundi diba mun ú tɔ̄. U cáá dibimmɔndi kí tɔ̄ u-ba kí kàl̄ mmɔŋki kí kɔ̀ntī unimpu un u cááyee nimbiliŋ.

⁶Ubɔ yaa cáá-ni dipɔndee, ní taa cùú yòon̄ u-naaku toolima, kí taa yòon̄ u-namintidɔŋu gba. Ni yaa ŋá mimmee, an bí kii ni fōō kun u ŋáań ki jīǹ ki bí dimaŋfalinee ní toolima.

⁷Ni yaa ká ubɔ cúú u-nabiki Isirayeel nib kansikin ubɔ ki dū-u ki kpántì u-yumbuu àá u dū-u ki nyáfèe, ní kpɔ̀ udaan. Ní ŋá míǹ kí nyāntí ikpiti ni-kansikin[113].

⁸An yaa sá dinyaŋgbandi weeŋŋu jandee, ní kpèè tiŋan kí ŋá kii Leefii yab bisaraaŋaliibi[114] nín dàkā yii ní ŋá puee deedee. Ni máaǹ kí ŋá tin m kpáafì-bi bí dūú dàkà-nee.

⁹Ní téetí ni nín nyáń Eejipiti tiŋkin ki dòoń ti-Dindaan ni-Nimbɔtiu ŋá Miiriyam pu nsannee[115].

¹⁰Ni yaa pīnnì ni-juti tibee, ní taa bìl̄ kí kɔ́ u-dumpu kí yòon̄ tiba toolima.

¹¹Ní nīn yú mmɔŋki ní ni-pɔnliu u-ba ń cáań-ni kun u làá dūú tīī-ni toolimee.

¹²Udaan yaa sá usoodaan ní ki yaa dū u-satabiiŋkaau ki tīī-ni toolimee, ní taa yàntī kutaa ń wúntí u-toolimau gbanti pu ni-dumpu.

¹³Ní fàtīí gíiǹ u-satau kí tīī-u ní ŋwìiń ń nín jēetí, án nín làá ŋá pu ú ŋmā kí ká kí bìin̄ kunyeeuee. Ni yaa ŋá mimmee, u làá mèè kí bìin̄ ni-pu ní án nīn sá min kítì ti-Dindaan ni-Nimbɔtiu ceeyee[116].

¹⁴Ní taa mùul̀ upaadaan un sá usoodaan kaa cáá tibee. An yaa sá ni-nabiyaamu Isirayeel yab ubɔ àá binicambi bin kóò ni-tiŋkinee kansikin ubɔɔɔ, ní taa mùul̀ udaan.

¹⁵Ní pà u-paati ní ŋwìiń ń nín jēetí, di sá yii u sá usoodaan, ní animbil gbanti pu ní u máká. An yaa kaa sá mimmee, u làá tīminsì ti-Dindaan kí tɔ̄ ni-pu ní ní kɔ́ ikpitin[117].

¹⁶Baa máaǹ kí kpɔ̀ bibaatiibi bi-biyaamu kpitii pu, kaa tí máaǹ kí kpɔ̀ mbiyaamu bi-baabi kpitii pu. Báà ŋma kpitii pu ní u máaǹ kí kpú[118].

¹⁷Ní taa mùul̀ unicaan àá ditaŋkpiibil ibɔsoon poon, kí taa yòon̄ ukpiipu bɔkutil toolima.

¹⁸Téetímaan yii ni nìn sá iyumbu ní Eejipiti tiŋkin ní ti-Dindaan ni-Nimbɔtiu dá-ni ki líì[119]. An pu ní m kpáafí-ni ní ŋúb́ tibɔti nee.

¹⁹Ni yaa bíi cēē ni-kpaajinti ní ki yaa súntì dibɔ́ndi diba pu boonee, ní taa fàtīí gítí ni-boon kí yòon̄-dì. Ní yàntī-dì, binicambi nì ataŋkpiibil nì bikpiipoobi yaa bíi lúlifí ki tin kée, bí yòon̄ ní ti-Dindaan ni-Nimbɔtiu ń bìin̄ ni-tuuŋŋi kɔkɔ pu.

²⁰Ni yaa kītì ɔliifi biliŋee, ní taa fàtīí gítí kí lūlifì. Ní yàntī abil ŋin kíǹ ki lúń busubu puee kí tīī binicambi nì ataŋkpiibil nì bikpiipoobi.

²¹Ni yaa tí kītì fiinyi biliŋee, ní taa fàtīí gítí kí lūlifì. Ní yàntī abil ŋin kíǹ ki lúńee kí tīī binicambi nì ataŋkpiibil nì bikpiipoobi[120].

²²Ní taa súntí yii nimbi ni-ba nìn sá iyumbu ní Eejipiti tiŋkin. An pu ní m kpáafí-ni ní ŋúb́ tibɔti nee.