Read Ntcham Deutéronome 25 Bible Online

Deutéronome 25 - Ntcham bible

Deutéronome 25

¹Binib bili yaa jáàyee, bí cù kubɔsoondiin ní bibɔsoonliibi ń sòoǹ bi-bɔti kí pɔ̀ un bɔti ŋān̄ee ní kí kpɔ̀ un bɔti kaa ŋān̄ee bɔti.

²An yaa sá bí gbá un jíń dibɔkpilee, ubɔsoonli ń yàntī ú dòon̄ kitiŋ u-nimbiin ní kí yàntī bí gbá-u anaalab. U-bɔkpil nín bàlifī bí gbá-u puee, míǹ ní bi máaǹ kí gbá-u.

³Ama ubɔsoonlee kaa máaǹ kí yàntī bí gbá-u kí jītí anaalab imuŋku ili pu[121]. Kun puee bi yaa gbáń-u an jítì míǹ puee, ni kíǹ ki bíi kpèé ki sìŋkīǹ ni-nabiki dee.

⁴Ní taa bóob́ unaa un tà ki gbátí adibilee nyɔkɔ[122].

⁵Nnabiyaamu di yaa bí ní ki kóò dicilpu, ní bi-kansikin ubɔ yaa cáá unimpu kaa láá màl̄ kibiki ní ki kpíì ki fá u-nimpuuee, ukpiipuee kaa máaǹ kí nyā kudicaŋuee poon kí cùú mɔ̄ǹ ubɔ laaba. U-cal nabiki kiba di fòol̄-u kí cáá ní kí ŋá kii mara nín bālifì puee.

⁶U-cal nabikee yaa cáá-uee, kibininjabiki kipeekaai kin u làá màal̀ee di làá téeǹ utaŋkpiilee yil u-yindi ń nīn bí ki cá jaanjaan Isirayeel tiŋkin[123].

⁷Ama uninjee yaa kaa là kí fōō u-nabiki kpiipuuee, ukpiipuee ń cù kí ká bitindaŋkpilib, kitiŋ punyɔkɔpu ní kí tùkù-bi yii: «M-cal nabiki kaa là u-nabiki utaŋkpiil yindi ń nīn bí ki cá Isirayeel yab kansikin. M-cal nabiki yíì kaa là kí ŋá min u máaǹ kí ŋá kí tīī-mee.»

⁸Niinee ní bitindaŋkpilib ń yíiń-u tibuul ní kí sòoǹ nì u. U yaa gbíntìi tɔ́kɔ́ ki lì yii: «Maa là kí fōō ukpiipuee»,

⁹ní ukpiipuee ń còom̀ kí cù u-nimbiin bikpilib nín kā puee, ní kí tákatí u-naatakal diba ní kí tíiĺ kí pɔ̀l̄ u-nimbiin ní kí lì yii: «Bi nín ŋáań unil un kaa là kí màal̀ kí téeǹ u-nabiki yilee puee dee!»

¹⁰Niinee ní Isirayeel tiŋki poonee bí pɔ̄ kijapaai gbanti dicaŋku diyindi yii: «Un taalin bi tákatì dinaatakalee dicaŋku.»

¹¹Bininjab bili yaa bíi jáà ní un bi bíi gbáàyee nimpuu yaa bàà cūtì kí fīī u-cal un bíi gbáà-uee ŋaan, ní u yaa tāntì u-ŋal ki cúú un bíi gbáà u-calee ninjatee,

¹²ní gāā kí gùutī u-ŋal. Ní taa sɔ̄ u-saai báà fiii pu.

¹³Ní taa nín̄ cáá ni-lookun tikúti tin bi cáa ŋmàntī nnyiŋfee mili pu, diba ń nīn nyìm̀, din kíǹee ń taa nín̄ nyìm̀ ní nīn cáa mùul̄.

¹⁴Ní taa nín̄ tí cáá ni-dumpu asambiŋmantikaa mili pu, diba ń nīn sá dikpaandi, din kíǹee ń nīn sá kiwaai.

¹⁵Ni máaǹ tikúti tin ni cáa ŋmàntī nnyiŋfee ń nīn sá deedee kúti, ní asambil ŋin ni cáa ŋmàntī tiwanee ń nīn sá deedee sambiliŋ. Mimmee ni làá kàl̄ kitiŋ kin ti-Dindaan ni-Nimbɔtiu làá tīī-nee poon kí yúntí.

¹⁶Di sá yii bin kɔkɔ ŋáań míǹ ki cáa mùul̄ee sá ntimbiil nib ní ti-Dindaan ni-Nimbɔtiu nimbiin[124].

¹⁷Ní téetímaan Amaleeki yab nín nìn ŋá-ni pu ŋyunti ŋun ni nìn nyáń Eejipiti tiŋkin ki dòońee.

¹⁸Ŋyunti ŋun ni nìn gīī kaa ti pée ŋūǹ kí ŋá tibee, ní bi cílìń ni-boon pú ki nāaǹ bin nìn pánní boonee. Baa nìn fāŋkì Unimbɔti báà fiii.

¹⁹Ti-Dindaan ni-Nimbɔtiu yaa láa nyántì-ni ni-nannanliibi bin māntì ki tú-nee ŋaan ki tīī-ni diŋuŋfil kitiŋ kin u làá dūú tīī-ni ní nīn kíǹ ki yèe poonee, ní dāá kpɔ̀ kí céetí Amaleeki yab kitiŋ pu, án nín làá ŋá pu báà ubɔ ń taa ti téetí bi-puee. Ní taa súntí tibɔti gbanti[125]!