Read Ntcham Deutéronome 32 Bible Online

Deutéronome 32 - Ntcham bible

Deutéronome 32

¹Kutagbɔŋu, pīlifì m-bɔti, kitiŋ, pīlifì m-nyɔɔbuŋŋi.

²M-bɔti tin m dàkèe yàantí kii utaayee, ní m-nyɔɔbundi tòó kii dimalindee, kii utaaja nín nì ki sɔ̀ŋkī kumɔsɔŋu puee, kii putipuuki nín yàantí kumoou pu puee.

³Di sá m làá nyɔ̄ŋkì ti-Dindaan yindi. Tí nyɔ̄ŋkìmaan ti-Nimbɔtiu kpaanti.

⁴Ti-Dindaan sá kutaŋkpanaakoou. Inaatuu kpá u-tuuŋŋi poon, u-saŋyi kɔkɔ tèen̄ ní. U sá deedee Nimbɔtiu ní, ikpiti kpá u-ni, ibaamɔn nì deedeedaan ní u sá.

⁵Nimbi bin ŋáań ikpiti ki gáatèe, ni yīntiǹ ti-Dindaan. Án nīn cáá-ni icoo! Naa ti sá u-biyaamu!

⁶Dinibul din nib sá bigbaambi ki lóò dinyilee, mimmee tipaal tin ni làá dūú pà ti-Dindaanee deeee? Úǹ di kaa sá ni-baa ki tīī-ni dimaŋfalaaa? Úǹ di kaa náań-ni ki dū-ni ki kpántì u-nibulaaa?

⁷Téetímaan iyuntikpiki pu, dàkafìmaan ni-naanjab yuntii pu. Bàlifìmaan ni-baabi bí tùkù-ni! Ní bàlifì ni-tikpilib bí māafì-ni!

⁸Yilpu fɔ́ŋŋŋ Nimbɔtiu nín nìn tīī atimbun kɔkɔ bi-timmuee, ŋyunti ŋun u nìn cúú anibul kɔkɔ ki yākatì tɔbinee, u nìn tīī ditimbundi kamaa di-kpaanyɔkɔ ki nóó nì Isirayeel yab nyɔkɔm ní.

⁹Ama ti-Dindaan nibul di sá u-fakal, Jaakɔb naantiibi ní u lēē kí nīn yì.

¹⁰Ti-Dindaan nìn ká u-nibul kuteeun, laakin bi gbìl̀ jiiŋkpaaibi siim ŋmaniŋma puee. U nìn wúń bi-pu ki dàkà-bi, u nìn cí-bi kii u-nimbibuliiyee.

¹¹U nìn ŋá kii ukaalun nín ŋáań pu, kí yòon̄ u-biyaamu kí jɔ̄m̀ yilpu kí gíiǹ-mu kí líiń pu ní kí kpátiń u-feeŋyi kí nīn sìntīń pu ki cí mun yaa gīīyee ń dāá páań puee ní.

¹²Ti-Dindaan baba di nìn kpōotì u-nibul, unimbɔti ubɔ kaa nìn bí ki kútì u-pu.

¹³U nìn kāaǹ-bi ŋgbantamu pu, ní ki dū tikpaajin ki kpíiǹ-bi. U lēē tisiil ntaŋkpalɔkɔn ki tīī-bi bi ŋmɔ́, ní ki nyántì ŋkpam ditaŋkpayaabulin ki tīī-bi bi jíń.

¹⁴U nìn tīī-bi waagaasii nì mpibiim, ki tīī-bi apibil nì iŋɔjaa nì ipijaa in bí màlmalee, ki tīī-bi bileemɔnti yim bi jíń, ní ki tīī-bi fiinyi damam bi nyùn̄.

¹⁵Yeesurun[163] jíń ki díkí ki ŋá ŋkpamee, ní ki kíǹ ki bíi tòó igbeen. U gbīfiǹ ki ŋá ŋkpam ki ŋá gbàlgbalee, ní ki dū Unimbɔti un náań-uee ki fá, ki kíǹ ki kpèé un sá u-taŋkpanaakooku nì u-fiiliuee fám.

¹⁶Isirayeel yab nìn ŋá ntimbiil tuuŋŋi ki yāntì Unimbɔti gíí diŋuul. Bi nìn dū bi-waatuuŋŋi ki gbítì u-ŋuul.

¹⁷Bi nìn ŋáań saraabi ki tìì arasiniibi, kaa sá Unimbɔti[164]. Bi nìn ŋáań ki tìì awaa ŋin baa nìn nyí ki kée, awaapɔɔn ŋin bi dáá nyántì bi-baabi kaa nìn nyí ŋi-pu gbee.

¹⁸«Isirayeel, a súntì a-taŋkpanaakooku pu, a súntì un màl̄-see pu, kaa ti dū Unimbɔti un tīī-si dimaŋfalee ki yíiń tiba.»

¹⁹Ti-Dindaan ká mimmee ní ki gíí diŋuul, u-jipɔmbi nì u-bisalib yīntiǹ-u ní u dū-bi ki fá.

²⁰Ní ti-Dindaan lī yii: «M làá fàtī m-boon kí tīī-bi, ní kí kpèè án nín làá dāá kúntíǹ-bi puee. Kun puee bi sá binib bin gáatèe ní, binib bin pu baa ŋūǹ kí nīn mákée.

²¹Bi yāntì kun kaa sá Unimbɔtee fōō m-paaŋŋu ki kɔ́ǹ-mi ipoompoon, ní ki dū bi-waaŋi ŋin kaa bí tibanee ki gbítì m-ŋuul. Ma mun làá dū dinibul din kaa sá m-yalee kí kɔ́ǹ-bi ipoompoon, ní kí yàntī bí fōō diŋuul binib bin kaa cáá iciinee pu[165].

²²Di sá m-ŋuul bíi fòol̄ lìblib kii ŋŋmee. Di wùn̄ ki tin bàn̄ ditaŋkpiil taapu, di wùn̄ ki kpáaǹ kitiŋ nì tin kɔkɔ ki lòon̄ee, ki làá póotí kí wà ajoon nyeel.

²³M làá tɔ̄-bi agìń tikpil poon, m làá tɔ̄-bi m-piiŋyi.

²⁴Ŋkùm yaa láa bàn̄-bi, ní bìlbil kúm weeŋyi nì iweentintikaa in kùee yaa láa cúú-bee, ní ḿ dāá dū ipeecuncuti nì ikoobu in cáá tiloolee kí tɔ̄ bi-pu.

²⁵Bi làá dū kitàataajiki kí kpɔ̀ bi-biyaamu adan pu, ní dipɔɔbiildi ń kɔ́ báà ŋma adiinni. Tin làá bàń unaacimpɔɔnee di làá bàń usapɔɔn, tin làá bàń kibipɔŋee di làá bàń utikpil.»

²⁶«M dākafì kí bàà nà-bi ní dúsi dusi, ní kí kúntí bi-yindi kitiŋ pu kpataaa.

²⁷Ama kun m fāŋkèe di sá bi-nannanliibi siibiliŋ. Bi ŋūǹ kí taa gbìl̄ taapu ní kí lì yii: <An sá ti-kpabil di tīī-ti dijajil, an kaa sá bi-Dindaan di ŋá tin bí nee.>

²⁸«Isirayeel yab sá ditimbundi din landɔkɔi gátèe ní, baa cáá iciin báà fiii.

²⁹Bi yaa bàà cáá dinyil fiii, bi bàà gbìl̀ taapu tiŋan, kí dàkafì kí béé tin dɔ̄ ki cí-bee.

³⁰Mana ní unibaanti bàà ŋūǹ kí jà binib kutuku, ní binib bili ja ń yàntī binib kutukub saalaa ń sāǹ, an yaa kaa sá yii man bi-Dindaan un sá bi-taŋkpanaakookuee di dū-bi ki ŋá bi-nannanliibi ŋaan?

³¹«Di sá yii bi-nannanliibi nyí tiŋan yii bi-taŋkpanaakooku kaa bí kii Isirayeel taŋkpanaakookuee.

³²Bi-fiinyi sufii bí kii Soodoom sufiiyee, bi-kpaaŋŋi bí kii Goomoora kpaaŋŋee. Bi-fiinyi sufii lòoǹ abil ŋin cáá tiloolee, abil ŋin di tū kátí katee.

³³Bi-damam sá kii ikoobu lootee ní, a lì kii ukoowaati lootee.

³⁴«Kpèèmaan kun man bi-Dindaan bɔ́ntì dibalin an dɔ̄ ki cí-bee.

³⁵Man di làá dāá tɔ̀ ipɔntoon, man di làá dāá pà bi-tuuŋŋi paati. Bi-nimbinaamandi wiiŋŋu tóobiń, tin bɔ́ntì ki cí-bee kaa làá tàan̄ ní kí bàń-bi.»

³⁶Tiŋman, ti-Dindaan làá dāá sòoǹ kí pɔ̀ u-nibul, ní kí dāá sɔ̄ u-tɔntɔnliibi saai ŋyunti ŋun u yaa láa ká yii baa ti cáá mpɔn, ní uyumbu àá un tɔ́ u-bee kaa ti bée.

³⁷U làá dāá bàlifì yii: <Bi-waaŋi ŋin nìn sá bi-taŋkpanaakooku bi sáń ki kóòyee bí la ní?

³⁸Awaa ŋin nìn ŋmóò bi-saraabi kpam, ki nyù ndaam min bi féeń-ŋee bí la? Ŋí yīkì kí dāá fīī-baa! Ŋí nyàab̀ kibalilaŋ kí tīī-baa!>

³⁹Míǹ puee ní béémaan díǹ yii, man baba di sá Unimbɔti, ubɔ kaa ti bí ki kútì man pu. Man di ŋūǹ kí lēē unil maŋfal, man di tí ŋūǹ kí tīī dimaŋfal. Man di tìì tiweendi, man di tí cāantí, ní ubɔ kaa bí ki ŋūǹ kí fīī un kā man ŋaanee.

⁴⁰M yōoǹ m-ŋal yilpu ki lī yii: <M bí dimaŋfalin kí nīn cá jaanjaan!

⁴¹M yaa lōoǹ m-tàataajiki kì jītí pámpam ki dū-kì ki tākaǹ m-ŋaan kí kíĺ ibɔsoonee, m làá tɔ̀ m-nannanliibi ipɔntoon, ní kí pà bin kɔkɔ ná-mee bi-kpitii paati.

⁴²M-piiŋyi làá dāá nyɔ̀ fatiku kí gbí, ní m-tàataajiki ń dāá ŋmɔ́ bin fōō tiweendee nì bin bi cúú kuyuŋuee nanti, ki kpáaǹ binannanliibi kpilib yiliŋ.>

⁴³Atimbun, ní pàkàmaan ti-Dindaan nikitil, di sá yii ti-Dindaan làá tɔ̀ u-tɔntɔnliibi bin bi kūūyee pɔntooŋyi, kí dáaĺ u-nannanliibi tafal, ní kí fíntí u-tiŋki nì u-nikitil kpitii.

⁴⁴Mooyiisi nì Nuuni jipɔɔn Joosuwa[166] dɔ́miń ki dū nlan nee nyɔɔbuŋŋi ki sòon̄ samaa kɔkɔ tafalin.

⁴⁵Ŋyunti ŋun ní Mooyiisi kàan̄ tibɔti gbanti kɔkɔ ki tīī Isirayeel yab ki dóòyee,

⁴⁶ní u bí-bi yii: «Ní taa dū tibɔti tin kɔkɔ m kpáafì-ni díǹ nee kí ŋá bugbambu, kí taa dūú gbīiliǹ. Ní dū-tì kí dàkà ni-biyaamu, ní mu mun ń ŋmā kí nīn tɔ́ marab nee nyɔɔbuŋŋi kɔkɔ tiŋan.

⁴⁷Di sá yii marab gbanti sá tibɔmɔntiil ní, ní ki sá ni-maŋfal. Ni yaa tɔ́-bee, bi làá yàntī ní kàl̄ kitiŋ kin ni làá dùtī Jɔɔdan buŋŋu kí cùú fōō kí nīn kíǹ ki yì nee poon kí yúntí.»

⁴⁸Ŋwimbaanti gbantee ní ti-Dindaan tùkū Mooyiisi yii:

⁴⁹«Cù Abariim jooŋŋi ŋin bí Moowaab tiŋkin, Jeeriikoo tiŋki nyɔkɔpuee kí jɔ̄m̀ Neeboo jool pu kí kpèè Kanaan tiŋki kin m làá dūú tīī Isirayeel yab bí nīn kíǹ ki yèe.

⁵⁰Dijool din a làá jɔ̄m̀ee pu ní a làá tin kpú kí cùú ŋàl̄ a-naanjab, kii a-maan Aarɔn nín kpíì Ɔɔr jool pu ki cūtìi ŋàl̄ u-yab puee[167].

⁵¹Di sá yii ŋyunti ŋun ni nìn bàn̄ Meeriiba Kadeesi, Siini teeku puee, ni-liitil kaa nìn ŋá Isirayeel yab nimbiin kii m nín nìn bí yii ní ŋá pu kí ká nnyimee, kaa nìn tí dàkā Isirayeel yab yii m sá circir[168].

⁵²Míǹ puee ndandati ní a làá sīĺ ní kí wāl̀ kitiŋ kin m làá dūú tīī Isirayeel yabee, ama sii a-ba kpá kí kɔ́ ki-ni[169].»