Read Ntcham Deutéronome 28 Bible Online

Deutéronome 28 - Ntcham bible

Deutéronome 28

¹Ni yaa tɔ́ ti-Dindaan ni-Nimbɔtiu tiŋman pu ní ki yaa ŋá kii marab bin kɔkɔ m tīī-ni díǹ nee nín bí yii ní ŋá puee, ti-Dindaan ni-Nimbɔtiu làá yòon̄-ni yilpu ní jītíǹ atimbun ŋin kɔkɔ bí kitiŋ puee.

²Ni yaa tɔ́ ti-Dindaan ni-Nimbɔtiuee, u nín làá bìin̄ ni-pu puee sɔ̀.

³U làá bìin̄ ni-pu ntimun nì tisatin.

⁴U làá bìin̄ ni-maaliŋu pu ní bùtī, kí bìin̄ ni-kpaajinti pu, ní kí yàntī ni-naai nì ni-piii nì ni-ŋoobui ń bùtī.

⁵U làá bìin̄ ni-pu kí gbéeǹ ni-kabiti tikpaajin ní ki gbéeǹ ni-yugutiliŋ ŋyim.

⁶U làá bìin̄ ni-nyātam nì ni-kɔ́tam pu.

⁷Ti-Dindaan làá yàntī ní já kí pɔ̄ɔkiǹ ni-nannanliibi bin làá yīkì kí jáǹ-nee. Bi yaa láa dī nsambaanti pu ki dɔ́mińee, bi dāa dì isan iluli pu ní kí kpì.

⁸Ti-Dindaan làá bìin̄ ni-pu ni-cakalaabi ń gbí tijin ní kí bìin̄ tin kamaa ní làá ŋée pu. Ti-Dindaan ni-Nimbɔtiu làá bìin̄ ni-pu kitiŋ kin u làá tīī-nee poon.

⁹Ni yaa ŋúb́ ti-Dindaan ni-Nimbɔtiu marab, ki yaa ŋáań u nín là puee, u làá dū-ni kí kpántí u-circir nibul kii u nín pōoǹ-ni puee.

¹⁰Ní kitiŋ pu nibuliŋ kɔkɔ ń dāa nīn kíǹ ki yíì-ni yii ti-Dindaan Unimbɔti yab, ní kí dāá fàŋkì-ni.

¹¹Ti-Dindaan làá yàntī ní nīn bí digbíl poon, ní màal̀ kí bùtī, ni-waŋkuti mun ń bùtī, ní ni-kpaajinti ń lòoǹ tiŋan kitiŋ kin ti-Dindaan pōoǹ ni-naanjab yii u làá dūú tīī-nee poon.

¹²Ti-Dindaan làá pìitī kutagbɔŋu, laakin u kpáafì nnyim tiŋan puee, kí yàntī utaa ń nì ni-timmu pu ŋyunti ŋun an máaǹee, ní kí bìin̄ ni-tuuŋŋi kɔkɔ pu. Atimbun tikpil dāa dòoń ni-cee, ní ní pìnnì-bi tin ni cááyee, ama nimbee, naa dāa cá ditimbundi diba cee kí pìnnì tiba.

¹³Ni yaa ŋúb́ ti-Dindaan ni-Nimbɔtiu marab bin ní m tīī-ni díǹ nee ní ki yaa ŋáań kii bi nín bí yii ní ŋá puee, ni làá nīn sá ditimbundi din làá nīn līī nyɔkɔpuee ní, ni kpá kí lūŋkì boon. Ni làá nīn pée yíkí yilpu ŋma ní, ni kpá kí sìntī taapu.

¹⁴Ní taa kàkatī kí cù ŋgiil pú, àá ŋgan pú kí wàatī marab bin m tīī-ni díǹ nee kí dū ni-ba kí nákáǹ awaa kí nīn tòotī-ŋi.

¹⁵Ama ni yaa kaa tɔ́ ti-Dindaan ni-Nimbɔtiu, ki yaa kaa ŋúb́ u-marab nì u-bɔkpaaŋi ŋin kɔkɔ m tīī-ni díǹ nee, mbusu un làá jēetí ni-puee sɔ̀.

¹⁶Ti-Dindaan làá tɔ̄-ni mbusu ntimun nì tisatin.

¹⁷U làá tɔ̄-ni mbusu ni-kabiti ń lóó tikpaajin ní ni-yugutiliŋ ń lóó ŋyim.

¹⁸Ti-Dindaan làá tɔ̄ ni-maaliŋu nì ni-kpaatanti nì ni-naai nì ni-piii nì ni-ŋoobui mbusu.

¹⁹U làá tɔ̄ ni-nyātam nì ni-kɔ́tam mbusu.

²⁰Ti-Dindaan làá yàntī mbusu nì fìkil fikil nì sámbu ń jēetí tin kamaa ni làá nīn ŋáańee pu kí cáá sāā ŋyunti ŋun ní ni làá céetí múbuee. Naa làá pée sūŋkì ní kí nàan̄, di sá yii ni dū-mi ki fá ki kíǹ ki bíi ŋáań atuŋkpiti.

²¹Ti-Dindaan làá dū iween kí tɔ̄ ni-pu ní í kpɔ̀ kí céetí-ni kitiŋ kin ni làá kɔ́ nee poon.

²²U làá dū didúntil nì nnaanyeem nì anal nì diwumpildi kpaŋkpam weeŋyi kí tɔ̄ ni-pu, ní kí yàntī ŋweel ń sīĺ ní ni kpaajinti ń kpā, àá tí sūū. Agìń gbanti kɔkɔ làá jēetí ni-pu kí cáá sāā ŋyunti ŋun ní ni làá kpú kí céetée.

²³Kutaa kun dàn̄ ni-yil pu nee làá kpántí kii tasee, ní kitiŋ kin dɔ̄ ni-taaŋi taapu nee mun ń pɔ̄ɔkì káŋkaŋ kii tikútee.

²⁴An nín bàà sá ti-Dindaan ń yàntī utaa ń nì ni-tiŋki puee, dikpɔŋkpɔndi nì dibul ní u làá yàntī an nyēeń yilpu ki sìtīń ni-pu kí kpɔ̀ kí céetí-ni.

²⁵Ti-Dindaan làá yàntī ni-nannanliibi ń já kí pɔ̄ɔkiǹ-ni. Ni làá dī nsambaanti pu kí cù kí já nì bi, ama ní kí dī isan iluli pu kí sāǹ-bi. Tin làá bàn̄ ni-puee làá cúú kitiŋ pu beeŋi kɔkɔ tifaandi.

²⁶Ni-nikpiliŋ làá kpántí tijin ní kí tīī inoon in ŋàaǹ kutaa puee nì tiwaŋkuti tin bí kitiŋ puee, ubɔ dāa kpá kí jà-tì.

²⁷Ti-Dindaan làá dū ibunsoon in u nìn tɔ́ Eejipiti yabee[145] nì ncaapa nì digbàndi nì iwàlfi kí tɔ̄ ni-pu. Ni dāa kpá kí ká dicáaǹdi.

²⁸Ti-Dindaan làá dū kuwaatiiu nì ijɔfi nì diyilabitil kí tɔ̄ ni-pu.

²⁹Ni dāa táfí an kɔkɔ kuwiŋkaŋu pu kii ujɔfu nín bí dibɔmbɔndin ki táfí puee ní. Tin kamaa ni yaa bíi ŋáańee, án kaa làá bútí-ni. Bi làá nīn wɔ́b̀-ni baabadal ní kí fūkul̀-ni. Báà ubɔ mun dāa kpá kí fīī-ni.

³⁰Ni làá nīn cáá bɔɔn ki bàà máká kí cáá-u ní ubɔ fám ń cáá-u. Ni yaa máń kudii, naa làá kɔ́-kù. Ni yaa kùn̄ bufiinyikpaa, naa làá ká bu-biliŋ kí kìtī.

³¹Ni-nimbilaaliyin ní bi làá cúú ni-naai kí làntì, ama naa làá ká i-nanti kí dáká. Ni dāa sí ki kpèé ní bí yɔ̀ ni-mammu, ama baa làá fàtīí gíiǹní-mu kí tīī-ni. Bi dāa dù ni-piii nì ni-ŋoobui kí tīī ni-nannanliibi, ama ubɔ kaa dāa bí kí jòó-ni.

³²Ditimbundi diba yab làá cūtì ni-jipɔmbi nì ni-bisalib kuyuŋu, ní ní kpèè bi-saŋŋu pú kí gīī, ama kaa dāa ŋūǹ kí ŋá tiba nì tiba.

³³Dinibul din naa nyée di dāa yì ni-timmu jinti nì ni-tuntuŋku paatii kɔkɔ kí jī. Nimbee, bi dāa pée sàantí-ni ní, ki jīǹ ni-pu.

³⁴Tibɔti tin làá nīn jītí ni kāntée làá yàntī ní wáatí.

³⁵Ti-Dindaan làá dū ibunsoon in baa dāa ŋūǹ kí cáaǹee kí tɔ̄ ni-tabiŋyiliŋ nì ni-tapaŋŋi ní an nyàtī kí gbí ni-wunti kɔkɔ pu kí yòon̄ ni-taaŋi poon kí cáá sāā ni-yiliŋ kansikin.

³⁶Ti-Dindaan làá cáá ni nì ni-bɔtiu un ni kāaǹee kí cùnnì ditimbundi din ní nimbi nì ni-naanjab kaa nìn nyée poon. Niin ní ni dāa kíǹ ki tòotī awaa ŋin sá ataŋkpee nì idɔee[146].

³⁷Tin làá jītí ni-puee làá ŋá atimbun ŋin poon ní ti-Dindaan làá cáá-ni kí cùnnèe nib bitii, ní bi dāa kíǹ ki sòoǹ ni-bɔti ki bèel̄-ni.

³⁸Ni làá kpɔ̀ tisati kí bɔ̄l̀ tikpil tikpil, ama ní kí cā fiii di sá yii inaakitoon làá kēefì kɔkɔ.

³⁹Ni làá kpɔ̀ afiinyikpaan kí cóoń fiinyi sufii kí bɔ́ntí-i an nín máaǹ puee, ama naa dāa kāntí fiinyi gbanti subil báà diba kí kìtī ki dāa nín nyàab̀ ŋi-daam kí nyɔ̀. Di sá yii akoosibil di dāa dù kɔkɔ kí ŋmɔ́.

⁴⁰Ni làá nīn cáá ɔliifi sufii ni-tiŋki kɔkɔ poon, ama naa dāa kāntí i-kpam kí ŋmìtī, di sá yii ni-ɔliifi sufii yaa láa lòon̄ee, abil kaa dāa bīī ní kí gbátí kɔkɔ.

⁴¹Ni làá màal̀ mbininjabiyaamu nì nnimpubiyaamu, ama muaa làá kàl̄ ni-cee, di sá yii bi dāa cútí-mu kí cùnnì kuyuŋu ní.

⁴²Inaakitoon dāa kpátí kí bìin̄ ni-sufii nì ni-kpaajinti pu ní kí kēefì kí céetí an kɔkɔ múb.

⁴³Unicaan un kóò ni-puee làá nīn jítiǹ-ni kpataaa, ní ki tɔ́kɔ́ ni-pu. Ama nimbee, ni dāa mɔ̀tīi sìntī taapu ní ki cá.

⁴⁴Úǹ di dāa cáá kí pìnnì-ni, ama nimbee, naa dāa cáá tiba kí pìnnì-u. U dāa sá usanliiti ní nimbi sá biboompaanliibi.

⁴⁵Mbusub nee kɔkɔ làá jēetí ni-pu ní kí nīn dī-ni míǹ kí cáá sāā ŋyunti ŋun ní ni làá kpú kí céetée. Di sá yii naa tɔ́ ti-Dindaan ni-Nimbɔtiu, ní kaa tí ŋúb́ u-marab nì u-bɔkpaaŋi ŋin u tīī-nee mun.

⁴⁶Mbusub gbanti làá nīn sá kudaaŋŋu nì atulim ní ki tīī nimbi nì ni-naantiibi ki nín cáa cá jaanjaan.

⁴⁷Ni yaa kaa jáam̀ ti-Dindaan ni-Nimbɔtiu nì mmɔn nì dipɔɔpindin ŋyunti ŋun ní ni bí digbilinee,

⁴⁸ni làá kpántí ni-nannanliibi bin ti-Dindaan dāa cāabìń kí tɔ̄ ni-puee yumbui ní. Ŋkùm nì nnyinnyoo làá cúú-ni ní ní nīn kíǹ ki gàaǹ kaa ti pée cáá báà tiba. Ti-Dindaan làá dū tikúti kí bóob́ kí páań ni-gbigbipati pu kii bi nín kpàl̀ inaa in kù tikpaalee puee, kí cáá sāā ŋyunti ŋun ní ni làá kpú kí céetí múbuee.

⁴⁹Ti-Dindaan làá cáań ditimbundi din nyánní ndandati kitiŋ gbeennyɔkɔee, ditimbundi din sooŋyi naa gbìl̀ee kí tɔ̄ ni-pu kii ukaabu nín tòó puee.

⁵⁰An dāa sá ditimbundi din nib cáá inimbinaakulimee ní. Baa dāa kpèé utikpil nimbiinaaa, kaa dāa sūǹ binipɔmbi mun saai.

⁵¹Bi dāa yòontí ni-waŋkuti kɔkɔ nì ni-kpaajinti kɔkɔ kí jī, ní ní dāá kpú ŋkùm. Baa dāa kīntí-ni dibileebil àá ndamam àá ŋkpam àá ni-naai nì ni-ŋoobui biyaamu gba, ní ní dāá kpú kí céetí.

⁵²Bi làá lùkù kí gíb́ ni-timmu kɔkɔ kí jáǹ-ni kí cáá sāā ŋyunti ŋun ní ni-timmu mun ni máń aguŋfɔkɔ ki tú ki máká mu-pu yii ubɔ kaa ŋūǹ kí kɔ́ mu-nee ń lítí. Bi dāa lùkù kí gíb́ ntimu mun kɔkɔ bí kitiŋ kin ti-Dindaan ni-Nimbɔtiu tīī-nee poon ní kí jáǹ-ni.

⁵³Bi yaa láa lùkū ki gíb́ ni-timmu míǹ kí já kí fōō-muee, ni làá kɔ́ falaakpaŋkpaan poon, áli gba ni-poon biyaamu di làá kpántí ni-jinti. Tiŋman, ni làá ŋmɔ́ ni-jipɔmbi nì ni-bisalib bin ti-Dindaan ni-Nimbɔtiu tīī-nee nanti.

⁵⁴Unil un dāa mɔ̄ ki gbìl̀ u-juti falaau ni-kansikinee kaa dāa gíti là ki wāl̀ úǹ u-ba maan àá u-naal àá u-nimpuu un u néeńee àá u-biyaamu mun kíǹ-uee gba.

⁵⁵Di sá yii waa dāa là u nì bi-kansikin ubɔ ń yàkatī u-biyaamu nanti kí ŋmɔ́, kun puee mbiyaamuee di dāa kíǹ ki sá u-jikaati ŋyunti ŋun ní ni-nannanliibi yaa láa lùkū ki gíb́ ni-timmu kí jáǹ-nee. Ni-nannanliibee làá yàntī ni-nimbiliŋ ń mántí tikpil.

⁵⁶Ni-kansikin unimpu un là u-ba tikpil kaa pée là tiba ń gbēē-u, kaa màkantí gba kí dū u-taal poon kí taa kitiŋee dāa dàab̀ u-cal un u néeńee nì úǹ u-ba jipɔmbi nì u-bisalib ní.

⁵⁷Di sá yii u dāa là kí ŋmɔ́ kibipɔŋ kin u dáá màl̄ee nì dibɔl dibalin u-baba, kun puee ni-nannanliibi nín lùkū ki gíb́ ni-timmu kɔkɔ pu kí jáǹ-nee làá kɔ́ǹ-ni dinimbinaamandin[147].

⁵⁸Ni yaa kaa ŋúb́ marab bin bi ŋmàn̄ kugbɔŋu nee poon, kí nīn ŋáań bi nín bí yii ní ŋá puee, kaa fāŋkì diyindi din cáá tinyool nì mpɔnee, an dàkà yii <Ti-Dindaan ni-Nimbɔtiu>,

⁵⁹ti-Dindaan làá dū maamaaci weeŋyi nì tiweeŋkpiil nì iween in pɔ̄ɔ̄ kaa pée ŋān̄ee kí tɔ̄ nimbi nì ni-naantiibi pu.

⁶⁰U làá cáań Eejipiti weeŋyi in ni fàŋkí kaa là ni-nimbil ń kée kɔkɔ kí tɔ̄ ni-pu ní í cúú-ni.

⁶¹Ti-Dindaan làá dū iween in kɔkɔ baa ŋmàn̄ marab gbɔŋku nee poonee gba kí tɔ̄ ni-pu ní ní kpú kí céetí.

⁶²Nimbi bin nìn wīikí kii iŋmalbijaa in bí kutaa puee dāa kīntí ní fiii, di sá yii naa tɔ́ ti-Dindaan ni-Nimbɔtiu.

⁶³Kii an nín nìn mɔ́ɔkiǹ ti-Dindaan u ŋá-ni tiŋan ki yāntì ni būtì ki bí mmɔnni puee, míǹ mbaantiim ní án làá tí fàtīí mɔ̄ɔkiǹ-u ú nàan̄-ni kí kúntí-ni. U làá jà-ni kí nyāntí kitiŋ kin ni làá kɔ́ kí fōō kí nīn kíǹ ki yì nee poon.

⁶⁴Ti-Dindaan làá yàntī ní yàl̄ kí kɔ́ atimbun kɔkɔn, kí yòon̄ kitiŋ kpaanyɔkɔ kiba kí cáá sāā kin kíǹee. Ni làá tòotī awaa ŋin sá idɔ nì ataŋkpee nimbi nì ni-naanjab kaa pée nyí ki kée.

⁶⁵Ni dāa kpá kí ká diŋuŋfil atimbun gbanti poon. Naa dāa ŋūǹ kí ká mpaan fiii yéè kí síiń ni-taaŋi. Niinee ní ti-Dindaan ń dāá yàntī ní fáá diniindi ní ni-nimbiliŋ ń mántí ní ni-wunti ń yɔ̀tī.

⁶⁶Naa dāa pée gíti nyí tin poon ni bée. Ni dāa bí dinyoondin ní ŋwiimpu nì kunyeeu. Ni dāa pée kíǹ ki bí yii ni nín bée ní.

⁶⁷Tibɔti tin kɔkɔ làá nīn jītí ni kāntée làá bīil̀ ni-pɔbiliŋ tikpil. Kutaafaauee ní ní lì yii: «Ba dal ní ku làá jóotí dee!> ní ku yaa tí jóotèe ní ní lì yii: <Ba dal ní ku wúntí dee!>

⁶⁸Ti-Dindaan làá yàntī ní kɔ́ meelab kí fàtīí gítí Eejipiti tiŋkin, nì min kɔkɔ u nìn lī yii: <Ni-taal gíti kpá kí tāā kitiŋ gbantinee>. Ni yaa láa bàn̄ niinee, ni dāa nyàab̀ kí dū ni-ba kí nyāfiǹ ni-nannanliibi kí bàà kpántí bi-yumbui, ama naa dāa kāntí udal.»

⁶⁹Dipoondi din ti-Dindaan nìn yāntì Mooyiisi tīī Isirayeel yab Moowaab tiŋkin ki kútì din u nìn pōoǹ-bi Ooreeb jool puee bɔti dee[148].