Read Ntcham Deutéronome 4 Bible Online

Deutéronome 4 - Ntcham bible

Deutéronome 4

¹Kɔŋkɔnnee Isirayeel yab, pīlifìmaan abɔkpaa nì akoobil ŋin mama m-ba bíi cáa dàkà-ni nee kí ŋá ŋi nín bí yii ní ŋá puee. Ni yaa ŋá mimmee, ni làá nīn bí dimaŋfalin ní kí kɔ́ kí fōō kitiŋ kin ní ti-Dindaan, ni-baabi Nimbɔtiu làá dūú tīī-ni nee.

²Ní taa gbéeǹ tiba nì tiba tibɔti tin man cáa kpáafí-ni nee pu, kí taa tí bàtī tiba mun ti-pu kí fá. Ní nīn ŋúb́ ti-Dindaan ni-Nimbɔtiu marab bin m cáa bíi kpáafí-ni nee[19].

³Nimbi ni-ba ni-nimbil ká tin ti-Dindaan nìn ŋá Baal Peewɔɔr tiŋkinee[20]. Ti-Dindaan ni-Nimbɔtiu nìn kūū ki céetì bin kɔkɔ nìn pée jáam̀ diwaal Baal Peewɔɔree ki nyántì ni-kansikin.

⁴Ama nimbi bin nìn síl̀ nì ti-Dindaan ni-Nimbɔtiu deedeeyee, ni-kɔkɔ gbíntìi bí dimaŋfalin díǹ pu.

⁵Kpèèmaan, m dàkā-ni abɔkpaa nì akoobil kii ti-Dindaan m-Nimbɔtiu nín kpáafì-mi puee. Ni yaa láa bàn̄ kitiŋ kin ni làá kɔ́ kí fōō kí nīn kíǹ ki yèe poonee, ní dū-ŋi kí ŋá ditundi.

⁶Ni yaa ŋúb́ abɔkpaa gbanti tiŋanee, anibul ŋin kíǹee làá dāá gbìl̄ bi sòoǹ ni-marab nee pu ní bí yíiń-ni binyiliibi nì biciŋfitiibi kí lì yii: «Tiŋman, ditimbuŋkpaandi nee nib lafun sá binyiliibi nì biciŋfitiibeeee!»

⁷Tiŋman, ditimbundi dilal, báà di yaa sá dikpaandi min min ní di-waaŋi pìl̄-dì kii ti-Dindaan ti-Nimbɔtiu nín pìl̄-ti ki ŋáań tikɔkɔ ki tìì-ti ŋyunti ŋun ní ti yaa kúuǹ ki yíiń-u na?

⁸Ditimbuŋkpaandi diba gíti bí ki cáá abɔkpaa nì akoobil sá amɔnti kii marab bin m cáa tìì-ni díǹ naaa?

⁹Ama ní cúúmaan ni-ba, ní nīn nyíǹ ni-ba tiŋan kí taa súntí tin tin ni-nimbil kée. Ní yàntī tin ni kée ń nīn kā ni-pɔbilin ní nīn cáá-tì ki dàkà ni-biyaamu nì ni-naantiibi, ni-maŋfal wiiŋyi kɔkɔ poon.

¹⁰Ní téetí ŋwiin ŋun ni nìn síl̀ ti-Dindaan ni-Nimbɔtiu nimbiin Ooreeb jool caŋinee. Ti-Dindaan nìn tùkū-mi yii: «Kóoǹ samaa nee kɔkɔ kí kpāfì m-cee. M làá yàntī bí gbìl̄ m-nyɔɔbuŋŋi án nín làá ŋá pu bi-wiiŋyi in kɔkɔ bi cáá kí kàl̄ kitiŋ nee puee, bí bīfì kí nīn kíǹ ki fàŋkí-mi ní kí nīn cáa dàkà bi-biyaamuee.»

¹¹Ŋyunti gbantee ní ni sútì ki pìl̄ dijool ki yú di-taapu. Dijool nìn fōō ŋŋmi ní aŋmilimbil nìn yíkí ki jɔ́ḿ kutaa ní atagbambɔn nì dibɔmbɔŋkpaandi nìn māntìi tú-dì.

¹²Ti-Dindaan nìn sòon̄ nì ni ŋŋmee poon. Nneen ŋubɔ nìn sòoǹ ní ni gbìl̀ nneenee pu, ama ní kaa wāĺ ubɔ. Kun kun ni nìn pée gbìl̀ee di sá nneen gbanti[21].

¹³U nìn cántì u-poondi din u pōoǹ-nee taapu ki tùkū-ni, ní ki bí yii ní ŋúb́ marab saalaa bin u síiǹ-nee. U nìn ŋmàn̄ marab gbanti titaŋkpapilindi tili pu[22].

¹⁴Ŋyunti gbanti mbaanti poon ní ti-Dindaan tīī-mi mara yii ḿ dàkà-ni abɔkpaa nì akoobil ŋin ni làá nīn ŋúb́ ni yaa bàn̄ kitiŋ kin ni làá dùtī kí fōō kí nīn kíǹ ki yì nee poonee.

¹⁵Ní nīn nyíǹ ni-ba, di sá yii ŋwiin ŋun ti-Dindaan nìn sòon̄ nì ni ŋŋmi poon Ooreeb jool puee, naa nìn wál̀ báà kujiliŋu kubɔ.

¹⁶Ní taa kɔ́ǹ ni-ba tijɔkɔndi kí cùú nīn māā àá ki kpítí awaa aba kí nántíǹ uninja àá unimpu[23].

¹⁷Ní taa tí kpítí tiba kí nántíǹ tiwaŋkuti tin bí kitiŋ puee àá inoon,

¹⁸kí taa tí kpítí tiba mun ki nántíǹ tin fù kitiŋee àá ijɔm[24].

¹⁹Míǹ mbaantiim ní ní taa wáaǹ kutaa kí kpèè ŋwìiń nì uŋmal nì iŋmalbijaa, an dàkà yii tin kɔkɔ pée bí kutaa puee, kí yàntī tí lábití ni-landɔkɔŋu ní nīn kíǹ ki gbàantí ti-taapu ki jáaḿ-tì. Ti-Dindaan ni-Nimbɔtiu dū atuun gbanti ki tīī anibul ŋin kɔkɔ kíǹ ki bí kitiŋ puee ní.

²⁰Ama nimbee, ti-Dindaan yōoǹ-ni ki nyántìń kipaai ŋmiŋu poon Eejipiti tiŋkin ní nīn kíǹ ki sá nnibool ŋun sá ki tīī-uee, kii ni nín sá pu díǹ ki tīī-u nan ní[25].

²¹Ni-puee, ti-Dindaan gíí m-pu diŋuul ní ki pūtì yii m kpá kí dùtī Jɔɔdan buŋŋu kí kɔ́ kitimmɔntii kin ti-Dindaan ni-Nimbɔtiu làá dūú tīī-ni án kpántí ni-yakee poon[26].

²²Di sá yii m làá kpú kitiŋ kin bí nee poon ní, maa làá ŋmā kí dùtī Jɔɔdan buŋŋu. Ama nimbee, ni làá dùtī-dì kí fōō kitiŋee kí nīn kíǹ ki yì.

²³Míǹ puee ní nīn nyíǹ ni-ba kí taa súntí dipoondi din ti-Dindaan ni-Nimbɔtiu pōoǹ-nee. Ní taa tin nín̄ nāantí awaa ki nántíǹ tiba kii ti-Dindaan ni-Nimbɔtiu nín bí yii ní taa ŋá puee.

²⁴Kun puee ti-Dindaan ni-Nimbɔtiu sá ŋŋmi ŋun wù ki céetée ní. U sá Unimbɔti un cáá ipoompoonee ní[27].

²⁵Ni yaa láa kāl̀ kitiŋ gbanti poon ki yúntì ní ki yaa láa cáá mbiyaamu nì naantiibee, ní taa láa kpítí awaa kí nántíǹ tiba kí kɔ́ǹ ni-ba tijɔkɔndi. Ní taa láa ŋá ikpiti gbanti ti-Dindaan ni-Nimbɔtiu nimbiin kí gbítí u-ŋuul.

²⁶Ama ni yaa ŋá mimmee, ibaamɔn ní m bíi tùkù-ni, kutagbɔŋu nì kitiŋ sá m-seeradambi díǹ yii naa làá pée sūŋkì ní kí kpú kí céetí kitiŋ kin ni làá dùtī Jɔɔdan buŋŋu kí tin kɔ́ nee poon. Naa làá kàl̄ ki-poon kí yúntí báà fiii, di sá yii ni làá kpú ní kí céetí malaa.

²⁷Ti-Dindaan làá dāá yàntī ní yàl̄ kí tin nín̄ bí atimbun aban. Ni-wíiŋŋu làá dāá bàtī ní ní kíń fiii atimbun ŋin poon ti-Dindaan làá dāá jà-ni kí cùnnèe.

²⁸Atimbun gbantinee, ni làá dāá nīn tòotī awaa ŋin ní unil dū u-ŋalii ki máńee, awaa ŋin sá idɔ nì ataŋkpee kaa wāĺaaa, kaa gbìl̀aaa, kaa jīǹ tijinaaa, kaa tíkì nnumee.

²⁹Ntimu gbanti poonee, ni làá dāá nyàab̀ ti-Dindaan ni-Nimbɔtiu. Ni yaa láa nyàab̄-u nì ni-pɔbiliŋ kɔkɔ nì ni-nammu kɔkɔee, ni làá dāá ká-u[28].

³⁰Ni-nimbinaamandi poonee, tin kɔkɔ m sòon̄ nee làá dāá bàń-ni, ní ní dāá fàtīí gítiń ti-Dindaan ni-Nimbɔtiu cee, ní kí nīn kíǹ ki tɔ́-u.

³¹Di sá yii ti-Dindaan ni-Nimbɔtiu sá disaasɔl Nimbɔtiu ní. Waa làá dū-ni kí fá, kaa làá kpɔ̀ kí céetí-ni, kaa làá tí súntí dipoondi din u pūtì ki pōoǹ ni-baabee mun pu.

³²Mimmee Isirayeel yab, naa bàlifī kí béé iyuntikpiki pu níii? Bàlifìmaan ŋyunti ŋun baa nìn dá láá màl̄-nee pu, ŋwiin ŋun Unimbɔti nìn náań unil kitiŋ puee kí cáá sāā díǹ pu. Bàlifìmaan kitiŋ kílilaŋki kí bàlifì ki-kúntilaŋki. Bàlifìmaan kí kpèè yii atuŋkpaan aba gíti ŋá laaba kii ŋi neeee? Ni pée gbìl̄ tiba tì náań nì tin bí nee dalbaaa?

³³Dinibul diba nib gíti bí laaba ki gbìl̄ unimbɔti ubɔ sòon̄ nì bi ŋŋmi poon baa kpíì kii ni nín gbìl̄ pu kaa kpíì neeee?

³⁴Àá unimbɔti ubɔ gíti bí laaba ki mākaǹ ki ŋá maamaacib nì atuŋkpaan nì dikɔ̀ndi nì mpɔŋkpaan tuuŋŋi nì atuun ŋin kɔ̄ntí tifaandee dalba kí nyāntí ditimbundi diba di-juti ŋaan kí gāā u-bindaaa[29]? Too míǹ ní ti-Dindaan ni-Nimbɔtiu ŋá ki nyántì-ni Eejipiti tiŋkin, nimbi ni-ba nimbil ká.

³⁵Ama nimbee, ni cáá diyimɔɔl ki ká an bɔti, án nín làá ŋá pu ní béé yii ti-Dindaan baba di sá Unimbɔti, ní unimbɔti ubɔ kaa ti bí laaba ki kútì úǹ puee[30].

³⁶Doooo yilpu ní u yāntì ni gbìl̄ u-neen pu kí dàkà-ni ní nīn tɔ́-u, ní ki yāntì ni ká ŋŋmikpaan ŋun poon u sòon̄ nì nee kitiŋ pu.

³⁷Di sá yii u nìn néeń ni-naanjab, ní ki lēē nimbi bin sá bi-naantiibee, ki dū u-pɔŋkpaaŋŋu ki nyántìń-ni Eejipiti tiŋkin.

³⁸U làá jà anibul ŋin sá akpaan ki pɔ̄ɔ̄ ki jítiǹ-nee, kí cáá-ni kí kɔ́ǹ bi-timmu poon, ní kí dū ntimuee kí tīī-ni mú kpántí ni-yamu.

³⁹Ní dàkafì tiŋan kí béé díǹ nee yii yilpu yilpu fɔ́ŋŋŋ nì kitiŋ taapuee, ti-Dindaan di sá Unimbɔti, Unimbɔti ubɔ kaa ti bí laaba.

⁴⁰Nín̄ ŋúb́maan u-bɔkpaaŋi nì u-marab bin m tīī-ni díǹ pu neeyee. Ni yaa ŋúb́-bee, án làá bútí ni nì ni-biyaamu mun làá dāá páań ni-boonee. Míǹ ní ni làá kàl̄ kí yúntí kitiŋ kin ti-Dindaan ni-Nimbɔtiu làá dūú tīī-ni jaanjaanee poon.

⁴¹Niinee ní Mooyiisi lēē ntimu muta Jɔɔdan buŋgbandi ŋwìiń nyalaŋki pú ki síiǹ,

⁴²yii ubɔ yaa kaa nyí ní ki kūū u-nabiki, ní an kaa sá nì kináŋee, udaan ń sāǹ kí kɔ́ ntimu gbanti kiba poon. Udaan yaa ŋúń ki sáǹ ki kɔ́ ntimu gbanti kiba poonee, ú ŋmátí[31].

⁴³Ntimuee sɔ̀. Bi nìn lēē Beeseer tiŋki kin bí kuteeu gbantaŋki puee ki tīī Rubeen yab, ní ki lēē Raamooti tiŋki kin bí Galaadee ki tīī Gaadi yab, ní ki lēē Goolan tiŋki kin bí Baasanee ki tīī Manasee yab.

⁴⁴Marab bin Mooyiisi nìn dūu tīī Isirayeel yabee sɔ̀.

⁴⁵Isirayeel yab nín nyáń Eejipiti tiŋkinee, marab nì abɔkpaa nì akoobil ŋin Mooyiisi nìn dūu tīī-bee sèé.

⁴⁶Ŋyunti gbantee, baa nìn dá láá dūtì Jɔɔdan buŋŋu. Bi nìn dá láá bí Beeti-Peewɔɔr tantakal caŋin ní. Dijandi gbanti nìn bí Siiwɔn, Amɔɔr yab bɔtiu un nìn kóò Eesbɔnee tiŋki pu ní. Ubɔti gbanti ní Mooyiisi nì Isirayeel yab nìn jáń ki jíń ŋyunti ŋun bi nyáń Eejipiti tiŋkinee.

⁴⁷Bi nìn jáń ki fōō u-tiŋki ki kpáaǹ Baasan yab bɔtiu Ɔɔgi tiŋki. Bibɔtiibee liitil nìn sá Amɔɔr yab bin nìn bí Jɔɔdan buŋgbandi, ŋwìiń nyalaŋki púee ní.

⁴⁸Kitiŋ kin Isirayeel yab nìn fōōyee nìn dɔ̄ kí yòon̄ Arooweer tiŋki kin bí Arinɔn buŋgbandee kí cáá sāā Siiwɔn jool, an dàkà yii Eermɔn jool.

⁴⁹An nìn kpáaǹ Arabaa tiŋki kin kɔkɔ bí Jɔɔdan jandi ŋwìiń nyalaŋki pú púee, kí cáá sāā Arabaa mɔɔl din dɔ̄ Piisga jool taapuee.