Read Ntcham Deutéronome 9 Bible Online

Deutéronome 9 - Ntcham bible

Deutéronome 9

¹Isirayeel yab, Pīlifìmaan! Ni làá dùtī Jɔɔdan buŋŋu dee. Ni làá cù kí já nì anibul ŋin sá akpaan ki jítiǹ-ni ki pɔ̄ɔǹ-nee nib ní kí fōō bi-timmu mun sá ŋkpaamu bi máń agun ki māntìi tú an fɔ̀kɔ̀ ki tin tūū kutaayee.

²Ni làá jà Anaaki yab tinikpaandi nì tinifɔkɔl bin kóò niinee. Nimbi ni-ba nyí-bi ní ki gbìl̄ bi sòon̄ bi-pu yii: «Ŋma di ŋūǹ kí sīĺ Anaaki yab nimbiin dee[47]?»

³Ama béémaan díǹ yii ti-Dindaan ni-Nimbɔtiu u-ba di līī ni-nyɔkɔpu kii ŋŋmi ŋun wù ki céetí tikɔkɔee. Úǹ di làá nàan̄-bi ní kí dū-bi kí ŋá ni-ŋaan ní ní jà-bi kí nyāntí bi-tiŋki pu, ní kí kpɔ̀ kí céetí-bi malaa kii ti-Dindaan nín nìn pōoǹ-ni puee.

⁴Ama ti-Dindaan ni-Nimbɔtiu yaa láa jìn̄-bi ki dū bi-tiŋki ki tīī-nee, ní taa láa lì yii: «An sá ti nín bí deedeeyee pu ní ti-Dindaan cáań-ti tí fōō kitiŋ nee kí nīn kíǹ ki yì.» Aayee, an kaa sá ni nín bí deedeeyee pu, ama an sá anibul nee kpitii pu ní ti-Dindaan làá jà-bi kí fōō bi-tiŋki kí tīī-ni.

⁵An puee, an kaa baasii sá yii ni bí deedee àá ni-baamɔŋyi pu ní ni làá fōō bi-tiŋki kí nīn kíǹ ki yì. Ama an sá anibul gbanti kpitii pu ní ti-Dindaan ni-Nimbɔtiu làá jà-bi kí fōō bi-tiŋki kí tīī-ni. U làá ŋá kii u nín nìn pōoǹ ni-naanjab Abraam nì Isaaki nì Jaakɔbee puee ní.

⁶Míǹ puee, ní béémaan yii an kaa sá ni nín bí deedee fiii gba puee pu ní ti-Dindaan ni-Nimbɔtiu làá fōō kitimmɔntii nee kí tīī-ni ní nīn yì. Ibaamɔn poonee, ni sá dinibul din pɔbil tīlifèe ní.

⁷Ní téetímaan tibɔti nee kí taa súntí-tì dalba dalba ni nín kɔ́ǹ ti-Dindaan ni-Nimbɔtiu diŋuul kuteeun puee. Kí yòon̄ ŋwiin ŋun ní ni nyáń Eejipitee kí cáá sāā ŋyunti ŋun ni bāań laakin ni bí neeyee, ni pée bí ní ki jáà nì Unimbɔti kaa gbèentí.

⁸Ooreeb jool puee, ni nìn tí gbítì ti-Dindaan ŋuul ní ki yāntì u gíí diŋuul tikpil áli u bàà nìn là kí kpɔ̀ kí céetí-ni.

⁹M nìn jɔ́m̀ dijool pu kí fōoń titaŋkpapilindi tin pu ti-Dindaan nìn ŋmàn̄ mpèé ŋun u nìn yóoǹ ni nì u kansikinee marab. M nìn ŋá dijool pu niin iwiin imuŋku ili ŋwiimpu nì kunyeeu, kaa jíń tibaaa, kaa nyùn̄ tiba mun[48].

¹⁰Ti-Dindaan nìn dū titaŋkpapilindi tili tin pu u nìn dū úǹ u-ba ŋal ki ŋmàn̄ee ki tīī-mi. Tipilindi gbanti pu ní marab bin kɔkɔ ti-Dindaan nìn dūu tīī-ni dijool pu, ŋŋmi poon, ŋyunti ŋun ni nìn kóoǹ ki kpáfì dijool taapuee nìn kā.

¹¹Iwiin imuŋku ili kúntidalee ní ti-Dindaan dū dipoondi taŋkpapilinti tili gbanti ki dūu tīī-mi.

¹²Míǹ boonee ní ti-Dindaan bí-mi yii: «Yīkì m-cee doo kí kpákatí malaa, kun puee dinibul din a nyántìń Eejipiti tiŋkinee kɔ́ tijɔkɔndin. Binibee kaa tāaǹ kí fàtī bi-boon kí tīī m-marab bin m tīī-bee. Bi dūntì tikúti ki dūu mɔ́ɔ́ diwaal.»

¹³Niinee ní ti-Dindaan gíti bí-mi yii: «M nín kpēē dinibul neeyee, m ká yii di-pɔbil lafun gbìfì.

¹⁴Pée yàntī-mi ḿ kpɔ̀ kí céetí-bi bí taa ti pée gbìl̄ bi-pu kitiŋ pu. Ama siiyee, m làá dī sii pu kí náań ditimbundi din cáá mpɔn ki wīikí ki jítiǹ-bee ní.»

¹⁵Niinee ní m kíĺ nsan ki nín kpákatiń dijool pu. Ŋŋmi nìn dá láá bí dijool gbanti pu. M nìn ŋúb́ dipoondi taŋkpapilinti tilee m-ŋaan.

¹⁶M kpēēyee ki lafun ká yii ni yīntiǹ ti-Dindaan ni-Nimbɔtiu. Ni nìn dūntì tikúti ki dūu mɔ́ɔ́ diwaal ki nántiǹ dinabil. Naa nìn pée tāaǹ ki fātì ni-boon ki tīī ti-Dindaan marab bin u tīī-nee.

¹⁷An pu ní m nìn dū titaŋkpapilindi tili tin m nìn ŋúb́ee ki yá kitiŋ ní ki gbáń ki wīī-ŋi ni-nimbiin niin[49].

¹⁸Míǹ boonee ní m tātìi dōoǹ dicincibil ti-Dindaan nimbiin, ki ŋá iwiin imuŋku ili ŋwiimpu nì kunyeeu, kii mpeepeekaam m nín nìn tí ŋá puee, kaa jíń tijinaaa, kaa nyùn̄ nnyim mun. M ŋá míǹ di sá ni nìn yīntiǹ ti-Dindaan ki ŋá min kaa kítì u-ceeyee ki gbítì u-ŋuul.

¹⁹M nìn fāŋkì diŋuul din ti-Dindaan nìn gíí ni-puee. U-ŋuulee nìn pɔ̄ɔ̄ tikpil áli gba u nìn là kí kpɔ̀ kí céetí-ni. Ama min bí nee muee, ti-Dindaan nìn tí pílifiǹ-mi ki fōō m-wimmeem.

²⁰Ti-Dindaan nìn gíí Aarɔn mun pu diŋuul ki nìn là kí kpɔ̀-u. Niinee ní m mēē Aarɔn mun pu.

²¹M nìn yōoǹ ikpiti in ni ŋée tundi, an dàkà yii dinabilee, ki tɔ́ ŋŋmin, ní ki gbáń ki mátì-dì ki nàn̄-dì dúsi dusi kii ntamee, ní ki dū ntamee ki sītì mbun ŋun nyēeń dijool pu ki pùub̀ ki sìntēe poon.

²²Ni nìn tí yāntì ti-Dindaan gíí diŋuul Tabeera nì Maasa nì Kiibirooti-Taafa timmun[50] mun.

²³Míǹ mbaantiim ní Kadeesi-Baarneeya[51], ŋyunti ŋun ti-Dindaan nìn tú-ni ki lī yii: «Cùmaan kí fōō kitiŋ kin ní m dūu tīī-nee», ni nìn ŋá ntafapɔn kaa nìn fātìi tɔ́ ti-Dindaan ni-Nimbɔtiu nyɔɔbundi. Naa nìn cáá u-pu dimákal ní kaa nìn dū tin u sòon̄ee ki túń ditundi.

²⁴Doooo ŋwiin ŋun m béè-nee, ni pée sá bin jáà nì ti-Dindaanee ní.

²⁵Ti-Dindaan nìn bíikì ki lī yii u làá kpɔ̀ kí céetí-ni. An di yì-tì ní m nìn tātìi dōoǹ dicincibil ti-Dindaan nimbiin ki ŋá iwiin imuŋku ili ŋwiimpu nì kunyeeu.

²⁶M nìn mēē ti-Dindaan yii: «M-Dindaan Unimbɔti, taa kpɔ̀ kí céetí a-nibul nee. Sii di yì-bi ní ki dū a-pɔŋkpaaŋŋu nì a-ŋal pɔfiŋu ki fīī-bi ki nyántìń Eejipiti tiŋkin.

²⁷Téetí a-tɔntɔnliibi Abraam nì Isaaki nì Jaakɔb pu. Taa kpèè binib nee pɔɔpɔŋŋu nì bi-toonam nì bi-kpitii pu kí lì yii a làá ŋá-bi tiba.

²⁸Á taa yàntī kitiŋ kin poon a nyántìń-tee nib ń lì yii: <Bi-Dindaan kaa nìn pée ŋūǹ kí cáá-bi kí kɔ́ǹ kitiŋ kin u nìn pōoǹ kí tīī-bee ni,> àá kí gíti lì yii: <Waa nìn pée néeń-bee pu ní u nyántì-bi Eejipiti tiŋkin kí cáá-bi kí kpɔ̀ kuteeu pu.>

²⁹Ti-Dindaan, bi sá a-nib ní. Sii di yì-bi ní ki dū a-pɔŋkpaaŋŋu nì a-ŋal pɔfiŋu ki nyántìń-bi Eejipiti tiŋkin!»