Read Ntcham Deutéronome 30 Bible Online

Deutéronome 30 - Ntcham bible

Deutéronome 30

¹Dibiindi nì mbusub bɔti tin m dūu bíl̀ ni-nimbiin nee làá dāá ŋá míǹ. Ti-Dindaan ni-Nimbɔtiu yaa láa yāntì ni yàl̄ ki búntì nnicantimunee, ní dāá dàkafì tibɔti gbanti pu tiŋan.

²Nimbi nì ni-biyaamu làá fàtīí gítiń ti-Dindaan ni-Nimbɔtiu cee kí nīn kíǹ ki tɔ́-u nì ni-pɔbil kɔkɔ nì ni-naŋki kɔkɔ, kí nóó nì tin kɔkɔ m dūu kpáafì-ni díǹ nee.

³Ti-Dindaan ni-Nimbɔtiu làá dāá dū ni-gìŋ́ŋi kí kpántí mmɔn. U làá dāá sɔ̄ ni-saai ní kí fàtīí kóoǹní-ni atimbun ŋin kɔkɔ poon ní u nìn yāntì ni yàl̄ ki búntèe kí gíiǹní.

⁴Báà ni yaa yàl̄ ki bínní kitiŋ gbeennyɔkɔ, ti-Dindaan ni-Nimbɔtiu làá dāá cù niin kí kóoǹní ni-kɔkɔ kí kpāfì kí fàtīí gíiǹní-ni.

⁵U làá dāá fàtīí gíiǹní-ni ni-naanjab tiŋkin, ní ní dāá fōō-kì kí nīn kíǹ ki yì. U làá dāá fàtīí tīī-ni mmɔn ní kí yàntī ní bùtī kí jītíǹ ni-naanjab.

⁶Ti-Dindaan ni-Nimbɔtiu làá dāá kpántí ni nì ni-naantiibi pɔbiliŋ, án nín làá ŋá pu ní dāá nīn kíǹ ki néeń-u nì ni-pɔbil kɔkɔ nì ni-naŋki kɔkɔ, kí nīn bí dimaŋfalinee.

⁷Ti-Dindaan ni-Nimbɔtiu làá dāá dū mbusub nee kɔkɔ kí tɔ̄ ni-nannanliibi nì bin ná-ni ki sàantí-nee pu.

⁸Nimbee, ní dāá fàtīí nīn tɔ́ ti-Dindaan kí nīn ŋúb́ u-marab bin kɔkɔ m tīī-ni díǹ nee.

⁹Niinee ní ti-Dindaan ń dāá yàntī án bútí-ni ni-tuuŋŋi kɔkɔ poon tikpil, kí bùtī ni-maaliŋu nì ni-waŋkuti ní kí yàntī ni-kpaajinti ń lòoǹ. Di sá yii án làá dāá fáatíǹ ti-Dindaan ú ŋá-ni tiŋan kii an nín nìn fáatiǹ-u u ŋá ni-naanjab puee.

¹⁰Kí wàatī míǹ ń nín ŋée, asee ní nīn tɔ́ ti-Dindaan ni-Nimbɔtiu kí nīn ŋúb́ u-marab nì u-bɔkpaaŋi ŋin bi ŋmàn̄ ki ŋá marab gbɔŋku nee poonee, ní kí fàtīí gítiń ti-Dindaan cee nì ni-pɔbil kɔkɔ nì ni-naŋki kɔkɔ.

¹¹Marab bin m cáa bíi tìì-ni díǹ nee kaa pɔ̄ɔ̄ tikpil ki jítiǹ ni-pɔŋŋu pu, ní kaa ti bíń laakin naa ŋūǹ kí bèe.

¹²Baa bíń yilpu[155] ní ní lì yii: «Ŋma di làá jɔ̄m̀ yilpu kí nyàab̀-bi kí cáań kí tùkù-ti, án nín làá ŋá pu tí ŋmā kí béé kí ŋá kii bi nín bí yii tí ŋá puee?»

¹³Baa tí bí tiŋku gbandi lapu yal ní ní lì yii: «Ŋma di làá dùtī tiŋku kí nyàab̀-bi kí cáań kí tùkù-ti, án nín làá ŋá pu tí ŋmā kí béé kí ŋá kii bi nín bí yii tí ŋá puee?»

¹⁴Aayee, dinyɔɔbundee dɔ̄ ki kɔ́ĺ-ni. Di kā ni-nyɔkɔn ki kā ni-pɔbilin, án nín làá ŋá pu ní ŋmā kí ŋá kii di nín bí yii ní ŋá puee.

¹⁵Kpèèmaan, díǹ nee, m dū dimaŋfal nì nnaam, ŋkúm nì nnaabu ki bíl̀ ni-nimbiin.

¹⁶Mamee, m kpáafí-ni díǹ yii ní nīn néeń ti-Dindaan ni-Nimbɔtiu, kí nīn ŋáań u nín là puee, kí nīn ŋúb́ u-marab nì u-bɔkpaaŋi nì u-koobiliŋ. Ni yaa ŋá mimmee, ni làá nīn bí dimaŋfalin ní kí bùtī, ní ti-Dindaan ni-Nimbɔtiu ń bìin̄ ni-boon kitiŋ kin ni làá kɔ́ kí tin fōō kí nīn kíǹ ki yì nee poon.

¹⁷Ama ni yaa fātì ni-boon ki tīī-u, ní ki yaa kaa pílifiǹ-u ní ki cūtìi bíi gbàantí awaa taapu ki tòotī-ŋee,

¹⁸m tùkū-ni ki gíti bíi tùkù-ni díǹ yii ni làá pée kpú kí céetí ní múb. Naa làá kàl̄ kitiŋ kin poon ni làá dùtī Jɔɔdan buŋŋu kí cùú kɔ́ kí nīn kíǹ ki yì nee kí yúntí.

¹⁹Kutagbɔŋu nì kitiŋ sá-mi biseeradambi díǹ yii m dū dimaŋfal nì ŋkúm, dibiindi nì mbusu ki bíl̀ ni-nimbiin ní lēē. Ama ní lēē dimaŋfal án nín làá ŋá pu ni nì ni-naantiibi ń nīn bí dimaŋfalinee.

²⁰Nín̄ néeḿmaan ti-Dindaan ni-Nimbɔtiu kí nīn tɔ́-u, kí dū ni-ba kí nákáǹ-u. Míǹ ní ti-Dindaan làá yàntī ní nīn bí dimaŋfalin, ní kí yàntī ní kàl̄ kitiŋ kin poon u nìn pūtì ki pōoǹ ni-naanjab Abraam nì Isaaki nì Jaakɔb yii u làá tīī-bee kí yúntí[156].