Read Ntcham Deutéronome 33 Bible Online

Deutéronome 33 - Ntcham bible

Deutéronome 33

¹Kí wàatī Unimbɔti niliu Mooyiisi ń kpúee, u nìn mēē ki bīiǹ Isirayeel yab pu.

²U nìn lī yii: «Ti-Dindaan nyánní Siinaayi jool pu, u nyáń ki páaǹní Seeyiir jool watil pú, ní ki ŋmíntì u-samaau pu doooo Paaran jool pu. U bāań Meeriiba Kadeesi. Niin ní u nìn ŋúbiń marab bin jìl̀ee u-ŋaan kí tīī-bi.

³Tiŋman ti-Dindaan, a néeń Isirayeel naakɔti. Bin kɔkɔ bí circiree bí a-ŋaan. Bi gbāā a-taaŋi taapu kí fōō a-nyɔɔbundi.

⁴Marab bin ní Mooyiisi tīī-tee, Jaakɔb naantiibi gaajawanti dee.

⁵Ŋyunti ŋun samaa kpilib nìn kpáfì ki kpáaǹ Isirayeel naakɔti kɔkɔee, ti-Dindaan di nìn sá Yeesurun[170] bɔtiu.»

⁶Ní Mooyiisi kútì ki lī yii: «Rubeen naakooku ń nīn bí dimaŋfalin kí taa kpú, u-nib bin pátèe mun ń nīn bí dimaŋfalin.»

⁷U sòon̄ Juuda naakooku pu yii: «Ti-Dindaan, pīlifì Juuda neen, kí cáań-u u-yab cee bí ŋá ubaanti. Ú mɔ̄tì u-ba pu nì tininjati. Tūtuǹ-u ú jáǹ u-nannanliibi.»

⁸U sòon̄ Leefii naakooku pu yii: «Ti-Dindaan, a dū a-Tumiimuu nì a-Uriimuu ki tīī unil un fáatiǹ-see ní. A nìn cɔ́ŋkì-u Maasa, sii nì u nìn kpáká Meeriiba nyim laŋki[171].

⁹U dàkā a-pu dineendi ki jítiǹ u-baa nì u-na pu, ki jítiǹ u-nabiyaamu nì u-biyaamu pu. Di sá bi nìn ŋúb́ a-nyɔɔbundi, ní ki nìn ŋúb́ a-poondi[172].

¹⁰Bíǹ di dàkà Jaakɔb yab a-koobiliŋ, ki dàkà Isirayeel yab a-marab. Bíǹ di tùutī talaalub ki tìì-si, ki ŋáań saraawɔkaa a-saraafaŋŋu pu.

¹¹Ti-Dindaan, mɔ̀tīí kūtì-bi mpɔn, yàntī bi-ŋaan tuuŋŋi ń fáatiǹ-si. Fáá kí tàtī bin yíkì kí jáǹ-bee cammu, bin ná-bee ń taa ti ŋmā kí yīkì.»

¹²U sòon̄ Beenjameen naakooku pu yii: «Ti-Dindaan bineeŋkaaki, ú nīn bí ŋgbansɔŋfin u-Nimbɔtiu cee. di sá úǹ di wúń u-pu baabadal, ní ki kóò u-gbantammu kansikin.»

¹³Mooyiisi sòon̄ Jooseefi naakooku pu yii: «Ti-Dindaan ń bìin̄ u-tiŋki pu, kí tīī-kì dimalindi din nyēeń yilpuee, nì nnyim min nyēeń kitiŋ taapuee,

¹⁴kí tí tīī-kì tikpaajin timɔntiil tin ŋwìiń yàntī an nyēēyee, nì asubimɔnti ŋin lòoǹ uŋmal kamaayee.

¹⁵Tijimmɔntiil ń lòoǹ ki-jooŋŋi ŋin bí doooo jaanjaanee pu, asubimɔnti ń lòoǹ ki-gbantammu mun bí doooo cannaakuee pu.

¹⁶Tigaajati tin gbí kitiŋ nee puee nì ti-Dindaan un nìn nyántì u-ba kisugbooi poon ki dàkēe biindi ń dāan̄ kí nīn bí Jooseefi pu, úǹ un sá kii ubɔti u-nabiyaamu kansikinee[173].

¹⁷U sá unaja un sá dibiseemalee, ki cáá tinyool. U-yiŋyi bí kii upɔɔnaa yiŋyee, íǹ ní u làá nīn cáa gbáà atimbun nib kí cáá sāā kitiŋ kúntilaŋki. Míǹ ní Eefiraayiim naantiibi cutimaanyee bí, míǹ ní Manasee naantiibi kutukub kutukubee bí.»

¹⁸Mooyiisi sòon̄ Sabulɔn nì Isakaar naakɔti pu yii: «Sabulɔn, án nīn mɔ̄ǹ-si a-saŋkindi poon. Isakaar, án nīn mɔ̄ǹ si mun a-tantib poon!

¹⁹Ni làá dāá yíiń anibul dijool pu, kí dāá ŋá saraabi kii bi nín síiǹ mara puee. Di sá yii ni-gaajati làá dāá nyānní dimɔɔl pu, ní tiwammɔntiil tin bál̀ee ń dāá nyānní dibulin.»

²⁰U sòon̄ Gaadi naakooku pu yii: «Nyɔ̄ŋkìmaan ti-Dindaan un wàantí Gaadi tiŋkee! Gaadi dɔ̄ kii gbikintee ní. U yaa cúú kuwaŋkuluuee, u tɔ̀ntī-ku ní, kí yòon̄ ataa kí cáá sāā diyil.

²¹U lēē kitimmɔntii ki gāā u-bindi, u dū dijandi din sá ubɔti yalee kí síiǹ u-ba. U dɔ́miń ki kútì samaa kpilib pu ki ŋá kii ti-Dindaan nín là puee, ní ki sòoǹ ti-Dindaan bɔkpaaŋi ŋin u nìn tīī Isirayeel yabee pu[174].»

²²Mooyiisi sòon̄ Daani naakooku pu yii: «Daani sá kii digbikintipɔmbil din wúliń doooo Baasan tiŋkinee ní[175].»

²³U sòon̄ Neefitalii naakooku pu yii: «Ti-Dindaan gbéeǹ Neefitalii u-ŋanti nì u-biindi. Úǹ di làá nīn yì kitiŋ kí yòon̄ ŋwìiń jeetilaŋki kí cáá cùnnì ŋgiil pú.»

²⁴U sòon̄ Aseer naakooku pu yii: «Jaakɔb biyaamu kansikinee, Aseer ń nīn sá un boon ti-Dindaan bīiǹ tikpilee, u-nabiyaamu ń nīn néeń u-bɔti ní u-taaŋi ń nīn dēē ɔliifi kpamin.

²⁵U-kampiiŋi ń dāá nīn sá tikúti nì tasa kúti, ú dāá nīn cáá mpɔn kí cáá sāā u-kúm dal!»

²⁶Ní Mooyiisi nìkī ki lī yii: «Yeesurun Nimbɔtiu kaa cáá juti. Úǹ di sá ukpaan ki kāń atagban pu ki jàkàń ki pùntī kutaa kí dāá jòoń-si.

²⁷Unimbɔti un bí jaanjaanee di sá a-taŋkpanaakooku. U dàkà u-pɔŋŋu taapu doo baabadal. Úǹ di jìn̄ a-nannanliibi a-nyɔkɔpu, ní ki bí-si yii á kpɔ̀ kí céetí-bi!

²⁸«Isirayeel yab bí ŋgbansɔŋfin, Jaakɔb naantiibi bí dibatɔlin. Bi tàkā bilee nì ndapɔm tiŋkin, kitiŋ kin pu dimalindi nyēeń yilpu ki tòóyee.

²⁹«A bí mmɔnneeee Isirayeel! Ŋma di bí kii sii dinibul din ní ti-Dindaan fīīyee? Ti-Dindaan di sá a-gbampɔɔl, ki sá un tútúǹ-see. U sá kitàataajiki kin tìì-si dijajilee. A-nannanliibi làá dāá gbàan̄ a-nimbiin ní á dāá tāā bi-waapaaŋyi pùb.»