Read Ntcham Deutéronome 34 Bible Online

Deutéronome 34 - Ntcham bible

Deutéronome 34

¹Niinee Mooyiisi dūu dī Moowaab tantakal ki dàb̄ Neeboo jool ki tin jɔ́m̀ Piisga jool yilpu. Piisga jool gbanti nìn bí Jeeriikoo tiŋki nyɔkɔpu ní. Niin ní ti-Dindaan nìn dàkā-u kitiŋ kɔkɔ, ki yōoǹ Galaadi ki tin cáa sāā Daani tiŋki,

²ki kpáaǹ Neefitalii tiŋki kɔkɔ nì Eefiraayiim nì Manasee tiŋki nì Juuda tiŋki kɔkɔ ki tin cáa sāā tiŋku ŋwìiń jeetilaŋki pú,

³nì Neegeeb tiŋki nì Jɔɔdan tantakal ki yōoǹ Jeeriikoo ibafi tiŋki, ki tin cáa sāā Soowaar.

⁴Niinee ní ti-Dindaan tùkū-u yii: «Kpèè, kitiŋ kin m nìn pōoǹ yii m làá tīī Abraam nì Isaaki nì Jaakɔbee dee. M nìn tùkū-bi yii: <M làá dāá dū-kì kí tīī ni-naantiibi ní[176].> M yāntì a wál̀ kitiŋ gbanti nì a-nimbiliŋ, ama aa làá nín kɔ́ ki-ni ní.»

⁵Míǹ boonee ní ti-Dindaan tɔntɔnliu Mooyiisi kpíì Moowaab tiŋkin niin kii ti-Dindaan nín nìn lī puee.

⁶Ní ti-Dindaan síb́-u Moowaab tiŋkin ditantakalin, Beeti-Peewɔɔr tiŋki nyɔkɔpu. Ama báà ubɔ kaa nyí u-kaakul laŋki ki dāa sāā díǹ.

⁷Mooyiisi nìn cáá abin dilaataal nì mmuŋku ní ki kpíì. U nìn dáá pée gbíntìi wāĺ tiŋan ní, u-nimbiliŋ kaa pēefì, ní ki nìn gbíntìi dáá cáá u-pɔŋŋu mun.

⁸Isirayeel yab nìn súń Mooyiisi kpool iwiin mmuŋku nì saalaa ní Moowaab tantakalin. Míǹ boon ní Mooyiisi kpool kúntì.

⁹Ti-Dindaan nìn gbéeǹ Nuuni jipɔɔn Joosuwa Ŋfam min tīī-u dinyilee, di sá yii Mooyiisi nìn dū u-ŋalii ki páaǹ u-pu ki mēē[177]. An puee Isirayeel yab nìn pílifiǹ-u ní ki nìn ŋáań kii ti-Dindaan nín nìn kpáafì Mooyiisi yii bí ŋá puee.

¹⁰Baa ti ká Isirayeel tiŋkin Unimbɔti bɔnaatiliu ubɔ bí kii Mooyiisee. Mooyiisi nìn yūlifí ti-Dindaan nimbiin ní bi sòoǹ nì tɔb[178].

¹¹Ti-Dindaan nìn tú-u Eejipiti tiŋkin u cūtìi ŋá maamaacikpaambi Faaroo nì u-kàliŋkpilib nì u-nib kɔkɔ nimbiin.

¹²Mooyiisi nìn dàkā mpɔŋkpaan nì maamaaci tuuŋŋi Isirayeel yab kɔkɔ nimbiin.