Read Ntcham Deutéronome 6 Bible Online

Deutéronome 6 - Ntcham bible

Deutéronome 6

¹Marab nì abɔkpaa nì akoobil ŋin ti-Dindaan ni-Nimbɔtiu tīī-mi ḿ dūú dàkà-ni ni yaa láa dūtì Jɔɔdan buŋŋu ki fōō kitiŋ ki kíǹ ki yèe, ní nīn ŋúb́ ki ŋáań kii bi nín bí yii ní ŋá puee dee.

²Án nín làá ŋá pu ní nimbi nì ni-jipɔmbi nì ni-naantiibi ń dāá fàŋkì ti-Dindaan ni-Nimbɔtiu kí nīn tɔ́ u-bɔkpaaŋi kɔkɔ nì u-marab bin m tīī-ni nee iwiin in kɔkɔ ni cáá kí kàl̄ kitiŋ puee. Míǹ ní ni-maŋfal wiiŋyi làá fɔ̀kɔn̄.

³An puee, Isirayeel yab, pīlifìmaan marab gbanti kí nīn tɔ́-bi, kí ŋá bi nín bí yii ní ŋá puee. Ni yaa ŋá mimmee, án làá bútí-ni, ní ní bùtī tikpil kitiŋ kin poon nnaabiim nì tisiil[34] còol̄ee, kii ti-Dindaan ni-baabi Nimbɔtiu nín pōoǹ-ni puee.

⁴Pīlifìmaan Isirayeel yab, ti-Dindaan di sá ti-Nimbɔtiu, ti-Dindaan sá ubaanti ní[35].

⁵Á nīn néeń ti-Dindaan a-Nimbɔtiu nì a-pɔbil kɔkɔ nì a-naŋki kɔkɔ nì a-pɔŋŋu kɔkɔ[36].

⁶Á dū marab bin m tīī-si díǹ nee kí kpāafì a-pɔbilin.

⁷Á dū-bi kí cóoĺ a-biyaamu. A yaa kā a-dumpuɔɔɔ, a yaa tàkā nsan pu ki còom̄ ki cáaa, a yaa tí dɔ̄ɔɔ, a yaa tí yúɔɔɔ, bí nīn kā a-nyɔkɔn.

⁸Á ŋmà-bi kí dūú fìn̄ a-ŋal nì a-yigbeel án nīn sá-si kudaaŋŋu.

⁹Á ŋmà-bi kí nákań a-punyɔmmu pu nì a-tiŋki punuubi pu[37].

¹⁰Ti-Dindaan ni-Nimbɔtiu làá dāá cáá-ni kí kɔ́ǹ kitiŋ kin ní u nìn pūtì ki pōoǹ ni-naanjab Abraam nì Isaaki nì Jaakɔb[38] yii u làá dūú tīī-nee poon. Kitiŋ gbanti cáá ntimu mun sá ŋkpaamu ki ŋān̄ naa máńee.

¹¹Kitiŋ gbanti gíti cáá adiin ŋin poon naa síiǹ tiba ama ní tigaajawan kɔkɔ nì ti-bulifi gbée, lɔkɔb bin naa gbìn̄ee, fiinyi nì ɔliifi sufii in naa cóoǹee kɔkɔ bí niin. Ni làá dāá jī ní kí díkí.

¹²Ama ní nīn nyíǹ ni-ba kí taa súntí ti-Dindaan un nyántìń-ni Eejipiti tiŋki kin poon ni nìn sá iyumbuee pu.

¹³Nín̄ fàŋkímaan ti-Dindaan ni-Nimbɔtiu. Úǹ baba ní ni máaǹ kí jāam̀[39], ní úǹ baba yindi mun ní ni máaǹ kí pùtī.

¹⁴Ní taa tòotī awaa ŋin anibul ŋin māntìi tú-nee tòotēe.

¹⁵Kun puee ti-Dindaan ni-Nimbɔtiu un bí ni-kansikinee sá ipoompoon Nimbɔtiu ní. Ni yaa ŋá mimmee, see ú gíí ni-pu diŋuul kí kpɔ̀ kí céetí-ni kitiŋ pu.

¹⁶Ní taa cɔ̄ŋkì ti-Dindaan ni-Nimbɔtiu kii ni nín nìn cɔ́ŋkì-u Maasa[40] puee.

¹⁷Nín̄ ŋúb́maan ti-Dindaan ni-Nimbɔtiu marab nì u-bɔkpaaŋi nì u-koobiliŋ ŋin u tīī-nee tiŋan.

¹⁸Nimbee, ŋámaan tin kítì ki ŋān̄ ti-Dindaan nimbiinee. Ni yaa ŋá mimmee, ní an bútí-ni ní ní ŋmā kí fōō kitimmɔntii kin u pōoǹ kí tīī ni-naanjabee kí nīn kíǹ ki yì.

¹⁹Ni làá jà ni-nannanliibi kii ti-Dindaan nín lī puee.

²⁰Fool boon, ni-biyaamu yaa láa bālifì-ni yii: «Ba pu ní ti-Dindaan ti-Nimbɔtiu tīī-ni abɔkpaa nì akoobil nì marab nee dee?»

²¹Ní dāá kíí-bi yii: «Ti nìn sá iyumbu ní Faaroo ŋaan Eejipiti tiŋkin, ní ti-Dindaan dū mpɔŋkpaan ki nyántìń-ti niin.

²²Ti-nimbiin niin ní ti-Dindaan dàkā Faaroo nì u-dicaŋku nì u-nib kɔkɔ u-daanti nì u-tuŋkpaaŋŋi, ní ki kɔ́ǹ-bi digìŋ́kpaandin.

²³Ama ní timbee, u nyántìń-ti niin ki cáań-ti doo ki dū kitiŋ kin u nìn pōoǹ kí tīī ti-naanjabee ki tīī-ti.

²⁴Ti-Dindaan nìn kpáafì-ti yii tí nīn tɔ́ u-bɔkpaaŋi kí nīn fàŋkí úǹ ti-Dindaan ti-Nimbɔtiu ní án bútí-ti tikɔkɔ poon, ní tí nīn bí dimaŋfalin kii an nín bí pu ki tīī-ti díǹ pu nee.

²⁵Tin ti máaǹ kí ŋá ní kí nīn kítì ti-Dindaan ti-Nimbɔtiu nimbiinee di sá tí nīn ŋúb́ marab nee kɔkɔ, kí ŋá kii bi nín bí yii tí ŋá puee.»