Read Ntcham Deutéronome 5 Bible Online

Deutéronome 5 - Ntcham bible

Deutéronome 5

¹Mooyiisi yíiń Isirayeel yab kɔkɔ ki kpáfì ní ki bí-bi yii: «Pīlifìmaan Isirayeel yab, pīlifìmaan abɔkpaa nì akoobil ŋin m làá dūú sòoǹ kí ŋá ni-tafalin díǹ nee, kí bīfì-ŋi, kí nīn ŋúb́-ŋi, kí nīn ŋáań kii ŋi nín bí yii ní ŋá puee.

²Ti-Dindaan ti-Nimbɔtiu pūtì ki pōoǹ-ti dipoondi Ooreeb jool pu.

³An kaa nìn sá ti-baabi ní ti-Dindaan nìn pūtì ki pōoǹ dipoondi gbanti, ama timbi bin kɔkɔ bí doo díǹ ki bí dimaŋfalin nee ní u nìn pūtì ki pōoǹ dipoondi gbanti.

⁴Ni-nimbiin niin, dijool pu ní ti-Dindaan sòon̄ nì ni ŋŋmi poon.

⁵Ŋyunti gbantee, man nìn sí ni nì ti-Dindaan kansikin ní ki cáá ti-Dindaan nyɔɔbundi ki nàatī-ni, kun puee ni nìn fàŋkí ŋŋmi gbanti kaa nìn kíí kí dàb̄ dijool. Ti-Dindaan nìn lī yii:

⁶«Man di sá a-Dindaan a-Nimbɔtiu un di nyántìń-si kuyuŋun Eejipiti tiŋkinee.

⁷«Á taa jāam̀ unimbɔti ubɔ kí kūtì man pu.

⁸«Á taa mɔ́ɔ́ diwaal diba kí nántíǹ tiba tin bí yilpuee àá tin bí kitiŋ pu taapu dooyee àá tin bí nnyimin kitiŋ taapuee.

⁹Á taa gbàan̄ awaa gbanti nimbiin ní kaa nín jáam̀-ŋi, kun puee mama a-Dindaan a-Nimbɔtiuee, m sá Unimbɔti un cáá ipoompoonee ní. Ubɔ yaa ná-mee, m dátí udaan tafal ní kí dāá dáaĺ u-biyaamu mun tafal kí cáá sāā anaantitɔntɔkɔ ata kii anaa pu.

¹⁰Ama bin néeń-mi ki ŋúb́ m-marabee, m ŋáań-bi tiŋan ní kí cáá sāā anaantitɔntɔkɔ kutuku pu.

¹¹«Á taa nín̄ yíì man a-Dindaan a-Nimbɔtiu yindi fám fám, kun puee man a-Dindaan kaa làá dūú pɔ̄ un ŋáań mimmee.

¹²«Á nīn tɔ́ ŋwiŋŋuŋfikaa ŋú nīn sá circir wiiŋŋu ki tīī-si, kii man a-Dindaan a-Nimbɔtiu nín síiǹ-si á ŋá puee.

¹³A cáá iwiin iluu kí tɔ̄ ditundi, kí ŋá tin kɔkɔ a cáá kí ŋée.

¹⁴Ama ŋwinluluúti dal sá ŋwiŋŋuŋfikaa ní, ŋwiin ŋun a dūu sú man a-Dindaan a-Nimbɔtiuee. Á taa tɔ̄ báà ditundi diba ŋwiin gbanti. Sii a-baaa, a-jipɔmbaaa, a-bisalibaaa, a-tɔntɔnliibi bininjab nì binimpoobaaa, a-naayaaa, a-mammuɔɔɔ, a-waŋkutaaa, binicambi bin kóò a-pueeyaaa, ubɔ ń taa tɔ̄ ditundi. A-tɔntɔnliibi bininjab nì binimpoobi máaǹ kí tɔ̄ bi-ba kí ŋùŋfì kii siiyee ŋwiin gbanti.

¹⁵Á téetí yii a nìn kāl̀ kuyuŋu Eejipiti tiŋkin ní man a-Dindaan a-Nimbɔtiu dū m-pɔŋkpaaŋŋu ki nyántìń-si kitiŋ gbantin. An pu ní man a-Dindaan a-Nimbɔtiu tīī-si mara yii á nīn tɔ́ ŋwiŋŋuŋfikaa.

¹⁶«Á nīn tɔ́ a-baa nì a-na kii man a-Dindaan a-Nimbɔtiu nín síiǹ-si mara yii á ŋá puee. A yaa ŋá mimmee, a làá kàl̄ kitiŋ pu kí yúntí ní an bútí-si kitiŋ kin man a-Dindaan a-Nimbɔtiu làá dūú tīī-see poon.

¹⁷«Á taa kpɔ̀ unil.

¹⁸«Á taa ŋá tilaakpaal.

¹⁹«Á taa yɔ̀.

²⁰«Á taa lēē inyimɔn seerau kí túń a-juti pu.

²¹«Á taa nín̄ cáá a-juti nimpuu pu nnimbitaataam. Á taa nín̄ cáá a-juti diiku àá u-tiŋki àá u-tɔntɔnliu uninja àá unimpu àá u-naau àá u-maŋki àá tin pée sá a-juti wantee pu nnimbitaataam.»

²²An nìn sá ŋŋmi nì ditagbandi nì dibɔmbɔŋkpaandi poon ní ti-Dindaan nìn sòon̄ nì ni-kɔkɔ mpɔn dijool pu ní ki tīī-ni marab nee. Waa nìn gíti kútì tiba an pu. Míǹ boonee ní u ŋmàn̄ marabee titaŋkpapilindi tili pu ní ki dūu tīī-mi.

²³Ŋyunti ŋun ni gbìl̄ nneen sòoǹ dibɔmbɔndi poon dijool mun fōō ŋŋmee ní ni-naakɔti kpilib kɔkɔ nì ni-kpootiliibi sútì ki pìlīń-mi,

²⁴ní ki lī yii: «Kpèè, ti-Dindaan ti-Nimbɔtiu yāntì ti ká u-nyooti nì u nín sá ukpaan miŋyee, ní ki yāntì ti gbìl̄ u-neen mun pu ŋŋmi poon. Díǹ ní ti nín ká yii Unimbɔti ŋūǹ kí sòoǹ nì unil, ní unil gbantee ń taa kpú kí nīn gbíntìi bí dimaŋfalin!

²⁵Kɔŋkɔnnee, ba pu ní tí dū ti-ba kí tīī ŋŋmikpaan nee ń wà-ti tí kpú ní? Ti yaa gbíntìi bíi pílifí ti-Dindaan ti-Nimbɔtiu nín sòoǹ pu ŋŋmikpaan nee poonee, see tí kpú.

²⁶Di sá yii nisaal ulɔu di pée gbìl̄ dimaŋfal Nimbɔtiu neen pu, u sòon̄ ŋŋmi poon kii timbi nín bíi gbìl̀ pu nee ki ŋmátì[32]?

²⁷Míǹ puee, sii sútí kí pìl̄ ti-Dindaan ti-Nimbɔtiu kí pīlifì tin u làá sòoǹee. Míǹ boonee á gítiń kí tùkù-ti tin kɔkɔ ti-Dindaan ti-Nimbɔtiu tùkū-see. Timbi làá pīlifì tin a làá sòoǹee kí ŋá míǹ[33].»

²⁸Ti-Dindaan nìn gbìl̄ tibɔti tin ni nìn sòon̄ m-ceeyee ní ki bí-mi yii: «M gbìl̄ tin kɔkɔ binib nee tùkū-see. Tin kɔkɔ bi lēe, an kítì míǹ.

²⁹Bi-pɔbiliŋ yaa bàà bɔ́ntì kí nīn fàŋkí-mi kí ŋúb́ m-marab kɔkɔ baabadal, án bàà làá nīn ŋān̄ ki tīī bi nì bi-biyaamu kí nīn cáa cá jaanjaan!

³⁰Cùú tùkù-bi yii báà ŋma ń nīn gítí u-tantiun.

³¹Ama siiyee, gbíntí m-cee doo ḿ dū m-marab nì m-bɔkpaaŋi nì m-koobiliŋ kí tīī-si á cáá dàkà-bi, bi yaa bàn̄ kitiŋ kin m làá dūú tīī-bi bí nīn kíǹ ki yèe poonee, bí nīn ŋúb́-bee.»

³²An puee ní nīn nyíǹ ni-ba kí ŋá kii ti-Dindaan ni-Nimbɔtiu nín bí yii ní ŋá puee, kí taa kpòotī kí cù ŋgiil púɔɔɔ, kí taa kpòotī kí cù ŋgan pú.

³³Ní nīn dī nsan ŋun ti-Dindaan ni-Nimbɔtiu cátì ki bíl̀ ni-nimbiinee, án nín làá ŋá pu ní nīn bí dimaŋfalin kí jī nnaam kí kàl̄ kitiŋ kin ni làá fōō kí nīn kíǹ ki yèe poon kí yúntée.