Read Ntcham Deutéronome 3 Bible Online

Deutéronome 3 - Ntcham bible

Deutéronome 3

¹Míǹ boonee ní ti kíĺ Baasan saŋŋu ki nín cá. Ŋyunti ŋun Baasan bɔtiu Ɔɔgi ká-tee ní u nì u-samaau kɔkɔ kíntì-ti Eedreeyii tiŋkin kí já nì ti.

²Niinee ní ti-Dindaan bí-mi yii: «Taa fàŋkì-u, kun puee m dū-u ki ŋá a-ŋaan ki kpáaǹ u-samaau kɔkɔ nì u-tiŋki. Kii a nín ŋá Amɔɔr yab bɔtiu Siiwɔn un nìn kóò Eesbɔn tiŋkin puee, míǹ ní á ŋá u mun.»

³Ní ti-Dindaan ti-Nimbɔtiu dū Baasan bɔtiu Ɔɔgi mun nì u-samaau kɔkɔ ki ŋá ti-ŋaan ní ti kūū ki céetì-bi múb, kaa kíǹ báà ubɔ.

⁴Niinee ní ti fōō u-timmu kɔkɔ. Báà kitiŋ kaa nìn kíǹ taa fōō u-ŋaan. Ntimu gbanti nìn nyáń imuŋku ita, Argoob laguŋku kɔkɔn, Baasan tiŋkin, laakin Ɔɔgi jíń dibeelee.

⁵Bi nìn máń aguŋfɔkɔ ki māntìi tú ntimu gbanti kɔkɔ. Mu nìn cáá mpunyɔmu nì tikpàlkaal. Ama ntimbilimu tikpil mun nìn bí baa nìn máń agun ki tú-mu.

⁶Ti nìn nāaǹ ntimu gbanti kɔkɔ ní ki kūū ki céetì mu-nib kɔkɔ, bininjab nì binimpoobi nì mbiyaamu, kii ti nín nìn ŋá Eesbɔn bɔtiu Siiwɔn puee.

⁷Ama ti nìn yōoǹ tiwaŋkuti nì tigaajawan tin ti nìn jáń ki fōō ntimu gbanti poonee kɔkɔ.

⁸Ti nìn jáń nì Amɔɔr yab bɔtiibi bilee ní ki fōō bi-timmu. Ntimu gbanti nìn bí Jɔɔdan, ŋwìiń nyalaŋki pú ní, kí yòon̄ Arinɔn buŋŋu kí cáá sāā Eermɔn jool.

⁹- Siidɔn yab yíì Eermɔn jool yii Siiriyɔn, ní Amɔn yab yíì-dì yii Seeniir. -

¹⁰Ti nìn fōō ntimu mun nìn bí kigbantaŋ puee nì Galaadi jool puee kɔkɔ, ki kpáaǹ Baasan tiŋki kɔkɔ ki cáá sāā Salka nì Eedreeyii, Baasan timmu mun pu ubɔti Ɔɔgi nìn kāl̀ dibeelee.

¹¹Reefa yab maaliŋu poonee, Baasan bɔtiu Ɔɔgi di nìn pée sá unibambaanti un nìn kíǹ ki bí dimaŋfalinee. U nìn cáá tikúti lambaŋki kiba. Kilambaŋ gbanti gbíntìi bí díǹ pu nee Raaba, Amɔn yab tiŋkin. Kilambaŋ gbanti púuŋŋu nìn sá meetab binaa ní ki-waaŋŋu sá meetab bili.

¹²Ntimu mun ti nìn jáń ki fōō ŋyunti gbantee dee. M nìn dū dijandi din bí kí yòon̄ Arooweer tiŋki kin bí Arinɔn buŋŋu caŋinee ki kpáaǹ Galaadi jool dijandi nì di-timmu ki tīī Rubeen nì Gaadi naakɔti yab.

¹³Galaadi jool dijandi din kíǹee nì Baasan tiŋki, an dàkà yii Ɔɔgi nín nìn kā ntimu mun pu dibeelee kɔkɔee, m nìn dūu tīī Manasee naakooku yab dijandi diba ní. Bi nìn yíì Argoob laguŋku kun bí Baasan tiŋkinee yii Reefa yab tinikpaandi tiŋki.

¹⁴Yayiir un sá Manasee naantiiuee di nìn jáń ki fōō Argoob laguŋku gbanti kɔkɔ ki tin cáa sāā Geesuur nì Maakati timmu, ní ki nìn dū u-yindi ki pú Baasan timmu gbanti. An pu ní bi yíì ntimbilimu gbanti yii Yayiir timbilimmu ki dāa sāā díǹ.

¹⁵M nìn dū Galaadi tiŋki ki tīī Manasee naantiiu Makiir ní.

¹⁶Ama Rubeen nì Gaadi yabee, m nìn dū kitiŋ kin dɔ̄ kí yòon̄ Galaadi kí tin cáá sāā Arinɔn buŋŋuee ní ki tīī-bi. Bi-tiŋki kpaanyɔkɔ ń nīn bí mbun gbanti kansikin, kí cáá sāā Yaabɔki buŋŋu ŋun sá Amɔn yab timmu kpaanyɔkɔee.

¹⁷Kikpaanyɔkɔ kin bí ŋwìiń jeetilaŋki watil pú ki dī Jɔɔdan tantakal din bí Kiineereeti[16] mɔɔl nì Ŋyaam mɔɔl kansikinee, ní ki nìkī ki tin sāā Piisga jool din bí ŋwìiń nyalaŋki púee taapu.

¹⁸Niinee ní m kpáafì-bi yii: «Ti-Dindaan ni-Nimbɔtiu di tīī-ni kitiŋ nee kí nīn sá ni-yaka. Ni-kansikin bininjab bin sá bijanjaliibee kɔkɔ ń gbìn̄ bi-gbajab kí jītí kí lìntī ni-nabiyaamu Isirayeel yab nyɔkɔpu kí dùtī Jɔɔdan buŋŋu kí cù kujaau.

¹⁹Ama ni-nimpoobi nì ni-biyaamu nì ni-waŋkuti ń gbíntí ntimu mun m tīī-nee poon, kun puee m nyí ni nín cáá tiwaŋkuti tikpilee.

²⁰Ní tūtuǹ ni-nabiyaamu kí cáá sāā ŋyunti ŋun ní ti-Dindaan làá tīī-bi diŋuŋfil bi mun ń fōō kitiŋ kin ti-Dindaan ni-Nimbɔtiu làá tīī-bi Jɔɔdan buŋgbandi din bí lapu pu kii u nín ŋá pu ki tīī ni muee. Míǹ boonee ní ni-kɔkɔ ń dāá gítí ni-timmu mun ní m yākatì ki tīī-nee poon.»[17]

²¹Ŋyunti gbanti mbaanti ní m kpáafì Joosuwa yii: «Sii a-ba nimbil ká ti-Dindaan ni-Nimbɔtiu nín ŋá bibɔtiibi bili nee puee. Míǹ mbaantiim ní u làá ŋá ntimu mun bí lapu pu buŋgbandee bɔtiibi bin a làá tin kée mun.

²²Ní taa fàŋkì-bi, kun puee ti-Dindaan ni-Nimbɔtiu di yì dikɔ̀ndi kí já kí tīī-ni.»

²³Niinee ní m mēē ki gbāam̀ ti-Dindaan yii:

²⁴«Ti-Dindaan m-Nimbɔtiu, sii di kíĺ ki dàkā man a-tɔntɔnliu a nín sá ukpaan miŋyee nì a-pɔŋŋu, di sá yii unimbɔti ubɔ kaa ti bí yilpu àá taapu ki ŋūǹ kí ŋá a-maamaaci tuuŋŋi nee juti!

²⁵An puee m pée gbàam̄-si ní, á yàntī m pée dùtī Jɔɔdan buŋŋu kí tin ká kitimmɔntii kin bí niinee nì dijoomɔntiil gbanti nì Leebanɔn tiŋki.»

²⁶Ama ni-puee, ti-Dindaan gíí m-pu diŋuul kaa pílifiǹ-mi, ní ki bí-mi yii: «An ŋmēetèe, á taa ti pée sòoǹ tibɔti gbanti man cee.

²⁷Jɔ̄m̀ Piisga jool yilpu kí kpèè kí màntīí tū ŋwìiń jeetilaŋki pú nì ŋgan pú nì ŋgiil pú nì ŋwìiń nyalaŋki pú, kí kpítí a-nimbiliŋ kí kpèè tiŋan, ama a kpá kí dùtī Jɔɔdan buŋŋu nee[18].

²⁸An puee, á kpāafì Joosuwa, kí tīī-u kunyannyaau ú mɔ̀tīi ká mpɔn, kun puee úǹ di làá nīn līī samaa nee nyɔkɔpu kí cáá-bi kí dùtī Jɔɔdan ní kí fōō kitiŋ kin a làá kpèè nee kí tīī-bi bí nīn kíǹ ki yì.»

²⁹Niinee ní ti gbíntì ditantakalin ki pìlīǹ Beeti-Peewɔɔr tiŋki.