Read Ntcham Deutéronome 27 Bible Online

Deutéronome 27 - Ntcham bible

Deutéronome 27

¹Isirayeel tindaŋkpilib nìn kútì Mooyiisi pu ki tīī Isirayeel yab mara nee yii: «Nín̄ ŋúb́maan marab bin kɔkɔ m tīī-ni díǹ nee.

²Ni yaa láa dūtì Jɔɔdan buŋŋu ki kɔ́ kitiŋ kin ti-Dindaan ni-Nimbɔtiu làá dūú tīī-nee poonee, ní dāá nyàab̀ ataŋkpakpaan kí cóoń ní kí dū kaaluupiin kí pīil̀-ŋi.

³Ni yaa láa pée dūtì mbunee, ní dāá ŋmà marab nee ataŋkpee gbanti pu. Boonee ní ní dāá kɔ́ kitiŋ kin ní ti-Dindaan ni-Nimbɔtiu dūu tīī-nee poon. Kitiŋ kin ní ti-Dindaan ni-naanjab Nimbɔtiu làá dūú tīī-ni kii u nín nìn pōoǹ-ni puee poonee, nnaabiim nì tisiil di còol̀[132].

⁴Ni yaa láa dūtì Jɔɔdan buŋŋu ki dóòyee, ní dāá dū ataŋkpee gbanti kí cóoń Eebaal jool pu kii m nín kpáafì-ni díǹ yii ní ŋá puee, ní kí dāá dū kaaluupiin kí pīil̀-ŋi.

⁵Míǹ boonee ní dū ataŋkpee ŋin baa dū kukúluu ki kpítèe kí mā ti-Dindaan ni-Nimbɔtiu nsaraafan niin.

⁶Ni nín pée yōoǹ ataŋkpee ŋi bí pu amɔnee, ní dūú mā[133] ti-Dindaan ni-Nimbɔtiu nsaraafan, ní kí ŋá ŋu-pu saraawɔkaa kí tīī ti-Dindaan ni-Nimbɔtiu.

⁷Ní dāá ŋá mpèé saraau mun, ní kí jī kí fàal̀ ti-Dindaan ni-Nimbɔtiu nimbiin niin.

⁸Ataŋkpee ŋin ní ni cóoǹee puee, ní dāá ŋmà marab nee an nīn wāĺ tiŋan[134].»

⁹Míǹ boonee ní Mooyiisi nì Leefii yab bisaraaŋaliibee bí Isirayeel yab kɔkɔ yii: «Isirayeel yab, ŋmīĺmaan kí pīlifì. Díǹ nee ni kpántì ti-Dindaan ni-Nimbɔtiu nibul.

¹⁰Nín̄ tɔ́maan ti-Dindaan ni-Nimbɔtiu, kí ŋá kii u-marab nì u-bɔkpaaŋi ŋin m tīī-ni díǹ nee nín bí yii ní ŋá puee.»

¹¹Ŋwiin gbanti mbaanti ní Mooyiisi tīī Isirayeel yab mara nee, yii:

¹²«Ni yaa láa dūtì Jɔɔdan buŋŋuee, Simeeyɔn nì Leefii nì Juuda nì Isakaar nì Jooseefi nì Beenjameen naakɔti ń dāá sīĺ Geerisiim jool pu kí mèè kí bìin̄ diniwul kɔkɔ pu.

¹³Ní Rubeen nì Gaadi nì Aseer nì Sabulɔn nì Daani nì Neefitalii naakɔti ń dāá sīĺ Eebaal jool pu kí tɔ̄ mbusu.»

¹⁴Leefii yab ń téeń mpɔn kí sòoǹ nì Isirayeel yab kɔkɔ yii:

¹⁵«Mbusu dɔ̄ ki cí unil un di kpítì diwaal àá ki dūntì tikúti ki máń diwaal kí nīn jáaḿ-dì dibalinee[135]. Ti-Dindaan nimbil kaa là kí wāl̀ an wanti tin ní unil dū u-ŋalii ki máńee.» Ní samaa kɔkɔ ń kíí yii: <Ameeni!>

¹⁶«Mbusu dɔ̄ ki cí unil un di kpēē u-baa nì u-na fámee[136].» Ní samaa kɔkɔ ń kíí yii: <Ameeni!>

¹⁷«Mbusu dɔ̄ ki cí un di cúú ditaŋkpal din cɔ́ u nì u-juti kpaanyɔkɔ ki cóotì ki nìkēe[137].» Ní samaa kɔkɔ ń kíí yii: <Ameeni!>

¹⁸«Mbusu dɔ̄ ki cí un di kaa dàkā ujɔfu nsammɔnti u tin wáŋkèe[138].» Ní samaa kɔkɔ ń kíí yii: <Ameeni!>

¹⁹<Mbusu dɔ̄ ki cí un di kaa sòon̄ unicaan nì ditaŋkpiibil nì ukpiipu bɔti nì ibaamɔnee[139].> Ní samaa kɔkɔ ń kíí yii: <Ameeni!>

²⁰<Mbusu dɔ̄ ki cí un di dōoǹ nì u-baa nimpoobi kansikin ubɔee, di sá yii u nín ŋá mimmee, u kpēē u-baa dooŋu fám dee[140].> Ní samaa kɔkɔ ń kíí yii: <Ameeni!>

²¹<Mbusu dɔ̄ ki cí un di dōoǹ nì kuwaŋkuluuee[141].> Ní samaa kɔkɔ ń kíí yii: <Ameeni!>

²²<Mbusu dɔ̄ ki cí un di dōoǹ nì u-niisal, pēē baa àá pēē nee[142].> Ní samaa kɔkɔ ń kíí yii: <Ameeni!>

²³<Mbusu dɔ̄ ki cí un di dōoǹ nì u-coo, an dàkà yii u-nimpuu nee[143].> Ní samaa kɔkɔ ń kíí yii: <Ameeni!>

²⁴<Mbusu dɔ̄ ki cí un di gbáń ki kūū u-juti dibalinee.> Ní samaa kɔkɔ ń kíí yii: <Ameeni!>

²⁵<Mbusu dɔ̄ ki cí un di kíí ki fōō tiba kí kpɔ̀ maanyiibee.> Ní samaa kɔkɔ ń kíí yii: <Ameeni!>

²⁶<Mbusu dɔ̄ ki cí un di kaa tɔ́ Unimbɔti marab nee, kaa ŋá bi nín bí yii ú ŋá puee[144].> Ní samaa kɔkɔ ń kíí yii: <Ameeni!>